Report sang mga Manugbantala sang Ginharian

Ang Bunayag nga mga Tawo Nagahatag sing Kadayawan kay Jehova

SA BUG-OS nga duta, ang mga Saksi ni Jehova​—⁠bata kag tigulang​—⁠nakilal-an sa ila pagkabunayag. Binagbinaga ang mga halimbawa gikan sa tatlo ka kontinente.

Isa ka adlaw, samtang nagapauli halin sa eskwelahan ang 17-anyos nga si Olusola, nga nagapuyo sa Nigeria, nakakita sia sing kahita sa alagyan. Gindala niya ini sa prinsipal, nga amo ang nag-isip sang kuarta, kag ₦6,200 (mga $45, U.⁠S.) ini. Gin-uli sang prinsipal ang kahita sa maestro nga nadulaan sini. Bilang pagpasalamat, ginhatagan sang maestro si Olusola sing ₦1,000 (mga $7, U.⁠S.) kag ginsilingan sia nga ibayad niya ini sa iya balayran sa eskwelahan. Sang nabalitaan sang iban nga mga estudyante ang natabo, ginyaguta nila si Olusola. Pagligad sang pila ka semana, ginreport sang isa ka estudyante nga ginkawat ang iya kuarta, gani ginpangabay ang mga manunudlo nga rekisahon ang tanan nga estudyante. “Magtindog ka diri,” siling sang manunudlo kay Olusola. “Nahibaluan ko nga subong isa sa mga Saksi ni Jehova, indi ka magpangawat.” Nakita ang kuarta sa duha sa mga bata nga lalaki nga nagyaguta kay Olusola, kag ginsilutan sila. Si Olusola nagsulat: “Nalipay gid ako nga kilala ako nga isa sa mga Saksi ni Jehova, nga wala gid nagapangawat, sa amo nagahatag ini sing himaya kay Jehova.”

Isa ka adlaw sang naglakat si Marcelo, nga tumandok sang Argentina, nakakita sia sing isa ka porpolyo pila lamang ka metro gikan sa puertahan sa likod sang iya balay. Gindala niya ang porpolyo sa sulod sang balay kag ginbuksan nila nga mag-asawa. Nakibot gid sila sang makita nila ang daku nga kantidad sang kuarta, mga credit card, pila ka pirmado na nga tseke, nga ang isa sini may kantidad nga isa ka milyon ka pesos. Nakakita sila sing numero sang telepono sa isa ka resibo. Gintawgan nila ang tag-iya kag ginkasugtan nga iuli ang porpolyo kag ang mga unod sini sa ulubrahan ni Marcelo. Sang nag-abot ang tag-iya, daw ginakulbaan sia. Ginsilingan sia sang amo ni Marcelo nga magkalma lang, kay si Marcelo isa sa mga Saksi ni Jehova. Bilang padya bangod nakita niya ang porpolyo, ginhatagan sang tag-iya si Marcelo sing 20 pesos (mga $6, U.⁠S.) lang. Nagpaakig ini sa amo bangod nagdayaw gid sia sa pagkabunayag ni Marcelo. Naghatag ini sing kahigayunan kay Marcelo nga mapaathag nga subong isa sa mga Saksi ni Jehova, dapat sia mangin bunayag sa tanan nga tion.

Ini nga eksperiensia naghalin sa Kyrgyzstan. Nakakita si Rinat, isa ka seis anyos nga bata nga lalaki, sing isa ka kahita nga iya sang babayi nga ila kaingod. Ang kahita nagaunod sing 1,100 ka som (mga $25, U.⁠S.). Sang gin-uli ni Rinat ang kahita sa babayi, gin-isip niya ang kuarta kag ginsilingan ang iloy ni Rinat nga kulang ini sing 200 ka som. Nagsiling si Rinat nga wala niya ginkuha ang kuarta. Nian naglakat ang tanan agod pangitaon ang kulang nga kuarta kag nakita ini malapit sa duog diin nakita ang kahita. Nakibot ang babayi. Nagpasalamat sia kay Rinat kag sa iya iloy, una bangod gin-uli nila ang kuarta kag ikaduha, bangod sang pagpadaku kay Rinat nga mangin Cristiano.