Magdiretso sa kaundan

Magdiretso sa listahan sang kaundan

Mga Pamatan-on, Pilia ang Pag-alagad kay Jehova

Mga Pamatan-on, Pilia ang Pag-alagad kay Jehova

 Mga Pamatan-on, Pilia ang Pag-alagad kay Jehova

“Magpili kamo karon para sa inyo kaugalingon kon sin-o ang inyo alagdon.”—JOSUE 24:15.

1, 2. Anong sayop nga mga porma sang bawtismo ang ginabuhat sang Cristiandad?

“TUGUTI ang mga [kabataan] nga mangin mga Cristiano kon makilala na nila si Cristo.” Ginsulat ini sang manunulat nga si Tertullian sang hingapusan sang ikaduha nga siglo C.E. Nagapamatok sia sa pagbunyag sa lapsag, isa ka buhat nga amat-amat na nga nagapanggamot sa apostata nga Cristiandad sang iya adlaw. Bangod wala nagaugyon kay Tertullian kag sa Biblia, ang Amay sang Simbahan nga si Augustine nangangkon nga ang pagbunyag nagadula sang dagta sang una nga sala kag nga ang mga lapsag nga napatay nga wala mabunyagan ginakondenar. Ginpasanyog sina nga pagpati ang pagbunyag dayon sa mga lapsag pagkabun-ag nila.

2 Madamo sang panguna nga relihion sang Cristiandad ang nagabunyag gihapon sa bag-o natawo nga mga lapsag. Dugang pa, sa bug-os nga maragtas, ang pilit nga pagbawtismo sa nalutos nga mga “pagano” ginabuhat sang mga manuggahom kag relihiosong mga lider sang ginatawag nga Cristianong mga pungsod. Apang ang pagbunyag sa lapsag kag ang pilit nga pagbawtismo sa mga adulto wala napasad sa Biblia.

Wala Sing Insigida nga Dedikasyon Karon

3, 4. Ano ang makabulig sa mga kabataan nga may dedikado nga mga ginikanan sa pagdedikar sing kinabubut-on sang ila kaugalingon?

3 Ginapakita sang Biblia nga ginakabig sang Dios nga balaan ang mga kabataan bisan pa nga isa lamang sa ila mga ginikanan ang matutom nga Cristiano. (1 Corinto 7:14) Nangin dedikado na bala nga mga alagad ni Jehova ang mga kabataan bangod sini? Indi. Apang, ang mga kabataan nga ginpadaku sang mga ginikanan nga dedikado kay Jehova ginahanas agod kinabubut-on sila nga magdedikar sang ila kaugalingon kay Jehova. Ang maalam nga si Hari Solomon nagsulat: “Tumana, anak ko, ang sugo sang imo amay, kag indi pagsikwaya ang kasuguan sang imo iloy. . . . Kon maglakat ka, magatuytoy ini sa imo; kon magtulog ka, magabantay ini sa imo; kag kon magmata ka, magahambal  ini sa imo. Kay ang sugo amo ang suga, kag ang kasuguan kapawa, kag ang mga pagsabdong sang disiplina amo ang dalan sang kabuhi.”—Hulubaton 6:20-23.

4 Ang panuytoy sang Cristianong mga ginikanan mangin pangamlig sa mga kabataan, ina kon handa sila nga sundon ini. Si Solomon nagsiling man: “Ang anak nga maalam amo ang isa nga nagapasadya sa amay, kag ang anak nga buangbuang kalisod sang iya iloy.” “Pamati ka, anak ko, kag magmaalam, kag tuytuyi ang imo tagipusuon sa dalanon.” (Hulubaton 10:1; 23:19) Huo, agod makabenepisyo sa paghanas sang imo mga ginikanan, kamo nga mga kabataan dapat handa nga magbaton sing panugyan, laygay, kag disiplina. Wala ka ginbun-ag nga maalam, apang mahimo ka “magmaalam” kag kinabubut-on nga sundon “ang dalan sang kabuhi.”

Ano ang Nagatadlong nga Panghunahuna?

5. Ano nga laygay ang ginhatag ni Pablo sa mga kabataan kag sa mga amay?

5 Si apostol Pablo nagsulat: “Mga kabataan, magmatinumanon kamo sa inyo mga ginikanan nga nahiusa sa Ginuo, kay ini matarong: ‘Padunggi ang imo amay kag ang imo iloy’; nga amo ang nahaunang sugo nga may saad: ‘Agod magmaayo ka kag magkabuhi ka sing malawig sa duta.’ Kag kamo, mga amay, dili ninyo pagpaakiga ang inyo mga anak, kundi padayon sila nga padakua sa disiplina kag sa nagatadlong nga panghunahuna ni Jehova.”—Efeso 6:1-4.

