Magdiretso sa kaundan

Magdiretso sa listahan sang kaundan

Ang Pagpangita sang Pagkamatarong Magaamlig sa Aton

Ang Pagpangita sang Pagkamatarong Magaamlig sa Aton

 Ang Pagpangita sang Pagkamatarong Magaamlig sa Aton

“Gani, padayon nga pangitaa anay . . . ang iya [sang Dios] pagkamatarong.”​—⁠MATEO 6:33.

1, 2. Ano nga desisyon ang ginhimo sang isa ka Cristianong lin-ay, kag ngaa amo sina ang nangin desisyon niya?

ISA ka Cristianong lin-ay sa Asia ang nagtrabaho subong sekretarya sa isa ka opisina sang gobierno. Mapisan sia, temprano pa nagaabot sa trabaho kag wala nagapabuyanbuyan. Apang, bangod indi permanente ang iya trabaho, ginkinahanglan nga binagbinagon ini liwat. Ginsilingan sang pangulo sang departamento ang lin-ay nga mangin permanente sia sa trabaho kag taasan pa sing posisyon, sa kondisyon nga makigrelasyon sia sa iya. Gilayon nga gindis-ayrihan ini sang lin-ay, bisan pa nagakahulugan ini nga madulaan sia sing trabaho.

2 Sayop bala ang nangin desisyon sining Cristianong lin-ay? Indi, kay matutom niya nga gintuman ang ginsiling ni Jesus: “Gani, padayon nga pangitaa anay . . . ang iya [sang Dios] pagkamatarong.” (Mateo 6:33) Para sa iya, ang pagsunod sa matarong nga mga prinsipio mas importante sangsa pagtigayon sing mataas nga posisyon paagi sa paghimo sing seksuwal nga imoralidad.​​—⁠1 Corinto 6:⁠18.

Ang Importansia sang Pagkamatarong

3. Ano ang pagkamatarong?

3 Ang “pagkamatarong” nagakahulugan sang pagsunod sa mga prinsipio sang moral kag pagkabunayag. Sa Biblia, ang Griego kag Hebreo nga mga tinaga sini nagakahulugan sing “pagkabunayag” ukon “pagkatadlong.” Indi ini pagpakamatarong-sa-kaugalingon, nga ginahukman ang kaugalingon paagi sa kaugalingon nga mga talaksan. (Lucas 16:15) Pagkatadlong ini nahisanto sa mga talaksan ni Jehova. Pagkamatarong ini sang Dios.​​—⁠Roma 1:​17; 3:⁠21.

4. Ngaa importante ang pagkamatarong sa isa ka Cristiano?

4 Ngaa importante ang pagkamatarong? Bangod si Jehova, ang “matarong nga Dios,” nahamuot sa iya mga katawhan kon nagahimo sila sing pagkamatarong. (Salmo 4:⁠1; Hulubaton 2:​20-​22; Habacuc 1:13) Ang bisan sin-o nga nagahimo sing pagkadimatarong indi puede mangin suod sa iya. (Hulubaton 15:8) Amo kon ngaa ginlaygayan ni apostol Pablo si Timoteo: “Palagyo ka sa mga kailigbon nga pinamatan-on, apang tinguhai ang pagkamatarong,” upod ang iban pa importante nga mga kinaiya. (2 Timoteo 2:22) Amo man sini kon ngaa, ginlakip ni Pablo ang “limbutong sang pagkamatarong” sang ginlista niya ang nanuhaytuhay nga bahin sang aton espirituwal nga hinganib.​—⁠Efeso 6:14.

