Paghimo kay Jehova nga Imo Dios

SANG panahon sang Biblia, ang pila ka indibiduwal may suod nga kaangtanan kay Jehova amo nga gintawag sia nga ila Dios. Halimbawa, si Jehova ginalaragway sa Kasulatan subong “Dios ni Abraham,” “Dios ni David,” kag “Dios ni Elias.”​—Genesis 31:42; 2 Hari 2:14; 20:5.

Paano ang kada isa sini nga mga lalaki nakatigayon sing suod nga kaangtanan sa Dios? Ano ang matun-an naton gikan sa ila agod matukod kag mahuptan man naton ang isa ka mabakod nga personal nga kaangtanan sa Manunuga?

Si Abraham ‘Nagtuo kay Jehova’

Si Abraham amo ang una nga tawo nga ginasiling sang Biblia nga nagtuo kay Jehova. Ang pagtuo amo ang panguna nga kinaiya ni Abraham nga bangod sini, nahamuot ang Dios sa iya. Ang matuod, daku gid ang kahamuot ni Jehova kay Abraham amo nga sang ulihi, ginpakilala sang Manunuga ang iya kaugalingon kay Moises subong “Dios ni Abraham” kag sang iya anak kag apo nga sanday Isaac kag Jacob.​—Genesis 15:6; Exodo 3:6.

Paano napalambo ni Abraham ini nga sahi sang pagtuo sa Dios? Una sa tanan, gintukod ni Abraham ang iya pagtuo sa isa ka mabakod nga sadsaran. Mahimo nga gintudluan sia tuhoy sa mga dalanon ni Jehova sang anak ni Noe nga si Sem, nga nakasaksi sang mga pagluwas sang Dios. Si Sem isa ka buhi nga saksi sang “gintipigan [ni Jehova] si Noe, isa ka manugbantala sang pagkamatarong, kaupod sang pito pa nga iban sang gin-anaw niya ang kalibutan sang di-diosnon nga mga tawo.” (2 Pedro 2:5) Mahimo nga ginsugiran ni Sem si Abraham nga kon si Jehova nagasaad, pat-od ini nga matuman. Gani, sang si Abraham mismo ginsaaran sang Dios, nalipay sia kag nagkabuhi pasad sa sigurado nga ihibalo nga ang saad matuman.

Bangod may yara na sia mabakod nga sadsaran, ang pagtuo ni Abraham ginpabakod sang iya mga buhat. Si apostol Pablo nagsulat: “Bangod sa pagtuo si Abraham, sang gintawag sia, nagtuman sa pagkadto sa duog nga batunon niya subong panublion; kag naglakat sia, walay sapayan nga wala sia makahibalo kon diin sia makadto.” (Hebreo 11:8) Yadto nga buhat sang pagkamatinumanon labi nga nagpabakod sang pagtuo ni Abraham, kag tuhoy sini si disipulo Santiago nagsulat: “Nakita mo nga ang iya pagtuo nagpanghikot kaupod sang iya mga binuhatan kag paagi sa iya mga binuhatan ang iya pagtuo ginhimpit.”—Santiago 2:22.

Dugang pa, gintugutan ni Jehova nga tilawan ang pagtuo ni Abraham agod labi pa ini nga magbakod. Si Pablo nagsiling pa gid: “Bangod sa pagtuo si Abraham, sang gintilawan sia, daw subong nga naghalad kay Isaac.” Ang pagtilaw  nagaputli kag nagapabakod sang pagtuo, nagahimo sa sini nga “daku pa ang balor sangsa bulawan.”—Hebreo 11:17; 1 Pedro 1:7.

Bisan pa napatay si Abraham nga wala na makita ang katumanan sang tanan nga ginsaad sang Dios, nalipay sia nga makita nga ginsunod sang iban ang iya halimbawa. Ang iya asawa nga si Sara kag ang tatlo pa ka katapo sang iya pamilya​—sanday Isaac, Jacob, kag Jose​—gindayaw man sa Biblia bangod sang ila tumalagsahon nga pagtuo.​—Hebreo 11:11, 20-​22.

Pagtuo Kaangay Sang kay Abraham Karon

Ang pagtuo kinahanglan sang bisan sin-o nga luyag himuon si Jehova nga iya Dios. “Kon wala sing pagtuo imposible nga mapahamut-an [ang Dios] sing maayo,” sulat ni Pablo. (Hebreo 11:6) Paano mapalambo sang isa ka alagad sang Dios karon ang mabakod nga pagtuo kaangay sang kay Abraham?