6, 7. Ano ang nadalahig sa pagpadaku sa kabataan sa “nagatadlong nga panghunahuna ni Jehova,” kag ngaa wala ini nagakahulugan sing di-makatarunganon nga pag-impluwensia sa ila kabataan?

6 Ginaimpluwensiahan bala sing di-makatarunganon sang Cristianong mga ginikanan ang ila kabataan kon ginapadaku nila sila sa “disiplina kag nagatadlong nga panghunahuna ni Jehova”? Wala. Pakamalauton bala ang mga ginikanan kon tudluan nila ang ila kabataan sang ginakabig nila nga amo ang husto kag mapuslanon sa moral? Ang mga ateista wala ginapakamalaut kon tudluan nila ang ila kabataan nga wala sing Dios. Ang Romano nga mga Katoliko nagapati nga obligado sila nga padakuon ang ila kabataan sa pagtuluuhan sang mga Katoliko, kag halos wala sing may nagapakamalaut sa ila kon himuon nila ini. Sing kaanggid, indi dapat pag-isumbong ang mga Saksi ni Jehova nga ginamaniobra nila ang panghunahuna sang ila kabataan kon ginapadaku nila sila nga sundon ang panghunahuna ni Jehova sa sadsaran nga mga kamatuoran kag moral nga mga prinsipio.

7 Suno sa Theological Dictionary of the New Testament, ang orihinal nga Griegong tinaga nga ginbadbad “nagatadlong nga panghunahuna” sa Efeso 6:4 nagapatuhoy sa isa ka proseso nga “nagatadlong sa hunahuna, sa pagtadlong sang sayop, sa pagpauswag sang espirituwal nga panimuot.” Paano kon ang isa ka pamatan-on mamatok sa paghanas sang mga ginikanan bangod ginaipit sia sang iya mga katubotubo kag luyag man niya nga himuon ang ginahimo nila? Sin-o ang ginabangdan sang makahalalit nga pag-ipit—ang mga ginikanan ukon ang mga katubotubo sang pamatan-on? Kon ang mga katubotubo nagaipit sa pamatan-on nga magdroga, magpatuyang sa pag-inom, ukon maghimo sing imoral nga paggawi, dapat bala pakamalauton ang mga ginikanan kon tadlungon nila ang panghunahuna sang ila bata kag buligan sia nga marealisar ang mga resulta sinang makatalagam nga paggawi?

8. Ano ang ginhimo agod ‘mahaylo sa pagpati’ si Timoteo?

8 Si apostol Pablo nagsulat sa pamatan-on nga si Timoteo: “Magpadayon ka sa mga butang nga natun-an mo kag nahaylo nga patihan, nga nakahibalo kon kay sin-o mo natun-an ini kag nga kutob sa pagkalapsag nahibaluan mo ang balaan nga mga kasulatan, nga makapaalam sa imo para sa kaluwasan paagi sa pagtuo may kaangtanan kay Cristo Jesus.” (2 Timoteo 3:14, 15) Sugod sang pagkabata ni Timoteo, ang iya iloy kag lola nagpasad sang isa ka mabakod nga pundasyon para sa iya pagtuo sa Dios suno sa ihibalo sa Balaan nga Kasulatan. (Binuhatan 16:1; 2 Timoteo 1:5) Sang ulihi, sang nangin Cristiano na sila, wala nila ginpilit si Timoteo nga magpati kundi ‘ginhaylo’ sia paagi sa maayo nga pagpangatarungan pasad sa ihibalo sa Kasulatan.

 Si Jehova Nagaagda sa Imo nga Magpili

9. (a) Paano ginpadunggan ni Jehova ang iya mga tinuga, kag sa ano nga rason? (b) Paano gingamit sang bugtong nga Anak sang Dios ang iya kahilwayan sa pagpili?

