Isa ka Pagdumalahan sa Pagtuman sang Katuyuan sang Dios

“[Ang Dios] nagapahikot sang tanan nga mga butang suno sa paagi nga ginapanugyan sang iya kabubut-on.”​—⁠EFESO 1:11.

1. Ngaa ang tanan nga kongregasyon sang mga Saksi ni Jehova magatipon sa Abril 12, 2006?

SA Mierkoles sang gab-i, Abril 12, 2006, mga 16 milyones ang magatipon agod saulugon ang Panihapon sang Ginuo. Sa tagsa ka duog tilipunan, may nahanda nga isa ka lamesa nga sa sini may tinapay nga walay tapay, nga nagasimbulo sa lawas ni Cristo, kag alak nga mapula, nga nagasimbulo sa iya ginpaagay nga dugo. Sa hingapusan sang pamulongpulong nga nagapaathag sang kahulugan sang Memoryal sang kamatayon ni Jesus, ini nga mga emblema​—⁠una ang tinapay, dayon ang alak​—⁠ipasa sa tanan nga magatambong. Sa pila ka kongregasyon sang mga Saksi ni Jehova, isa ukon kapin pa sa tumalambong ang magaambit sa mga emblema. Apang, sa masami wala sing nagaambit. Ngaa pila lamang sang mga Cristiano, yadtong nagalaum nga magapuyo sa langit, ang magapakig-ambit, samtang ang kalabanan, yadtong nagalaum nga magapuyo sa duta sing dayon, wala nagapakig-ambit?

2, 3. (a) Paano nagpanuga si Jehova suno sa iya katuyuan? (b) Sa anong katuyuan nga gintuga ni Jehova ang duta kag ang katawhan?

2 Si Jehova isa ka Dios sang katuyuan. Sa pagtuman sang iya katuyuan, sia “nagapahikot sang tanan nga mga butang suno sa paagi nga ginapanugyan sang iya kabubut-on.” (Efeso 1:11) Una, gintuga niya ang iya bugtong nga Anak. (Juan 1:1, 14; Bugna 3:14) Nian, paagi sining Anak, gintuga ni Jehova ang isa ka pamilya sang espiritu nga mga kaanakan kag sang ulihi ang pisikal nga uniberso, lakip ang duta kag ang katawhan sa sini.​—⁠Job 38:​4, 7; Salmo 103:19-21; Juan 1:​2, 3; Colosas 1:​15, 16.

3 Wala gintuga ni Jehova ang duta subong isa ka duog diin tilawan ang mga tawo agod mapat-od kon bala kalipikado sila nga idugang sa espiritu nga kaanakan sa langit, subong sang ginatudlo sang madamo nga mga relihion sang Cristiandad. Gintuga niya ini nga may pat-od nga katuyuan, “agod puy-an” ini. (Isaias 45:18) Gintuga sang Dios ang duta para sa tawo kag ang tawo para sa duta. (Salmo 115:16) Ang bug-os nga planeta mangin isa ka paraiso, nga puno sing matarong nga mga tawo, nga magakultibar kag magaatipan sini. Wala gid gintanyag sa mag-asawa ang paglaum nga sa ulihi mapalangit sila.​—⁠Genesis 1:26-28; 2:7, 8, 15.

Ginhangkat ang Katuyuan ni Jehova

4. Paano ginduhaduhaan kon paano ginapakita ni Jehova ang iya pagkasoberano sa ginsuguran sang maragtas sang katawhan?

4 Nagrebelde ang isa ka espiritu nga anak sang Dios kag determinado sia nga balabagan ang katuyuan ni Jehova, nga isa ka pag-abuso sa regalo sang Dios nga kahilwayan. Gintublag niya ang paghidait nga natigayon sang tanan nga nagapakita sing mahigugmaon nga pagpasakop sa pagkasoberano  ni Jehova. Ginpangunahan ni Satanas ang unang tawhanon nga mag-asawa nga sugdan ang isa ka dalanon sang pagkaindependiente sa Dios. (Genesis 3:1-6) Wala niya ginpanghiwala ang gahom ni Jehova, apang ginduhaduhaan niya kon paano ginapakita ni Jehova ang iya pagkasoberano kag busa ang Iya kinamatarong sa paggahom. Sa amo, ang panguna nga hulusayon tuhoy sa pagkasoberano ni Jehova nag-utwas diri sa duta, sa ginsuguran gid sang maragtas sang katawhan.

