Sugilanon sang Kabuhi

Ginbuligan Ako ni Jehova nga Makita Sia

PANUGIRON NI FLORENCE CLARK

Gin-uyatan ko ang kamot sang akon bana nga may malubha nga balatian. Bilang isa ka Anglikano, nangamuyo ako sa Dios nga ayuhon niya ang akon bana, kag nangako ako nga kon indi sia mapatay, pangitaon ko ang Dios tubtob nga makita ko sia. Nian mangin iya ako.

FLORENCE Chulung ang ginhatag sa akon nga ngalan sang natawo ako sang Septiembre 18, 1937 sa Aboriginal Oombulgurri Community sa nabaw-ing nga Kimberley Plateau sa rehiyon sang Nakatundan nga Australia.

Indi ko gid malipatan ang masadya kag malipayon nga mga tion sadtong bata pa ako. Natun-an ko sa amon simbahan ang pila ka sadsaran nga mga panudlo nahanungod sa Dios kag sa Biblia, apang ang akon iloy amo ang nagtudlo sa akon sang Cristianong mga prinsipio. Pirme niya ako ginabasahan sang Biblia, kag kutob pa sa pagkabata gusto ko na nga makatuon tuhoy sa Dios. Bilib man ako sa akon isa ka tiya nga misyonera sang ila relihion. Luyag ko gid nga mangin kaangay niya.

Ang amon komunidad, nga kilala anay nga Forrest River Mission, nagapaeskwela sa mga bata halin sa una tubtob ikalima nga grado. Duha ka oras lang kada aga ang amon klase. Gani diutay lamang ang akon matun-an, butang nga ginakabalak-an gid sang akon amay. Luyag niya nga mas madamo sing matun-an ang iya kabataan, amo nga namat-od sia nga sayluhon ang iya pamilya sa banwa sang Wyndham halin sa Oombulgurri. Sang adlaw nga nagsaylo kami nasubuan gid ako, apang sang yara na kami sa Wyndham, bug-os nga adlaw ang akon pag-eskwela sa sulod sang apat ka tuig, halin sang 1949 tubtob 1952. Nagapasalamat gid ako nga ginbuligan ako sang akon amay nga makatigayon sang amo nga edukasyon.

 Si Nanay nagtrabaho sa isa ka doktor sa amon lugar, kag sang nag-untat ako eskwela sa edad nga 15, ginpaobra ako sining doktor sa ospital sang Wyndham bilang isa ka nars. Malipayon ko ini nga ginbaton, kay man maiwat ang trabaho sadto nga tion.

Mga pila ka tuig sang ulihi nakilala ko si Alec, isa ka puti (Caucasian) nga manug-atipan sang mga sapat sa isa ka rantso. Nagpakasal kami sang 1964 sa banwa sang Derby, diin nagasimba ako sing regular sa simbahan sang Anglikano. Isa ka adlaw nagduaw ang mga Saksi ni Jehova sa amon balay. Ginsilingan ko sila nga indi gid ako interesado kag ginpangabay nga indi na sila magbalik liwat. Apang, may ginhambal sila nga nagpainteres sa akon​—⁠ang Dios may personal nga ngalan kag ini amo si Jehova.

“Ngaa Indi Ka Makapangamuyo nga Ikaw Lang?”

Nangin mabudlay gid ang amon pangabuhi sang 1965. Makatlo nga naaksidente sing malubha ang akon bana​—⁠makaduha sa iya kabayo kag makaisa sa iya awto. Maayo lang kay nag-ayo sia kag nakabalik sa iya trabaho. Apang, wala magdugay, naaksidente naman sia liwat sa iya kabayo. Sa sining higayon, grabe gid ang samad sa iya ulo. Pag-abot ko sa ospital, ginhambalan ako sang doktor nga mapatay ang akon bana. Naglalain gid ako. Ginpangabay sang isa ka nars ang pari sa amon lugar nga makigkita sa akon, apang nagsabat sia: “Indi lang subong. Buas na lang!”

Nasambit ko sa madre nga luyag ko tani nga upod kami sang pari nga mangamuyo. Ang sabat niya sa akon: “Ano ka man imo man? Ngaa indi ka makapangamuyo nga ikaw lang?” Gani nangamuyo ako sing bulig sa mga santos sang simbahan​—⁠apang sa walay pulos. Nagatagumatayon na ang akon bana. Sa pensar ko, ‘Ano na lang ang matabo sa akon kon wala na ang akon bana?’ Nabalaka man ako sa akon tatlo ka kabataan​—⁠si Christine, si Nanette, kag si Geoffrey. Ano na lang ayhan ang ila mangin kabuhi kon wala na ang ila nga amay? Apang, makalilipay gid nga pagligad sang tatlo ka adlaw naulian sing pangalibutan ang akon bana, kag naggua sia sa ospital sang Disiembre 6, 1966.

