Ituon ang Igtalupangod sa Kaayo sang Organisasyon ni Jehova

“Maayawan gid kami sa kaayo sang imo balay.”—SALMO 65:4.

1, 2. (a) Ano ang mangin epekto sa katawhan sang Dios sang mga kahimusan may kaangtanan sa templo? (b) Paano ginsakdag ni David ang pagtukod sang templo?

SI David sang dumaan nga Israel isa sa labing talalupangdon nga tawo nga ginsambit sa Hebreong Kasulatan. Ining manugbantay, musikero, manalagna, kag hari nagsalig sing bug-os kay Jehova nga Dios. Bangod sang suod nga kaangtanan ni David kay Jehova, naghandum sia nga magtukod sing balay para sa Dios. Ini nga balay, ukon templo, mangin sentro sang matuod nga pagsimba sa Israel. Nakahibalo si David nga ang mga kahimusan may kaangtanan sa templo magadala sing kalipay kag pagpakamaayo sa katawhan sang Dios. Busa nag-amba si David: “Malipayon sia nga ginpili kag ginapapalapit mo [Jehova], agod magpuyo sia sa imo mga luwang. Pat-od nga maayawan gid kami sa kaayo sang imo balay, ang balaan nga duog sang imo templo.”—Salmo 65:4.

2 Wala gintugutan si David nga magdumala sa pagtukod sang balay ni Jehova. Sa baylo, ining pribilehiyo ginhatag sa iya anak nga si Solomon. Wala nagkumod si David bangod ginhatag sa iban ang pribilehiyo nga ginhandum gid niya. Ang labing importante para sa iya amo nga matukod ang templo. Bug-os tagipusuon niya nga ginsakdag ang proyekto paagi sa paghatag kay Solomon sang plano sang templo nga nabaton niya halin kay Jehova. Dugang pa, ginbahinbahin ni David ang linibo ka Levinhon para sa nagkalainlain nga katungdanan kag nag-amot sia sing madamo katama nga bulawan kag pilak para sa pagtukod sang templo.—1 Cronica 17:1, 4, 11, 12; 23:3-6; 28:11, 12; 29:1-5.

3. Ano ang panimuot sang mga alagad sang Dios sa mga kahimusan para sa matuod nga pagsimba?

3 Ginsakdag sang matutom nga mga Israelinhon ang mga kahimusan para sa matuod nga pagsimba sa balay sang Dios. Subong mga sumilimba ni Jehova karon, ginasakdag man naton ang mga kahimusan sa pagsimba sa sulod sang dutan-on nga bahin sang organisasyon ni Jehova. Sa sining paagi, ginapasundayag naton ang panimuot nga kaangay  kay David. Indi kita palareklamo. Sa baylo, ginatuon naton ang aton igtalupangod sa kaayo sang organisasyon sang Dios. Nahunahuna mo na bala ang madamo nga maayong butang nga dapat gid naton pasalamatan? Binagbinagon naton ang pila sini.

Mapinasalamaton sa mga Nagapanguna

4, 5. (a) Paano ginatuman sang “matutom kag mainandamon nga ulipon” ang salabton sini? (b) Ano ang ginbatyag sang pila ka Saksi tuhoy sa espirituwal nga pagkaon nga ila nabaton?

4 May rason kita agod mangin mapinasalamaton sa “matutom kag mainandamon nga ulipon” nga gintangdo ni Jesucristo sa pagtatap sang iya mga pagkabutang sa duta. Ining ulipon nga klase sang hinaplas sang espiritu nga mga Cristiano amo ang nagapanguna sa pagbantala sang maayong balita, nagahimo sing kahimusan para sa mga miting para sa pagsimba, kag nagabalhag sing pasad-sa-Biblia nga mga literatura sa kapin sa 400 ka lenguahe. Minilyon ka tawo sa bug-os nga duta ang mapinasalamaton nga nagakaon sining espirituwal nga “pagkaon sa nagakaigo nga tion.” (Mateo 24:45-47) Pat-od nga wala gid kita sing rason nga magkumod.

