Ang Pagsimba nga Mapuslanon Para sa Imo

“ANG pagpalapit sa Dios maayo para sa akon,” siling ni salmista Asaf. Ginhunahuna niya anay nga maayo ilugon ang mga tawo nga wala nagasapak sa Dios kag nagatinguha sang kasulhayan sa kabuhi. Apang ginbinagbinag ni Asaf ang mga bentaha sang pagpakigsuod sa Dios kag naghinakop nga maayo ini para sa iya. (Salmo 73:2, 3, 12, 28) Maayo bala para sa imo ang matuod nga pagsimba karon? Paano ka makabenepisyo sa sini?

Ang pagsimba sa matuod nga Dios magabulig sa imo nga maghunahuna sing labaw pa sangsa maiyaiyahon lamang nga estilo sang pagkabuhi. Bangod sa pagkahuman sa aton sang “Dios sang gugma,” ang mga nagatinguha sang ila kaugalingon nga mga interes lamang indi gid magmalipayon. (2 Corinto 13:11) Gintudlo ni Jesus ang panguna nga kamatuoran tuhoy sa kinaugali sang tawo sang nagsiling sia: “May kapin nga kalipay sa paghatag sangsa pagbaton.” (Binuhatan 20:35) Amo kon ngaa nalipay gid kita maghimo sing mga butang para sa aton mga abyan kag pamilya. Apang ang labing daku nga kalipay nagagikan sa paghimo sang kabubut-on sang Dios. Labaw sa kay bisan sin-o, sia ang labing takus nga higugmaon naton. Minilyon ka tawo nga may nanuhaytuhay nga ginhalinan ang nakasapo nga makaalayaw gid ang pagsimba sa Dios paagi sa paghimo sang iya mga ginapangabay.—1 Juan 5:3.

May Katuyuan nga Kabuhi

Ang matuod nga pagsimba mapuslanon man sa imo bangod nagahatag ini sa imo sing katuyuan sa kabuhi. Natalupangdan mo bala nga sa masami naangot ang kalipay sa pagbatyag nga may nahimo kita nga mga butang nga mapuslanon? Ang kalabanan nga tawo may tulumuron sa kabuhi, may kaangtanan man ini sa ila pamilya, mga abyan, negosyo, ukon kalingawan. Bangod sang pagkawalay kapat-uran sang kabuhi, ini nga mga butang masami nga napaslawan sa pagpahalipay sa ila. (Manugwali 9:11) Apang, ang matuod nga pagsimba makabulig sa aton nga masapwan ang isa ka mas mataas nga katuyuan, isa nga nagapabilin nga makaalayaw bisan pa makapalaslaw ang iban nga bahin sang kabuhi.

Ang matuod nga pagsimba nagadalahig sa pagkilala kay Jehova kag sa pag-alagad sa iya sing matutom. Yadtong nagahimo sini nagasuod gid sa Dios. (Manugwali 12:13; Juan 4:23; Santiago 4:8) Ayhan daw indi mo mahanduraw nga posible nga makilala mo sing maayo ang Dios kag mangin abyan sia. Apang paagi sa pagpamalandong sa mga rekord sang iya pagpakig-angot sa mga tawo kag paagi sa pagbinagbinag sa iya mga tinuga, mahimo mo mahibaluan ang mga aspekto sang iya personalidad. (Roma 1:20) Dugang pa, paagi sa pagbasa sang Pulong sang Dios, mahangpan mo kon ngaa yari kita diri, kon ngaa gintugutan sang Dios ang pag-antos kag, ayhan ang labing makawiwili sa tanan, amo nga mahibaluan mo kon paano ka makahimo sing isa ka importante nga papel sa mga katuyuan sang Dios. (Isaias 43:10; 1 Corinto 3:9) Ini nga paghangop makahatag sa imo sing bag-o nga rason sa pagkabuhi!

