Magdiretso sa kaundan

Magdiretso sa listahan sang kaundan

Relihion—Ano ang Kapuslanan Sini?

Relihion—Ano ang Kapuslanan Sini?

 Relihion—Ano ang Kapuslanan Sini?

“MAHIMO ako mangin maayo nga tawo bisan indi ako relihioso!” Amo sini ang kinaandan nga ginabatyag sang mga tawo. Madamo sing bunayag, mainawaon, kag responsable nga mga tawo ang indi interesado sa relihion. Halimbawa, pila lang sa mga taga-Katundan nga Europa ang tayuyon nga nagasimba, apang ang kalabanan sa ila nagasiling nga nagapati sa Dios. * Bisan sa Latin Amerika, mga 15 tubtob 20 porsiento lamang nga mga Katoliko ang tayuyon nga nagasimba.

Kaangay sa madamo pa nga iban, ayhan nagapati ka nga wala sing kaangtanan ang relihion sa maayo nga pagkabuhi. Apang, mahimo nga natalupangdan mo man nga sang nagligad nga mga dekada, sa panahon sang imo mga lolo kag lola, mas relihioso ang kalabanan nga mga tawo sangsa karon. Ngaa nadula ang interes sa relihion karon? Mahimo bala mangin maayo ang isa ka tawo bisan pa indi sia relihioso? May relihion bala nga makahatag sa imo sing kaayuhan?

Kon Ngaa Madamo ang Nagsikway sa Relihion

Sa sulod sang mga siglo, ang kalabanan nga mga tawo sa Cristiandad nagapati nga ginapangayo sang Dios ang pagkamatinumanon. Nagasimba sila agod kahamut-an sang Dios, paagi man ini sa mga rituwal nga ginahimo sang pari ukon paagi sa panuytoy sang manugwali. Siempre pa, madamo ang nakatalupangod sang pagkasalimpapaw sang relihion. Bantog gid ang papel sang relihion sa inaway, subong man ang abusado nga paggawi sang mga klerigo. Apang madamo nga tawo ang nagapati nga ang relihion mismo maayo. Naluyagan sang iban ang tanhaga, ang tradisyon, kag ang musika; napahulag pa gani ang iban sa pamahog sang dayon nga pag-antos sa kalayuhon nga impierno, panudlo nga wala sa Kasulatan. Sang ulihi, bangod sang pila ka pag-uswag sa ihibalo nagbag-o ang pagtamod sang madamo nga tawo sa relihion.

Nangin lapnag ang teoriya sang ebolusyon. Ang iban nakumbinse nga nagtuhaw sing aksidente ang kabuhi—nga wala ini gintuga sang Dios. Ang kalabanan nga relihion napaslawan sa paghatag sing makapakumbinsi nga pamatuod nga ang Dios amo ang Tuburan sang kabuhi. (Salmo 36:9) Dugang pa, nagapati ang mga tawo nga ang bisan ano nga problema mahimo masolbar sang siensia bangod sang pag-uswag sang teknolohiya, daku nga hinimuan sa medisina, transportasyon, kag komunikasyon. Subong man, ginapatihan nga makahatag sing mas maayo nga giya ang mga social scientist kag mga sikologo sangsa mga relihion. Sa bahin naman sang relihion, napaslawan sila sa pagpakita sing makapakumbinsi nga pamatuod nga ang pagsunod sa kasuguan sang Dios amo ang pinakamaayo nga pamaagi sang pagkabuhi.—Santiago 1:25.

Bangod sini, ginbag-o sang madamo nga relihion ang ila ginatudlo. Ang mga pari kag mga manugwali wala na nagatudlo nga ginapangayo sang Dios ang pagkamatinumanon. Sa baylo, ginatudlo sang madamo nga ang tagsa ka tawo amo na ang magadesisyon para sa iya kaugalingon kon ano ang husto kag sayop. Agod mangin popular, ang pila ka lider sang relihion nagsiling nga ginakahamut-an ka sang Dios bisan ano man ang estilo sang imo pagkabuhi. Ini nga panudlo nagapahanumdom sa aton sa gintagna sang Biblia: “Magaabot ang isa ka hut-ong sang tion nga indi nila pagbatason ang  makapapagros nga panudlo, kundi, nahisanto sa ila kaugalingon nga mga handum, magatipon sila sing mga manunudlo para sa ila kaugalingon agod pakalamon ang ila mga dulunggan.”—2 Timoteo 4:3.