5. Paano mapangita sang di-himpit nga mga tinuga ang pagkamatarong?

5 Sa pagkamatuod, wala sing tawo ang matarong sa bug-os nga kahulugan. Ang tanan nakapanubli sing pagkadihimpit gikan kay Adan, kag ang tanan makasasala, di-matarong, sugod sa pagkabun-ag. Apang, nagsiling si Jesus nga dapat naton pangitaon ang pagkamatarong. Paano ina mangin posible? Posible ina bangod ginhatag ni Jesus ang iya himpit nga kabuhi subong gawad para sa aton, kag kon magtuo kita sa sini nga halad, handa si Jehova nga patawaron ang aton mga sala. (Mateo 20:28; Juan 3:​16; Roma 5:​8, 9, 12, 18) Sa sina rason, samtang ginatun-an naton ang matarong nga mga talaksan ni Jehova kag ginahimo ang bug-os naton nga masarangan sa pagtuman sini​—⁠nagapangayo sing bulig paagi sa pangamuyo nga malandas naton ang aton mga kaluyahon​—⁠ginabaton ni Jehova ang aton pagsimba. (Salmo 1:⁠6; Roma 7:​19-​25; Bugna 7:​9, 14) Daw ano gid ina ka makalulugpay!

Matarong sa Isa ka Di-matarong nga Kalibutan

6. Ngaa ang kalibutan isa ka makatalagam nga duog para sa mga Cristiano sang una?

6 Sang mabaton sang mga disipulo ni Jesus ang  sugo nga mangin mga saksi niya “tubtob sa ukbong sang duta,” nag-atubang sila sing mabudlay nga sitwasyon. (Binuhatan 1:8) Ang tanan nga teritoryo nga gin-asayn sa ila “yara sa gahom sang isa nga malauton,” si Satanas. (1 Juan 5:19) Ang kalibutan naimpluwensiahan sang malaut nga mga panimuot nga ginapasanyog niya, kag ang mga Cristiano mahimo madayag sa makalalaton nga impluwensia sini. (Efeso 2:2) Para sa ila, ang kalibutan isa ka makatalagam nga duog. Paagi lamang sa pagpangita anay sang pagkamatarong sang Dios nga makabatas sila kag mahuptan ang ila integridad. Ang kalabanan nga mga Cristiano sang una nakabatas matuod, apang may pila nga wala na naglakat sa “dalanon sang pagkamatarong.”​​—⁠Hulubaton 12:28; 2 Timoteo 4:⁠10.

7. Ano nga mga responsibilidad ang nagaobligar sa isa ka Cristiano nga pamatukan ang malaut nga mga impluwensia?

7 Ang kalibutan bala karon mas di-makatalagam para sa mga Cristiano? Indi gid! Mas malaut pa ini sangsa unang siglo. Wala labot pa sa sina, si Satanas gintagbong sa duta kag mapintas nga nakig-away batok sa hinaplas nga mga Cristiano, ang “mga nabilin sang iya [sang babayi nga] binhi, nga nagatuman sang mga sugo sang Dios kag may hilikuton sa pagpanaksi tuhoy kay Jesus.” (Bugna 12:​12, 17) Ginasalakay man ni Satanas ang tanan nga nagasuportar sa sini nga “binhi.” Apang, ang mga Cristiano indi makapalagyo gikan sa kalibutan. Bisan pa indi sila bahin sang kalibutan, kinahanglan sila magpuyo sa sini. (Juan 17:​15, 16) Kag kinahanglan sila magbantala sa sini agod pangitaon ang mga tawo nga husto nga nahuyog kag tudluan sila agod mangin mga disipulo ni Cristo. (Mateo 24:14; 28:​19, 20) Busa, sanglit indi malikawan sang bug-os sang mga Cristiano ang malaut nga mga impluwensia sining kalibutan, dapat nila ini pamatukan. Binagbinagon naton ang apat sa sini nga mga impluwensia.

