Kahadluki si Jehova​—Mangin Malipayon!

“Malipayon ang tawo nga nagakahadlok kay Jehova.”—SALMO 112:1.

1, 2. Ang kahadlok kay Jehova nagadala sing ano?

ANG kalipay indi mahapos matigayon. Ang matuod nga kalipay nagadepende sa husto nga mga pagpili, sa paghimo sang maayo, kag sa paglikaw sa paghimo sing malain. Ang aton Magbubuhat nga si Jehova, naghatag sa aton sang iya Pulong, ang Biblia, agod tudluan kita kon paano maagom ang pinakamaayo nga paagi sang pagkabuhi. Kon pangitaon kag tumanon naton ang mga sugo ni Jehova, nagapakita kita sing kahadlok sa Dios, sa amo matigayon naton ang matuod nga kaayawan kag kalipay.—Salmo 23:1; Hulubaton 14:26.

2 Binagbinagon naton sa sining artikulo ang mga halimbawa sa Biblia kag sa modernong-tion nga nagapakita kon paano ang matuod nga kahadlok sa Dios nagahatag sa isa sing kusog sa paglikaw sa paghimo sing malain kag sing kaisog sa paghimo sing matarong. Makita naton nga ang diosnon nga kahadlok nagadala sa aton sing kalipay bangod ginapahulag kita sini nga tadlungon ang sayop nga dalanon, subong sang ginhimo anay ni Hari David. Makita man naton nga ang kahadlok kay Jehova isa gid ka hamili nga palanublion nga maliton sang mga ginikanan sa ila kabataan. Sa pagkamatuod, ginapalig-on kita sang Pulong sang Dios: “Malipayon ang tawo nga nagakahadlok kay Jehova.”—Salmo 112:1.

Pagpasag-uli Liwat sang Nadula nga Kalipay

3. Ano ang nagbulig kay David nga makapanumbalik gikan sa pagpakasala?

3 Subong sang ginbinagbinag sa nauna nga artikulo, napaslawan si David sa pagpakita sing nagakaigo nga diosnon nga kahadlok kag naghimo sing sala sa tatlo ka talalupangdon nga okasyon. Apang, ang iya reaksion sa disiplina ni Jehova nagapakita nga isa gid sia ka mahinadlukon sa Dios nga tawo. Ang iya masinimbahon nga pagtahod sa Dios nagpahulag sa iya sa pagbaton sang iya sala, pagtadlong sang iya dalanon, kag pagpasag-uli sang iya maayo nga kaangtanan kay Jehova. Bisan pa nga ang iya mga kasaypanan nagresulta sa iya pag-antos kag sang iban, padayon gihapon sia nga ginsakdag kag ginpakamaayo ni Jehova bangod matuod ang iya paghinulsol.  Pat-od nga ang halimbawa ni David makapabakod sa mga Cristiano karon nga mahimo makakomiter sing mabug-at nga sala.

4. Paano makabulig ang kahadlok sa Dios agod mapasag-uli sang isa ang iya kalipay?

4 Binagbinaga ang eksperiensia ni Sonja. * Bisan pa isa sia ka bug-os tion nga ebanghelisador, nabarkada si Sonja sa malain nga mga tawo, nadalahig sa di-Cristiano nga paggawi, kag sa amo kinahanglan i-disfellowship sa Cristianong kongregasyon. Sang makamaradmad sia, ginhimo ni Sonja ang bug-os niya nga masarangan agod mapasag-uli ang iya kaangtanan kay Jehova. Sang ulihi, ginpapanumbalik sia sa kongregasyon. Walay sapayan sang iya inagihan, wala nangampo si Sonja sa iya handum nga alagdon si Jehova. Sang ulihi, nagsulod sia liwat sa bug-os tion nga ministeryo subong payunir. Pagligad sang pila ka tion, nakapamana sia sing isa ka huwaran nga Cristianong gulang, kag malipayon sia karon nga nagaalagad upod sa iya bana sa kongregasyon. Bisan pa naghinulsol gid si Sonja sa iya umalagi nga pagpalayo sa Cristianong banas, nalipay sia nga ang iya kahadlok sa Dios nagbulig sa iya nga makapanumbalik.

Mag-antos Na Lang Sangsa Makahimo sing Sala

5, 6. Ipaathag kon ngaa makaduha ka beses nga wala ginpatay ni David si Saul.

