Si Job​—Isa ka Tawo sang Pagbatas kag Integridad

“Natalupangdan mo bala ang akon alagad nga si Job, nga wala sing kaangay sa iya sa duta, tawo nga wala sing kasawayan kag matarong, nga mahadlukon sa Dios kag nagalikaw sa malaut?”—JOB 1:8.

1, 2. (a) Anong wala ginapaabot nga trahedya ang naeksperiensiahan ni Job? (b) Ilaragway ang kabuhi ni Job antes nagbunal ang mga trahedya.

MAY isa ka tawo nga halos ara na sa iya ang tanan—manggad, kadungganan, maayo nga panglawas, kag malipayon nga pamilya. Nian, nagbunal ang tatlo ka asud-asod nga trahedya. Sing hinali, nadula ang iya manggad. Masunod, ang di-kinaandan nga bagyo nagkutol sang kabuhi sang tanan niya nga mga kabataan. Sang ulihi, gintapikan sia sing makasiligni nga balatian amo nga ang iya lawas napuno sing mga hubag. Ayhan kilala mo nga ini nga tawo amo si Job, isa ka panguna nga karakter sa tulun-an sang Job sa Biblia.—Job, kapitulo 1 kag 2.

2 “O kabay pa kuntani nga subong ako sang sa mga bulan nga nagligad,” tuaw niya. (Job 3:3; 29:2) Kon mag-abot ang kalamidad, sin-o ang wala nagahandum sang maayo nga mga adlaw sang una? Sa kaso ni Job, nagkabuhi sia sing matadlong, nga daw naamligan gikan sa kapahamakan. Ginatahod sia kag ginapangayuan sing laygay sang prominente nga mga tawo. (Job 29:5-11) Manggaranon sia apang may balanse sia nga pagtamod sa kuarta. (Job 31:24, 25, 28) Kon masumalang niya ang mga balo ukon mga ilo nga bululigan, ginabuligan niya sila. (Job 29:12-16) Kag nangin matutom sia sa iya asawa.—Job 31:1, 9, 11.

3. Ano ang pagtamod ni Jehova kay Job?

3 Si Job walay kasawayan bangod nagasimba sia sa Dios. “Wala sing kaangay sa iya sa duta,” siling ni Jehova, “tawo nga wala sing kasawayan kag matarong, nga mahadlukon sa Dios kag nagalikaw sa malaut.” (Job 1:1, 8) Apang walay sapayan sang integridad ni Job, ginguba sang trahedya ang iya komportable nga pagkabuhi. Nadula ang tanan niya nga pinangabudlayan, kag ang iya kabakod gintilawan sang kasakit, kalisod, kag kalugaw-an.

4. Ngaa makabulig sa aton ang pagbinagbinag sa pagtilaw kay Job?

4 Siempre pa, indi lamang si Job ang alagad sang Dios nga nag-antos sing kalamidad. Madamo man nga Cristiano karon ang makahangop sa inagihan ni Job. Bangod sini, duha ka pamangkot ang nagakaigo nga binagbinagon naton: Paano ang pag-usisa sa pagtilaw kay Job makabulig sa aton kon makaeksperiensia kita sing trahedya? Kag paano ini makatudlo sa aton nga mangin mas mahinuklugon sa iban nga nagaantos?

 Isa ka Hulusayon Sang Katutom kag Pagtilaw sa Integridad

5. Suno kay Satanas, ngaa nagaalagad si Job sa Dios?

5 Ang kaso ni Job pinasahi gid. Lipod kay Job, ginduhaduhaan sang Yawa ang iya motibo sa pag-alagad sa Dios. Sang ginpatalupangod ni Jehova sa isa ka pagtilipon sa langit ang maayo nga mga kinaiya ni Job, nagsabat si Satanas: “Wala ka bala magbutang sing kudal sa palibot niya kag sa palibot sang iya balay kag sa palibot sang tanan nga iya sa bug-os nga palibot?” Busa, suno kay Satanas si Job napahulag sang kakagod—kag daw ginapahangop niya nga amo man ang iban nga alagad sang Dios. “Untaya ang imo kamot, palihug, kag tanduga ang tanan nga iya kag tan-awa kon indi ka niya pagpakamalauton sa imo nawong mismo,” siling ni Satanas kay Jehova.—Job 1:8-11.

