Mga Manugbantay nga mga “Huwaran sa Panong”

“Bantayi ninyo ang panong sang Dios nga yara sa inyo pag-atipan . . . sing kinabubut-on . . . , sing malangkagon . . . , mangin mga huwaran sa panong.”⁠—⁠1 PEDRO 5:​2, 3.

1, 2. (a) Anong pribilehiyo ang gintugyan ni Jesus kay apostol Pedro, kag ngaa nagakaigo ang pagsalig ni Jesus? (b) Ano ang ginabatyag ni Jehova sa gintangdo nga mga manugbantay?

MGA pila ka tion antes sang Pentecostes 33 C.⁠E., si Pedro kag ang anom pa ka disipulo nagapamahaw sang ginhanda ni Jesus sa baybayon sang Dagat sang Galilea. Indi ini ang una nga tion nga nakita ni Pedro ang ginbanhaw nga si Jesus, kag walay duhaduha nga nakunyag gid sia nga mahibaluan nga buhi si Jesus. Apang mahimo man nga natahap si Pedro. Kay man, mga pila ka adlaw antes sini, dayag niya nga ginpanghiwala nga kilala niya si Jesus. (Lucas 22:55-60; 24:34; Juan 18:25-27; 21:1-14) Ginsabdong bala ni Jesus ang mahinulsulon nga si Pedro bangod sang iya kakulang sing pagtuo? Wala. Sa baylo, gintugyanan niya si Pedro sing pribilehiyo nga pakan-on kag bantayan ang “gamay nga mga karnero” ni Jesus. (Juan 21:15-17) Subong sang ginapakita sang rekord sang Biblia sa maragtas sang unang siglo nga Cristianong kongregasyon, nagakaigo gid ang pagsalig ni Jesus kay Pedro. Upod ang iban nga mga apostoles kag tigulang nga mga lalaki sa Jerusalem, ginhimo ni Pedro ang pagbantay sa Cristianong kongregasyon sa isa ka dag-on sang mabaskog nga mga pagtilaw kag madasig nga pag-uswag.​—⁠Binuhatan 1:15-26; 2:14; 15:6-9.

2 Sa karon, gintangdo ni Jehova paagi kay Jesucristo ang kalipikado nga mga lalaki nga mag-alagad subong espirituwal nga mga manugbantay agod magtuytoy sa Iya mga karnero sa labing makahalanguyos nga mga tion sa maragtas sang tawo. (Efeso 4:​11, 12; 2 Timoteo 3:1) Wala bala sing nagakaigo nga rason ina nga pagsalig? Ginapamatud-an sang mahidaiton nga Cristianong paghiliutod nga nagaluntad sa bug-os nga kalibutan nga may nagakaigo gid ini nga rason. Matuod, ining mga manugbantay nagasayop man kaangay ni Pedro. (Galacia 2:11-14; Santiago 3:2) Walay sapayan, ginasaligan sila ni Jehova nga ila atipanon ang mga karnero nga “ginbakal niya paagi sa dugo sang iya kaugalingon nga Anak.” (Binuhatan 20:28) Si Jehova may tudok nga pagpalangga sa sining mga lalaki kag ginakabig sila nga “takus sa pilo nga kadungganan.”​—⁠1 Timoteo 5:17.

3. Paano ginahuptan sang espirituwal nga mga manugbantay ang isa ka kinabubut-on kag malangkagon nga espiritu?

3 Paano ginahuptan sang espirituwal nga mga manugbantay ang isa ka kinabubut-on kag malangkagon nga espiritu, sa amo nangin mga halimbawa sa panong? Kaangay ni Pedro kag sang iban nga unang siglo nga mga manugbantay, nagasandig sila sa balaan nga espiritu sang Dios, nga nagahatag sa ila sing kusog nga kinahanglanon nila agod nga madala nila ang ila lulan sang responsibilidad. (2 Corinto 4:7) Ang balaan nga espiritu nagapatubas man sa ila sing mga bunga sang espiritu​—⁠gugma, kalipay, paghidait, pagkamapinasensiahon, pagkamainayuhon, pagkaayo, pagtuo, kalulo, kag pagpugong sa kaugalingon. (Galacia 5:​22, 23) Binagbinagon naton ang pila ka espesipiko nga mga paagi nga mahimo sang mga manugbantay agod makapahamtang sing halimbawa sa pagpakita sini nga mga bunga samtang ginatatap nila ang panong sang Dios sa idalom sang ila pag-atipan.