5. Ano ang ikaduha nga hulusayon ang ginpautwas, kag sin-o ang nadalahig?

5 Naangot sa panguna nga hulusayon tuhoy sa bug-os uniberso nga pagkasoberano amo ang ikaduha nga hulusayon nga ginpautwas ni Satanas sang mga adlaw ni Job. Ginduhaduhaan ni Satanas ang motibo sang mga tinuga ni Jehova sa pagpasakop kag pag-alagad sa Iya. Ginpahangop ni Satanas nga nagaalagad lamang sila bangod sa makagod nga mga rason kag gani, kon pagatilawan sila, isikway nila ang Dios. (Job 1:7-11; 2:​4, 5) Bisan pa nag-utwas ini may kaangtanan sa isa ka tawhanon nga alagad ni Jehova, ini nga hangkat naglakip man sa espiritu nga mga anak sang Dios, bisan sa bugtong nga Anak ni Jehova pa gani.

6. Paano ginpamatud-an ni Jehova nga matutom sia sa iya katuyuan kag sa iya ngalan?

6 Bangod matutom sa iya katuyuan kag sa kahulugan sang iya ngalan, si Jehova nangin isa ka Manalagna kag Manluluwas.⁠ * Sia nagsiling kay Satanas: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Dugmukon ka niya sa ulo kag dugmukon mo sia sa tikod.” (Genesis 3:15) Paagi sa Binhi sang iya “babayi,” ukon sa langitnon nga bahin sang iya organisasyon, pagasabton ni Jehova ang hangkat ni Satanas kag magaaman sa mga kaanakan ni Adan sing paglaum nga maluwas kag mabuhi.​—⁠Roma 5:21; Galacia 4:​26, 31.

“Ang Sagrado nga Likom sang Iya Kabubut-on”

7. Ano nga katuyuan ang ginpahayag ni Jehova paagi kay apostol Pablo?

7 Sa iya sulat sa mga Cristiano sa Efeso, ginpaathag sing maayo ni Pablo kon paano ginadumalahan ni Jehova ang mga butang agod matuman ang iya katuyuan. Si Pablo nagsulat: “Ginpahibalo niya sa aton ang sagrado nga likom sang iya kabubut-on. Nahisanto ini sa iya kahamuot nga gintuyo niya sa iya kaugalingon para sa isa ka pagdumalahan sa bug-os nga latid sang gintalana nga mga tion, nga amo, agod tipunon liwat ang tanan nga butang kay Cristo, ang mga butang sa langit kag ang mga butang sa duta.” (Efeso 1:​9, 10) Ang mahimayaon nga katuyuan ni Jehova amo ang pagpaluntad sing isa ka nahiusa nga uniberso nga ginapuy-an sang mga tinuga nga mahigugmaon nga nagapasakop sa iya pagkasoberano. (Bugna 4:11) Sa amo mapakabalaan ang Iya ngalan, mapamatud-an nga butigon si Satanas, kag matuman ang kabubut-on sang Dios “sa duta, subong sang sa langit.”​—⁠Mateo 6:10.

8. Ano ang kahulugan sang tinaga nga ginbadbad “pagdumalahan”?

8 Ang “kahamuot,” ukon katuyuan ni Jehova,  matuman paagi sa “isa ka pagdumalahan.” Gingamit ni Pablo ang tinaga nga literal nga nagakahulugan sing “pagdumala sa panimalay.” Nagapatuhoy ini indi sa isa ka panguluhan, subong sang Mesianikong Ginharian, kundi sa isa ka paagi sang pagdumala sa mga butang.⁠ * Ang makatilingala nga paagi sang pagdumala ni Jehova sa mga butang agod matuman ang iya katuyuan nagadalahig sa isa ka “sagrado nga likom” nga ipahayag sing amat-amat samtang nagaligad ang mga siglo.​—⁠Efeso 1:10; 3:​9, New World Translation of the Holy Scriptures With References, footnote.

