Magdiretso sa kaundan

Magdiretso sa listahan sang kaundan

Nahangpan Mo Bala ang Tanda sang Presensia ni Jesus?

Nahangpan Mo Bala ang Tanda sang Presensia ni Jesus?

 Nahangpan Mo Bala ang Tanda sang Presensia ni Jesus?

WALA sing luyag magmasakit sing grabe ukon mabiktima sang kalamidad. Agod malikawan ini nga mga kalamidad, ang isa ka maalam nga tawo alerto sa mga tanda nga nagapatimaan sing katalagman kag pagkatapos, nagahimo sia sing nagakaigo nga aksion. Ginsambit ni Jesucristo ang isa ka partikular nga tanda nga dapat naton mahangpan. Ina nga tanda magaapektar sa bug-os nga kalibutan kag sa tanan nga katawhan. Nagalakip ina sa imo kag sa imo pamilya.

Naghambal si Jesus tuhoy sa Ginharian sang Dios, nga amo ang magadula sang kalautan kag magahimo sang duta nga isa ka paraiso. Napukaw ang interes sang iya mga disipulo sa sini kag luyag nila mahibaluan kon san-o magaabot ina nga Ginharian. Namangkot sila: “Ano ang mangin tanda sang imo presensia kag sang katapusan sang sistema sang mga butang?”​—⁠Mateo 24:3.

Nahibaluan ni Jesus nga kon mapatay na sia kag mabanhaw, mga siniglo pa ang magaligad antes sia palingkuron sa trono sa langit subong Mesianikong Hari nga magagahom sa katawhan. Sanglit indi makita sang mga tawo ang iya paglingkod sa trono, naghatag si Jesus sing tanda agod marealisar sang iya mga sumulunod ang iya “presensia” kag ang “katapusan sang sistema sang mga butang.” May madamo nga bahin ini nga tanda, nga nagahuman sing isa ka kabilugan nga tanda, ukon sinyales​—⁠ang tanda sang presensia ni Jesus.

Mahalungon nga ginrekord sang mga manunulat sang Ebanghelyo nga sanday Mateo, Marcos, kag Lucas ang sabat ni Jesus. (Mateo, kapitulo 24 kag 25; Marcos, kapitulo 13; Lucas, kapitulo 21) Ang iban nga mga manunulat sang Biblia nagdugang sing mga detalye sa tanda. (2 Timoteo 3:1-5; 2 Pedro 3:​3, 4; Bugna 6:1-8; 11:18) Kulang ang espasyo kon usisaon naton ang tanan nga detalye, apang binagbinagon naton ang lima ka nagapanguna nga bahin sang tanda nga ginsambit ni Jesus. Makita mo nga mapuslanon kag importante gid nga binagbinagon mo ini.​—⁠Tan-awa ang kahon sa pahina 6.

“Isa ka Pagbag-o Padulong sa Bag-o nga Dag-on”

“Ang pungsod magatindog batok sa pungsod kag ang ginharian batok sa ginharian.” (Mateo 24:7) Ang nagabalita nga magasin sang Alemanya  nga Der Spiegel, nagsiling nga antes sang 1914, ang mga tawo “nagpati sa isa ka matahom nga palaabuton nga may kapin nga kahilwayan, progreso, kag kahamungayaan.” Apang nagbag-o ang tanan. “Makakulugmat gid ang inaway nga nagsugod sang Agosto 1914 kag natapos sang Nobiembre 1918. Isa ini ka daku nga pagbag-o sa maragtas sang tawo, nga nagpain sang daan gikan sa bag-o,” siling sang magasin nga GEO. Kapin sa 60 milyones ka soldado gikan sa lima ka kontinente ang nagpakigbahin sa masandukot nga inaway. Sa promedyo, mga 6,000 ka soldado ang ginpatay kada adlaw. Halin sadto, gintamod sang mga istoryador sang tagsa ka kaliwatan kag sang bisan anong politikal nga opinyon “ang mga tuig 1914 tubtob 1918 subong isa ka pagbag-o padulong sa bag-o nga dag-on.”