Ang Malaut nga Impluwensia sang Imoralidad

8. Ngaa ang mga Israelinhon nagsugod sa pagsimba sa mga dios sang mga Moabinhon?

8 Sa hingapusan nga bahin sang ila 40 ka tuig nga pagpanglakaton sa kahanayakan, madamo nga Israelinhon ang nagbiya sa dalanon sang pagkamatarong. Nasaksihan nila ang madamo nga buhat sang pagluwas ni Jehova, kag sa dili madugay magasulod na sila sa Ginsaad nga Duta. Apang, sa sinang ital-ital nga tion, nagsugod sila sa pag-alagad sa mga dios sang mga Moabinhon. Ngaa? Nagpadala sila sa “kailigbon sang unod.” (1 Juan 2:16) Ang rekord nagasiling: “Ang katawhan nagsugod sa pagpakighilawas sa mga anak nga babayi sang Moab.”​—⁠Numeros 25:1.

9, 10. Anong sitwasyon karon ang nagapakita nga importante gid nga dumdumon pirme ang malaut nga impluwensia sang sayop nga mga kailigbon sa unod?

9 Ginapakita sadto nga hitabo kon paano ang sayop nga mga kailigbon sa unod makapalain sa mga di-mabinantayon. Dapat makatuon kita sing leksion gikan sa sini, ilabi na bangod ang imoralidad lapnag nga ginatamod subong kalahamut-an nga estilo sang pagkabuhi. (1 Corinto 10:​6, 8) Ang isa ka report gikan sa Estados Unidos nagasiling: “Antes sang mga 1970, ang pagpuyopuyo [pagpuy-anay sang isa ka babayi kag isa ka lalaki nga indi kasal] ilegal sa tanan nga estado sang Amerika. Sa karon, kinaandan na lang ini. Kapin sa katunga sang tanan nga nagpakasal sa una nga tion ang nagpuyopuyo anay antes sang ila kasal.” Ini kag ang kaanggid nga lugak nga paggawi sa moral indi lamang makita sa isa ka pungsod. Makita ini sa bilog nga kalibutan, kag sing makapasubo, ginhimo man ini sang pila ka Cristiano​—⁠ginsikway pa gani sila sa Cristianong kongregasyon.​​—⁠1 Corinto 5:⁠11.

10 Dugang pa, ang mga propaganda nga nagapasanyog  sang imoralidad daw makita na lang bisan diin. Ginapakita sang mga pelikula kag sang mga programa sa telebisyon nga daw wala lang sing problema kon ang mga pamatan-on maghuliray antes sang kasal. Ang homoseksuwal nga mga relasyon ginapakita subong normal lamang. Kag madamo nga palaguaon ang nagapakita sing labi ka detalyado nga pagpakigsekso. Ang mga laragway sang detalyado nga pagpakigsekso mahapos lang matigayon sa Internet. Halimbawa, isa ka kolumnista sang pamantalaan ang nagreport nga ang iya siete-anyos nga bata nga lalaki nagpauli halin sa eskwelahan kag makunyagon nga nagsugid nga ang iya amigo sa eskwelahan nakakita sang isa ka site sa Internet nga nagapakita sang hublas nga mga babayi nga nagapakigsekso. Kinugmat ang iya amay, apang pila ayhan ka kabataan ang nakakita sini nga mga site nga wala nagapanugid sa ila mga ginikanan? Dugang pa, pila ayhan ka ginikanan ang nakahibalo kon ano ang kaundan sang mga video game nga ginahampang sang ila kabataan? Madamong popular nga video game ang nagapakita sing makangilil-ad nga imoralidad, subong man sing demonismo kag kasingki.