9. Paano amat-amat nga ginpahayag ni Jehova ang sagrado nga likom sang iya kabubut-on?

9 Paagi sa paagisod nga mga katipan, amat-amat nga ginpahayag ni Jehova kon paano matuman ang iya katuyuan tuhoy sa Binhi nga ginsaad sa Eden. Ang iya katipan nga ginsaad kay Abraham nagapakita nga ang ginsaad nga Binhi magaabot sa duta sa kaliwatan ni Abraham kag paagi sa sini “ang tanan nga mga pungsod sa duta” magapakamaayo sang ila kaugalingon. Ginpakita man sining katipan nga ang iban mangin bahin sang panguna nga bahin sang binhi. (Genesis 22:​17, 18) Ang Kasuguan nga katipan nga ginhimo sa undanon nga Israel nagsugid sang katuyuan ni Jehova nga magtukod sing “isa ka ginharian sang mga saserdote.” (Exodo 19:​5, 6) Ginpakita sang katipan kay David nga ang Binhi amo ang mangin Ulo sang isa ka Ginharian tubtob sa walay latid nga tion. (2 Samuel 7:​12, 13; Salmo 89:​3, 4) Sang mag-abot na ang Mesias nga ginsaad sa mga Judiyo sa Kasuguan nga katipan, nagpahayag si Jehova sing dugang pa nga mga aspekto sang katumanan sang iya katuyuan. (Galacia 3:​19, 24) Ang mga tawo nga nalakip sa panguna nga bahin sang binhi amo ang magahuman  sang gintagna nga “ginharian sang mga saserdote” kag pagadal-on sa “isa ka bag-o nga katipan” subong ang bag-o nga “Israel,” isa nga espirituwal.​—⁠Jeremias 31:31-34; Hebreo 8:7-9.⁠ *

10, 11. (a) Paano ginpahayag ni Jehova ang gintagna nga Binhi? (b) Ngaa nagkari sa duta ang bugtong nga Anak sang Dios?

10 Agod matuman ang pagdumalahan sang katuyuan sang Dios, nag-abot ang tion para sa gintagna nga Binhi nga magkari sa duta. Ginpadala sang Dios ang anghel nga si Gabriel agod sugiran si Maria nga magabun-ag sia sing isa ka anak nga lalaki nga tawgon nga Jesus. Ang anghel nagsiling sa iya: “Ining isa mangin daku kag tawgon nga Anak sang Labing Mataas; kag ihatag sa iya ni Jehova nga Dios ang trono ni David nga iya amay, kag magahari sia sa panimalay ni Jacob sing dayon, kag ang iya ginharian wala sing katapusan.” (Lucas 1:​32, 33) Gani, nangin maathag kon sin-o ang ginsaad nga Binhi.​—⁠Galacia 3:16; 4:4.

11 Ang bugtong nga Anak ni Jehova magakari sa duta kag pagatilawan sing bug-os. Nagadepende sa dalanon sang kabuhi ni Jesus ang bug-os nga sabat sa hangkat ni Satanas. Magamatutom bala sia sa iya Amay? Nagadalahig ini sa isa ka sagrado nga likom. Ginpaathag sang ulihi ni apostol Pablo ang papel ni Jesus: “Daku gid ang sagrado nga likom sining diosnon nga debosyon: ‘Ginpahayag sia sa unod, ginpakamatarong sa espiritu, nagpakita sa mga anghel, ginbantala sa tunga sang mga pungsod, gintuuhan sa kalibutan, ginbaton sa hitaas sa kahimayaan.’” (1 Timoteo 3:16) Huo, paagi sa di-mationg nga integridad tubtob sa kamatayon, ginhatag ni Jesus ang bug-os nga sabat sa hangkat ni Satanas. Apang ang iban nga mga detalye sang sagrado nga likom ipahayag pa.

“Ang Sagrado nga Likom sang Ginharian sang Dios”

12, 13. (a) Ano ang isa ka aspekto sang ‘sagrado nga mga likom sang ginharian sang Dios’? (b) Ano ang nalakip sa pagpili ni Jehova sing limitado nga kadamuon sang mga tawo nga mapalangit?

12 Sa tion sang iya pagbantala sa Galilea, ginpakita ni Jesus nga ang sagrado nga likom may kaangtanan gid sa iya Mesianikong Ginharian nga panguluhan. Ginsilingan niya ang iya mga disipulo: ‘Sa inyo ginhatag ang paghangop sa sagrado nga mga likom sang ginharian sang langit [“ginharian sang Dios,” Marcos 4:11].’ (Mateo 13:11) Ang isa ka aspekto sinang likom naglakip sa pagpili ni Jehova sing “diutay nga panong” nga 144,000 nga makaupod sang iya Anak subong bahin sang binhi, agod maggahom upod sa iya sa langit.​—⁠Lucas 12:32; Bugna 14:​1, 4.