Mangin Mas Maayo nga Tawo

Ang matuod nga relihion mapuslanon sa imo bangod magabulig ini sa imo nga mangin mas maayo nga tawo. Samtang ginabuhat mo ang matuod nga pagsimba, mapalambo mo ang isa ka personalidad nga nagaresulta sa mas malipayon nga kaangtanan sa iban. Matun-an mo gikan sa Dios kag sa iya Anak ang tuhoy sa pagkabunayag, paghambal sing mainayuhon, kag pagkabuhi sing responsable. (Efeso 4:20–5:5) Kon makilala mo sing maayo ang Dios kag matun-an sia nga higugmaon, mapahulag ka nga ilugon sia. Nagsiling ang Biblia: “Mangin mga manug-ilog kamo sang Dios, subong nga mga anak nga hinigugma, kag padayon kamo nga maglakat sa gugma.”—Efeso 5:1, 2.

Indi bala makalilipay nga mapalibutan kita sang mga tawo nga nagailog sa gugma sang Dios? Sing makalilipay, ang pagsimba sa matuod nga Dios  indi hilikuton nga nagaisahanon ka lang. Nagapasuod ini sa imo sa iban nga nagahigugma man sa husto kag maayo. Siempre pa, mahimo nga mamag-o ka sa ideya sang pagsimba upod sa isa ka organisado nga relihion. Apang, subong sang aton nabasa sa una nga artikulo, ang problema sa kalabanan nga relihion indi amo ang ila pagkaorganisado, kundi, nga naorganisar sila sa sayop nga dalanon kag sa sayop nga mga tulumuron. Madamo nga organisado nga mga relihion ang may mga tulumuron nga indi iya sang mga Cristiano. Ang katawhan sang Dios gin-organisar mismo ni Jehova para sa isa ka dungganon nga katuyuan. Nagsiling ang Biblia: “Ang Dios isa ka Dios, indi sang kagamo, kundi sang paghidait.” (1 Corinto 14:33) Kaangay sang minilyon, mahimo masapwan mo nga ang pagpakig-upod sa isa ka organisado nga hubon sang mga Cristiano may maayo nga impluwensia sa imo mga pagtamod.

Paglaum sa Palaabuton

Ginapakita sang Balaan nga Kasulatan nga ginaorganisar sang Dios ang matuod nga mga sumilimba agod makalampuwas sila sa katapusan sang sistema sang mga butang karon kag makapanubli sang bag-ong duta nga sa sini “magapuyo ang pagkamatarong.” (2 Pedro 3:13; Bugna 7:9-17) Kon amo, ang mapuslanon nga pagsimba nagahatag sa imo sing paglaum, nga kinahanglanon gid para sa kalipay. Ang iban nagasalig sang ila palaabuton sa kalig-unan sang mga gobierno, sa matin-ad nga negosyo, ukon sa maayong panglawas kag sa makaalayaw nga pagretiro. Apang pila lamang sa sining mga butang ang nagahatag sang masaligan nga basihan para sa malipayon nga palaabuton. Sa pihak nga bahin, nagsulat si apostol Pablo: “Ginapahamtang namon ang amon paglaum sa buhi nga Dios.”—1 Timoteo 4:10.

Kon maid-id ka nga magpangusisa, masapwan mo ang matuod nga mga sumilimba. Sa sining nabahinbahin nga kalibutan karon, kilala gid ang mga Saksi ni Jehova bangod sang ila gugma kag paghiusa. Naggikan sila sa halos tanan nga pungsod kag gindak-an; apang, ginahiusa sila sang ila gugma sa isa kag isa kag kay Jehova. (Juan 13:35) Ginaagda nila ikaw nga tukibon kon ano ang ila mga eksperiensia. Si Asaf nagsulat: “Ang pagpalapit sa Dios maayo para sa akon.”—Salmo 73:28.

[Retrato sa pahina 7]

Mahimo ka mangin abyan sang Dios