5 Sa sulod sang madamo nga tuig, ang isa ka tigulang na nga Saksi ni Jehova nga si Elfi nalugpayan kag nabuligan bangod gin-aplikar niya ang Makasulatanhon nga mga laygay nga masapwan sa mga publikasyon sang ulipon nga klase. Ginpahulag sang iya tudok nga apresasyon, si Elfi nagsulat: “Ano na lang ang himuon ko kon wala ang organisasyon ni Jehova?” Si Peter kag si Irmgard nagaalagad sa Dios sa sulod na sang madamo nga tinuig. Ginpabutyag ni Irmgard ang iya apresasyon sa tanan nga aman sang “mahigugmaon kag matinatapon nga organisasyon ni Jehova.” Ang pila sining mga publikasyon espesipiko nga gindesinyo para sa mga tawo nga may pinasahi nga mga kinahanglanon, subong sang mga indibiduwal nga may mga kasablagan sa panulok kag palamatin-an.

6, 7. (a) Paano ginadumalahan ang mga hilikuton sang mga kongregasyon sa bug-os nga duta? (b) Ano ang ginsiling sang iban tuhoy sa dutan-on nga bahin sang organisasyon ni Jehova?

6 Ang ‘matutom nga ulipon’ ginarepresentar sang Nagadumala nga Hubon sang mga Saksi ni Jehova, isa ka magamay nga grupo sang hinaplas sing espiritu nga mga lalaki nga nagaalagad sa bug-os kalibutan nga ulong talatapan sang mga Saksi ni Jehova sa Brooklyn, New York. Ang Nagadumala nga Hubon nagatangdo sang eksperiensiado nga mga alagad ni Jehova agod mag-alagad sa mga sanga talatapan nga nagadumala sa mga hilikuton sang kapin sa 98,000 ka kongregasyon sa bug-os nga duta. Ang mga lalaki nga nakalab-ot sang mga kinahanglanon sa Biblia ginatangdo subong mga gulang kag mga ministeryal nga alagad sa sining mga kongregasyon. (1 Timoteo 3:1-9, 12, 13) Ang mga gulang nagapanguna kag mahigugmaon nga nagabantay sa panong sang Dios nga ginapaatipan sa ila. Daw ano nga pagpakamaayo nga mangin bahin sinang panong kag maeksperiensiahan ang  gugma kag paghiusa nga nagaluntad sa tunga sang “bug-os nga katilingban sang mga kauturan”!—1 Pedro 2:17; 5:2, 3.

7 Sa baylo nga magreklamo, masami ginapabutyag sang mga indibiduwal ang ila apresasyon tungod sa mahigugmaon nga espirituwal nga panuytoy nga ila nabaton gikan sa mga gulang. Halimbawa, binagbinaga si Birgit, isa ka Cristianong asawa nga mga treintahon ang edad. Sang tin-edyer sia, nabarkada sia kag diutayan lang nakahimo sing mabug-at nga sala. Apang ang maathag nga laygay sang mga gulang gikan sa Biblia kag ang pagsakdag sang mga masigkatumuluo nagbulig sa iya nga makapanginpadlos sa makatalagam nga sitwasyon. Ano karon ang ginabatyag ni Birgit? Nagsiling sia: “Nagapasalamat gid ako nga bahin gihapon ako sang dalayawon nga organisasyon ni Jehova.” Ang 17-anyos nga si Andreas nagsiling: “Amo gid ini ang organisasyon ni Jehova, ang pinakamaayo nga organisasyon sa bilog nga kalibutan.” Indi bala nga dapat gid kita mangin mapinasalamaton sa kaayo sang dutan-on nga bahin sang organisasyon ni Jehova?

Ang mga Nagapanguna mga Di-himpit

8, 9. Paano naggawi ang mga kontemporaryo ni David, kag ano ang reaksion ni David sa sini?

8 Siempre pa, ang mga gintangduan nga manguna sa matuod nga pagsimba mga di-himpit. Tanan sila nagasayop, kag ang iban may mga kaluyahon gihapon nga ginapanikasugan gid nila nga kontrolon. Dapat bala kita masubuan bangod sini? Indi. Bisan ang mga indibiduwal nga gintulinan sing madamo nga salabton sa dumaan nga Israel nakahimo sing mabug-at nga kasaypanan. Halimbawa, sang pamatan-on pa si David, ginpatawag sia sa pag-alagad subong musikero agod mapakalma ang problemado nga si Hari Saul. Pagligad sang pila ka tion, gintinguhaan ni Saul nga patyon si David, nga sang ulihi kinahanglan na magpalagyo para sa iya kabuhi.—1 Samuel 16:14-23; 18:10-12; 19:18; 20:32, 33; 22:1-5.