5 Siempre mas maayo kon bangod sa kahadlok sa Dios malikawan sang isa ang paghimo sing sala. Matuod ini kay David. Sang si David ginlagas anay ni Saul upod ang tatlo ka libo nga hangaway, nagsulod si Saul sa isa ka kuweba—ang mismo nga kuweba nga ginapanaguan ni David kag sang iya mga tinawo. Ginsugyot si David sang iya mga tinawo nga patyon na si Saul. Indi bala nga gintugyan na ni Jehova ang mortal nga kaaway ni David sa iya kamot? Hinayhinay nga ginpalapitan ni David si Saul kag gingutraban ang sidsid sang iya panapton. Bangod nahadlok si David sa Dios, ginkonsiensia sia bisan pa indi gid man makahalalit ining buhat. Ginpaaplaag ni David ang iya natublag nga mga tinawo, nga nagasiling: “Imposible, para sa akon, suno sa pagtamod ni Jehova, nga himuon ko ini nga butang sa akon ginuo, ang hinaplas ni Jehova.” *1 Samuel 24:1-7.

6 Sa isa pa ka okasyon, nagkampo sanday Saul agod magpaligad sing gab-i, nian sia kag ang iya mga tinawo ‘ginpatulog sing mahamuok ni Jehova.’ Dalidali apang mahipos nga nagkadto si David kag ang iya maisog nga hinablos nga si Abisai sa tunga sang kampo sa ginatulugan mismo ni Saul. Patyon na kuntani ni Abisai si Saul. Ginpunggan ni David si Abisai nga nagasiling: “Sin-o bala ang makauntay sang iya kamot batok sa hinaplas ni Jehova kag mangin walay sala?”—1 Samuel 26:9, 12.

7. Ano ang nagpugong kay David sa pagpakasala?

7 Ngaa wala ni David ginpatay si Saul bisan pa duha ka beses sia nga may kahigayunan nga himuon ini? Bangod mas nahadlok sia kay Jehova sangsa kay Saul. Bangod sang iya nagakaigo nga kahadlok sa Dios, handa si David nga mag-antos, kon kinahanglanon, sangsa makahimo sing sala. (Hebreo 11:25) Nagasalig sia nga indi pagpabay-an ni Jehova ang Iya katawhan kag pati man sia. Nahibaluan ni David nga ang pagtuman kag pagsalig sa Dios magadala sing kalipay kag madamo nga pagpakamaayo, samtang ang pagsikway sa Dios magaresulta sang Iya di-kahamuot. (Salmo 65:4) Nahibaluan man niya nga tumanon sang Dios ang Iya saad nga himuon si David nga Hari kag pahalinon si Saul sa pagkahari suno sa Iya tion kag paagi.—1 Samuel 26:10.

Ang Pagkahadlok sa Dios Nagadala sing Kalipay

8. Paano ang paggawi ni David sa idalom sang pag-ipit isa ka halimbawa?

8 Subong mga Cristiano, paabuton naton ang pagyaguta, paghingabot, kag iban pa nga mga pagtilaw. (Mateo 24:9; 2 Pedro 3:3) Kon kaisa, mahimo kita magkaproblema sa aton masigkasumilimba. Apang, nahibaluan naton nga makita ni Jehova ang tanan nga butang, mabatian ang aton mga pangamuyo kag, sa nagakaigo nga tion, tadlungon niya ang mga butang nahisuno sa iya kabubut-on. (Roma 12:17-21; Hebreo 4:16) Busa, sa baylo nga mahadlok sa mga nagapamatok sa aton, kay Jehova kita nahadlok kag sia ang ginapaabot naton nga magaluwas sa aton. Kaangay ni David, wala kita nagatimalos, ukon nagakompromiso sang matarong nga mga prinsipio agod malikawan ang pag-antos. Sa ulihi, nagadala ini sing kalipay. Apang paano?

9. Maghatag sing isa ka halimbawa kon paano ang kahadlok sa Dios mahimo magresulta sa kalipay walay sapayan sang paghingabot.

9 “Nadumduman ko ang halimbawa sang isa ka iloy kag sang iya lin-ay nga bata nga bangod sang  ila Cristianong neutralidad, wala sila nagbakal sing kard sang partido-politika,” saysay sang isa ka madugay na nga misyonero sa Aprika. “Ginkastigo sila sang guban sang mga lalaki kag ginpapauli. Samtang nagalakat sila, gin-uloulohan sang iloy ang iya nagatalangison nga bata, nga nabudlayan sa paghangop kon ngaa natabo ini sa ila. Indi gid sila malipayon sadto nga tion, apang matinlo ang ila konsiensia. Sang ulihi, malipayon sila katama bangod gintuman nila ang Dios. Kon nagbakal sila sang kard sang partido, kuntani nalipay gid ang guban. Kuntani ginhatagan sila sang mga lalaki sing softdrink kag nagsaot-saot palibot sa ila tubtob sa ila balay. Apang, para sa mag-iloy, sila na kuntani ang pinakamasubo nga tawo sa kalibutan bangod nahibaluan nila nga nagkompromiso sila.” Wala ini natabo sa sila bangod may kahadlok sila sa Dios.

