Bug-os Kalibutan nga Impluwensia ni Jesus

“ANG tanan nga nasulat sa mga ebanghelyo tuhoy sa ginsiling ni Jesus, sing pribado ukon sing dayag, mahimo niya mahinambit sa sulod sang duha ka oras,” sulat sang manugbadbad sang Biblia nga si Edgar Goodspeed. “Apang inang malip-ot nga panudlo makapapagsik gid, makapahulag gid kag makapatudok gid amo nga makasiling kita nga wala pa gid sing nakaimpluwensia sa kalibutan sing tuman ka daku subong sang nahimo niya.”

Sang natapos ni Jesucristo ang iya ministeryo sa duta sang tuig 33 C.⁠E., ang iya sumulunod nagdamo sing di-magkubos mga 120 ka lalaki kag babayi. (Binuhatan 1:15) Sa karon, kapin sa duha ka bilyon ka tawo ang nagapangangkon nga Cristiano. Ginatos ka milyon pa ang nagakilala kay Jesus subong propeta. Sa pagkamatuod, ang iya mga panudlo may tumalagsahon nga impluwensia sa katawhan.

Ang bug-os kalibutan nga impluwensia ni Jesus ginakilala bisan gani sang di-Cristiano nga mga lider. Halimbawa, ang Judiyong rabbi nga si Hyman Enelow nagsulat: “Si Jesus nangin labing popular, pirme ginatun-an, labing maimpluwensia nga persona sa relihiosong maragtas sang katawhan.” Nagsiling man si Enelow: “Sin-o bala ang makabanabana sang tanan nga impluwensia ni Jesus sa katawhan? Ang gugma nga iya gin-inspirar, ang lugpay nga iya ginhatag, ang kaayuhan nga iya ginhimo, ang paglaum kag kalipay nga iya ginpadabdab​—⁠ang tanan di-matupungan sa maragtas sang tawo. Sa tanan nga bantog kag maayo nga tawo nga nagkabuhi, wala sing mapaanggid kay Jesus sa bug-os kalibutan nga  pagganyat kag pag-impluwensia. Sia ang nangin labing makawiwili nga persona sa maragtas.” Ang Hindu nga lider nga sa Mohandas K. Gandhi nagsiling: “Wala pa ako sing nakilala nga nakalabaw sa ginhimo ni Jesus sa katawhan. Sa katunayan, wala sing sayop sa Cristianismo.” Apang, nagdugang sia: “Ang problema yara sa inyo nga mga Cristiano. Wala ninyo ginasunod ang inyo mga ginatudlo.”

Ang Cristiandad madugay na nga nakilal-an nga wala nagasunod sa mga panudlo ni Jesus. Si Cecil John Cadoux, istoryador sang Cristianismo, nagsiling nga “ang amat-amat kag dalayon nga paglambo sang huyog nga pagpalugak sa moral sa bug-os nga Simbahan” nakakuha na “sang igtalupangod sang mga Cristianong lider sadto pa sang . . . 140 A.D.” Nagsiling sia: “Ang paglisa sa pagkaestrikto sa moral sang una nga Cristianismo nagdul-ong sa pagpauyon sini sa mga dalanon sang kalibutan.”

Ining pagkalusod labi pa nga nagdugang sang ikap-at nga siglo, sang ginbaton sang Romanong Emperador nga si Constantino ang Cristianismo. “Natalupangdan sang mga istoryador, kag ang pila sa ila nalugaw-an,” sulat ni Cadoux, “sa madamo nga pagkompromiso nga nahimo sang Simbahan bangod sang iya pagpakig-alyansa kay Constantinus.” Sa sulod sang mga siglo sugod sadto, madamo sing makahuluya nga buhat ang nahimo sang nagapangangkon nga mga Cristiano nga nagpakahuya sa ngalan ni Cristo.

Nian, ang mga pamangkot nga dapat naton kabalak-an amo: Ano gid bala ang gintudlo ni Jesus? Kag ano dapat ang mangin impluwensia sa aton sang iya mga panudlo?

[Retrato sa pahina 3]

“Wala pa gid ako sing nakilala nga nakalabaw sa ginhimo ni Jesus sa katawhan.”​—⁠Mohandas K. Gandhi

[Retrato sa pahina 3]

“Wala pa sing nakaimpluwensia sa kalibutan sing tuman ka daku subong sang nahimo niya.”​—⁠Edgar Goodspeed

[Credit Line]

Culver Pictures