Magdiretso sa kaundan

Magdiretso sa listahan sang kaundan

Huo, Masapwan Mo ang Kalipay

Huo, Masapwan Mo ang Kalipay

 Huo, Masapwan Mo ang Kalipay

ANG kalipay—matuod kag dayon nga kalipay—mabudlay kon kaisa masapwan. Amo gid sina bangod madamo nga tawo nga wala nagauntat sa pagpangita sing kalipay ang indi makahibalo kon diin ini pangitaon. Kon may abyan lang sila kuntani nga masaligan kag sangkol nga makatudlo sa ila sa husto nga direksion!

Ang Biblia makahatag sinang ginakinahanglan nga direksion. Binagbinaga ang isa lamang sa mga tulun-an sini—Ang mga Salmo. Ini nga tulun-an isa ka koleksion sang 150 ka sagrado nga ambahanon para kay Jehova nga Dios, nga ang mga katunga sini ginkomposo ni Hari David sang dumaan nga Israel. Apang mas importante sangsa paghibalo kon sin-o ang mga manunulat sini amo ang paghibalo nga ini nga tulun-an ginsulat sa idalom sang pag-inspirar sang labing daku nga Abyan sang katawhan, si Jehova. Gani, mapat-od naton nga nagaunod ini sang panuytoy ni Jehova para sa aton kaayuhan kag ginatudlo sini ang dalan padulong sa kalipay.

Napat-od sang mga manunulat sang Salmo nga ang kalipay resulta sang maayo nga kaangtanan sang isa ka tawo sa Dios. “Malipayon ang tawo nga nagakahadlok kay Jehova,” sulat sang salmista. (Salmo 112:1) Wala sing tawhanon nga relasyon, wala sing materyal nga pagkabutang, kag wala sing personal nga katigayunan ang makahatag sing kalipay nga nagagikan sa pagbuylog sa “katawhan nga ang ila Dios amo si Jehova.” (Salmo 144:15) Ginapamatud-an ini sang kabuhi sang madamo nga alagad sang Dios karon.

Ang isa ka halimbawa amo si Susanne, nga kuarentahon ang edad. * Nagsiling sia: “Madamo karon ang nagabuylog sa pila ka grupo agod malab-ot ang pareho nga tulumuron ukon agod mag-ambit sa pareho nga mga intereses. Apang, talagsa lang sa sini nga grupo nga magtinamdanay sila subong mga mag-abyan. Tuhay sa katawhan ni Jehova. Bangod sang amon gugma kay Jehova, nagahigugmaanay kami. Bisan diin man kami matabuan, wala kami nagapang-iban-iban kon kaupod namon ang katawhan sang Dios. Ini nga paghiusa nagahimo  gid sang amon kabuhi nga makaalayaw. Sin-o pa ang makasiling nga may mga abyan sila gikan sa nanuhaytuhay nga sahi sang pagkabuhi, ginhalinan kag nasyonalidad? Tinagipusuon nga masiling ko nga ang pagpakig-upod sa katawhan ni Jehova nagadul-ong sa kalipay.”

Narealisar man ni Maree nga natawo sa Scotland nga importante ang isa ka maayong kaangtanan kay Jehova agod makasapo ang isa sing kalipay. “Sang wala ko pa mahibaluan ang kamatuoran sang Biblia,” siling niya, “maluyagon ako magtan-aw sing kalahadlukan nga mga pelikula. Apang indi ako makatulog kon gab-i nga wala nagauyat sing krus agod tabugon ang mga murto kag mga bampira, nga amo ang makita sa madamo nga mga pelikula. Pero, sang matun-an ko na ang kamatuoran, kag gin-untatan ko na ang pagtan-aw sing subong sini nga mga pelikula, bangod sang akon kaangtanan kay Jehova makatulog na ako nga wala nahadlok, kag malipayon nga nagaalagad sa isa ka Dios nga mas gamhanan sangsa mga demonyo ukon ginahanduraw lamang nga mga bampira.”

Ang Pagsalig kay Jehova Nagadul-ong sa Kalipay

Wala kita sing rason nga duhaduhaan ang pagkalabing gamhanan sang Manunuga kag ang iya walay latid nga kaalam. Bangod nahibaluan ni David nga makasalig sia sing bug-os kay Jehova kag makadangop sia sa Iya, nagsulat sia: “Malipayon ang mabukod nga tawo nga ang iya pagsalig si Jehova.”—Salmo 40:4.

Nagsiling si Maria: “Naeksperiensiahan ko sa Espanya kag sa bisan diin nga kon himuon naton ang mga butang suno sa dalanon ni Jehova, bisan pa tuhay ang huyog sang aton ginabatyag kag emosyon, pinakamaayo gid nga resulta ang matigayon naton. Nagadul-ong ini sa kalipay bangod ang dalanon ni Jehova amo pirme ang labing maayo nga dalanon.”