Higugmaa ang Panong kag ang Tagsa ka Indibiduwal nga Karnero

4, 5. (a) Paano ginapakita ni Jehova kag ni Jesus ang gugma sa panong? (b) Ano ang pila ka paagi nga mapakita sang espirituwal nga mga manugbantay ang gugma sa panong?

4 Ang gugma amo ang panguna nga kinaiya nga  ginapatubas sang espiritu sang Dios. Ginapakita ni Jehova ang iya gugma para sa panong sa kabilugan paagi sa pag-aman sing bugana nga espirituwal nga pagkaon. (Isaias 65:​13, 14; Mateo 24:45-47) Apang, wala lamang niya ginapakaon ang panong. May yara sia mahigugmaon nga pag-ulikid sa tagsa ka indibiduwal nga karnero. (1 Pedro 5:​6, 7) Ginahigugma man ni Jesus ang panong. Ginhatag niya ang iya kabuhi para sa ila, kag kilala niya ang tagsa ka karnero sing personal, “sa ila ngalan.”​—⁠Juan 10:​3, 14-16.

5 Ginailog sang espirituwal nga mga manugbantay sanday Jehova kag Jesus. Ginapakita nila ang gugma sa panong sang Dios sa kabilugan paagi sa ‘pag-ukod [sa ila kaugalingon] sa pagpanudlo’ sa kongregasyon. Ang ila pasad sa Biblia nga mga pamulongpulong nagabulig sa pagpakaon kag pag-amlig sa panong, kag ang ila lakas nga pagpangabudlay sa sini nga bahin makita gid sang tanan. (1 Timoteo 4:​13, 16) Ang indi tanto matalupangdan amo ang tion nga ila ginahinguyang sa paghupot sing mga rekord, pagpadala sing mga sulat, paghimo sing iskedyul, kag pag-atipan sa madamo iban pa nga mga detalye agod mapat-od nga ang mga miting sa kongregasyon kag iban pa nga mga hilikuton mahimo sing “nagakaigo kag suno sa kahimusan.” (1 Corinto 14:40) Kalabanan sining mga hilikuton ginahimo nga wala makita sang iban sa kongregasyon kag mahimo nga indi sila madayaw sa sini. Isa gid ini ka pagpangabudlay bangod sang gugma.​—⁠Galacia 5:13.

6, 7. (a) Ano ang isa ka paagi agod mangin suod ang mga manugbantay sa mga karnero? (b) Ngaa mapuslanon kon kaisa nga isugid ang aton mga balatyagon sa isa ka gulang?

6 Ginatinguhaan sang mahigugmaon nga Cristianong mga manugbantay nga ipakita ang ila personal nga interes sa tagsa ka karnero sa kongregasyon. (Filipos 2:4) Ang isa ka paagi agod mangin suod ang mga manugbantay sa indibiduwal nga karnero amo ang pagpanghikot upod sa ila sa publiko nga pagbantala nga hilikuton. Pirme ginaupod ni Jesus ang iya mga sumulunod sa pagbantala nga hilikuton kag ginagamit ini nga mga higayon agod palig-unon sila. (Lucas 8:1) Ang isa ka eksperiensiado nga Cristianong manugbantay nagasiling: “Nasapwan ko nga ang isa sa labing maayo nga paagi agod makilala kag mapalig-on ang isa ka utod amo ang pagpanghikot upod sa iya sa ministeryo sa latagon.” Kon sining  karon lang wala ka nakahigayon nga mag-upod sa isa sa mga gulang sa ministeryo sa latagon, ngaa indi maghimo sing kahimusan nga mag-upod sa ila?