10, 11. Anong maayo nga mga resulta ang naeksperiensiahan sang isa ka babayi bangod sang iya pagpakita sing kahadlok sa Dios?

10 Ang pagpakita sing diosnon nga kahadlok nagaresulta man sa kalipay kon nagaatubang kita sing mga pagtilaw may kaangtanan sa pagtahod sa pagkabalaan sang kabuhi. Sang nagbusong si Mary sa iya ikatlo nga bata, ginlaygayan sia sang doktor nga ihulog ang bata. “Delikado ang imo kahimtangan,” siling niya. “Mahimo ka mangin kritikal sa bisan ano nga oras kag mapatay sa sulod sang 24 oras. Kag ang bata mapatay man. Bisan ano pa ang matabo, wala sing garantiya nga mangin normal ang lapsag.” Si Mary madugay na nga nagatuon sa Biblia upod sa mga Saksi ni Jehova apang wala pa mabawtismuhan. “Walay sapayan sini,” siling ni Mary, “nagdesisyon na ako nga mag-alagad kay Jehova, kag determinado ako nga magpabilin nga matutom sa iya, bisan ano pa ang matabo.”—Exodo 21:22, 23.

11 Sang nagabusong sia, masako si Mary sa pagtuon sa Biblia kag sa pag-atipan sa iya pamilya. Sang ulihi, nanganak sia. “Mas binudlayan ako sa pagbun-ag sini sangsa nauna nga duha ko ka bata, apang wala sing daku nga mga komplikasyon,” panugiron ni Mary. Ang kahadlok sa Dios nagbulig kay Mary nga mahuptan ang maayo nga konsiensia, kag wala magdugay nabawtismuhan sia. Samtang nagadaku ang lapsag, natun-an man sang bata ang pagkahadlok kay Jehova, kag nagaalagad na sia karon sa isa sa mga sanga talatapan sang mga Saksi ni Jehova.

‘Palig-una ang Imo Kaugalingon Paagi kay Jehova’

12. Paano ang kahadlok sa Dios nagpalig-on kay David?

12 Ang kahadlok ni David kay Jehova wala lamang nagpugong sa iya sa paghimo sing malain. Nagpalig-on man ini sa iya sa paghimo sing determinado kag maalamon nga desisyon sa idalom sang mabudlay nga mga kahimtangan. Sa sulod sang isa ka tuig kag apat ka bulan, bangod sa pagpalagyo kay Saul, si David kag ang iya mga tinawo nagdangop sa Ziklag, sa kaumhan sang Filistia. (1 Samuel 27:5-7) Isa ka bes, sang wala ang mga lalaki, ginsunog sang guban sang Amaleknon nga mga manug-ati ang siudad kag gindala nga bihag ang mga asawa, kabataan, kag panong sang mga lalaki. Sang nagbalik si David kag ang iya mga tinawo, naghibi sila sang nakita nila ang natabo. Ang ila kasubo nangin kaakig, kag nagsiling ang mga tinawo ni David nga batuhon sia. Bisan pa napiutan si David, wala sia nadulaan sing paglaum. (Hulubaton 24:10) Ang iya kahadlok sa Dios nagpahulag sa iya sa pagpangayo sing bulig kay Jehova, kag “ginpalig-on niya ang iya kaugalingon paagi kay Jehova.” Paagi sa bulig sang Dios, nalagas ni David kag sang iya mga tinawo ang mga Amaleknon kag nakuha nila liwat ang tanan nga ginkuha sa ila.—1 Samuel 30:1-20.

13, 14. Paano ang kahadlok sa Dios nakabulig sa isa ka Cristiano sa paghimo sing maayo nga mga desisyon?

13 Ang mga alagad sang Dios karon nagaatubang man sing mga sitwasyon nga nagakinahanglan sing pagsalig kay Jehova kag sing kaisog sa paghimo sing determinado nga desisyon. Binagbinaga halimbawa si Kristina. Sang bata pa si Kristina, nagtuon sia sa Biblia upod sa mga Saksi ni Jehova. Apang luyag niya mangin pianista sa konsierto, kag daku ang iya pag-uswag sa sining patag. Isa pa, ginanerbios sia magbantala kag busa nagapangalag-ag sia sa pagbaton sang iya mangin mga salabton kon mabawtismuhan sia. Samtang nagapadayon si Kristina sa pagtuon sa Pulong sang Dios, nabatyagan niya ang gahom sini. Natun-an niya ang pagkahadlok kay Jehova, kag nahangpan niya nga ginapaabot ni Jehova nga higugmaon sia sang iya mga alagad sing bug-os tagipusuon, hunahuna, kalag, kag kusog. (Marcos 12:30) Nagpahulag ini sa iya sa pagdedikar sang iya kaugalingon kay Jehova kag magpabawtismo.