Bisan pa nga nag-ayo ang akon bana, nasamad ang iya utok. Indi na niya madumduman ang nagligad nga mga hitabo kag karon madali na sia magsingki kag nangin alabuton. Nabudlayan sia makig-angot sa mga bata kag maabtik magpadapat-kamot kon wala sila dayon nagapati sa iya. Nabudlayan gid ako sa pag-atipan sa iya. Halos ako na lang ang nagahimo sang tanan para sa iya. Gintudluan ko gani sia liwat sa pagbasa kag pagsulat. Bangod nabug-atan na gid ako sa pag-atipan sa iya kag sa pag-atender sang akon mga hilikuton sa sulod-balay, gin-atake ako sang nerbios. Pito ka tuig pagkatapos nga naaksidente ang akon bana, nagsugtanay kami nga magbulagay sing makadali agod maulian ang akon lawas.

Gindala ko ang kabataan kag nagsaylo sa bagatnan pakadto sa siudad sang Perth. Antes kami magsaylo, ang akon manghod nga babayi nagtuon sa Biblia upod sa mga Saksi ni Jehova sa Kununurra, isa ka gamay nga banwa sa Nakatundan nga Australia. Ginpakita niya sa akon ang isa ka larawan sa libro nga Ang Kamatuoran nga Nagadul-ong sa Kabuhi nga Dayon,⁠ * nga naglaragway sang saad sang Biblia nga paraiso nga duta. Ginpakita man niya sa akon sa sining libro nga ang Dios may ngalan, si Jehova, kag nagpainteres ini sa akon. Bangod wala gid ako gintudluan sining mga butang sa amon simbahan, namat-od ako nga tawgan ang mga Saksi ni Jehova sa tion nga makakita na kami sing puluy-an sa Perth.

Apang, daw nagaalang-alang man ako nga manawag sa ila. Nian isa ka gab-i, may nag-doorbell sa amon balay. Nagkadto ang akon bata nga lalaki sa ganhaan kag nagbalik sia nga nagadalidali gid, kag nagsiling, “Ma, ara ang mga tawo nga siling mo tawgan mo.” Daw nahinalian ako kag nagsabat, “Silinga sila nga wala ako!” Apang nagsabat sia, “Ma, indi bala nga siling mo indi ako magbutig.” Bangod ginsaway, ginguwaan ko ang bisita. Sang gintamyaw ko sila, natalupangdan ko nga daw natingala sila. Ang nagapuyo gali anay diri ang luyag nila duawon. Ginpasulod ko sila kag ginpaarakan sing mga pamangkot apang nasabat nila ini tanan paagi sa Biblia.

 Pagkasunod nga semana, regular ako nga nagtuon sa Biblia sa mga Saksi sa libro nga Ang Kamatuoran nga Nagadul-ong sa Kabuhi nga Dayon. Napukaw liwat ang akon kaluyag sa pagtuon tuhoy sa Dios. Pagligad sang duha ka semana nagtambong ako sa Memoryal sang kamatayon ni Cristo Jesus. Nagtambong man ako sa mga miting kada Domingo, kag wala magdugay nagtambong man ako sa mga miting sa tungatunga sang semana. Ginpaambit ko man sa iban ang akon natun-an. Nasapwan ko nga ang pagbulig sa iban sa pagtuon sa mga kamatuoran sa Biblia nagpauswag sang akon mental kag emosyonal nga kapagros. Anom ka bulan sang ulihi gintugmawan ako sa distrito nga kombension sa Perth.

Samtang nagadalom ang akon kaalam sa Biblia, nahangpan ko ang pagtamod ni Jehova tuhoy sa pagkasagrado sang pag-asawahay, lakip na ang prinsipio sa Biblia nga masapwan sa 1 Corinto 7:13 nga nagasiling: “Ang babayi nga may bana nga di-tumuluo, apang nagasugot sa pagpakigpuyo sa iya, dili niya pagbulagan sia.” Ini nga teksto nagpahulag sa akon nga balikan si Alec.