7 Ang gugma amo ang nagpahulag kay Jesus nga magbuylog sa mga kalipay kag mga kasubo sang iya mga sumulunod. Halimbawa, sang nagbalik nga malipayon ang iya 70 ka disipulo halin sa ila pagbantala, si Jesus “napuno sing kalipay.” (Lucas 10:17-21) Apang, sang nakita niya ang epekto sang kamatayon ni Lazaro kay Maria kag sa iya mga katapo sang pamilya kag mga abyan, “si Jesus nagluha.” (Juan 11:33-35) Sing kaanggid, ang mainulikdon nga mga manugbantay karon interesado man sa balatyagon sang mga karnero. Ang gugma nagapahulag sa ila nga “magkasadya upod sa mga tawo nga nagakasadya” kag “maghibi upod sa mga tawo nga nagahibi.” (Roma 12:15) Kon nagabatyag ka sing kalipay ukon kasubo sa imo kabuhi, hilway nga isugid ang imo mga balatyagon sa Cristianong mga manugbantay. Mapalig-on sila kon mabatian nila ang imo kalipay. (Roma 1:​11, 12) Mapalig-on kag mapaumpawan ka nila kon mahibaluan nila ang tuhoy sa imo mga pagtilaw.​—⁠1 Tesalonica 1:⁠6; 3:1-3.

8, 9. (a) Paano ginpakita sang isa ka gulang ang iya gugma sa iya asawa? (b) Daw ano ka importante para sa isa ka manugbantay ang pagpakita sing gugma sa iya pamilya?

8 Ang gugma sang manugbantay sa panong ilabi na nga makita sa kon paano niya ginatratar ang iya mismo pamilya. (1 Timoteo 3:​1, 4) Kon may asawa sia, ang iya gugma kag pagpadungog sa iya asawa isa ka huwaran nga maayo ilugon sang mga bana. (Efeso 5:25; 1 Pedro 3:7) Binagbinaga ang ginsiling sang isa ka Cristianong babayi nga si Linda. Kapin sa 20 ka tuig nga manugtatap ang iya bana antes ini napatay. Sia nagsiling: “Masami nga tuman kasako ang akon bana sa pag-atipan sa kongregasyon. Apang ginapabatyag niya sa akon nga nagaupdanay kami. Pirme niya ginapasalamatan ang akon pagsuporta sa iya, kag ginahinguyang niya ang iya bakante nga tion upod sa akon. Subong resulta, nabatyagan ko nga ginahigugma niya ako kag wala ko ginapangimunan ang tion niya nga ginagamit sa kongregasyon.”

9 Kon ang Cristianong manugbantay may mga kabataan, ang iya mahigugmaon nga pagdisiplina kag regular nga komendasyon sa ila nagahatag sa iban nga mga ginikanan sing modelo nga sundon. (Efeso 6:4) Sa katunayan, ang gugma nga iya ginapakita sa iya pamilya padayon nga nagahatag sing pamatuod nga takus sia sa pagsalig nga gintugyan sa iya sang gintangdo sia sang balaan nga espiritu subong manugbantay.​—⁠1 Timoteo 3:​4, 5.

Pasanyuga ang Kalipay kag Paghidait Paagi sa Pagkomunikar

10. (a) Ano ang may negatibo nga epekto sa kalipay kag paghidait sang kongregasyon? (b) Ano nga hulusayon ang nagbutang sa katalagman sa paghidait sang nahaunang siglo nga kongregasyon, kag paano ginsolbar ini nga hulusayon?

10 Ang balaan nga espiritu sarang makapatubas sing kalipay kag paghidait sa tagipusuon sang tagsa ka Cristiano, sa tunga sang hubon sang mga gulang, kag sa kongregasyon sa kabilugan. Apang, ang kakulang sing bukas nga komunikasyon may negatibo nga epekto sa sining kalipay kag paghidait. Si Solomon sang una nagsiling: “Nagakapaslawan ang mga plano kon wala sing kompidensiyal nga paghambalanay.” (Hulubaton 15:22) Sa pihak nga bahin, ang matinahuron kag tampad nga komunikasyon nagapasanyog sang kalipay kag paghidait. Halimbawa, sang nabutang sa katalagman ang paghidait sang nahaunang siglo nga kongregasyon bangod sa hulusayon tuhoy sa sirkunsisyon, ang nagadumala nga hubon sa Jerusalem nagpatuytoy sa balaan nga espiritu. Ginpabutyag man nila ang ila nanuhaytuhay nga pagtamod tuhoy sini nga topiko. Pagkatapos sang mainit nga paghambalanay, nakahimo sila sing isa ka desisyon. Sang ginpaalinton nila ang ila nadesisyunan sa mga kongregasyon, ang mga kauturan “nagkasadya tungod sa pagpalig-on.” (Binuhatan 15:6-23, 25, 31; 16:​4, 5) Napasanyog ang kalipay kag paghidait.