14 Nangayo si Kristina sing bulig kay Jehova  agod mag-uswag sa espirituwal. “Nakahibalo ako nga ang isa ka pianista sa konsierto pirme nagalakbay kag may kontrata nga magtokar sing tubtob sa 400 ka konsierto kada tuig,” paathag ni Kristina. “Gani nagdesisyon ako nga mangin isa ka manunudlo agod masakdag ko ang akon kaugalingon sa pinansial kag mag-alagad subong isa ka bug-os tion nga ebanghelisador.” Sadto man nga tion, nakaiskedyul na si Kristina sa paghatag sang iya una nga pasundayag sa publiko sa pinakabantog nga concert hall sang ila pungsod. “Ang akon una nga konsierto amo gali ang akon una kag katapusan nga konsierto,” saysay niya. Si Kristina nakapamana sing isa ka Cristianong gulang. Nagaalagad sila karon sa isa sa mga sanga talatapan sang mga Saksi ni Jehova. Malipayon sia bangod ginhatagan sia ni Jehova sing kusog sa paghimo sing husto nga mga desisyon kag nga magamit niya karon ang iya tion kag kusog sa pag-alagad sa Dios.

Isa ka Hamili nga Palanublion

15. Ano ang luyag ipasubli ni David sa iya mga anak, kag paano niya ini ginhimo?

15 “Kari kamo, mga anak, pamatii ninyo ako,” sulat ni David. “Ang pagkahadlok kay Jehova amo ang itudlo ko sa inyo.” (Salmo 34:11) Subong isa ka amay, determinado si David nga ipasubli sa iya mga anak ang isa ka hamili nga palanublion nga mahatag niya—ang tunay, balanse kag nagakaigo nga kahadlok kay Jehova. Paagi sa pulong kag buhat, ginpakita ni David nga si Jehova indi isa ka estrikto kag makahaladlok nga Dios, nga handa magsilot sa bisan ano nga paglapas sa Iya mga kasuguan, kundi isa ka mahigugmaon, mainulikdon, kag mapinatawaron nga Amay sa Iya dutan-on nga mga anak. “Mga kasaypanan—sin-o bala ang makahantop?” pamangkot ni David. Nian, nagapakita sang iya pagsalig nga wala ginausisa ni Jehova sing maid-id ang aton mga sayop sa tanan nga tion, nagsiling pa sia: “Hukmi ako nga walay sala gikan sa lipod nga mga sayop!” Sa kabaliskaran, napat-od ni David nga kon himuon niya ang iya bug-os nga masarangan, ang iya mga pulong kag mga panghunahuna mangin kalahamut-an kay Jehova.—Salmo 19:12, 14.

16, 17. Paano matudluan sang mga ginikanan ang ila kabataan nga magkahadlok kay Jehova?

 16 Si David isa ka maayo nga halimbawa para sa mga ginikanan karon. “Ginhimo sang amon mga ginikanan nga makalilipay ang pagdaku sa kamatuoran,” siling ni Ralph, nga nagaalagad upod sa iya manghod nga lalaki sa isa sa mga sanga talatapan sang mga Saksi ni Jehova. “Sang gamay pa kami, ginalakip nila kami sa ila mga pagsugilanunay tuhoy sa mga hilikuton sang kongregasyon, amo nga nangin mapagsik kami sa kamatuoran kaangay nila. Ginpadaku nila kami nga nagapati nga puede kami makahimo sing maayo nga mga butang sa pag-alagad kay Jehova. Sa katunayan, ang amon pamilya nagpuyo sa sulod sang madamo nga tinuig sa isa ka pungsod diin daku ang kinahanglanon para sa mga manugbantala sing Ginharian kag nagbulig sa pagtukod sing bag-o nga mga kongregasyon.