Kaangay ni Abraham, ang aton pagtuo dapat natukod sa mabakod nga sadsaran. Ang pinakamaayo nga paagi agod mahimo naton ini amo ang regular nga pagtuon sa Biblia kag sa mga publikasyon pasad sa Biblia. Ang pagbasa sing Biblia kag ang pagpamalandong sa nabasa makapasalig sa aton nga ang mga saad sang Dios matuman. Nian mapahulag kita nga bag-uhon ang aton pagkabuhi pasad sa sinang masaligan nga pagpaabot. Ang aton pagtuo labi nga ginapabakod sang mga buhat sang pagkamatinumanon, nga nagalakip sang pagpakigbahin sa publiko nga ministeryo kag pagtambong sa Cristianong mga miting.​—Mateo 24:14; 28:19, 20; Hebreo 10:24, 25.

Ang aton pagtuo pat-od nga tilawan, ayhan bangod sang pagpamatok, malubha nga balatian, pagkapatay sang isa ka hinigugma, ukon sang iban pa nga paagi. Ang pagpabilin nga matutom kay Jehova sa idalom sang pagtilaw nagapabakod sang aton pagtuo kag nagahimo sa sini nga mas bilidhon sangsa bulawan. Kon bala buhi pa kita agod makita ang katumanan sang tanan nga saad sang Dios ukon indi na, ang aton pagtuo labi nga magapasuod sa aton kay Jehova. Dugang pa, ang aton halimbawa magapalig-on sa iban nga ilugon ang aton pagtuo. (Hebreo 13:7) Amo ini ang natabo kay Ralph, nga nakatalupangod kag nag-ilog sang pagtuo sang iya mga ginikanan. Nagpaathag sia:

“Sang yara pa ako sa balay, ginpalig-on sang akon mga ginikanan ang bug-os nga pamilya sa pagbugtaw sing temprano agod mabasa namon ang Biblia. Nabasa namon ang bug-os nga Biblia sa sini nga paagi.” Ginabasa gihapon ni Ralph ang Biblia kada aga, kag sa amo, ginasugdan niya ang adlaw sa nagakaigo nga paagi. Nagaupod anay si Ralph sa iya amay kada semana sa publiko nga ministeryo. “Didto ko natun-an ang paghimo sing mga pagduaw liwat kag pagdumala sing mga pagtuon sa Biblia sa puluy-an.” Si Ralph isa na karon ka boluntaryo sa isa sang mga sanga talatapan sang mga Saksi ni Jehova sa Europa. Daw ano kaayo nga padya tungod sa pagtuo sang iya mga ginikanan!

Isa ka Lalaki nga Kalahamut-an sa Tagipusuon ni Jehova

Si David, nga natawo mga 900 ka tuig pagkatapos ni Abraham, isa ka talalupangdon nga personalidad sa tunga sang mga alagad ni Jehova nga ginsambit sa Kasulatan. Tuhoy sa pagpili ni Jehova kay David subong palaabuton nga hari, si manalagna Samuel nagsiling: “Si Jehova pat-od nga magapangita sing isa ka lalaki nga kalahamut-an sa iya tagipusuon.” Suod gid ang kaangtanan ni Jehova kag ni David amo nga sang ulihi, nagpamulong si manalagna Isaias kay Hari Ezequias tuhoy kay “Jehova nga Dios ni David nga imo katigulangan.”​—1 Samuel 13:14; 2 Hari 20:5; Isaias 38:5.

Bisan pa si David kalahamut-an sa tagipusuon ni Jehova, may mga tion nga nadaug sia sang iya  mga kailigbon. Makatlo nga nakahimo sia sing mabug-at nga sala: Gintugutan niya nga sayluhon ang kaban sing di-nagakaigo pakadto sa Jerusalem; nagpanghilahi sia upod kay Batseba kag ginplano ang pagpatay sa iya bana, nga si Urias; kag gin-isip niya ang katawhan sang Israel kag Juda bisan pa wala ginsugo ni Jehova. Sa sining tatlo ka higayon, ginlapas ni David ang Kasuguan sang Dios.​—2 Samuel 6:​2-​10; 11:​2-​27; 24:​1-9.

Apang, sang ginsukna kay David ang iya mga sala, ginbaton niya ini kag wala ginbasol ang iban. Ginbaton niya nga ang pagsaylo sa Kaban wala maplano sing maayo, kag nagsiling man sia nga ‘wala nila ginpangita si Jehova suno sa kinabatasan.’ Sang ginbuyagyag ni manalagna Natan ang pagpanghilahi ni David, nagsabat si David, nga nagasiling: “Nakasala ako batok kay Jehova.” Kag sang nakita ni David ang kabuangan sang pag-isip sa katawhan, ginbaton niya: “Nakasala ako sing daku sa nahimo ko.” Naghinulsol si David sa iya mga sala kag nagpabilin nga suod kay Jehova.​—1 Cronica 15:13; 2 Samuel 12:13; 24:10.