11. Paano maamligan ang isa ka pamilya batok sa imoralidad sang kalibutan?

11 Paano mapamatukan sang isa ka pamilya ining makapalain nga “kalingawan”? Paagi sa pagpangita anay sang pagkamatarong sang Dios, nga amo ang paglikaw sa bisan ano nga butang nga imoral. (2 Corinto 6:​14; Efeso 5:3) Ang mga ginikanan nga nagabantay sing nagakaigo sa ginahimo sang ila mga kabataan kag ginapatudok sa ila mga kabataan ang gugma kay Jehova kag sa iya matarong nga mga kasuguan nagaamlig sa ila batok sa pornograpiya, pornograpiko nga mga video game, imoral nga mga pelikula, kag iban pa di-matarong nga pagsulay​​—⁠Deuteronomio 6:​4-9.⁠ *

Ang Katalagman nga Maimpluwensiahan sang Komunidad

12. Ano nga problema ang nag-utwas sang unang siglo?

12 Sang si Pablo didto sa Listra sa Asia Minor, milagruso niya nga gin-ayo ang isa ka tawo. Ang rekord nagasiling: “Sang makita sang mga kadam-an ang ginhimo ni Pablo, ginbaskog nila ang ila mga tingog, nga nagasiling sa hambal nga Licaonianhon: ‘Ang mga dios nangin subong sang mga tawo kag nanaug sa aton!’ Kag gintawag nila si Bernabe nga Zeus, apang Hermes naman si Pablo, bangod sia ang nagapanguna sa paghambal.” (Binuhatan 14:​11, 12) Sang ulihi luyag patyon sang amo man nga kadam-an sanday Pablo kag Bernabe. (Binuhatan 14:19) Maathag gid nga yadto nga mga tawo madali gid maimpluwensiahan sang komunidad. Mahimo nga sang ang mga tawo gikan sa sina nga rehiyon nangin Cristiano, mapinatihon gihapon sila sa mga disparatis. Sa iya sulat sa mga Cristiano sa Colosas, si Pablo nagpaandam batok sa “pagsimba sa mga anghel.”​​—⁠Colosas 2:⁠18.

13. Ano ang pila ka kustombre nga dapat likawan sang isa ka Cristiano, kag paano sia makatigayon sing kusog sa paghimo sini?

13 Sa karon, dapat man likawan sang matuod nga mga Cristiano ang ginabaton sang kalabanan nga mga kustombre pasad sa sayop nga relihioso nga mga ideya nga supak sa Cristianong mga prinsipio. Halimbawa, sa pila ka kadutaan, madamong namat-an na nga mga seremonya may kaangtanan sa pagkabun-ag kag kamatayon ang pasad sa kabutigan nga may yara kita di-mamalatyon nga espiritu.  (Manugwali 9:​5, 10) May mga kadutaan nga ang kustombre amo ang female genital mutilation.⁠ * Isa ini ka mapintas, di-kinahanglanon nga buhat nga wala nagahisanto sa mahigugmaon nga pag-atipan nga dapat ihatag sang Cristianong mga ginikanan sa ila kabataan. (Deuteronomio 6:​6, 7; Efeso 6:4) Paano mapamatukan sang mga Cristiano ang mga pag-ipit sang komunidad kag sikwayon ining mga buhat? Paagi sa pagsalig sing bug-os kay Jehova. (Salmo 31:6) Pabakuron kag atipanon sang matarong nga Dios ang mga nagasiling sa iya sing tinagipusuon: “Ikaw ang akon dalangpan kag ang akon kuta, ang akon Dios, nga akon ginasaligan.”​—⁠Salmo 91:⁠2; Hulubaton 29:25.

Indi Pagkalimti si Jehova

14. Ano nga paandam ang ginhatag ni Jehova sa mga Israelinhon wala magdugay antes sila magsulod sa Ginsaad nga Duta?

14 Wala madugay antes magsulod ang mga Israelinhon sa Ginsaad nga Duta, ginpaandaman sila ni Jehova nga indi nila sia pagkalimtan. Nagsiling sia: “Maghalong ka nga basi malipatan mo si Jehova nga imo Dios amo nga indi mo matuman ang iya mga sugo kag ang iya hudisyal nga mga desisyon kag ang iya mga palatukuran nga ginasugo ko karon sa inyo; kay basi magkaon ka kag mabusog, kag magpatindog ka sing maayo nga mga balay kag magpuyo sa sini, kag magdamo ang imo mga baka kag mga panong, kag magdamo ang imo pilak kag bulawan, kag ang tanan nga pagkabutang mo magdamo; kag ang imo tagipusuon magpabugal kag imo malipatan si Jehova nga imo Dios.”​​—⁠Deuteronomio 8:​11-​14.