Si Andreas nga isa ka Cristianong gulang nga nag-alagad sa pila ka pungsod sa Europa nakahibalo man pasad sa iya naeksperiensiahan nga masaligan naton si Jehova. Nagsiling sia: “Ang akon magulang nga lalaki, nga indi Saksi, mabaskog gid nga nag-impluwensia sa akon, nga ginapalig-on ako nga magkuha sing isa ka karera nga may daku nga kita. Nalugaw-an gid sia sang magsulod ako sa bug-os tion nga ministeryo, kag wala nagsandig sa ginatawag nga seguridad nga mahatag sang pension bangod sang pagtrabaho. Sa akon pag-alagad sing bug-os tion, wala gid ako ginkulang, kag nakabaton ako sing mga pagpakamaayo nga ginadamgo lamang sang iban.”

Sang 1993, gin-agda si Felix nga magbulig sa pagpasangkad sang mga pasilidad sang sanga talatapan sang mga Saksi ni Jehova sa Selters, Alemanya. Sang mahuman ini, gin-agda sia nga mangin permanente nga katapo sang pamilya Bethel didto. Ang iya reaksion? “Ginbaton ko ang imbitasyon nga nagaduhaduha pa. Apang halos napulo ka tuig  na ako diri karon, kag kumbinsido ako nga ginsabat ni Jehova ang akon mga pangamuyo. Nahibaluan niya kon ano ang labing maayo para sa akon. Paagi sa bug-os nga pagsalig sa iya kag pagsunod sa iya panuytoy, ginhatagan ko sia sing kahigayunan nga ipakita sa akon kon ano ang luyag niya nga himuon ko.”

Luyag ni Susanne, nga ginsambit kaina, nga mag-alagad subong bug-os tion nga ministro, nga isa ka payunir, apang indi sia makakita sing part-time lang nga trabaho. Pagligad sang isa ka tuig nga paghulat-hulat nga basi makakita sia sing trabaho, naghulag sia nga may pagsalig kay Jehova. Nag-asoy sia: “Ginsumiter ko ang akon aplikasyon para sa pagregular payunir. Nagsupot ako sing kuarta nga bastante para sa akon mga isa ka bulan nga galastuhon. Kag nangin makakulunyag gid ini nga bulan! Daku nga kalipay ang natigayon ko gikan sa akon ministeryo, apang isa-isa nga wala magmadinalag-on ang mga interbyu sa akon para sa trabaho. Walay sapayan sini, subong sang ginsaad ni Jehova, wala niya ako pagbiyai. Sa katapusan nga adlaw sang bulan, isa ka kontrata para sa trabaho ang ginpirmahan ko. Napamatud-an ko na karon nga masaligan ko gid si Jehova! Ining una ko nga eksperiensia sa bug-os tion nga pag-alagad nakabulig nga mangin makapaladya kag malipayon ang akon pagkabuhi.”

Nagadugang sing Kalipay ang Pagbaton sa Laygay Halin sa Dios

Nakahimo si Hari David sing pila ka mabug-at nga sala. Kon kaisa, kinahanglan niya ang maalamon nga laygay. Handa bala kita sa pagbaton sing laygay kag instruksion kaangay ni David?

Narealisar ni Aida nga taga-Pransia nga nakahimo sia sing isa ka mabug-at nga sala. Nag-asoy sia: “Ang pinakaimportante gid sa akon amo ang mapasag-uli ang akon kaangtanan kay Jehova. Wala na sing iban pa.” Nagpalapit sia sa Cristianong mga gulang agod magpabulig. Pagligad sang kapin sa 14 ka tuig nga pag-alagad sa bug-os tion nga ministeryo, nagsiling sia karon: “Nagapasalamat gid ako nga ginpatawad ni Jehova ang akon sala!”

Malikawan naton ang makasala kon batunon naton ang laygay halin sa Dios. Nagpaathag si Judith: “Sa edad nga 20 anyos, gintubuan ako sing luyag sa isa ka Aleman nga kaupod ko sa negosyo nga naghimo sang iya labing masarangan agod maganyat ako. Respetado sia, may madinalag-on gid nga karera, kag may asawa na! Nahibaluan ko nga dapat ako magdesisyon kon bala tumanon ko ang kasuguan ni Jehova ukon talikdan Sia sing bug-os. Nagtu-ad ako sa akon mga ginikanan. Gintampad ako ni Tatay kon ano ang ginapaabot sa akon ni Jehova. Maathag kaayo ang ginhambal niya sa akon—ang ginakinahanglan ko gid! Apang, nagapamalibad gihapon ang akon tagipusuon. Sa sulod sang mga sinemana ginhambal ako ni Nanay kada gab-i kon daw ano ka importante kag makaluwas kabuhi ang mga kasuguan sang Dios. Nagapasalamat gid ako nga ang akon tagipusuon amat-amat nga nagliso kay Jehova. Ang iya pagdisiplina kag pagtudlo sa akon naghatag sa akon sing daku nga kalipay—ang madamo nga makapaladya nga mga tinuig sa bug-os tion nga ministeryo kag ang isa ka maayo nga Cristianong bana nga nagahigugma sa akon kag nagahigugma kay Jehova sing bug-os tagipusuon.”