9 Ang iban nga mga Israelinhon nangin maluibon. Halimbawa, ginpatay sang kumandante sang militar ni David nga si Joab ang paryente ni Saul nga si Abner. Naghimbon si Absalom batok sa iya amay, nga si David, agod agawon ang pagkahari. Kag ginluiban si David sang iya ginsaligan nga manuglaygay nga si Ahitofel. (2 Samuel 3:22-30; 15:1-17, 31; 16:15, 21) Apang, si David wala nagdumot ukon nagreklamo; ni nagtalikod sia sa matuod nga pagsimba. Sa katunayan, kabaliskaran pa gani ang iya ginhimo. Ang mga kalisdanan nagpahulag kay David nga manguyapot kay Jehova kag huptan ang maayo nga panimuot nga kaangay anay sang iya panimuot sang nagpalagyo sia kay Saul. Si David nag-amba sadto: “Pakitai ako sing kaluoy, O Dios, pakitai ako sing kaluoy, kay sa imo nagdangop ang akon kalag; kag nagadangop ako sa landong sang imo pakpak tubtob makalabay na ang akon mga kalisdanan.”—Salmo 57:1.

10, 11. Ano ang naeksperiensiahan sang isa ka Cristiano nga si Gertrud sang bataon pa sia, kag ano ang ginsiling niya tuhoy sa pagkadihimpit sang iya masigkatumuluo?

10 Sa karon, wala na kita sing rason nga magreklamo tuhoy sa pagluib sa sulod sang organisasyon. Si Jehova, ang mga anghel, ukon ang espirituwal nga mga manugbantay wala nagakunsinti nga may mga maluibon kag mga malauton sa sulod sang Cristianong kongregasyon. Walay sapayan sini, kinahanglan naton tanan atubangon ang tawhanon nga pagkadihimpit—ang aton mismo pagkadihimpit kag ang iya sang iban nga alagad sang Dios.

11 Sang si Gertrud, isa ka madugay na nga sumilimba ni Jehova, bataon pa, ginsumbong sia nga isa ka impostor kag indi isa ka bug-os tion nga manugbantala sang Ginharian. Ano ang ginhimo niya? Nagkumod bala si Gertrud bangod sinang pagtratar? Wala. Antes sia napatay sang 2003 sa edad nga 91, naghinumdom sia sang iya nagligad kag nagsiling: “Ini kag ang iban ko pa nga mga eksperiensia sa kabuhi nagtudlo sa akon nga walay sapayan sang kasaypanan sang mga indibiduwal, ginatuytuyan ni Jehova ang iya importante nga hilikuton, kag ginagamit niya kita nga di-himpit nga mga tawo.” Kon nagaatubang sa mga di-kahimpitan sang iban nga mga alagad sang Dios, nagapangamuyo si Gertrud sing hanuot kay Jehova.

12. (a) Anong di-maayo nga halimbawa ang ginpahamtang sang mga Cristiano sang unang-siglo? (b) Sa ano naton dapat ituon ang aton panghunahuna?

12 Sanglit bisan ang labing mainunungon kag debotado nga mga Cristiano di-himpit, padayon kita nga maghimo sang “tanan nga butang nga walay pagkumod” kon magsayop ang isa ka gintangdo nga alagad. (Filipos 2:14) Makapasubo gid  kon sundon naton ang di-maayo nga halimbawa sang pila anay sa Cristianong kongregasyon sang unang-siglo! Suno kay disipulo Judas, ang butig nga mga manunudlo sadto “nagatamay sang pagkaginuo kag nagapasipala sa mga ginpadunggan sang Dios.” Isa pa, yadtong mga manughimo sang kalainan “mga palakumod, mga reklamador tuhoy sa ila kahimtangan sa kabuhi.” (Judas 8, 16) Kabay nga indi naton pagsundon ang ginhimo sadtong palakumod nga mga reklamador kag ituon ang aton panghunahuna sa maayong mga butang nga ginabaton naton paagi sa ‘matutom nga ulipon.’ Apresyahon naton ang kaayo sang organisasyon ni Jehova kag ‘padayon nga himuon ang tanan nga butang nga walay pagkumod.’