17 “Ang nagbulig sa amon nga magpabilin sa husto nga banas indi ang madamo nga estrikto nga mga pagsulundan kundi ang kamatuoran nga para sa amon mga ginikanan, si Jehova matuod kag tuman gid ka mainayuhon. Handum gid nila nga makilala si Jehova sing mas maayo kag mapahamut-an sia, kag nakatuon kami gikan sa ila tunay nga kahadlok sa Dios kag gugma sa iya. Bisan pa makasayop kami, wala ginapabatyag sa amon sang amon mga ginikanan nga wala na kami ginahigugma ni Jehova; ni maakigon sila nga nagahatag sing di-kinahanglanon nga mga pagdumili sa amon. Sa masami, ginasugilanon nila kami sing kalmado, kon kaisa nagatulo ang luha ni Nanay samtang ginatinguhaan niya nga lab-uton ang amon tagipusuon. Kag epektibo gid ini. Natun-an namon paagi sa mga pulong kag mga buhat sang amon mga ginikanan nga ang kahadlok kay Jehova isa gid ka dalayawon nga butang kag ang mangin iya mga Saksi makalilipay, indi makapabug-at.”—1 Juan 5:3.

18. Ano ang matigayon naton sa pagkahadlok sa matuod nga Dios?

18 Ang “katapusan nga mga pulong ni David,” nagasiling: “Kon ang nagagahom sa katawhan matarong, nga nagagahom nga may kahadlok sa Dios, nian kaangay ini sang silak sang kaagahon, samtang nagabutlak ang adlaw.” (2 Samuel 23:1, 3, 4) Nakita gid sang nagbulos kay David nga si Solomon, ang kaalam sa sining mga pulong, kay nangabay sia kay Jehova nga hatagan sia sing “isa ka matinumanon nga tagipusuon” kag sing ikasarang “sa paghantop sang maayo kag malain.” (1 Hari 3:9) Nakita ni Solomon nga ang kahadlok kay Jehova isa ka dalanon sang kaalam kag kalipay. Sang ulihi, ginsumaryo niya ang tulun-an sang Manugwali sa sining mga pulong: “Ang katapusan sang butang, sang nabatian na ang tanan, amo: Magkahadlok sa matuod nga Dios kag magtuman sa iya mga sugo. Kay amo ini ang bug-os nga katungdanan sang tawo. Kay ang matuod nga Dios mismo magadala sang tagsa ka sahi sang binuhatan sa hukmanan may kaangtanan sa butang nga natago, kon bala ini maayo ukon malain.” (Manugwali 12:13, 14) Kon tumanon naton ining laygay, makita gid naton nga “ang resulta sang pagkamapainubuson kag sang kahadlok kay Jehova” indi lamang kaalam kag kalipay kundi “manggad kag himaya kag kabuhi” man.—Hulubaton 22:4.

19. Ano ang makabulig sa aton nga mahangpan “ang kahadlok kay Jehova”?

19 Nakita naton gikan sa mga halimbawa sa Biblia kag sa modernong-adlaw nga mga eksperiensia nga ang nagakaigo nga kahadlok sa Dios may positibo nga impluwensia sa kabuhi sang matuod nga mga alagad ni Jehova. Ini nga kahadlok wala lamang nagapugong sa aton sa paghimo sang butang nga di-kalahamut-an sa aton langitnon nga Amay kundi nagahatag man ini sa aton sing kaisog sa pag-atubang sa aton mga kasumpong kag sing kusog sa pagbatas sa mga pagtilaw kag mga kabudlayan nga magaabot sa aton. Busa, kita tanan, bata kag tigulang, mangin maukod sa pagtuon sang Pulong sang Dios, sa pagpamalandong sa aton natun-an, kag sa pagpalapit kay Jehova sa regular kag tinagipusuon nga pangamuyo. Sa paghimo sini, indi lamang naton masapwan “ang ihibalo mismo sa Dios” kundi mahangpan man naton “ang kahadlok kay Jehova.”—Hulubaton 2:1-5.

[Mga nota]

^ par. 4 Gin-islan ang mga ngalan.

^ par. 5 Mahimo isa ini sa mga eksperiensia nga nagpahulag kay David sa pagkomposo sang Salmo 57 kag 142.

Mapaathag Mo Bala?

Paano ang kahadlok sa Dios

• makabulig sa isa sa pagpanumbalik gikan sa isa ka mabug-at nga sala?

• makahatag sing kalipay walay sapayan sang mga pagtilaw kag paghingabot?

• makapabakod sa aton sa paghimo sang kabubut-on sang Dios?

• mangin isa ka hamili nga palanublion para sa aton mga anak?

[Mga Pamangkot sa Pagtinuon]

[Retrato sa pahina 26]

Ang kahadlok kay Jehova nagpugong kay David sa pagpatay kay Hari Saul

[Mga retrato sa pahina 29]

Ang kahadlok sa Dios isa gid ka hamili nga palanublion nga mapasubli sang mga ginikanan sa ila mga anak