11. Paano mapasanyog sang mga gulang ang kalipay kag paghidait sa kongregasyon?

11 Sa karon man, ginapasanyog sang mga manugbantay ang kalipay kag paghidait sa kongregasyon paagi sa maayo nga pagkomunikar. Kon may mga problema nga nagabutang sa katalagman sa paghidait sang kongregasyon, nagahiwat sila sing miting kag hilway nga ginapabutyag ang ila mga balatyagon. Matinahuron sila nga nagapamati sa mga komento sang ila masigkamanugbantay. (Hulubaton 13:10; 18:13) Pagkatapos makapangamuyo para sa balaan nga espiritu, ginabase nila ang ila desisyon sa mga prinsipio sang Biblia kag sa mga giya nga ginabalhag sang “matutom kag mainandamon nga ulipon.” (Mateo 24:45-47; 1 Corinto 4:6) Kon mahimo na sang hubon sang  mga gulang ang desisyon pasad sa Kasulatan, ang tagsa ka gulang nagapasakop sa panuytoy sang balaan nga espiritu paagi sa pagsakdag sina nga desisyon bisan pa nga ang iya personal nga opinyon wala gin-ugyunan sang kalabanan. Ina nga pagkaugdang nagapasanyog sang kalipay kag paghidait kag nagapahamtang sing isa ka maayo nga halimbawa para sa mga karnero kon paano maglakat upod sa Dios. (Miqueas 6:8) Ikaw bala maugdang nga nagakooperar sa pasad sa Biblia nga mga desisyon nga ginahimo sang mga manugbantay sa kongregasyon?

Mangin Mapinasensiahon kag Mainayuhon

12. Ngaa kinahanglan ni Jesus nga mangin mapinasensiahon kag mainayuhon sa iya pagpakig-angot sa mga apostoles?

12 Si Jesus mapinasensiahon kag mainayuhon sa iya pagpakig-angot sa mga apostoles, walay sapayan sang ila sulitsulit nga pagsayop. Halimbawa, liwat kag liwat nga ginpadaku ni Jesus sa ila ang kinahanglanon nga mangin mapainubuson. (Mateo 18:1-4; 20:25-27) Apang, sang hingapusan nga gab-i sang kabuhi ni Jesus sa duta, sa tapos lamang nga matudluan niya sila sing isa ka leksion sa pagkamapainubuson paagi sa paghugas sang ila tiil, “nagbaisay man sila kon sin-o sa ila ang labing daku.” (Lucas 22:24; Juan 13:1-5) Gin-akigan bala ni Jesus ang mga apostoles? Wala, mainayuhon sia nga nangatarungan sa ila, nga nagasiling: “Sin-o ang mas daku, ang nagasaliay sa lamesa ukon ang nagaalagad? Indi bala ang nagasaliay sa lamesa? Apang yari ako sa tunga ninyo subong isa nga nagaalagad.” (Lucas 22:27) Ang pagkamapinasensiahon kag pagkamainayuhon ni Jesus​—⁠upod ang iya maayo nga halimbawa​—⁠nagtandog gid man sang ulihi sa tagipusuon sang mga apostoles.

13, 14. San-o ilabi na dapat mangin mainayuhon ang mga manugbantay?