9 Puede kuntani nga himuon ni Jehova nga robot ang iya mga tinuga, nga naprograma na sa paghimo sang iya kabubut-on kag indi makahimo sang ila kaugalingon nga pagpili. Apang, ginpadunggan niya sila paagi sa paghatag sa ila sing kahilwayan sa pagpili. Luyag sang aton Dios ang kinabubut-on nga pagpasakop. Nalipay sia nga makita ang iya mga tinuga, tigulang kag pamatan-on, nga nagaalagad sa iya bangod ginahigugma nila sia. Ang pinakamaayo nga halimbawa sang mahigugmaon nga pagpasakop sa kabubut-on sang Dios amo ang iya bugtong nga Anak, nga sa iya si Jehova nagsiling: “Ini ang akon Anak, ang hinigugma, nga ginakahamut-an ko.” (Mateo 3:17) Ining panganay nga Anak nagsiling sa iya Amay: “Sa paghimo sang imo kabubut-on, O Dios ko, nagakalipay ako, kag ang imo kasuguan yari sa akon nasulod nga mga bahin.”—Salmo 40:8; Hebreo 10:9, 10.

10. Ano ang basehan sang kalahamut-an nga pag-alagad sa Dios?

10 Ginapaabot ni Jehova ang mga nagaalagad sa iya sa idalom sang pagtuytoy sang iya Anak nga ipakita ang amo man nga pagpasakop sa Iya kabubut-on. Sing matagnaon, ang salmista nag-amba: “Ang imo katawhan magahalad sang ila kaugalingon sing kinabubut-on sa adlaw sang imo puersa militar. Sa himaya sang pagkabalaan, gikan sa pamanagbanag sang kaagahon, kaupod mo ang mga pamatan-on kaangay sang mga tulo sang tun-og.” (Salmo 110:3) Ang bug-os nga organisasyon ni Jehova, ang langitnon kag dutan-on nga mga bahin, nagapanghikot pasad sa mahigugmaon nga pagpasakop sa kabubut-on sang Dios.

11. Ano nga pagpili ang dapat himuon sang mga pamatan-on nga ginpadaku sang dedikado nga mga ginikanan?

11 Gani, dapat ninyo mahangpan mga pamatan-on nga wala kamo ginapilit sang inyo mga ginikanan ukon sang Cristianong mga gulang sa kongregasyon nga magpabawtismo. Ang handum nga alagaron si Jehova dapat inyo desisyon. Si Josue sang una nagsiling sa mga Israelinhon: “Alagda [si Jehova] sa katutom kag kamatuoran . . . Magpili kamo karon para sa inyo kaugalingon kon sin-o ang inyo alagdon.” (Josue 24:14-22) Sing kaanggid, dapat inyo desisyon ang pagpili nga idedikar ang inyo kaugalingon kay Jehova kag ihugod ang inyo kabuhi sa paghimo sang iya kabubut-on.

Pagbaton sang Inyo Responsibilidad

12. (a) Bisan pa nga mahanas sang mga ginikanan ang ila kabataan, ano ang indi nila mahimo para sa ila? (b) San-o ang isa ka pamatan-on mangin responsable sa atubangan ni Jehova sa mga pagpili nga iya ginahimo?

12 Magaabot ang tion nga kamo nga mga pamatan-on wala na ginaamligan sang katutom sang inyo mga ginikanan. (1 Corinto 7:14) Si disipulo Santiago nagsulat: “Kon ang isa makahibalo kon paano himuon ang husto apang wala niya ini ginahimo, sala ini para sa iya.” (Santiago 4:17) Indi maalagad sang mga ginikanan ang Dios para sa ila kabataan subong nga ang kabataan indi man makaalagad sa Dios para sa ila mga ginikanan. (Ezequiel 18:20) Natun-an mo na bala ang tuhoy kay Jehova kag sa iya mga katuyuan? Yara ka na bala sa edad nga mahangpan ang imo natun-an kag magsugod sa pagtigayon sing personal nga kaangtanan upod sa iya? Indi bala makatarunganon hunahunaon nga ang Dios nagakabig sa imo nga sangkol na sa pagdesisyon nga alagaron sia?

13. Anong mga pamangkot ang dapat ipamangkot sang di-bawtismado nga pamatan-on sa ila kaugalingon?

13 Ikaw bala isa ka di-bawtismado nga pamatan-on nga ginpadaku sang diosnon nga mga ginikanan, nga nagatambong sa Cristianong mga miting, kag nagapakigbahin pa gani sa pagbantala sang maayong balita sang Ginharian? Kon  amo, pamangkuta ang imo kaugalingon sing bunayag: ‘Ngaa ginahimo ko ini? Nagatambong bala ako sa mga miting kag nagapakigbahin sa pagbantala nga hilikuton bangod ginapaabot sang akon mga ginikanan nga himuon ko ini ukon bangod luyag ko pahamut-an si Jehova?’ Napamatud-an mo bala sa imo kaugalingon “ang maayo kag kalahamut-an kag himpit nga kabubut-on sang Dios”?—Roma 12:2.

