Magdiretso sa kaundan

Magdiretso sa listahan sang kaundan

Ang Pagpangita sing Kalinong sa Hunahuna

Ang Pagpangita sing Kalinong sa Hunahuna

 Ang Pagpangita sing Kalinong sa Hunahuna

SI Albert malipayon nga nagapangabuhi upod sa iya asawa kag duha ka anak. Apang nabatyagan niya nga may kulang pa sa iya kabuhi. Sang tion nga nagapangita sia sing obra, nadalahig sia sa politika kag nangin sumulunod sang sosialismo. Nangin aktibo pa gani sia nga katapo sang lokal nga partido Komunista.

Apang, wala magdugay, nalugaw-an si Albert sa Komunismo. Gin-untatan niya ang politika kag ginhugod ang iya bug-os nga tion sa iya pamilya. Ang pagpat-od nga mangin malipayon sila amo ang nangin katuyuan sang iya kabuhi. Walay sapayan, nabatyagan gihapon ni Albert nga ang iya kabuhi wala sing kahulugan; wala sia sing kalinong sa hunahuna.

Ang inagihan ni Albert kinaandan lang. Agod masapwan ang makahulugan nga katuyuan sang kabuhi, minilyon ang nagtilaw-tilaw sing lainlain nga mga ideolohiya, mga pilosopiya, kag mga relihion. Sa Nakatundan, ang kahublagan sang mga hippie sang katuigan 1960 isa ka pagrebelde batok sa tradisyunal nga moral kag pamatasan sang katilingban. Ginpangita sang mga pamatan-on ang kalipay kag kahulugan sang kabuhi paagi sa makapierde sa hunahuna nga mga droga kag sa mga pilosopiya sang ginatawag sang kahublagan nga mga guru kag espirituwal nga mga lider. Apang, napaslawan ang kahublagan sang mga hippie sa paghatag sing matuod nga kalipay. Sa baylo, nakaamot pa ini sa pagduging sang mga nagiyan sa droga kag imoral nga mga pamatan-on, nga nagpadasig sa paglugdang sang sosiedad sa kagumon sa moral.

Sa sulod sang mga siglo, madamo ang nagpangita sing kalipay paagi sa manggad, gahom, ukon edukasyon. Nagdul-ong ini sang ulihi sa kabang-awan. “Bisan pa may kabuganaan ang isa ka tawo,”  siling ni Jesus, “ang iya kabuhi indi resulta sang mga butang nga ginapanag-iyahan niya.” (Lucas 12:15) Sa baylo, ang determinado nga pagpangita sing manggad masami nga nagadul-ong sa kasubo. Ang Biblia nagasiling: “Ang mga determinado nga magmanggaranon nagakahulog sa pagsulay kag siod kag sa madamong binuang kag makahalalit nga kailigbon, nga nagatugdang sang mga tawo sa kalaglagan kag kahapayan. Kay ang gugma sa kuarta amo ang gamot sang tanan makahalalit nga mga butang, kag paagi sa paghingamo sini nga gugma ang iban . . . nagbuno sang ila mga kaugalingon sing madamong kasakitan.”​—⁠1 Timoteo 6:​9, 10.

Paano, nian, ang isa makasapo sing kalinong sa hunahuna kag sing katuyuan sa kabuhi? Pagtilawtilaw lamang bala ini, nga daw kaangay bala nga nagapuntariya sang baslay sa kadulom? Makalilipay nga indi subong sini. Subong sang makita naton sa masunod nga artikulo, yara ang solusyon sa pagpaayaw sa importante gid kag, sa pagkamatuod, pinasahi nga kinahanglanon sang tawo.

[Retrato sa pahina 3]

Makabulig bala sa imo ang paghingamo sing manggad, gahom, ukon edukasyon agod masapwan ang kalinong sa hunahuna?