13 Sing kaanggid, ang isa ka espirituwal nga manugbantay mahimo maghatag sing sulitsulit nga laygay sa isa ka tawo tuhoy sa iya kaluyahon. Ang manugbantay mahimo maakig sa indibiduwal. Apang, kon ginadumdom niya ang iya kaugalingon nga mga kasaypanan samtang ‘ginasaway ang mga magamo,’ ginapakita niya ang pagkamapinasensiahon kag pagkamainayuhon sa iya utod. Sa sinang paagi ginailog niya sanday Jesus kag Jehova, nga nagapakita sining mga kinaiya sa tanan nga mga Cristiano​—⁠lakip na sa mga manugbantay.​—⁠1 Tesalonica 5:14; Santiago 2:13.

14 Ang mga manugbantay kinahanglan maghatag kon kaisa sing matigdas nga laygay sa isa nga nakahimo sing serioso nga sala. Kon ang indibiduwal indi mahinulsulon, dapat sia sikwayon sang mga manugbantay sa kongregasyon. (1 Corinto 5:11-13) Bisan pa amo sini, ang paagi sang ila pagpakig-angot sa sina nga tawo nagapakita nga ginadumtan nila ang sala, indi ang nakasala. (Judas 23) Ang mainayuhon nga paagi sa bahin sang mga manugbantay mahimo nga magapahapos sa isa ka nagtalang nga karnero nga magbalik sa ulihi sa panong.​—⁠Lucas 15:11-24.

Ang Maayong mga Binuhatan Ginapahulag sang Pagtuo

15. Ano ang isa ka paagi nga mailog sang mga manugbantay ang pagkaayo ni Jehova, kag ano ang nagapahulag sa ila nga himuon ini?

15 “Si Jehova maayo sa tanan,” bisan sa mga wala nagaapresyar sa iya ginahimo para sa ila. (Salmo 145:⁠9; Mateo 5:45) Ilabi na nga makita ang pagkaayo ni Jehova bangod ginapadala niya ang iya katawhan agod magbantala sing “maayong balita sang ginharian.” (Mateo 24:14) Ginapabanaag sang mga manugbantay ang pagkaayo sang Dios paagi sa pagpanguna sa sining pagbantala nga hilikuton. Ano ang nagapahulag sa ila walay kakapoy nga mga panikasog? Ang mabakod nga pagtuo kay Jehova kag sa iya mga saad.​—⁠Roma 10:​10, 13, 14.

16. Paano ang mga manugbantay “makabuhat sing maayo” sa mga karnero?

 16 Dugang pa sa pagbuhat “sing maayo sa tanan” paagi sa pagbantala, responsibilidad man sang mga manugbantay nga magbuhat sing maayo “labi na gid sa mga may labot sa [ila] sa pagtuo.” (Galacia 6:10) Ang isa ka paagi nga mahimo nila ini amo ang paghimo sing makapalig-on nga mga pagduaw sa pagbantay. “Nalipay gid ako nga maghimo sing mga pagduaw sa pagbantay,” siling sang isa ka gulang. “Nagahatag ini sa akon sing kahigayunan nga madayaw ang mga kauturan sa ila mga panikasog kag mabuligan sila nga mahangpan nga ang ila lakas nga pagpangabudlay ginaapresyar.” Kon kaisa, mahimo magpanugda ang mga manugbantay sing mga paagi agod mapauswag sang isa ka indibiduwal ang iya pag-alagad kay Jehova. Sa paghimo sini, ginailog sang maalamon nga mga manugbantay si apostol Pablo. Talupangda ang iya paagi sa pagpalig-on sa mga kauturan sa Tesalonica: “May pagsalig kami sa Ginuo nahanungod sa inyo, nga kamo nagahimo kag padayon nga magahimo sing mga butang nga amon ginasugo.” (2 Tesalonica 3:4) Ina nga pagpabutyag sing pagsalig nagganyat sa maayong mga tinutuyo sang mga karnero kag nagpahapos sa ila nga “mangin matinumanon sa mga nagapanguna.” (Hebreo 13:17) Kon napalig-on ka sang isa ka pagduaw sa pagbantay, ngaa indi mo pag-ipabutyag ang apresasyon sa sini?