15. Paano naton mapat-od nga wala naton ginakalimtan si Jehova?

15 Puede man bala matabo ang kaangay sini karon? Huo, kon may sayop kita nga mga prioridad. Apang, kon ginauna naton ang pagkamatarong sang Dios, ang putli nga pagsimba amo ang mangin labing importante nga butang sa aton kabuhi. Subong sang ginapalig-on sa aton ni Pablo nga himuon, ‘baklon naton ang nagakaigo nga tion’ kag magbatyag sing pagkahilingagawon sa aton ministeryo. (Colosas 4:⁠5; 2 Timoteo 4:2) Apang, kon mas importante sa aton ang paglingawlingaw ukon paglipaylipay sangsa pagtambong sa mga miting kag pag-alagad sa latagon, mahimo naton malimtan si Jehova sa kahulugan nga ginatamod na lang naton sia subong segundaryo sa aton kabuhi. Si Pablo nagsiling nga sa katapusan nga mga adlaw, ang mga tawo mangin “mahigugmaon sa kinasadya sa baylo nga mahigugmaon sa Dios.” (2 Timoteo 3:4) Ang sinsero nga mga Cristiano regular nga nagausisa sang ila kaugalingon agod mapat-od nga indi sila maimpluwensiahan sini nga panghunahuna.​​—⁠2 Corinto 13:5.

Mag-andam sa Independiente nga Panimuot

16. Ano ang sayop nga panimuot ang ginpakita ni Eva kag sang pila sang panahon ni Pablo?

16 Sa Eden, madinalag-on nga nasulay ni Satanas ang makagod nga handum ni Eva nga mangin independiente. Luyag ni Eva maghimo sang iya kaugalingon nga mga desisyon tuhoy sa kon ano ang husto kag sayop. (Genesis 3:​1-6) Sang unang siglo, may amo sini nga independiente nga panimuot ang pila sa kongregasyon sang Corinto. Abi nila mas maalam sila sangsa kay Pablo, amo kon ngaa mayubiton sila nga gintawag ni Pablo nga lutaw nga mga apostoles.​​—⁠2 Corinto 11:​3-5; 1 Timoteo 6:​3-5.

17. Paano naton malikawan nga magpalambo sing independiente nga panimuot?

17 Sa kalibutan karon, madamo ang “matig-a sing ulo, nagahabok sa pagpadayaw,” kag ang pila  ka Cristiano naimpluwensiahan sini nga panghunahuna. Ang pila nangin mga manugpamatok pa gani sang kamatuoran. (2 Timoteo 3:⁠4; Filipos 3:18) May kaangtanan sa putli nga pagsimba, importante nga kay Jehova kita mangayo sing panuytoy kag makigkooperar sa “matutom kag mainandamon nga ulipon” kag sa mga gulang sang kongregasyon. Isa ini ka paagi sa pagpangita sang pagkamatarong, kag nagaamlig ini sa aton agod indi kita magpalambo sang independiente nga panimuot. (Mateo 24:45-47; Salmo 25:​9, 10; Isaias 30:21) Ang kongregasyon sang mga hinaplas “isa ka haligi kag pamakod sang kamatuoran.” Gintukod ini ni Jehova agod amligan kag tuytuyan kita. (1 Timoteo 3:15) Ang pagkilala sa importante nga papel sini magabulig sa aton nga ‘indi maghimo sing bisan ano bangod sang egotismo’ samtang mapainubuson kita nga nagapasakop sa matarong nga kabubut-on ni Jehova.​—⁠Filipos 2:2-4; Hulubaton 3:4-6.