6. Anong importante nga hulusayon ang ginpautwas ni Satanas?

6 Ang hulusayon importante gid. Ginhangkat ni Satanas ang paagi sang pagpadapat ni Jehova sang iya pagkasoberano. Posible gid bala sa Dios nga gamhan ang uniberso paagi sa gugma? Ukon, subong sang ginpahangop ni Satanas, mangin madinalag-on gid bala pirme ang kakagod? Gintugutan ni Jehova ang Yawa nga tilawan si Job, nga nagasalig sa integridad kag katutom sang Iya alagad. Gani, si Satanas mismo ang nagpahanabo sa mga kalamidad nga nag-abot kay Job sing asud-asod. Sang napaslawan si Satanas sa iya una nga pagsalakay, ginpaantos niya si Job sing makasiligni nga balatian. “Panit sa panit, kag ang tanan nga iya sang isa ka tawo ihatag niya tungod sa iya kalag,” pangangkon sang Yawa.—Job 2:4.

7. Sa anong mga paagi ang mga alagad sang Dios karon nagaatubang sing mga pagtilaw nga kaangay sang iya ni Job?

7 Bisan pa nga ang kalabanan nga mga Cristiano karon wala gid man nag-antos sing kaangay ni Job, ang nanuhaytuhay nga sahi sang kapipit-an nagapabudlay sa ila. Madamo ang nagaatubang sing paghingabot ukon mga problema sa pamilya. Ang kapigaduhon ukon mapigaw nga panglawas makahalanusbo. Ang iban napatay bangod sang ila pagtuo. Apang, indi kita dapat magdumdom nga si Satanas ang ginabangdan sang tagsa ka trahedya nga ginaantos naton. Ang matuod, ang pila ka problema mahimo nga resulta sang aton kaugalingon nga mga sayop ukon sang napanubli nga kahimtangan sa pisikal. (Galacia 6:7) Kag tanan kita apektado sang makahalalit nga epekto sang pagtigulang kag natural nga mga kalamidad. Ginapaathag sang Biblia nga sa karon, wala ginaamligan sing milagruso ni Jehova ang iya mga alagad gikan sa sining mga kasisit-an.—Manugwali 9:11.

8. Paano gamiton ni Satanas ang mga kapipit-an nga ginaantos naton?

8 Walay sapayan sini, mahimo gamiton ni Satanas ang mga kapipit-an nga ginaantos naton agod paluyahon ang aton pagtuo. Ginsambit ni apostol Pablo nga nag-antos sia sing “ungon sa unod, isa ka anghel ni Satanas,” nga padayon nga “nagatampa” sa iya. (2 Corinto 12:7) Ayhan isa man ini ka pisikal nga problema subong sang mapigaw nga panulok, ukon iban pa, nahangpan ni Pablo nga mahimo gamiton ni Satanas ini nga problema kag ang kabang-awan nga resulta sini nga magdula sang kalipay kag integridad ni Pablo. (Hulubaton 24:10) Sa karon, mahimo pahanabuon ni Satanas nga sa pila ka paagi hingabuton ang mga alagad sang Dios sang mga miembro sang pamilya, mga kabutho, ukon bisan pa gani sang diktador nga mga panguluhan.

9. Ngaa indi kita dapat matingala gid sa kapipit-an ukon paghingabot?

9 Paano naton maatubang sing madinalag-on ini nga mga problema? Paagi sa pagtamod sini subong kahigayunan agod ipakita nga ang aton gugma kay Jehova kag ang aton pagpasakop sa iya pagkasoberano wala nagabag-o. (Santiago 1:2-4) Ano man ang ginabangdan sang aton kasisit-an, ang paghangop nga importante ang pagkamainunungon sa Dios magabulig sa aton nga huptan ang aton espirituwal nga pagkabalanse. Si apostol Pedro nagsulat sa mga Cristiano: “Mga hinigugma, dili kamo matingala nahanungod sa kalayuhon nga pagtilaw sa tunga ninyo, nga nagakatabo sa inyo subong isa ka pagtilaw, subong nga daw isa ka kalatingalahan nga butang ang nahanabo sa inyo.” (1 Pedro 4:12) Kag si Pablo nagpaathag: “Ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Timoteo 3:12) Ginahangkat gihapon ni Satanas ang integridad sang mga Saksi ni Jehova, subong sang ginhimo  niya sa kaso ni Job. Sa katunayan, ginapakita sang Biblia nga padayon pa gid nga nagasalakay si Satanas sa katawhan sang Dios sa sining tion sang katapusan.—Bugna 12:9, 17.