“Ini nga mga Pulong Makakilibang”

13. Ano ang reaksion sang iban sa pila ka panudlo ni Jesucristo?

13 Samtang ang pila ka tawo sang nahaunang siglo nagkumod batok sa gintangdo nga mga alagad, ang iban naman nagkumod batok sa mga panudlo ni Jesus. Subong sang narekord sa Juan 6:48-69, si Jesus nagsiling: “Sia nga nagakaon sang akon unod kag nagainom sang akon dugo makatigayon sing kabuhi nga wala sing katapusan.” Sang mabatian ini, “madamo” sa iya mga “disipulo . . . [ang] nagsiling: ‘Ini nga mga pulong makakilibang; sin-o ang makapamati sini?’” Nahibaluan ni Jesus nga “ang iya mga disipulo nagkumod tuhoy sini.” Dugang pa, “bangod sini madamo sa [ila] ang nagbalik sa mga butang nga ila ginbiyaan kag wala na maglakat upod sa iya.” Apang indi tanan nga disipulo nagkumod. Talupangda kon ano ang natabo sang ginpamangkot ni Jesus ang 12 ka apostoles: “Indi man ninyo luyag nga magbiya, indi bala?” Si apostol Pedro nagsabat: “Ginuo, kay sin-o kami makadto? Ikaw ang may mga pulong sang kabuhi nga wala sing katapusan; kag nagapati kami kag nahibaluan namon nga ikaw ang Isa nga Balaan sang Dios.”

14, 15. (a) Ngaa ang pila nangin di-kontento sa pila ka aspekto sang Cristianong panudlo? (b) Ano ang matun-an naton gikan sa halimbawa ni Emanuel?

14 Sa moderno nga tion, ang pila sa katawhan sang Dios nangin di-kontento sa pila ka aspekto sang Cristianong panudlo kag nagkumod batok sa dutan-on nga bahin sang organisasyon ni Jehova. Ngaa natabo ini? Ang masami nga rason sining mga pagkumod amo ang kakulang sing paghangop sa paagi sang pagpanghikot sang Dios. Ginapahayag sang Manunuga ang kamatuoran sa iya katawhan sing amat-amat. Busa, ang aton paghangop sa Kasulatan kinahanglan bag-uhon sa tion kag tion. Ang kalabanan sang katawhan ni Jehova nalipay sa sining mga pagbag-o. Ang iban nangin ‘lakas katarong’ kag ginsikway ining mga pagbag-o. (Manugwali 7:16) Ang isa ka rason mahimo nga amo ang bugal, kag ang pila nasiod sa independiente nga panghunahuna. Bisan ano man ang rason, makatalagam ini nga pagkumod, bangod mahimo kita sini dalhon pabalik sa kalibutan kag sa mga paggawi sini.

15 Halimbawa, ginmulay anay sang isa ka Saksi nga si Emanuel ang pila ka butang nga nabasahan niya sa mga publikasyon sang “matutom kag mainandamon nga ulipon.” (Mateo 24:45) Nag-untat sia sa pagbasa sang aton Cristianong mga literatura kag sang ulihi ginsilingan niya ang mga gulang sa ila kongregasyon nga indi na niya luyag mangin Saksi ni Jehova. Apang, pagligad sang malip-ot nga tion, narealisar ni Emanuel nga ang mga panudlo sang organisasyon ni Jehova matuod gid gali. Ginkontak niya ang mga Saksi, gin-ako ang iya sayop, kag ginpanumbalik subong isa sa mga Saksi ni Jehova. Subong resulta, nangin isa sia liwat ka malipayon nga tawo.

16. Ano ang makabulig sa aton agod madula ang aton pagduhaduha sa pila ka Cristianong panudlo?

16 Ano abi kon masulay kita nga magkumod bangod nagaduhaduha kita sa pila ka panudlo sang organisasyon ni Jehova? Kon amo, kabay nga indi kita matak-an sa paghulat. Ang ‘matutom nga ulipon’ mahimo may ibalhag sa ulihi nga magasabat sang aton mga pamangkot kag magadula sang aton mga pangduhaduha. Maalamon nga mangayo sing bulig sa Cristianong mga gulang. (Judas 22, 23) Ang pangamuyo, personal nga pagtuon, kag pagpakig-upod sa mahunahunaon sa espirituwal nga mga masigkatumuluo makabulig man sa aton nga madula ang aton mga pangduhaduha kag makapadalom sang aton apresasyon sa makapabakod-pagtuo nga mga kamatuoran sang Biblia nga natun-an naton paagi sa alagyan sang komunikasyon ni Jehova.

