Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Hulyo 2006

Ano ang Ginharian Sang Dios?

Ano ang Ginharian Sang Dios?

 Ano ang Ginharian Sang Dios?

DAW ano ka makakulugmat nga kapahamakan ang natabo sa katawhan sadtong maaga nga bahin sang maragtas sang tawo! Isa ka anghel ang nagrebelde sa awtoridad sang Isa nga nagtuga mismo sa iya. Ginsulay sining rebelde ang unang babayi, nga si Eva, sa pagkaon sing ginadumilian nga bungang-kahoy. Tuhoy sa iya kag sa iya bana, nga si Adan, ang anghel nagsiling: “Indi gid kamo mapatay. Kay nakahibalo ang Dios nga sa adlaw nga magkaon kamo gikan sini magamuklat ang inyo mga mata kag mangin kaangay kamo sang Dios, nga nakahibalo sang maayo kag malain.” (Genesis 2:16, 17; 3:1-5) Ang rebelde nga anghel gintawag nga Yawa kag Satanas.—Bugna 12:9.

Namati bala si Eva kay Satanas? Ang Biblia nagasugid sa aton: “Nakita sang babayi nga ang kahoy maayo nga kaunon kag nga makagalanyat ini sa mga mata, huo, ang kahoy halandumon gid tulukon. Gani nagkuha sia sing bunga sini kag nagkaon sini. Pagkatapos ginhatagan man niya ang iya bana kag nagkaon sia sini.” (Genesis 3:6) Huo, ang nahaunang mag-asawa, nga sanday Adan kag Eva, nagbuylog kay Satanas sa iya pagrebelde. Subong resulta, nadula nila ang Paraiso para sa ila kaugalingon kag para sa ila mga kaliwat. Sa baylo nga mabun-ag nga himpit kag mabuhi sing dayon, napanubli sang ila mga anak ang sala kag kamatayon.—Roma 5:12.

Ano ang ginhimo ni Jehova nga Dios, ang Soberano nga Manuggahom sang uniberso? Naghimo sia sing kahimusan para sa kapatawaran sang mga sala. (Roma 5:8) Naghimo man si Jehova nga Dios sing kahimusan para sa isa ka panguluhan nga magalubad sa krisis. Ini nga kahimusan ginatawag nga “ginharian sang Dios.” (Lucas 21:31) Gintukod bilang sanga sang bug-os uniberso nga paggahom sang Dios, ini nga Ginharian may yara espesipiko nga katuyuan.

Ano ang katuyuan sang Ginharian sang Dios? Ano ang pila ka aspekto sini, kag kamusta ini kon ipaanggid sa paggahom sang tawo? San-o ang Ginharian nagsugod sa paggahom? Ini nga mga pamangkot binagbinagon sa masunod nga artikulo.