Ini nga panudlo wala gid nagaganyat sa mga tawo. Kinaandan sila nga nagapalibog: ‘Kon ang relihion nagaduhaduha sa gahom sang Dios sa pagpanuga kag sa kaalam sang Dios sa pagbalay sang mga kasuguan, ano pa ang pulos sang pagsimba? Ngaa tudluan ko pa gid abi sang relihion ang akon kabataan?’ Para sa mga indibiduwal nga nagatinguha lamang nga magkabuhi sing maayo, indi na importante ang relihion. Wala na sila nagasimba, kag wala na nila ginasapak ang relihion. Ngaa ang butang nga dapat maghatag sing kaayuhan nangin wala na sing pulos? Ang Biblia nagahatag sing makapakumbinsi nga sabat.

Ginagamit ang Relihion sa Malain nga mga Tinutuyo

Ginpaandaman ni apostol Pablo ang mga Cristiano sang una nga gamiton sang pila ang Cristianismo sa malain nga mga tinutuyo. Nagsiling sia: “Magasulod ang mapiguson nga mga lobo sa tunga ninyo kag indi makig-angot sing mapinalanggaon sa panong, kag gikan sa inyo mismo may mga tawo nga magalutaw kag magapamulong sing tiko nga mga butang agod ipahilayo ang mga disipulo kag pasundon sa ila.” (Binuhatan 20:29, 30) Ang isa nga nagpamulong sing “tiko nga mga butang” amo ang Romano Katoliko nga teologo nga si Augustine. Gintudluan ni Jesus ang iya mga sumulunod nga kumbinsihon ang iban paagi sa pagpangatarungan gikan sa Kasulatan. Apang, ginpatiko ni Augustine ang kahulugan sang ginsiling ni Jesus nga narekord sa Lucas 14:23, nga “Pilita sila sa pagkari,” sa pagsiling nga husto ang pagpilit sa mga tawo agod makumbertir sila. (Mateo 28:19, 20; Binuhatan 28:23, 24) Gingamit ni Augustine ang relihion sa pagkontrol sa mga tawo.

Si Satanas, ang rebelyuso nga anghel, amo ang yara sa likod sining kasaypanan kag kagarukan sa relihion. Gin-impluwensiahan niya ang relihioso nga mga tawo sang unang siglo agod dagtaan ang Cristiano nga mga kongregasyon. Nagsiling ang Biblia tuhoy sa sini nga mga tawo: “Ini nga mga tawo butig nga mga apostoles, malimbungon nga mga manugpangabudlay, nga ginahimo ang ila kaugalingon nga mga apostoles ni Cristo. Kag indi ini katingalahan, kay si Satanas mismo padayon nga nagahimo sang iya kaugalingon nga anghel sang kapawa. Gani indi ini daku nga butang kon ang iya mga ministro padayon man nga nagahimo sang ila kaugalingon nga mga ministro sang pagkamatarong.”—2 Corinto 11:13-15.

Ginagamit gihapon ni Satanas ang relihion agod magpakunokuno nga Cristiano, nga husto, kag nagahatag kuno sing kapawa agod nga ang mga tawo magsunod sa iya mga talaksan sa baylo nga sa Dios. (Lucas 4:5-7) Mahimo nga natalupangdan mo nga madamo sang mga klerigo karon ang nagagamit sang relihion agod nga pataason ang ila mga kaugalingon paagi sa matinaastaason nga mga titulo kag agod nga makakuarta gikan sa ila mga panong. Ginagamit man sang mga panguluhan ang relihion agod nga kumbinsihon ang mga banwahanon nga isakripisyo ang ila kaugalingon sa inaway.