Ang Bug-os Kalibutan nga Inaway I nagtuga sing permanente nga mga pagbag-o sa katilingban sang tawo kag nagduso sang katawhan sa katapusan nga mga adlaw sining sistema sang mga butang. Dugang pa nga mga inaway, naarmasan nga mga pagbangigay, kag terorismo ang natabo sa nabilin nga bahin sina nga siglo. Wala mag-ayo ang kahimtangan sa nahauna nga mga tuig sang karon nga siglo. Luwas sa inaway, kitaon man ang iban pa nga mga bahin sang tanda.

Tiggulutom, mga Peste, kag mga Linog

“May kakulang sa kalan-on.” (Mateo 24:7) Nag-antos ang Europa sing tiggulutom sang matabo ang nahauna nga bug-os kalibutan nga inaway, kag halin sadto wala na madula sa katawhan ang tiggulutom. Ang istoryador nga si Alan Bullock nagsulat nga sa Rusya kag Ukraine sang 1933, “madamo nga gutom nga mga tawo ang nagdalangdalang patabok sa dulunan . . . Naghinantal ang mga bangkay sa higad sang mga dalan.” Sang 1943, nasaksihan sang dyurnalista nga si T. H. White ang tiggulutom sa probinsia sang Henan sa China. Nagsulat sia: “Sa tion sang tiggulutom, ang halos tanan nga butang ginakaon kag ginabukbok, agod kaunon kag maghatag sing kusog sa lawas sang tawo. Apang mapilitan lamang ang isa ka tawo nga kaunon ang isa ka butang nga tubtob karon wala ginakaon kon ang iya kabuhi yara sa katalagman.” Makapasubo nga halos kinaandan na ang tiggulutom sa Aprika sining nagligad nga mga dekada. Bisan pa ang pagkaon nga ginapatubas sang duta bastante para sa tanan, ginabanta sang UN Food and Agriculture Organization nga hawothawot ang ginakaon sang 840 milyones ka tawo sa bug-os nga kalibutan.

“Sa nagakalainlain nga mga duog may mga peste.” (Lucas 21:11) “Ginabanta nga 20 milyones tubtob 50 milyones ka tawo ang napatay sa trangkaso Espanyola sang 1918, kapin pa sa napatay sa salot nga gintawag black death ukon sa nahauna nga bug-os kalibutan nga inaway,” report sang Süddeutsche Zeitung. Kutob sadto, madamo gid ang gindunggo sang balatian nga malaria, tipdas, anus, polio, kag kolera. Kag naalarma ang kalibutan nga ang AIDS padayon gihapon nga nagalapnag. Kalatingalahan nga wala gihapon karon matapna ang balatian samtang dalayawon gid ang pag-uswag sang  medisina. Tubtob karon wala gihapon mahangpan sang katawhan nga isa ini ka maathag nga pamatuod nga nagakabuhi na kita sa indi kinaandan nga mga tion.

“Mga linog.” (Mateo 24:7) Sa sulod sang nagligad nga 100 ka tuig, ginatos ka libo ka tawo ang napatay sa mga linog. Ginapakita sang isa ka tiliman-an nga sa promedyo, halin sang tuig 1914, 18 ka linog kada tuig ang nagakatabo nga ang kabaskugon tuman gid amo nga naguba ang mga bilding kag nagbuka ang duta. Mas makamamatay pa nga mga linog nga makarumpag sing mga bilding ang nagakatabo halos makaisa kada tuig. Walay sapayan sang mga pag-uswag sa teknolohiya, madamo gihapon ang mga nagakapatay bangod sang madasig nga pagdamo sang mga pumuluyo sa mga siudad nga yara sa alagyan sang linog.