Pagbalik sa Derby

Nagbalik ako sa Derby sang Hunyo 21, 1979, pagkatapos sang kapin sa lima ka tuig nga paghilayuay namon sang akon bana. Sa pagkamatuod, salakot ang akon ginabatyag kag nagpalibog ako kon ano ang iya mangin reaksion sa akon pagbalik. Nakibot ako nga nalipay gid sia nga nagbalik ako, bisan pa nga nagsiling sia nga nasubuan gid sia nga nangin isa ako sang mga Saksi ni Jehova. Nagsiling sia gilayon nga masimba ako sa ila simbahan, ang ginatambungan ko anay antes ako nagkadto Perth. Ginpaathag ko sa iya nga indi ko ina mahimo. Gintinguhaan ko gid nga magpasakop sa iya kag ginhimo ang akon labing masarangan subong isa ka Cristianong asawa. Gintinguhaan ko man nga makigsugilanon sa iya tuhoy kay Jehova kag sa Iya matahom nga saad sa palaabuton, apang indi sia interesado.

Apang, sang ulihi, wala lamang ginbaton ni Alec ang akon bag-o nga pagsinalayo kundi ginbuligan man niya ako sa galastuhon agod makatambong ako sa mga kombension, mga asambleya, kag subong man sa mga miting kada semana. Nalipay gid ako sang nagbakal sia sing awto​—⁠isa ka mapuslanon gid nga butang sa nabaw-ing nga duog sang Australia​—⁠para magamit ko sa Cristianong ministeryo. Masami nagadayon sang pila ka gab-i sa amon balay ang mga kauturan lakip na ang nagalakbay nga manugtatap. Bangod sini, nakilala ni Alec ang pila ka Saksi, kag daw nanamian man sia sa ila.

Daw Kaangay Ako ni Ezequiel

Nalipay gid ako kon magduaw ang mga kauturan, apang may isa ako ka problema. Nagaisahanon lang ako nga Saksi sa banwa sang Derby. Ang pinakamalapit nga kongregasyon yara sa Broome, 220 kilometros ang kalayuon. Gani ginhimo ko ang akon labing masarangan nga ibantala ang maayong balita. Sa bulig ni Jehova, naghimo ako sing kahimusan kag nagsugod sa pagpamalaybalay. Mabudlay ini para sa akon, apang pirme ko ginapahanumdom ang akon kaugalingon sang ginsiling ni apostol Pablo: “Sa tanan nga butang may kusog ako bangod sa iya nga nagahatag sing gahom sa akon.”​—⁠Filipos 4:13.

Wala nalipay ang pari sa amon duog sa akon ginahimo, ilabi na sa akon pagpanaksi sa mga masigka-Aborigine. Ginpahog nila ako kag ginpauntat sa pagbantala. Bangod sang ila pagpamatok, nangin determinado pa gid ako nga magpadayon, kag pirme ako nagapangayo sing bulig kay Jehova sa pangamuyo. Masami ko ginadumdom ang makapalig-on nga mga pulong nga ginhatag kay Ezequiel: “Yari karon! Ang imo guya ginpatig-a ko subong sang ila mga guya kag ang imo agtang subong katig-a sang ila mga agtang. Ginhimo ko nga matig-a kaangay sang brilyante  ang imo agtang nga mas matig-a pa sa santikan. Dili ka mahadlok sa ila, ukon mahangawa sa ila mga nawong.”​​—⁠Ezequiel 3:​8, 9.

Samtang nagapamalaklon ako, pila ka beses nga ginpalapitan ako sang duha ka lalaki gikan sa unyon sang Methodist, Presbyterian kag Congregational Church sa Australia. Ginyaguta nila ako nga nagasinggitan agod mabatian ini sang iban nga bumalakal. Wala ko lang sila pagsapaka. Isa ka tion, sang nagbalik-duaw ako sa isa ka interesado nga babayi, ginkadtuan ako sang ministro sang isa ka simbahan kag ginpatupatuan ako nga wala ako nagapati kay Jesus. Ginbuklas niya ang Biblia sa akon kamot, daw halos inuno ini sa akon guya kag gulpi ini nga ginbalik sa akon kamot. Gintulok ko sia diretso sa mata, ginkutlo ko sing malulo apang sing malig-on ang Juan 3:16 kag ginsingganan sia nga nagatuo ako kay Jesus. Daw kinum-an sia sa akon may kompiansa nga sabat kag naglakat nga wala nakatingog.

Nanamian ako magbantala sa mga Aborigine sa Derby. Gintinguhaan sang isa ka pari nga punggan ako sa pagkadto sa mga tawo sa isa ka partikular nga komunidad, apang ginsaylo sia. Gani, napaambit ko sa ila ang mensahe sang Biblia. Handum ko gid nga mangin misyonera kaangay sang akon tiya, kag ang ginahimo ko karon hilikuton sang isa ka misyonera, nagabulig sa iban sa pagtuon sa Pulong sang Dios. Madamo sa mga Aborigine ang nagbaton sa akon ginabantala, kag nakasugod ako sing pila ka pagtuon sa Biblia.