Mangin mga Manug-ilog ni Jesus

18. Ginapalig-on kita nga ilugon si Jesus sa anong mga paagi?

18 Tuhoy kay Jesus, ang Biblia matagnaon nga nagsiling: “Ginhigugma mo ang pagkamatarong kag gindumtan mo ang pagkamalaut.” (Salmo 45:⁠7; Hebreo 1:9) Daw ano kaayo nga panimuot nga dapat ilugon! (1 Corinto 11:1) Wala lamang nahibaluan ni Jesus ang matadlong nga mga talaksan ni Jehova; ginhigugma niya ini. Gani sang ginsulay sia ni Satanas sa kahanayakan, malig-on nga ginpangindian ni Jesus nga mapatalang gikan “sa banas sang pagkamatarong.”​—⁠Hulubaton 8:20; Mateo 4:3-11.

19, 20. Ano ang maayo nga mga resulta sang pagpangita sang pagkamatarong?

19 Matuod, mahimo mangin mabaskog ang di-matarong nga mga kailigbon sang unod. (Roma 7:​19, 20) Apang, kon ginapabaloran naton ang pagkamatarong, magapabaskog ini sa aton nga pamatukan ang kalautan. (Salmo 119:165) Ang tudok nga gugma sa pagkamatarong magaamlig sa aton kon ginasulay kita nga maghimo sing sayop. (Hulubaton 4:​4-6) Dumduma nga kon magpasulay kita, ginahatagan naton sing kadalag-an si Satanas. Daw ano gid kaayo nga pamatukan naton sia kag hatagan sing kadalag-an si Jehova!​​—⁠Hulubaton 27:11; Santiago 4:​7, 8.

20 Bangod ginapangita nila ang pagkamatarong, ang matuod nga mga Cristiano “napun-an sang mga bunga sang pagkamatarong nga paagi kay Jesucristo, sa kahimayaan kag kadayawan sang Dios.” (Filipos 1:​10, 11) Nagasuksok sila sing “bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efeso 4:24) Natungod sila kay Jehova kag nagakabuhi agod alagdon sia, indi agod pahamut-an ang ila kaugalingon. (Roma 14:⁠8; 1 Pedro 4:2) Amo ini ang nagatuytoy sang ila mga hunahuna kag mga buhat. Daw ano gid nga kalipay ang ila ginahatag sa tagipusuon sang ila langitnon nga Amay!​​—⁠Hulubaton 23:24.

[Mga nota]

^ par. 11 Ang mapuslanon nga mga panugda para sa mga ginikanan tuhoy sa pag-amlig sa pamilya batok sa imoral nga mga impluwensia masapwan sa libro nga Ang Sekreto Sang Kalipay sa Pamilya, nga ginbalhag sang mga Saksi ni Jehova.

^ par. 13 Ang female genital mutilation ginatawag anay nga pagsirkunsidar sa mga babayi.

Mapaathag Mo Bala?

• Ngaa importante nga pangitaon ang pagkamatarong?

• Paano mapangita sang isa ka di-himpit nga Cristiano ang pagkamatarong?

• Ano ang pila ka butang sa kalibutan nga dapat likawan sang isa ka Cristiano?

• Paano makaamlig sa aton ang pagpangita sa pagkamatarong?

[Mga Pamangkot sa Pagtinuon]

[Retrato sa pahina 26]

Para sa mga sumulunod ni Jesus, ang kalibutan isa ka makatalagam nga duog

[Retrato sa pahina 27]

Ang mga kabataan nga ginatudluan nga higugmaon si Jehova mangin mabakod sa paglikaw batok sa imoralidad

[Retrato sa pahina 28]

Nalimtan sang pila ka mga Israelinhon si Jehova sang naghamungaya sila sa Ginsaad nga Duta

[Retrato sa pahina 29]

Kaangay ni Jesus, ginadumtan sang mga Cristiano ang pagkadimatarong