Maayo nga Balita!

Ang kalabanan nga bahin sang tanda sang katapusan nga mga adlaw makapasubo. Apang nagsambit man si Jesus sing maayo nga balita.

“Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran.” (Mateo 24:14) Ang hilikuton nga ginsugdan mismo ni Jesus​—⁠ang pagbantala sing maayong balita sang Ginharian​—⁠magadangat sa talipuspusan sa tion sang katapusan nga mga adlaw. Amo gid sini ang nagakatabo karon. Ginabantala sang mga Saksi ni Jehova ang mensahe sang Biblia kag ginatudluan ang mga interesado nga iaplikar sa ila adlaw-adlaw nga pagkabuhi ang ila natun-an. Sa karon, kapin sa anom ka milyon ka Saksi ang nagabantala sa 235 ka kadutaan kag sa kapin sa 400 ka lenguahe.

Talupangda nga wala magsiling si Jesus nga magadulog ang tanan nga aktibidades bangod sang makapasubo nga mga kahimtangan sa kalibutan. Wala man sia magsiling nga isa lamang ka bahin sang tanda ang makita sa bug-os nga kalibutan. Sa baylo, nagtagna sia sing madamo nga hitabo nga sa kabilugan magahuman sing isa ka tanda nga makita sa bug-os nga duta.

Sa baylo nga magtulok sa isa lamang ka partikular nga hitabo, makita mo bala nga pareho ang nagakalatabo, isa ka kabilugan nga tanda nga makita sa bug-os nga kalibutan? Ang nagakatabo sa duta nagaapektar sa imo kag sa imo pamilya. Apang ngaa, mahimo mamangkot  kita, nga pila lamang ka tawo ang nagasapak sini?

Ginauna ang Kaugalingon nga mga Intereses

“No Swimming!,” “High Voltage!,” “Reduce Speed.” Pila ini sang mga karatula kag mga paandam nga makita naton apang masami nga wala ginasapak. Ngaa? Madali kita maimpluwensiahan sang aton ginakabig nga amo ang labing maayo para sa aton. Halimbawa, mahimo nga luyag naton magpadalagan sang aton salakyan sing mas madasig sangsa ginatugot sang kasuguan, ukon mahimo nga luyag gid naton maglangoy sa mga duog nga ginadumilian. Apang indi maalamon nga indi pagsapakon ang nagapaandam nga mga karatula.

Halimbawa, napatay ang mga turista sang matiphag ang duta sa bukid sang Alps nga sakop sang Austria, Italya, Pransia, kag Switzerland bangod wala nila ginsapak ang mga paandam nga nagalaygay sa ila nga mag-ski ukon mag-snowboard (magpadaligdig) sa sigurado lamang nga mga lugar. Suno sa Süddeutsche Zeitung, ang halambalanon sang madamo nga turista nga wala nagasapak sa sini nga mga paandam amo, Wala sing sadya kon wala sing peligro. Apang, ang indi pagsapak sa mga paandam makadul-ong sa makapasubo nga mga resulta.

Ngaa wala ginasapak sang mga tawo ang tanda nga ginsambit ni Jesus? Mahimo nga nabulag sila sang ila handum nga magmanggaranon, nalandas sang ila di-pagsapak, naparalisar sang pag-alang-alang, nabanga sa rutina, ukon nahugakom sang kahadlok nga madula ang ila dungog. Mahimo ayhan nga ang isa sini amo ang kabangdanan kon ngaa wala mo ginasapak ang tanda sang presensia ni Jesus? Indi bala mas maalamon nga kilalahon ang tanda kag maghikot sing nagakaigo?