Di-paghangpanay kag Pila ka Sayop nga Laygay

10. Anong disbentaha ang gin-antos ni Job?

10 Si Job may disbentaha, nga indi na naton dapat maeksperiensiahan. Wala niya mahibaluan kon ngaa natabo sa iya ining mga kalamidad. Sayop nga naghinakop si Job nga sa pila ka paagi “si Jehova ang naghatag, si Jehova man ang nagkuha.” (Job 1:21) Ayhan, nagtinguha gid si Satanas nga ipapati kay Job nga ang Dios ang nagpahanabo sang kasisit-an niya.

11. Ipaathag ang reaksion ni Job sa iya mga kalamidad.

11 Si Job ginluyahan gid sing buot, bisan pa nagdumili sia nga pakamalauton ang Dios, subong sang ginpalig-on sang iya asawa nga himuon niya. (Job 2:9, 10) ‘Ang mga malauton daw nagkaayuhan sangsa akon,’ siling niya. (Job 21:7-9) ‘Ngaa ginasilutan ako sang Dios?’ ayhan palibog niya. May mga tion nga luyag na lang niya nga mapatay. “O kabay pa kuntani nga taguon mo ako sa Sheol, nga huptan mo kuntani ako nga tinago tubtob nga magtaliwan ang imo kaakig!” tuaw niya.—Job 14:13.

12, 13. Paano naapektuhan si Job sa ginsiling sang iya tatlo ka abyan?

12 Si Job may tatlo ka abyan nga nagduaw sa iya, agod tani “magsimpatiya sa iya kag maglugpay sa iya.” (Job 2:11) Sa baylo, sila nangin “manuggamo nga mga manuglugpay.” (Job 16:2) Mahimo kuntani makabenepisyo si Job gikan sa mga abyan nga iya matuaran sang iya mga problema, apang ining tatlo nagdugang sa libog ni Job kag sa iya pagbatyag sing kalugaw-an.—Job 19:2; 26:2.

13 Makatarunganon lamang ihinakop nga si Job mahimo namangkot sa iya kaugalingon: ‘Ngaa ako pa? Ano ang ginhimo ko agod matabo ini sa akon?’ Ang iya mga abyan naghatag sing makapalibog nga mga paathag. Suno sa ila si Job ang nagdala sing pag-antos sa iya kaugalingon paagi sa paghimo sing serioso nga sala. “Sin-o ang wala sing sala nga napatay?” pamangkot ni Elifaz. “Suno sa akon nakita, ang mga nagahimo sing kasakitan kag ang mga nagasab-ug sing kagamo amo ang magaani sini mismo.”—Job 4:7, 8.

14. Ngaa indi naton dayon pag-ipabangod ang pag-antos sa sayop nga paggawi?

14 Ibutang ta, ang mga problema mahimo mag-utwas kon magsab-ug kita sa unod sa baylo nga sa espiritu. (Galacia 6:7, 8) Apang, sa karon nga sistema, ang kagamo mahimo mag-utwas ano man ang aton paggawi. Dugang pa, indi matuod nga ang mga inosente hilway sa tanan nga kalamidad. Si Jesucristo nga “wala sing dagta, napain gikan sa mga makasasala,” nag-antos sing masakit nga kamatayon sa usok sang pag-antos, kag si apostol Santiago napatay nga martir. (Hebreo 7:26; Binuhatan 12:1, 2) Ang sayop nga pangatarungan ni Elifaz kag sang iya duha ka abyan nagpahulag kay Job nga pangapinan ang iya reputasyon kag iinsister ang iya pagkawalay sala. Sa gihapon, ang ila matigdas nga pagpabangod nga ang pag-antos ni Job nagakaigo mahimo nga nag-impluwensia sang iya pagtamod sa katarungan sang Dios.—Job 34:5; 35:2.