 Hupti ang Positibo nga Panimuot

17, 18. Sa baylo nga magkumod, ano dapat ang panimuot naton, kag ngaa?

17 Matuod nga ang di-himpit nga mga tawo may kinaugali nga huyog sa pagpakasala, kag ang pila may huyog gid sa pagpautwas sang ila walay basehan nga mga reklamo. (Genesis 8:21; Roma 5:12) Apang kon mangin batasan na naton ang pagkumod, ginabutang naton sa katalagman ang aton kaangtanan kay Jehova nga Dios. Busa, kinahanglan naton kontrolon ang aton huyog nga magkumod.

18 Sa baylo nga magkumod tuhoy sa mga kahimusan sa kongregasyon, mas maayo nga huptan naton ang positibo nga panimuot kag sundon ang rutina nga makabulig sa aton nga magpabilin nga masako, malipayon, matinahuron, balanse, kag mapagros sa pagtuo. (1 Corinto 15:58; Tito 2:1-5) Kontrolado ni Jehova ang tanan nga butang sa sulod sang iya organisasyon, kag nahibaluan ni Jesus ang tanan nga nagakatabo sa kada kongregasyon, subong nga nahibaluan niya anay ang nagakatabo sadtong unang-siglo. (Bugna 1:10, 11) Mapailubon nga maghulat sa Dios kag kay Cristo, ang Ulo sang kongregasyon. Ang masaligan nga mga manugbantay mahimo gamiton sa pagtadlong sang mga butang nga kinahanglan tadlungon.—Salmo 43:5; Colosas 1:18; Tito 1:5.

19. Samtang wala pa ang bug-os nga pagkontrol sang Ginharian sa tanan nga hilikuton sang katawhan, sa ano naton dapat ituon ang aton igtalupangod?

19 Sa dili madugay, madula na ining malaut nga sistema sang mga butang, kag ang Mesianikong Ginharian na ang magakontrol sing bug-os sa tanan nga hilikuton sang katawhan. Apang samtang wala pa ina, daw ano ka importante nga huptan sang kada isa sa aton ang positibo nga panimuot! Magabulig ini sa aton nga makita ang maayo nga mga kinaiya sang aton mga masigkatumuluo, sa baylo nga ituon ang aton igtalupangod sa ila mga kasaypanan. Ang pagtuon sang aton igtalupangod sa maayo nga mga aspekto sang ila personalidad magapahalipay sa aton. Busa, sa baylo nga maluyahan sing buot bangod sa pagkumod, mapalig-on kita kag mapabakod sa espirituwal.

20. Ang positibo nga panimuot makabulig sa aton nga maagom ang anong mga pagpakamaayo?

20 Makabulig man ang positibo nga panimuot agod madumduman naton ang madamo nga mga pagpakamaayo nga ginaagom naton sa pagpakig-upod sa dutan-on nga bahin sang organisasyon ni Jehova. Amo lamang ini ang organisasyon sa kalibutan nga mainunungon sa Soberano sang Uniberso. Ano ang ginabatyag mo bangod sa sining kamatuoran kag sa pribilehiyo nga masimba ang lamang matuod nga Dios nga si Jehova? Kabay nga ang imo panimuot mangin kaangay kay David, nga nag-amba: “O Manugpamati sang pangamuyo, bisan ang katawhan sang tanan nga unod magakari sa imo. Malipayon ang imo ginapili kag ginapapalapit, agod magpuyo sia sa imo luwang. Maayawan gid kami sa kaayo sang imo balay.”—Salmo 65:2, 4.

Madumduman Mo Bala?

• Ngaa dapat kita mangin mapinasalamaton sa mga nagapanguna sa kongregasyon?

• Ano dapat ang mangin reaksion naton kon magsayop ang masaligan nga mga utod?

• Paano naton dapat tamdon ang mga pagbag-o sa paghangop sa Kasulatan?

• Ano ang makabulig sa isa ka Cristiano agod malandas ang mga pangduhaduha?

[Mga Pamangkot sa Pagtinuon]

[Retrato sa pahina 20]

Ginhatag ni David kay Solomon ang mga plano sang templo kag bug-os tagipusuon nga ginsakdag ang matuod nga pagsimba

[Retrato sa pahina 23]

Ang Cristianong mga gulang nalipay sa paghatag sing espirituwal nga bulig