Ang Kabuhi sa Paraiso nga Duta

Madamo na ang nagapamati sa tanda sang presensia ni Jesus. Si Kristian, isa ka lamharon nga minyo nga lalaki sa Alemanya, nagsulat: “Magal-umon ang panahon karon. Walay duhaduha nga nagakabuhi kita sa ‘katapusan nga mga adlaw.’” Sia kag ang iya asawa nagahinguyang sing daku nga tion sa pagpakighambal sa iban tuhoy sa Mesianikong Ginharian. Si Frank nagapuyo sa amo man nga pungsod. Ginapalig-on nila nga mag-asawa ang iban paagi sa maayong balita sang Biblia. Nagsiling si Frank: “Bangod sang kahimtangan sa kalibutan, madamo karon ang nagakabalaka sa palaabuton. Ginapalig-on namon sila paagi sa mga tagna sang Biblia tuhoy sa isa ka paraiso nga duta.” Sa amo, ginatuman nanday Kristian kag Frank ang isa ka bahin sang tanda ni Jesus​—⁠ang pagbantala sing maayong balita sang Ginharian.​—⁠Mateo 24:14.

Sa talipuspusan sang katapusan nga mga adlaw, laglagon ni Jesus ining daan nga sistema kag ang mga tawo nga nagasuportar sa sini. Nian, ang Mesianikong Ginharian amo ang magadumala sa duta, nga himuon nga Paraiso subong sang gintagna. Sa sina nga tion, mangin hilway na ang katawhan gikan sa balatian kag kamatayon, kag banhawon ang mga patay sa duta. Amo ini ang makalilipay nga mga paglaum nga nagahulat sa mga nagakilala sa tanda sang mga tion. Indi bala maalamon nga hibaluon ang dugang pa tuhoy sa tanda kag kon ano ang dapat himuon sang isa agod maluwas sa katapusan sining sistema? Sa pagkamatuod, isa ini ka butang nga dapat himuon gilayon sang tagsatagsa.​—⁠Juan 17:3.

[Blurb sa pahina 4]

Nagtagna si Jesus sing madamo nga hitabo nga sa kabilugan magahuman sing isa ka tanda nga makita sa bug-os nga duta

[Blurb sa pahina 6]

Makita mo bala nga pareho ang nagakalatabo, isa ka kabilugan nga tanda nga makita sa bug-os nga kalibutan?

[Kahon/Mga retrato sa pahina 6]

MGA TANDA SANG KATAPUSAN NGA MGA ADLAW

Wala pa matabo nga inaway.​—⁠Mateo 24:⁠7; Bugna 6:4

Tiggulutom.​—⁠Mateo 24:⁠7; Bugna 6:​5, 6, 8

Mga Peste.​—⁠Lucas 21:11; Bugna 6:8

Nagadugang nga pagkamalinapason.​—⁠Mateo 24:12

Mga linog.​—⁠Mateo 24:7

Makahalanguyos nga mga tion nga mabudlay pakigbagayan.—⁠2 Timoteo 3:1

Sobra nga gugma sa kuarta.​—⁠2 Timoteo 3:2

Pagkadimatinumanon sa mga ginikanan.​—⁠2 Timoteo 3:2

Wala sing kinaugali nga gugma.​—⁠2 Timoteo 3:3

Mahigugmaon sa mga kinasadya sa baylo nga sa Dios.​—⁠2 Timoteo 3:4

Wala sing pagpugong sa kaugalingon.​—⁠2 Timoteo 3:3

Wala sing gugma sa pagkamaayo.​—⁠2 Timoteo 3:3

Wala nagasapak sa nagapadulong nga katalagman.​—⁠Mateo 24:39

Mga mayubiton nga nagasikway sa pamatuod sang katapusan nga mga adlaw.​—⁠2 Pedro 3:​3, 4

Bug-os kalibutan nga pagbantala sing Ginharian sang Dios.​—⁠Mateo 24:14

[Credit Lines sang retrato sa pahina 5]

WWI soldiers: From the book The World War​​—⁠A Pictorial History, 1919; poor family: AP Photo/Aijaz Rahi; polio victim: © WHO/P. Virot