Maathag nga ginapadaku sini nga mga eksperiensia ang kamatuoran sang ginsiling ni David: “Malipayon sia nga ang iya paglalis ginapatawad, nga ang iya sala ginatabunan. Malipayon ang tawo nga wala ginapasangti ni Jehova sing kalautan.”—Salmo 32:1, 2.

Kalipay nga Nagagikan sa Pagpatugsiling sa Iban

“Malipayon ang nagapatugsiling sa kubos,” sulat ni David. Nagpadayon sia: “Sa adlaw sang kalamidad si Jehova magaaman sing kaluwasan para sa iya. Si Jehova mismo magabantay sa iya kag magaamlig sa iya nga buhi. Ipahayag sia nga malipayon.” (Salmo 41:1, 2) Ang mahigugmaon nga patugsiling nga ginpakita ni David kay Mefiboset, ang piang nga anak sang hinigugma nga abyan ni David nga si Jonatan, isa ka huwaran sang husto nga panimuot nga dapat ipakita sa isa nga kubos.—2 Samuel 9:1-13.

Si Marlies, nga isa ka misyonera sa sulod sang 47 ka tuig, may pinasahi nga kahigayunan sa pagbantala sa mga tawo nga nagpinalagyo gikan sa makatalagam nga mga duog sang Aprika, Asia, kag Nasidlangan nga Europa. Nagsiling sia: “Lainlain ang ila mga problema kag palareho ang ila ginabatyag  nga wala sila ginabaton, nga sila, sa pagkamatuod, ginaihig-ihig. Ang pagbulig sa subong sini nga mga tawo nagahatag pirme sing kalipay.”

Si Marina, nga kuarentahon pa lang, nagsulat: “Bangod dalaga ako, nahibaluan ko kon ano ang mabatyagan kon may mga tawo nga magbulig sa imo. Nagpahulag ini sa akon nga buligan ang iban paagi sa pagtelepono sa ila ukon paagi sa pagsulat sa ila. Madamo ang nagpabutyag sang ila apresasyon. Ang pagbulig sa iban nagahatag sa akon sing kalipay.”

Si Dimitar, nga mga 25 anyos pa lang, nagsiling: “Nagdaku ako nga wala sing amay. Sang lamhad pa ako, nalipay ako nga kada semana ginaupod ako sa ministeryo sang isa ka manugtatap sa Pagtinuon sang Kongregasyon sa Libro agod hanason. Ginapasalamatan ko gihapon ang iya maid-id nga pagbulig sa akon. Nahibaluan ko nga kon kaisa mabudlay ako pasunuron.” Subong pasalamat sa bulig nga nabaton niya anay, ginabuligan karon ni Dimitar ang iban: “Ginatinguhaan ko nga bisan makaisa man lang kada bulan maupdan ko sa pag-alagad sa ministeryo ang isa ka pamatan-on kag isa man ka may edad na.”

Ang tulun-an sang Mga Salmo may ginasambit man nga iban pa nga mga butang nga nagahatag sing kalipay. Ang isa amo ang importansia sang pagsandig sa kusog ni Jehova sa baylo nga sa kaugalingon: “Malipayon ang mga tawo nga ang ila kusog yara [kay Jehova].”—Salmo 84:5.

Nahangpan ini ni Corinna. Nagsaylo sia sa isa ka pungsod diin daku ang kinahanglan sa ministeryo. “Bag-o nga lenguahe, bag-o nga kultura, kag bag-o nga panghunahuna ang nasumalang ko. Daw subong bala nga yara ako sa iban nga planeta. Ginnerbios ako sa pagpamensar nga mabantala ako sa isa ka palibot nga indi pamilyar sa akon. Nangayo ako sing bulig kay Jehova, kag paagi sa iya kusog nahimo ko nga magbantala sa bug-os nga adlaw sa nabaw-ing nga teritoryo. Sang ulihi, daw normal na lang ini sa akon. Madamo ako sing nasugdan nga pagtuon sa Biblia, kag nagabenepisyo gihapon ako gikan sa sini nga eksperiensia. Natun-an ko nga paagi sa kusog ni Jehova, malandas naton ang daw indi malandas nga mga balagbag.”

Huo, nanuhaytuhay nga mga butang ang makahatag sing kalipay, subong sang pagpalambo sing pagpakig-abyan sa Dios kag sa iya katawhan, pagsalig sing bug-os kay Jehova, pagbaton sang iya laygay, kag pagpatugsiling sa iban. Paagi sa paglakat sa mga dalanon ni Jehova kag pagtuman sa iya mga sugo, malipayon nga mabaton naton ang iya kahamuot.—Salmo 89:15; 106:3; 112:1; 128:1, 2.

[Nota]

^ par. 5 Gin-islan ang iban nga mga ngalan.

[Retrato sa pahina 12]

Si Maria

[Retrato sa pahina 13]

Si Maree

[Retrato sa pahina 13]

Sanday Susanne kag Andreas

[Retrato sa pahina 15]

Si Corinna

[Retrato sa pahina 15]

Si Dimitar