Kon Makahimo Kita Sing Sala

Samtang nagapanikasog kita sa paghimo kay Jehova nga Dios naton, ang halimbawa ni David makapalig-on. Kon ang tawo nga kalahamut-an gid sa tagipusuon ni Jehova makahimo sing mabug-at nga mga sala, indi kita dapat maluyahan sing buot kon, walay sapayan sang aton daku gid nga mga panikasog, makahimo kita kon kaisa sing sala ukon sing mabug-at pa gani nga mga kasaypanan. (Manugwali 7:20) Mapalig-on kita sa kamatuoran nga sang naghinulsol si David, ang iya mga sala ginpatawad. Amo sini ang natabo kay Uwe * mga pila ka tuig na ang nagligad.

Si Uwe isa anay ka gulang sa isa ka kongregasyon sang mga Saksi ni Jehova. Isa ka bes, nagpadaug sia sa sayop nga mga kailigbon kag nakahimo sing imoralidad. Kaangay ni Hari David, ginlikom ini sang primero ni Uwe, sa paglaum nga basi pasapayanan lamang ni Jehova ang iya sala. Sang ulihi, gintublag si Uwe sang iya konsiensia amo nga nagtu-ad sia sa isa pa ka gulang kag gani, ginhimo ang tikang agod buligan si Uwe nga makapasag-uli sa natabo sa iya.

Naghinulsol si Uwe sa iya mga sala kag nagpabilin nga suod kay Jehova kag sa kongregasyon. Nagpasalamat gid sia sa bulig nga nabaton niya amo nga pagligad sang pila ka semana nagsulat sia sa mga gulang nga nagapabutyag sang iya hanuot kag tudok nga pagpasalamat sa ila bulig. “Ginbuligan ninyo ako nga indi mapasipalahan ang ngalan ni Jehova,” sulat niya. Nahuptan ni Uwe ang iya kaangtanan kay Jehova kag sang ulihi gintangdo liwat sia subong alagad sa amo man nga kongregasyon.

“Isa ka Tawo nga May mga Balatyagon Kaangay Naton”

Si Elias, nga nagkabuhi sang siglo pagkatapos ni David, isa anay sa kilala nga mga manalagna sa Israel. Ginsakdag ni Elias ang matuod nga pagsimba sang panahon nga ang kagarukan kag imoralidad lapnag, kag wala gid sia mationg sa iya debosyon kay Jehova. Indi katingalahan nga si Jehova gintawag sang nagbulos sa iya, nga si Eliseo, nga “Dios ni Elias”!​—2 Hari 2:​14.

Apang, si Elias tawo lamang. Si Santiago nagsulat: “Si Elias isa ka tawo nga may balatyagon kaangay naton.” (Santiago 5:17) Halimbawa, sang napierde niya ang mga sumilimba ni Baal sa Israel, namahog si Reyna Jesebel nga patyon sia. Ano ang reaksion niya? Hinadlukan sia kag nagpalagyo sa kahanayakan. Nagalingkod sa idalom sang kahoy nga enebro, si Elias nagpanalabiton: “Tuman na! Karon, O Jehova, kuhaa ang akon kabuhi, kay indi ako maayo pa sa akon mga ginikanan.” Indi na luyag ni Elias nga mangin manalagna kag sa baylo, luyag na niya mapatay.​—1 Hari 19:4.

Apang, nahangpan ni Jehova ang balatyagon ni Elias. Ginpabakod sia sang Dios, kag ginpasalig Niya si Elias nga wala sia nagaisahanon, kay may iban pa nga matutom sa matuod nga pagsimba. Dugang pa, nagsalig gihapon si Jehova kay Elias kag may ginpahimo Sia sa iya.​—1 Hari 19:5-18.

Ang nabatyagan ni Elias indi tanda nga nadula niya ang kahamuot sang Dios. Mga 1,000 ka tuig sang ulihi, sang nagbaylo-dagway si Cristo Jesus sa atubangan nanday Pedro, Santiago, kag Juan, sin-o ang napili ni Jehova nga makaupod ni Jesus  sa palanan-awon? Si Moises kag si Elias. (Mateo 17:1-9) Maathag nga gintamod ni Jehova si Elias nga isa ka huwaran nga manalagna. Bisan pa nga si Elias “isa ka tawo nga may balatyagon kaangay sa aton,” gin-apresyar sang Dios ang iya kapisan sa pagpasag-uli sang matuod nga pagsimba kag sa pagpakabalaan sa Iya ngalan.