Ngaa Magpalantang sa Pagpabawtismo?

14. Anong mga halimbawa sa Biblia ang nagapakita nga ang bawtismo indi dapat ipalantang?

14 “Ano ang nagapugong sa akon sa pagpabawtismo?” Ang Etiopianhon nga lalaki nga nagpamangkot sina kay Felipe nga ebanghelisador bag-o lang nakahibalo nga si Jesus amo ang Mesias. Apang ang Etiopianhon may bastante na nga ihibalo sa Kasulatan agod mahangpan nga dapat indi sia magpalantang sa pagpabutyag nga sugod sina nga tion alagaron niya si Jehova subong bahin sang Cristianong kongregasyon, kag naghatag ini sa iya sing daku nga kalipay. (Binuhatan 8:26-39) Sing kaanggid ang babayi nga si Lidia, nga ang iya tagipusuon ginbuksan “agod talupangdon ang mga ginapamulong ni Pablo,” gilayon nga ‘ginbawtismuhan’ kaupod sang iya panimalay. (Binuhatan 16:14, 15) Subong man, ang manugbilanggo sa Filipos nagpamati kay Pablo kag Silas samtang ‘ginhambal nila ang pulong ni Jehova sa iya,’ kag “gilayon nga ginbawtismuhan ang tanan, sia kag ang iya panimalay.” (Binuhatan 16:25-34) Busa, kon may sadsaran ka nga ihibalo tuhoy kay Jehova kag sa iya mga katuyuan, sinsero nga handum nga himuon ang iya kabubut-on, kag may maayo ka nga reputasyon sa kongregasyon kag tayuyon nga nagatambong sa mga miting kag nagapakigbahin sa pagbantala sang maayong balita sang Ginharian, ngaa magpalantang ka pa sa pagpabawtismo?—Mateo 28:19, 20.

15, 16. (a) Anong sayop nga pangatarungan ang nagapugong sa pila ka pamatan-on nga magpabawtismo? (b) Paano ang dedikasyon kag bawtismo isa ka pangamlig para sa mga pamatan-on?

15 Nagapangalag-ag ka bala nga himuon ining importante nga tikang kay nahadlok ka nga manabat kon makahimo ka sing sayop nga paggawi? Kon amo binagbinaga ini: Indi ka bala magkuha sing lisensia sa pagmaneho bangod lamang kay nahadlok ka nga basi maaksidente ka? Indi gid! Indi ka man dapat mangalag-ag nga magpabawtismo kon kalipikado ka. Sa katunayan, mapahulag ka gid nga himuon ang imo labing masarangan nga pamatukan ang sayop kon gindedikar mo na ang imo kabuhi kay Jehova kag nag-ugyon nga himuon ang iya kabubut-on. (Filipos 4:13) Mga pamatan-on, palihug indi paghunahunaa nga paagi sa pagpalantang sa pagpabawtismo, nalikawan mo ang salabton. Kon hamtong ka na, salabton mo kay Jehova ang imo ginabuhat bawtismado ka man ukon indi.—Roma 14:11, 12.

16 Madamo nga mga Saksi sa bug-os nga kalibutan ang nagapati nga ang ila desisyon nga magpabawtismo sang pamatan-on pa sila nakabulig gid sa ila sing daku. Binagbinaga subong halimbawa ang 23 anyos nga Saksi sa Nakatundan nga Europa. Suno sa iya ang pagpabawtismo sa edad nga 13 anyos nagbulig sa iya nga maghalong nga  indi magpadala sa “mga kailigbon nga pinamatan-on.” (2 Timoteo 2:22) Sang bata pa sia, handum niya nga mag-alagad subong bug-os tion nga ministro. Malipayon nga nagaalagad sia karon sa sanga talatapan sang mga Saksi ni Jehova. Ang bugana nga mga pagpakamaayo nagahulat sa tanan nga pamatan-on, lakip sa imo, nga nagpili nga alagaron si Jehova.

