Malandas Naton ang Bisan Ano nga Pagtilaw!

NAGAATUBANG ka bala karon sing isa ka pagtilaw? Naluyahan gid bala ikaw amo nga daw indi mo na ini mabatas? Nahadlok ka pa gani bala kon kaisa nga daw tumalagsahon ang imo problema kag daw wala na sing solusyon sa sini? Kon amo, magpakalig-on! Bisan ano man nga mga pagtilaw ang aton maatubang, ginapasalig kita sang Biblia nga buligan kita sang Dios agod malandas ini.

Ginasiling sang Biblia nga ang mga alagad sang Dios ‘makasugata sing nanuhaytuhay nga mga pagtilaw.’ (Santiago 1:2) Talupangda ang tinaga nga “nanuhaytuhay” (poi·kiʹlos sa Griego). Suno sa paggamit sa sining orihinal nga tinaga sang una, nagakahulugan ini sing “madamo kag lainlain” ukon “madamo sing kolor” kag ginapadaku “ang pagkananarisari sang mga pagtilaw.” Kon amo, ang “nanuhaytuhay nga mga pagtilaw” amo ang mga pagtilaw nga daw madamo sing kolor. Walay sapayan sini, ginabuligan kita ni Jehova nga malandas ang kada isa sini. Ngaa masiguro naton ina?

Ang “Di-bagay nga Kaayo sang Dios nga Ginpakita sa Lainlain nga Paagi”

Ginsiling ni apostol Pedro nga ang mga Cristiano ‘ginapaantos sang sarisari nga mga pagtilaw.’ (1 Pedro 1:6) Sa ulihi nga bahin sang iya inspirado nga sulat, nagsiling sia nga ang ‘di-bagay nga kaayo sang Dios ginapakita sa lainlain nga paagi.’ (1 Pedro 4:10) Ang prase nga “sa lainlain nga paagi” may porma sang amo man nga orihinal nga Griegong tinaga. Sa pagkomento sa sini nga ekspresyon, ang isa ka iskolar sa Biblia nagsiling: “Makahalawhaw ini nga ideya. . . . Ang paglaragway sa bugay [ukon, di-bagay nga kaayo] sang Dios subong poikilos nagakahulugan nga wala sing kahimtangan ukon eksperiensia sang tawo nga indi malandas sang bugay sang Dios.” Nagsiling pa sia: “Wala sing posible nga kahimtangan, krisis, emerhensia ukon hilingagawon nga kinahanglanon nga indi mapangitaan sing paagi sang bugay sang Dios, kag indi maatubang kag malandas sing madinalag-on sang bugay sang Dios. Ining puno sing kahulugan nga tinaga nga poikilos maathag nga nagapahanumdom sa aton sang madamo sing kolor nga bugay sang Dios nga bastante gid para sa tanan nga butang.”

Mga Pagtilaw nga Ginalandas sang Kaayo

Suno kay Pedro, ginapakita sang Dios ang iya di-bagay nga kaayo paagi sa mga miembro sang Cristianong kongregasyon. (1 Pedro 4:11) Ang tagsa ka alagad sang Dios may espirituwal nga mga dulot, ukon mga ikasarang, nga mahimo makapalig-on sa mga nagaatubang sing mga pagtilaw. (Roma 12:6-8) Halimbawa, ang pila ka miembro sang kongregasyon maayo gid nga mga manunudlo sang Biblia. Ang ila mahinantupon nga mga pulong nagapapagsik kag nagapalig-on sa iban nga magbatas. (Nehemias 8:1-4, 8, 12) Regular nga ginaduaw sang iban sa puluy-an ang mga nagakinahanglan sing bulig. Ini nga mga pagduaw mga tion sang pagpalig-on, ‘paglugpay sa tagipusuon.’ (Colosas 2:2) Kon ginahimo sang mga manugtatap ining makapalig-on sa pagtuo nga mga pagduaw, nagahatag  sila sing espirituwal nga dulot. (Juan 21:16) May iban naman sa kongregasyon nga kilala sa ila pagpalangga, kaawa, kag pagkamainulikdon sa pagpakig-angot sa mga masigkatumuluo nga ginapabudlayan sang mga pagtilaw. (Binuhatan 4:36; Roma 12:10; Colosas 3:10) Ang empatiya kag bulig sining mahigugmaon nga mga kauturan isa ka talalupangdon nga pagpabutyag, ukon “kolor,” sang di-bagay nga kaayo sang Dios.​—⁠Hulubaton 12:25; 17:17.

“Ang Dios nga May Bug-os nga Paglugpay”

Labaw sa tanan, si Jehova nagalugpay. Sia ‘ang Dios nga may bug-os nga paglugpay, nga nagalugpay sa aton sa tanan naton nga kapipit-an.’ (2 Corinto 1:​3, 4) Ang kaalam nga makita sa inspirado nga Pulong sang Dios kag ang kabakod halin sa iya balaan nga espiritu amo ang panguna nga mga paagi ni Jehova sa pagsabat sa aton mga pangamuyo nga buligan kita. (Isaias 30:​18, 21; Lucas 11:13; Juan 14:16) Mapalig-on kita sang inspirado nga ginpangako ni apostol Pablo. Nagsiling sia: “Ang Dios matutom, kag indi sia magtugot nga sulayon kamo labaw sa inyo masarangan, kundi kaupod sang pagsulay magahatag man sia sing lulutsan agod nga mabatas ninyo ini.”​—⁠1 Corinto 10:13.

Huo, bisan ano man ang “kolor,” ukon sahi, sang pagtilaw sa aton, may yara gid pirme “kolor,” ukon pagpabutyag, sang di-bagay nga kaayo sang Dios nga bagay ukon magalandas sa sini. (Santiago 1:17) Ang sibu sa tion kag nagakaigo nga bulig ni Jehova sa iya mga alagad​—⁠bisan ano man ka nanuhaytuhay ang mga pagsulay ukon problema nga ila ginaatubang​—⁠isa lamang ka pamatuod sang “pagkasarisari sang kaalam sang Dios.” (Efeso 3:10) Wala ka bala nagaugyon?

[Mga retrato sa pahina 31]

Ginabuligan kita ni Jehova nga malandas ang mga pagtilaw sa aton