Pagpakigbato sa Aton Balatyagon

Ang mga alagad ni Jehova karon mahimo kon kaisa maluyahan sing buot ukon mabalaka. Makalulugpay gid nga mahibaluan nga nabatyagan man ini ni Elias! Kag makapasalig gid nga kon nahangpan ni Jehova ang balatyagon anay ni Elias, mahangpan man Niya ang pagpakigbato naton sa aton balatyagon.​—Salmo 103:14.

Sa isa ka bahin, ginahigugma naton ang Dios kag ang aton isigkatawo kag luyag naton ibantala ang maayong balita sang Ginharian nga ginsugo ni Jehova. Sa pihak nga bahin, mahimo maluyahan kita sing buot bangod sang di-pagsapak sa aton ginabantala ukon sang pagkabalaka pa gani sa mga pagpamahog sang mga kaaway sang matuod nga pagsimba. Apang, subong nga ginsangkapan anay ni Jehova si Elias sa pagpadayon, sangkapan man Niya ang iya mga alagad karon. Binagbinaga ang halimbawa nanday Herbert kag Gertrud.

Sanday Herbert kag Gertrud ginbawtismuhan subong mga Saksi ni Jehova sa Leipzig, sa anay German Democratic Republic, sang 1952. Mabudlay sadto ang kabuhi para sa mga alagad sang Dios, kay ang ila publiko nga ministeryo ginadumilian. Ano ang ginbatyag ni Herbert sa pamalaybalay nga pagbantala?

“Nabalaka gid kami kon kaisa. Kon magpamalaybalay kami, wala kami makahibalo kon bala hinali lang nga mag-ulhot ang mga awtoridad kag dakpon kami.” Ano ang nakabulig kay Herbert kag sa iban pa agod malandas ang ila kahadlok? “Pirme kami personal nga nagatuon sing Biblia. Kag ginpabaskog kami ni Jehova agod mapadayon namon ang amon pagbantala.” Sa iya publiko nga ministeryo, madamo sing naeksperiensiahan si Herbert nga nagpabakod​—nagpakadlaw pa gani​—sa iya.

Nasugilanon ni Herbert ang isa ka medyo may edad na nga babayi nga nagpakita sing interes sa Biblia. Sang nagduaw liwat si Herbert pagligad sang pila ka adlaw, naabtan niya ang isa ka pamatan-on nga lalaki kag namati man sia sa paghambalanay. Pagligad sang pila ka minuto, may nasiplatan si Herbert nga nagpakubakuba sang iya dughan. May kalo sang pulis sa isa ka siya sa hilit sang balay. Iya ini sang pamatan-on nga lalaki, kay isa gali sia ka pulis nga determinado gid sa pagdakop kay Herbert.

“Isa ikaw sa mga Saksi ni Jehova!” siling sang pamatan-on. “Patan-awa ako sang imo ID.” Ginduhol ni Herbert ang iya ID. Nian isa ka butang ang wala gid ginapaabot nga natabo. Gintulok sang babayi ang pulis kag ginpaandaman sia: “Kon may matabo sa sining tawo sang Dios, indi ka na makasulod sa sini nga balay.”

Nagdulog sa makadali ang pamatan-on, gin-uli ang ID kay Herbert, kag ginpalakat sia. Nahibaluan sang ulihi ni Herbert nga nagapangaluyag gali ang pulis sa anak sang babayi. Maathag gid nga ginpakamaayo niya nga padayunon ang pagpangaluyag sa dalaga sangsa dakpon si Herbert.

Himua si Jehova nga Aton Dios

Ano ang matun-an naton gikan sa sini nga mga hitabo? Kaangay ni Abraham, dapat may yara kita mabakod nga pagtuo sa mga saad ni Jehova. Kaangay ni David, dapat kita maghinulsol kag magpangayo sing patawad kay Jehova kon makahimo kita sing sala. Kag kaangay ni Elias, dapat magsalig kita kay Jehova nga hatagan niya kita sing kusog sa tion sang pagkabalaka. Paagi sa sini, ginahimo naton si Jehova nga aton Dios sa karon kag sa walay katubtuban, kay sia ang “buhi nga Dios, nga amo ang Manluluwas sang tanan nga sahi sang mga tawo, labi na sang mga matutom.”​—1 Timoteo 4:10.

[Nota]

^ par. 20 Gin-islan ang ngalan.

[Retrato sa pahina 25]

Ang mga buhat sang pagkamatinumanon nagpabakod sang pagtuo ni Abraham

[Retrato sa pahina 26]

Kaangay ni David, dapat kita maghinulsol kon makasala kita

[Retrato sa pahina 28]

Kon nahangpan anay ni Jehova ang mga balatyagon ni Elias, mahangpan man niya kita