Pagtigayon sing Bulig Kon Nagaatubang sing Kapipit-an

15. Ano nga pangatarungan ang makabulig sa aton kon nagaantos kita?

15 May matun-an bala kita nga leksion kay Job? Ang mga trahedya, balatian, ukon paghingabot mahimo nga daw indi gid makatarunganon. Kay ang iban daw wala man nakaagi sining madamo nga mga problema. (Salmo 73:3-12) Kon kaisa, mahimo naton mapamangkot ang aton kaugalingon sining importante nga mga pamangkot: ‘Ginapahulag bala ako sang akon gugma sa Dios nga alagaron sia bisan ano man ang matabo? Luyag ko bala nga ihatag kay Jehova “ang sabat sa isa nga nagayaguta sa Iya?”’ (Hulubaton 27:11; Mateo 22:37) Indi naton dapat pagtugutan ang wala patugsiling nga mga komento sang iban agod duhaduhaan naton ang aton langitnon nga Amay. Ang isa ka matutom nga Cristiano nga nag-antos sing nagabalikbalik nga balatian sa sulod sang malawig nga mga tinuig nagsiling anay: “Nahibaluan ko nga ano man ang ginapahanugot ni Jehova, mabatas ko ini. Nahibaluan ko nga hatagan niya ako sing kinahanglanon nga kusog. Pirme gid niya ini ginahatag.”

16. Paano ang Pulong sang Dios nakabulig sa mga nagaatubang sing mga kabudlayan?

16 Mas nahangpan naton karon ang mga taktika  ni Satanas sangsa kay Job. “Indi kita ignorante sa iya mga pahito,” ukon malaut nga mga padugi. (2 Corinto 2:11) Dugang pa, may matigayon kita nga bugana nga praktikal nga kaalam. Sa Biblia, masapwan naton ang mga kasaysayan sang matutom nga mga lalaki kag mga babayi nga nagbatas sang tanan nga sahi sang kabudlayan. Si apostol Pablo nga nag-antos sing labi pa, nagsulat: “Ang tanan nga butang nga ginsulat sadto ginsulat sa pagtudlo sa aton, agod nga paagi sa aton pagbatas kag paagi sa lugpay gikan sa Kasulatan makatigayon kita sing paglaum.” (Roma 15:4) Ang isa ka Saksi sa Europa nga ginbilanggo tungod sa iya pagtuo sadtong ikaduha nga bug-os kalibutan nga inaway nagbaylo sang iya tatlo ka adlaw nga rasyon para sa isa ka Biblia. “Daw ano gid ka makapaladya ini nga pagbaylo!” siling niya. “Walay sapayan sang akon pisikal nga kagutom, nakabaton ako sing espirituwal nga pagkaon nga nagbulig sa akon kag sa iban agod mabatas namon ang mga pagtilaw sadtong magamo nga mga tion. Gintipigan ko yadto nga Biblia tubtob sining adlaw.”

17. Anong mga aman gikan sa Dios ang makabulig sa aton nga makabatas?

17 Luwas sa lugpay gikan sa Kasulatan, may madamo kita nga mga bulig sa pagtuon sa Biblia nga nagatanyag sing mapuslanon nga giya agod malandas ang mga problema. Kon tan-awon mo ang Watch Tower Publications Index, mahimo nga makakita ka sing mga eksperiensia sang masigka-Cristiano nga nag-atubang sing pagtilaw nga kaanggid sa imo. (1 Pedro 5:9) Makabulig man kon isugid mo ang imo kahimtangan sa mahinuklugon nga mga gulang ukon sa iban nga hamtong nga mga Cristiano. Labaw sa tanan, paagi sa pangamuyo, makasandig ka sa bulig ni Jehova kag sang iya balaan nga espiritu. Paano ginpamatukan ni Pablo ang mga ‘tampa’ ni Satanas? Paagi sa  pagtuon sa pagsandig sa gahom sang Dios. (2 Corinto 12:9, 10) “Sa tanan nga butang may kusog ako bangod sa iya nga nagahatag sing gahom sa akon,” sulat niya.—Filipos 4:13.