Mahunahunaon sa Akon Espirituwal nga Kinahanglanon

Sa sulod sang lima ka tuig, nagaisahanon lang ako nga Saksi ni Jehova sa Derby. Mabudlay ang pagpabilin nga malig-on sa espirituwal nga wala sing pagpalig-on gikan sa regular nga mga miting upod sa mga masigkatumuluo. Isa ka tion, naluyahan gid ako sing buot, gani ginmaneho ko ang amon salakyan. Sang magpauli ako sadto nga hapon, nagahulat sa akon ang isa ka utod  nga babayi kag ang iya pito ka kabataan. Gindal-an nila ako sing suplay nga literatura halin sa malayo nga kongregasyon sa Broome. Kutob sadto, ining utod nga babayi nga si Betty Butterfield naghimo sing kahimusan nga magkadto sa Derby makaisa sa isa ka bulan kag mag-upod sa akon sa talipuspusan sang semana. Upod kami nga nagbantala kag nagtuon sang Ang Lalantawan sa amon balay. Kag nagakadto man ako sa Broome makaisa sa isa ka bulan.

Mabinuligon gid ang mga kauturan sa Broome kag kon kaisa nagabiyahe sila sing malayo pa Derby agod buligan ako sa pagbantala. Ginpalig-on nila ang mga utod nga makalabay sa Derby nga duawon kag updan ako sa ministeryo. Gindal-an man ako sining mga kauturan sang mga tape sang mga pamulongpulong publiko. Ang iban nagbuylog sa akon sa pagtuon sa Ang Lalantawan. Ining malip-ot nga mga pagduaw makapalig-on gid.

Manug-abot Pa nga Bulig

Sa sulod sang pila ka tuig, napalig-on pa gid ako sang mag-abot sanday Arthur kag Mary Willis, isa ka retirado nga mag-asawa gikan sa nabagatnan nga bahin sang Nakatundan nga Australia, sa pagbulig sa akon sa sulod sang tatlo ka bulan sa tion nga mas mabugnaw ang panahon. Si Utod Willis ang nagdumala sang kalabanan nga mga miting kag nagpanguna sa paggua sa latagon. Ululupod kami nga nagalakbay pakadto sa nabaw-ing nga mga bahin sang Kimberley Plateau, nga nagaduaw sa mga rantsuhan sa sining malayo nga mga duog. Sa tagsa ka tion nga magpauli gani ang mag-asawa nga Willis, nasubuan gid ako.

Sang ulihi, sang talipuspusan sang 1983, nakabaton ako sing makalilipay nga balita nga isa ka pamilya​—⁠sanday Danny kag Denise Sturgeon kag ang ila apat ka bata nga lalaki​—⁠ang magapuyo sa Derby. Sang nag-abot sila, naghiwat kami sing regular nga mga miting kada semana kag ulupod kami nga naggua sa latagon. Sang 2001 isa ka kongregasyon ang natukod. Sa karon, ang Derby isa na ka malig-on nga kongregasyon nga may 24 ka manugbantala sang Ginharian, nga may duha ka gulang kag isa ka ministeryal nga alagad nga nagaatipan sa amon sa espirituwal. Kon kaisa, nagalab-ot kami 30 nga nagatambong sa mga miting.

Kon panumdumon ko ang nagligad, nalipay gid ako nga makita kon paano ako ginbuligan ni Jehova nga maalagad sia. Bisan nga indi pa Saksi ang akon bana, padayon niya nga ginasakdag ako sa iban nga mga paagi. Lima ka katapo sang akon pamilya ang nangin bawtismado nga Saksi​—⁠ang akon duha ka bata nga babayi, duha ka apo nga babayi, kag ang isa ka hinablos nga babayi. Dugang pa, madamo sang akon mga paryente ang nagatuon sa Biblia upod sa katawhan ni Jehova.

Nagapasalamat gid ako nga ginbuligan ako ni Jehova nga makita sia. Determinado ako nga mangin Iya ako sing dayon.​​—⁠Psalm 65:2

[Mga nota]

^ par. 14 Ginbalhag sang mga Saksi ni Jehova apang wala na karon ginaimprinta.

[Mapa/Mga retrato sa pahina 15]

(Para sa aktual nga pormat, tan-awa ang publikasyon)

AUSTRALIA

Wyndham

Kimberley Plateau

Derby

Broome

Perth

[Credit Lines]

Kangaroo and lyrebird: Lydekker; koala: Meyers

[Retrato sa pahina 14]

Nagatrabaho bilang isa ka nars sa ospital sa Wyndham sang 1953

[Retrato sa pahina 15]

Ang kongregasyon sang Derby, 2005