Mga Pamangkot Gikan sa mga Bumalasa

Mahuptan bala sang isa ka Cristiano ang matinlo nga konsiensia kon batunon niya ang trabaho nga nagakinahanglan nga mag-uyat sia sing armas?

Ginatuman gid sang mga Saksi ni Jehova sa bug-os nga kalibutan ang ila hatag-Dios nga responsibilidad nga amanan sa materyal nga paagi ang ila pamilya. (1 Timoteo 5:8) Apang, may pila ka sahi sang trabaho nga maathag nga supak sa mga prinsipio sa Biblia kag dapat ini likawan. Nagalakip ini sa mga trabaho nga may kaangtanan sa sugal, sa di-nagakaigo nga paggamit sing dugo, kag sa pagpalig-on sa paggamit sing tabako. (Isaias 65:11; Binuhatan 15:29; 2 Corinto 7:⁠1; Colosas 3:5) May pila ka sahi sang trabaho, nga bisan pa wala ginapakamalaut sing direkta sang Biblia, nagatublag sa konsiensia sang isa ukon sang iban.

Yara na sa isa kon batunon niya ang trabaho nga nagakinahanglan nga mag-uyat sia sing pusil ukon sing iban nga armas. Apang, ang isa nga nagauyat sing armas sa trabaho posible nga makasala sa dugo kon kinahanglan niya ini gamiton. Gani, dapat anay binagbinagon sing mapangamuyuon sang isa ka Cristiano kon bala handa sia sa paggamit sing armas kon may kabuhi na nga nataya. Ang pag-uyat sing armas nagapadayag man sa isa sa katalagman nga masamaran ukon mapatay bangod sang pag-atake ukon pagtimalos.

Mahimo maapektuhan man ang iban sang desisyon sang isa. Halimbawa, ang panguna nga responsibilidad sang isa ka Cristiano amo ang pagbantala sang maayong balita sang Ginharian sang Dios. (Mateo 24:14) Puede bala ang isa magtudlo sa iban nga “magpakighidait sa tanan nga tawo,” kon sia mismo nagauyat sing armas sa iya trabaho? (Roma 12:18) Kamusta naman ang mga kabataan ukon ang iban nga katapo sang pamilya? Mabutang bala sa katalagman ang ila kabuhi kon may pusil sa balay? Dugang pa, mahimo bala masandad ang iban sa mangin desisyon sang isa?​​—⁠Filipos 1:⁠10.

Sa sining “katapusan nga mga adlaw,” nagadamo pa gid ang mga tawo nga “mabangis, wala sing gugma sa pagkamaayo.” (2 Timoteo 3:​1, 3) Nakahibalo sini, mahimo ayhan ang isa mangin “hilway sa panumbungon” kon makaengkwentro sia sining mga tawo bangod ginpili niya ang trabaho nga magauyat sia sing armas? (1 Timoteo 3:10) Indi gid. Pasad sa sini, indi sia pagkabigon sang kongregasyon nga “di-salabdungon” kon padayon sia gihapon nga mag-uyat sing armas bisan sa tapos nga mainayuhon nga ginlaygayan gikan sa Biblia. (1 Timoteo 3:⁠2; Tito 1:​5, 6) Gani, ini nga lalaki ukon babayi indi mahatagan sing bisan anong pinasahi nga mga pribilehiyo sa kongregasyon.

Ginpasalig ni Jesus ang iya mga disipulo nga kon unahon nila ang intereses sang Ginharian sa ila kabuhi, indi sila dapat nga mabalaka gid sa ila mga kinahanglanon. (Mateo 6:​25, 33) Sa pagkamatuod, kon magsalig kita sing bug-os kay Jehova, “sia gid magaalay-ay sa [aton]. Indi gid sia magtugot nga malingkang ang matarong.”​​—⁠Salmo 55:22.