Lapnag nga ginagamit sang Yawa ang relihion sangsa ginahunahuna sang kalabanan nga tawo. Ayhan abi mo ang pila lang ka relihioso nga mga ekstremista ang ginagamit ni Satanas para sa iya mga intereses. Apang suno sa Biblia, “ang isa nga gintawag Yawa kag Satanas . . . nagapatalang sa bug-os napuy-an nga duta.” Nagsiling man ang Biblia: “Ang bug-os nga kalibutan yara sa gahom sang isa nga  malauton.” (Bugna 12:9; 1 Juan 5:19) Ano ang pagtamod sang Dios sa relihion nga ginagamit sang relihioso kag politikal nga mga lider nga luyag lamang pasundon ang mga tawo sa ila?

“Ano Gid Bala ang Labot Ko?”

Kon nakibot ka sa paggawi sang pila ka relihion sa Cristiandad, dumduma nga ginakangil-aran gid sila sang Labing Gamhanan nga Dios. Nagapangangkon ang Cristiandad nga may katipan sila sa Dios; amo man sini ang ginapangangkon sang mga Israelinhon sang una. Ining duha napamatud-an nga nangin di-matutom. Busa, ang pagpakamalaut ni Jehova sa Israel ipadapat man sa Cristiandad karon. Nagsiling si Jehova: “Wala sila namati sa akon mga pulong kag ginsikway ang akon kasuguan. Ano gid bala ang labot ko sa incienso nga naggikan sa Sheba? . . . Ang inyo mga halad wala nagpahamuot sa akon.” (Jeremias 6:19, 20, New International Version) Wala ginabaton sang Dios ang pagsimba sang mga salimpapaw. Indi sia interesado sa ila mga rituwal kag mga pangamuyo. Ginsilingan niya ang Israel: “Ang inyo pinat-od nga mga piesta ginadumtan sang akon kalag. Nangin lulan ini sa akon; ginalapyo na ako sa pagbatas sini. Kag kon ginauntay ninyo ang inyo mga palad, ginalipnan ko ang akon mga mata gikan sa inyo. Bisan pa maghimo kamo sing madamo nga pangamuyo, wala ako nagapamati.”—Isaias 1:14, 15.

Nahamuot bala si Jehova sa mga piesta nga ginapresentar sang mga relihion subong Cristiano apang orihinal nga nagapadungog sa butig nga mga dios? Ginapamatian bala niya ang pangamuyo sang mga klerigo nga nagapatiko sang mga panudlo ni Cristo? Ginakahamut-an bala sang Dios ang bisan ano nga relihion nga nagasikway sa iya kasuguan? Makapat-od ka nga ang iya pagtamod sa mga rituwal sang relihion karon pareho man sa iya pagtamod sa mga halad sang mga Israelinhon sang una, sang sia nagsiling: “Ano gid bala ang labot ko?”

Apang, ginatalupangod gid ni Jehova ang pagsimba sang sinsero nga mga tawo paagi sa kamatuoran. Nalipay gid ang Dios kon ang mga tawo magapabutyag sang ila pagpasalamat sa tanan nga ila nabaton gikan sa iya. (Malaquias 3:16, 17) Busa mahimo ka bala mangin maayo nga tawo bisan wala ka nagasimba sa Dios? Ang isa ka tawo nga wala sing ginahimo nga bisan ano para sa iya mahigugmaon nga mga ginikanan indi gid makapamatuod nga maayo sia nga tawo, indi bala? Maayo bala nga tawo ang isa bisan wala sia sing ginahimo para sa Dios? Sing makatarunganon, dapat mangin interesado gid kita sa matuod nga Dios, nga amo ang ginhalinan sang kabuhi. Sa masunod nga artikulo, binagbinagon naton kon paano ang matuod nga pagsimba wala lamang nagapadungog sa Dios kundi nagahatag man sing kaayuhan sa aton.

[Nota]

^ par. 2 “Sa madamo nga pungsod, nagsugod sang katuigan 1960 . . . ang pagkalusod sang relihioso nga kultura sa kabug-usan.”—The Decline of Christendom in Western Europe, 1750-2000.

[Retrato sa pahina 4]

Ginatudlo bala sang relihion ang pamatuod nga gintuga sang Dios ang tanan nga butang?

[Retrato sa pahina 5]

Dapat bala makita sa sini nga danyag ang tiglawas sang Dios?

[Retrato sa pahina 5]

Paano ginatamod sang Dios ini nga sahi sang kapiestahan?

[Credit Line]

AP Photo/Georgy Abdaladze