17. Sa anong mga bahin sang kabuhi nga importante nga hangpon kon ano “ang kabubut-on ni Jehova”?

17 Ang dedikasyon kag bawtismo patimaan sang pagsugod sang isa ka kabuhi nga nagasunod sa kabubut-on ni Jehova sa tanan naton nga hilikuton. Ang pagtuman sang aton dedikasyon nagadalahig sa ‘pagbakal sang tion.’ Paano naton ini mahimo? Paagi sa pagbuhin sang tion nga gamiton kuntani naton sa wala sing pulos nga mga hilikuton kag idugang ini sa serioso nga pagtuon sa Biblia, sa tayuyon nga pagtambong sa mga miting, kag sa bug-os nga pagpakigbahin sa pagbantala sang “maayong balita sang ginharian.” (Efeso 5:15, 16; Mateo 24:14) Ang aton dedikasyon kay Jehova kag ang aton handum sa paghimo sang iya kabubut-on makahatag sing kaayuhan sa tanan nga bahin sang aton kabuhi, lakip sa aton pagliwaliwa, sa aton pagkaon kag pag-inom, kag sa sahi sang musika nga aton ginapamatian. Ngaa indi magpili sing kalingawan nga mahimo mo mabenipesyuhan tubtob sa walay katubtuban? Linibo sang malipayon nga pamatan-on nga mga Saksi ang magasugid sa imo nga madamo sing kalahamut-an nga pamaagi sang pagkinalipay samtang wala nagalapas sa “kabubut-on ni Jehova.”—Efeso 5:17-19.

“Magaupod Kami sa Inyo”

18. Ano ang dapat ipamangkot sang mga pamatan-on sa ila kaugalingon?

18 Sugod sang 1513 B.C.E. tubtob sang Pentecostes 33 C.E., si Jehova may organisado nga katawhan sa duta nga iya ginpili agod magsimba sa iya kag mangin iya mga saksi. (Isaias 43:12) Ang pamatan-on nga mga Israelinhon ginbun-ag sa sini nga pungsod. Sugod sang Pentecostes, si Jehova may bag-o nga “pungsod” sa duta, ang espirituwal nga Israel, “isa ka katawhan para sa iya ngalan.” (1 Pedro 2:9, 10; Binuhatan 15:14; Galacia 6:16) Si apostol Pablo nagsiling nga si Cristo nagtinlo para sa iya kaugalingon sing “katawhan nga pinasahi nga iya, makugi sa maayong mga buhat.” (Tito 2:14) Kamo nga mga pamatan-on hilway sa pagpat-od sa inyo kaugalingon kon diin masapwan ina nga mga tawo. Sin-o karon ang nagahuman sa “matarong nga pungsod nga nagahupot sing matutom nga paggawi,” nga nagakabuhi nahisanto sa mga prinsipio sa Biblia, nagapanghikot subong matutom nga mga Saksi ni Jehova, kag nagabantala sang iya Ginharian subong ang lamang nga paglaum sang katawhan? (Isaias 26:2-4) Usisaa ang relihion sang Cristiandad kag ang iban pa, kag ipaanggid ang ila paggawi sa ginapatuman sang Biblia para sa matuod nga mga alagad sang Dios.

19. Sa ano kumbinsido ang minilyon nga katawhan sa bug-os nga duta?

19 Minilyon sang katawhan sa bug-os nga kalibutan, lakip ang madamo nga mga pamatan-on, ang kumbinsido nga ang hinaplas nga nagkalabilin sang mga Saksi ni Jehova ginahuman sinang “matarong nga pungsod.” Ginasiling nila ini sa espirituwal nga mga Israelinhon: “Magaupod kami sa inyo, kay nabatian namon nga ang Dios nagaupod sa inyo.” (Zacarias 8:23) Ginalauman gid namon kag ginapangamuyo nga kamo nga mga pamatan-on magadesisyon nga mangin bahin sang katawhan sang Dios kag busa “magpili sang kabuhi”—kabuhi nga walay katapusan sa bag-ong kalibutan ni Jehova.—Deuteronomio 30:15-20; 2 Pedro 3:11-13.

Bilang Pagrepaso

• Ano ang nadalahig sa nagatadlong nga panghunahuna?

• Ano nga sahi sang pag-alagad ang kalahamut-an kay Jehova?

• Anong pagpili ang dapat himuon sang tanan nga mga pamatan-on nga ginpadaku sang dedikado nga mga ginikanan?

• Ngaa indi dapat ipalantang ang bawtismo?

[Mga Pamangkot sa Pagtinuon]

[Retrato sa pahina 26]

Kay sin-o ka mamati?

[Retrato sa pahina 28]

Paano ang dedikasyon kag bawtismo isa ka pangamlig para sa imo?

[Retrato sa pahina 29]

Ano ang nagapugong sa imo nga magpabawtismo?