Magdiretso sa kaundan

Magdiretso sa listahan sang kaundan

Paghangop sa Biblia—Ang Kalipay nga Matigayon Mo

Paghangop sa Biblia—Ang Kalipay nga Matigayon Mo

 Paghangop sa Biblia—Ang Kalipay nga Matigayon Mo

ANG Biblia nagaunod sing hamili nga mga kamatuoran gikan sa Dios. Nagasugid ini sa aton sang katuyuan sang kabuhi, sang kabangdanan sang pag-antos sang tawo, kag sang palaabuton sang katawhan. Nagatudlo ini sa aton kon paano masapwan ang kalipay, kon paano makig-abyan, kag kon paano malubad ang mga problema. Mas importante pa sa sini, nagatudlo ini sa aton tuhoy sa aton Manunuga kag langitnon nga Amay nga si Jehova. Ini nga ihibalo nagapahalipay sa aton kag nagahatag sing kahulugan sa aton kabuhi.

Ginapaanggid sang Biblia ang pagkuha sing ihibalo tuhoy sa Dios sa pagkaon. Si Jesus nagsiling: “Ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.” (Mateo 4:4; Hebreo. 5:12-14) Subong nga ang adlaw-adlaw nga pagkaon sing masustansia nga kalan-on kinahanglanon agod magpabilin kita nga buhi, ang regular nga pagbasa sang Pulong sang Dios kinahanglanon man agod matigayon naton ang saad sang Dios nga kabuhi nga walay katapusan.

Nanamian kita sa pagkaon bangod gintuga kita ni Jehova agod magkalipay sa sini kag bangod ginapaayawan sini ang tig-una nga kinahanglanon. Apang, may isa pa ka tig-una nga kinahanglanon nga dapat naton paayawan kon luyag naton magmalipayon. Si Jesus nagsiling: “Malipayon ang mga mahunahunaon sang ila espirituwal nga kinahanglanon.” (Mateo 5:3) Mahimo kita mangin malipayon bangod ina nga kinahanglanon mapaayawan paagi sa paghangop sa Pulong sang Dios.

Matuod nga ang iban nabudlayan nga mahangpan ang Biblia. Halimbawa, ayhan kinahanglan mo ang bulig agod mahangpan ang mga teksto nga nagahinambit sing di-pamilyar nga mga kinabatasan ukon nagagamit sing malaragwayon nga mga ekspresyon. Subong man, may mga tagna nga ginsulat sa simbuliko nga pinamulong nga sarang lamang mahangpan  paagi sa pagtan-aw sa iban pa nga mga teksto sa Biblia nga nagabinagbinag sang amo man nga butang. (Daniel 7:1-7; Bugna 13:1, 2) Walay sapayan sini, mahangpan mo gid ang Biblia. Ngaa makapat-od ka?

Ang Kalipay nga Matigayon sang Tanan

Ang Biblia amo ang Pulong sang Dios. Ginapabutyag diri sang Dios kon ano ang kabubut-on niya para sa aton. Magaaman bala ang Dios sing isa ka libro nga indi gid maintiendihan ukon nga mahangpan lamang sang mga may mataas nga tinun-an? Indi, kay si Jehova mainayuhon. Si Cristo Jesus nagsiling: “Sin-o nga amay sa inyo nga kon pangayuan sang iya anak sing isda, hatagan niya sia sing man-ug sa baylo sing isda? Ukon kon mangayo sia sing itlog, hatagan niya sia sing iwiiwi? Busa, kon kamo bisan malaut makahibalo maghatag sing maayo nga mga dulot sa inyo mga anak, labi pa nga ang Amay sa langit magahatag sing balaan nga espiritu sa mga nagapangayo sa iya!” (Lucas 11:11-13) Gani, makapat-od ka nga mahangpan mo ang Biblia kag kon hanuot nga mangayo ka sing bulig sa Dios, buligan ka niya nga mahangpan ang iya Pulong. Ti, ang sadsaran nga mga panudlo sang Biblia mahangpan kag maintiendihan bisan gani sang mga bata!—2 Timoteo 3:15.

Walay sapayan nga dapat panikasugan nga mahangpan ang Biblia, may makapabakod kag makapalig-on nga epekto ini sa aton kon himuon naton ini. Pagkatapos mabanhaw si Jesus, nagpakita sia sa iya duha ka disipulo kag nagpamulong sa ila tuhoy sa mga tagna sang Biblia. Ang rekord ni Lucas nagsiling: “Sugod kay Moises kag sa tanan nga Manalagna, ginpaathag niya sa ila ang mga butang nahanungod sa iya sa bug-os nga Kasulatan.” Ano ang resulta? Sadto nga gab-i, samtang ginahunahuna nila ang ila natun-an, ang mga disipulo nagsiling sa isa kag isa: “Wala bala nagadabdab ang aton tagipusuon sang nagapakighambal sia sa aton sa dalan, samtang ginatalastas niya sa aton sing bug-os ang Kasulatan?” (Lucas 24:13-32) Ang paghangop sa Pulong sang Dios naghatag sa ila sing kalipay bangod nagpabakod ini sang ila pagtuo sa mga saad sang Dios kag naghatag sa ila sing malaumon nga pagtamod sa palaabuton.

Sa baylo nga makapabug-at, ang paghangop sa Pulong sang Dios makawiwili kag mapuslanon, kag makalilipay ini kaangay sang pagkaon sing manamit nga kalan-on. Ano ang dapat mo himuon agod matigayon ang amo nga paghangop? Ginapakita sang masunod nga artikulo kon paano mo matigayon ang “ihibalo gid sang Dios.”—Hulubaton 2:1-5.

[Retrato sa pahina 4]

Kaangay sang isa ka mahigugmaon nga amay, ginahatag ni Jehova ang balaan nga espiritu agod buligan kita nga mahangpan ang Biblia