18. Paano ang mga masigka-Cristiano nagatanyag sing mapuslanon nga pagpalig-on?

18 Busa, may matigayon nga bulig, kag indi ka dapat magpangalag-ag nga pangayuon ini. “Nagaluya bala ang imo buot sa adlaw sang kapiutan? Ang imo kusog mangin diutay,” siling sang hulubaton. (Hulubaton 24:10) Subong nga ang mga anay makaguba sang balay nga kahoy, ang pagluya sing buot makapaluya man sa integridad sang isa ka Cristiano. Agod mabatuan ini nga katalagman, ginasakdag kita ni Jehova paagi sa aton mga masigkaalagad sang Dios. Ang anghel nagpakita kay Jesus kag nagpabakod sa iya sang gab-i nga gindakop sia. (Lucas 22:43) Samtang nagalakbay pa Roma subong bilanggo, si Pablo “nagpasalamat sa Dios kag naglig-on” sang makita niya ang mga kauturan sa Tiendahan sang Apio kag Tres Tavernas. (Binuhatan 28:15) Madumduman gihapon sang isa ka Saksi nga taga-Alemanya ang bulig nga nabaton niya sang mag-abot sia sa kampo konsentrasyon sang Ravensbrück subong isa ka natahap nga tin-edyer. “Nakita ako dayon sang isa ka masigka-Cristiano kag mainit ako nga gin-abiabi,” hinumdom niya. “Gin-atipan ako sang isa pa ka matutom nga utod nga babayi, kag nangin kaangay sia sang espirituwal nga iloy sa akon.”

“Pamatud-i nga Matutom Ka”

19. Ano ang nakabulig kay Job nga pamatukan ang mga panikasog ni Satanas?

19 Ginlaragway ni Jehova si Job subong tawo nga “nagahupot sang iya integridad.” (Job 2:3) Walay sapayan nga ginaluyahan sing buot kag wala makahangop kon ngaa nagaantos sia, si Job wala mag-isol sa importante nga hulusayon sang pagkatutom. Wala sia magkompromiso. Sia nagsiling: “Tubtob nga mapatay ako indi ko pag-isikway ang akon integridad gikan sa akon!”—Job 27:5.

20. Ngaa mapuslanon ang pagbatas?

20 Kon may kaangay kita sini nga determinasyon mabuligan kita nga mahuptan ang aton integridad sa bisan ano nga kahimtangan—sa atubangan sang mga pagsulay, pagpamatok, ukon kalisdanan. “Indi ka magkahadlok sa mga butang nga buot mo na antuson,” siling ni Jesus sa kongregasyon sang Smirna. “Yari karon! Ang Yawa padayon nga magasulod sang iban sa inyo sa bilangguan agod matilawan kamo sing bug-os, kag agod may kapipit-an [kagamo, kalisod, ukon pagpamatok] kamo sa sulod sang napulo ka adlaw. Pamatud-i nga matutom ka bisan tubtob sa kamatayon, kag ihatag ko sa imo ang korona sang kabuhi.”—Bugna 2:10.

21, 22. Kon nagabatas sing kapipit-an, ano nga ihibalo ang magapaumpaw sa aton?

21 Sa sining sistema nga ginagamhan ni Satanas, ang aton pagbatas kag integridad pagatilawan. Walay sapayan, si Jesus nagapasalig sa aton nga samtang nagapaabot kita sa palaabuton, wala kita sing dapat kahadlukan. Ang importante amo nga pamatud-an naton nga matutom kita. “Ang kapipit-an umalagi,” siling ni Pablo, samtang ang “himaya,” ukon ang padya nga ginasaad ni Jehova sa aton “may labaw pa nga kabug-aton kag walay katapusan.” (2 Corinto 4:17, 18) Bisan ang kapipit-an ni Job umalagi lamang kon ipaanggid sa madamong malipayon nga mga tinuig nga natigayon niya antes kag pagkatapos sang iya pagtilaw.—Job 42:16.

22 Sa gihapon, may mga tinion sa aton kabuhi nga ang aton mga pagtilaw daw walay katapusan kag ang aton pag-antos daw indi na masarangan. Sa masunod nga artikulo, binagbinagon naton kon paano ang eksperiensia ni Job makatudlo sa aton sing dugang pa nga mga leksion sa pagbatas. Binagbinagon man naton ang mga paagi diin mapalig-on naton ang iban nga nagaatubang sing kalisdanan.

Ano ang Imo Sabat?

• Anong importante nga hulusayon ang ginpautwas ni Satanas tuhoy sa integridad ni Job?

• Ngaa indi kita dapat matingala sa mga kasisit-an?

• Paano kita ginabuligan ni Jehova nga makabatas?

[Mga Pamangkot sa Pagtinuon]

[Mga retrato sa pahina 23]

Ang pagpanalawsaw, pagpakigsugilanon sa hamtong nga mga Cristiano, kag pagpautwas sang aton ginabatyag sa pangamuyo makabulig sa aton nga makabatas