Ang Pagkalulo Nagakinahanglan sing Pagpugong sa Kaugalingon

17. Ano nga leksion ang natun-an ni Pedro kay Jesus?

17 Si Jesus malulo, bisan pa nga ginpaakig sia. (Mateo 11:29) Sang ginluiban sia kag gindakop, nagpakita si Jesus sing pagkalulo kag daku nga pagpugong sa kaugalingon. Padasudaso nga gingabot ni Pedro ang iya espada kag nagbalos. Apang ginpahanumdom sia ni Jesus: “Nagahunahuna ka bala nga indi ako makapangabay sa akon Amay nga padalhan ako sa sini nga tion sing kapin sa napulog duha ka lehiyon sang mga anghel?” (Mateo 26:51-53; Juan 18:10) Natun-an sing maayo ni Pedro ang leksion kag ginpahanumdom niya sang ulihi ang mga Cristiano: “Si Cristo nag-antos tungod sa inyo, nga nagabilin sa inyo sing huwaran agod nga sundon ninyo sing maayo ang iya mga tikang. . . . Sang ginpasipalahan sia, wala sia magbalos sing pasipala. Sang nag-antos sia, wala sia magpamahog.”​—⁠1 Pedro 2:21-23.

18, 19. (a) San-o ilabi na dapat ipakita sang mga manugbantay ang kalulo kag pagpugong sa kaugalingon? (b) Anong mga pamangkot ang binagbinagon sa masunod nga artikulo?

18 Sing kaanggid, agod mangin epektibo ang mga manugbantay dapat sila mangin malulo bisan pa kon pakig-angutan sila sing di-nagakaigo. Halimbawa, ang iban nga luyag nila buligan sa kongregasyon mahimo indi mag-apresyar sini. Kon ang indibiduwal nga bululigan maluya sa espirituwal ukon nagamasakit sa espirituwal, mahimo nga sabton niya ang nagalaygay paagi sa “paghambal sing di-mapatugsilingon kaangay sang mga buno sang espada.” (Hulubaton 12:18) Apang, kaangay ni Jesus, ang mga manugbantay wala nagabalos sing matigdas nga mga pulong ukon matimaluson nga mga buhat. Sa baylo, nagapugong sila sa kaugalingon kag nagapakita gihapon sing patugsiling, nga pagpakamaayo gid sa isa nga nagakinahanglan sing bulig. (1 Pedro 3:​8, 9) Nakatuon ka bala gikan sa halimbawa sang mga gulang kag nagapasundayag sing kalulo kag pagpugong sa kaugalingon kon ginalaygayan ka?

19 Walay duhaduha nga ginaapresyar gid ni Jehova kag ni Jesus ang lakas nga pagpangabudlay sang linibo ka manugbantay nga kinabubut-on nga nagaatipan sa panong sa bug-os nga kalibutan. Si Jehova kag ang iya Anak may tudok man nga pagpalangga sa linibo ka ministeryal nga alagad nga nagasakdag sa mga gulang sa ‘pag-alagad sa mga balaan.’ (Hebreo 6:10) Kon amo, ngaa ang pila ka bawtismado nga kauturan nga mga lalaki nagapangalag-ag sa paglab-ot sa sining “maayong hilikuton”? (1 Timoteo 3:1) Kag paano ginahanas ni Jehova ang mga ginatangdo niya subong mga manugbantay? Binagbinagon naton ining mga pamangkot sa masunod nga artikulo.

Madumduman Mo Bala?

• Ano ang pila ka paagi nga mapakita sang mga manugbantay ang gugma sa panong?

• Paano mapasanyog sang tanan sa kongregasyon ang kalipay kag paghidait?

• Ngaa ang mga manugbantay mapinasensiahon kag mainayuhon kon nagalaygay?

• Paano ginapakita sang mga gulang ang pagkaayo kag pagtuo?

[Mga Pamangkot sa Pagtinuon]

[Retrato sa pahina 18]

Ang mga gulang ginapahulag sang gugma agod mag-alagad sa kongregasyon

[Mga retrato sa pahina 18]

Nagahinguyang man sila sing tion upod sa ila pamilya sa paglingawlingaw . . .

. . . kag sa ministeryo

[Retrato sa pahina 20]

Ang maayong komunikasyon sa tunga sang mga gulang nagapasanyog sang kalipay kag paghidait sa kongregasyon