13 Sanglit ang mga tawo gintuga nga magpuyo sa duta, kinahanglan ang ‘bag-o nga tinuga’ ni Jehova agod makapalangit ang iban. (2 Corinto 5:17) Nagapamulong subong isa sa mga ginpili sa sining pinasahi nga langitnon nga paglaum, si apostol Pedro nagsulat: “Bulahan ang Dios kag Amay sang aton Ginuong Jesucristo, kay suno sa iya dakung kaluoy naghatag sia sa aton sing bag-o nga pagkabun-ag padulong sa isa ka buhi nga paglaum paagi sa pagkabanhaw ni Jesucristo gikan sa minatay, padulong sa isa ka di-madinulunton kag walay dagta kag di-maalimunaw nga panublion. Ginatigana ini sa langit para sa inyo.”​—⁠1 Pedro 1:​3, 4.

14. (a) Paano ang mga di-Judiyo nalakip sa ‘sagrado nga likom sang ginharian sang Dios’? (b) Ngaa nahangpan naton ining “madalom nga mga butang sang Dios”?

14 Ang isa pa ka bahin sang sagrado nga likom kon tuhoy sa palaabuton nga Ginharian nga panguluhan amo ang kabubut-on sang Dios nga ilakip ang mga di-Judiyo sa diutay lamang nga kadamuon sang mga tawo nga pagatawgon nga maggahom upod kay Cristo sa langit. Ginpaathag ni Pablo ining aspekto sang “pagdumalahan” ni Jehova, ukon paagi sa pagdumala sa pagtuman sang iya katuyuan: “Sa iban nga mga kaliwatan ini nga likom wala ginpahibalo sa mga anak sang mga tawo subong nga ginpahayag ini karon sa iya balaan nga mga apostoles kag mga manalagna paagi sa espiritu, nga amo, nga ang katawhan sang mga pungsod mangin mga masigkamanunubli kag mga kabahin sang lawas kag mga masigkaumalambit sang saad nga nahiusa kay Cristo Jesus paagi sa maayong balita.” (Efeso 3:​5, 6) Ang paghantop sa sining bahin sang sagrado nga likom ginpahayag sa “balaan nga mga apostoles.” Sa karon man, kon wala ang bulig sang balaan nga espiritu, indi naton mahangpan ang “madalom nga mga butang sang Dios.”​—⁠1 Corinto 2:10; 4:⁠1; Colosas 1:​26, 27.

15, 16. Ngaa sa katawhan si Jehova nagpili sing kaupod nga mga gumalahom ni Cristo?

 15 “Ang isa ka gatos kag kap-atan kag apat ka libo” nga nakita nga nagatindog upod sa “Kordero” sa langitnon nga Bukid Sion ginasiling nga “ginbakal gikan sa duta,” “ginbakal gikan sa katawhan subong nahaunang mga bunga sa Dios kag sa Kordero,” si Cristo Jesus. (Bugna 14:1-4) Ginpili ni Jehova ang una sa iya langitnon nga mga anak nga mangin panguna nga bahin sang binhi nga ginsaad sa Eden, apang ngaa sa katawhan sia nagpili sang mga makaupod ni Cristo? Ginpaathag ni apostol Pablo nga ining limitado nga kadamuon “gintawag suno sa iya [ni Jehova] katuyuan,” suno sa ginakahamut-an sang iya kabubut-on.”​—⁠Roma 8:​17, 28-30; Efeso 1:​5, 11; 2 Timoteo 1:9.

16 Ang katuyuan ni Jehova amo ang pagpakabalaan sa iya daku kag balaan nga ngalan kag pagbindikar sa iya pagkasoberano sa bug-os nga uniberso. Paagi sa iya di-matupungan nga kaalam sa “pagdumalahan,” ukon paagi sa pagdumala sa mga butang, ginpadala ni Jehova ang iya bugtong nga Anak sa duta, diin pagatilawan sia sing bug-os tubtob sa kamatayon. Dugang pa, ginpat-od ni Jehova nga ang Mesianikong Ginharian nga panguluhan sang iya Anak magalakip sa mga tawo nga nagsakdag man sang Iya pagkasoberano tubtob sa kamatayon.​—⁠Efeso 1:8-12; Bugna 2:​10, 11.

17. Ngaa malipay kita nga si Cristo kag ang iya kaupod nga mga manuggahom nagkabuhi anay subong mga tawo?

17 Ginpakita ni Jehova ang iya daku nga gugma para sa mga kaanakan ni Adan paagi sa pagpadala sa iya Anak sa duta kag paagi sa pagpili gikan sa katawhan sadtong mangin kaupod nga manunubli sang Anak sa Ginharian nga panguluhan. Paano nakabenepisyo sa sini ang iban nga nangin matutom kay Jehova, sugod kay Abel tubtob karon? Bangod natawo nga ulipon sa sala kag kamatayon, kinahanglan nga mabulong sa espirituwal kag pisikal ang di-himpit nga mga tawo kag mangin himpit suno sa orihinal nga katuyuan ni Jehova para sa katawhan. (Roma 5:12) Makalulugpay gid para sa tanan nga nagalaum sing kabuhi nga walay katapusan sa duta ang mahibaluan nga ang ila Hari magapakita man sa ila sing gugma kag mainayuhon nga pagkamahinangpanon subong sang ginpakita niya sa iya mga disipulo sa tion sang iya ministeryo sa duta! (Mateo 11:​28, 29; Hebreo 2:​17, 18; 4:15; 7:​25, 26) Kag makapalig-on gid para sa ila nga mahibaluan nga ang kaupod ni Cristo nga mga hari-saserdote sa langit mga lalaki kag babayi sang pagtuo anay nga nagpakigbato man sa personal nga mga kaluyahon kag mga hangkat sa kabuhi kaangay naton!​—⁠Roma 7:21-25.

Ang Indi Mapaslawan nga Katuyuan ni Jehova

18, 19. Ngaa mas maathag sa aton ang ginsiling ni Pablo sa Efeso 1:8-11, kag ano ang pagabinagbinagon sa masunod nga artikulo?

18 Mas nahangpan na naton karon ang kahulugan sang mga pinamulong ni Pablo sa hinaplas nga mga Cristiano, subong sang masapwan sa Efeso 1:8-11. Ginsiling niya nga ginpahibalo ni Jehova sa ila “ang sagrado nga likom sang iya kabubut-on,” nga sila “gintangdo subong mga manunubli” upod kay Cristo, kag nga sila “gintangdo na nga daan suno sa katuyuan niya nga nagapahikot sang tanan nga mga butang suno sa paagi nga ginapanugyan sang iya kabubut-on.” Nahantop naton nga ini nagasigo sa dalayawon nga “pagdumalahan” ni Jehova sa tanan nga mga butang para sa katumanan sang iya katuyuan. Nagabulig man ini sa aton nga mahangpan kon ngaa diutay lamang sa mga nagatambong sa Panihapon sang Ginuo ang nagaambit sa mga emblema.

19 Sa masunod nga artikulo, hibaluon naton kon ano ang kahulugan sang Memoryal sang kamatayon ni Cristo sa mga Cristiano nga may paglaum sa langit. Tun-an man naton kon ngaa minilyon sang mga may paglaum sa duta ang dapat mangin interesado gid sa kon ano ang ginasimbulo sang Memoryal.

[Mga nota]

^ par. 6 Ang ngalan sang Dios literal nga nagakahulugan sing “Sia nga Nagapahanabo nga Mangin Amo.” Sarang mahimo ni Jehova ang bisan ano nga kinahanglanon agod matuman ang iya katuyuan.​—⁠Exodo 3:​14, New World Translation of the Holy Scriptures With References, footnote.

^ par. 8 Ginapakita sang ginsiling ni Pablo nga ang “pagdumalahan” nagapanghikot sang iya adlaw, samtang ginapakita sang Kasulatan nga ang Mesianikong Ginharian natukod lamang sang 1914.

^ par. 9 Para sa isa ka detalyado nga paathag sining mga katipan nga nadalahig sa pagtuman sang katuyuan sang Dios, tan-awa Ang Lalantawan, Pebrero 1, 1989, pahina 10-15.

Bilang Pagrepaso

• Ngaa gintuga ni Jehova ang duta kag ginbutang ang tawo sa sini?

• Ngaa kinahanglan nga tilawan sa duta ang bugtong nga Anak ni Jehova?

• Ngaa sa katawhan si Jehova nagpili sang kaupod nga mga gumalahom ni Cristo?

[Mga Pamangkot sa Pagtinuon]