Mga Milagro nga Imo Nakita!

ANG ikaduha nga kahulugan sang tinaga nga “milagro” amo ang “isa ka talalupangdon gid ukon di-kinaandan nga hitabo, butang, ukon hinimuan.” Tanan kita nakakita na sining sahi sang milagro nga wala ginhimo sang Dios.

Bangod nag-uswag ang ihibalo sang tawo tuhoy sa pisikal nga mga kasuguan sa kinaugali, sarang na karon mahimo ang mga butang nga ginatamod sang una nga imposible. Halimbawa, abi sang madamo nga tawo sang nagligad nga isa ka gatos ka tuig, imposible ang kinaandan nga ginahimo karon sang mga kompyuter, telebisyon, teknolohiya sa paglakbay sa kahawaan, kag kaanggid nga modernong adlaw nga mga pag-uswag.

Ginbaton sang pila ka sientipiko nga indi na nila mapat-od kon ano ang imposible bangod nakahibalo sila nga diutay lamang ang ila  nahibaluan sa sientipiko nga mga katingalahan sa mga tinuga sang Dios. Ang masiling lamang nila amo nga daw indi ini mahimo matabo. Gani ginabaton nila nga mahimo matabo ang “mga milagro” sa palaabuton.

Bisan pa kon ginapatuhuyan naton ang panguna nga kahulugan sang “milagro,” nga nagapatuhoy sa mga butang nga “may kaangtanan sa labaw sa kinaugali,” masiling naton nga kita tanan nakakita na sing mga milagro. Halimbawa, nakita naton ang adlaw, bulan kag mga bituon​​—⁠tanan ini hinimuan sang isa nga “labaw sa kinaugali,” ang Manunuga mismo. Dugang pa, sin-o ang makapaathag sing detalyado kon paano nagapanghikot ang lawas sang tawo? paano nagapanghikot ang utok? ukon paano nagatubo ang tawhanon nga sibudbod? Ang libro nga The Body Machine nagsiling: “Ang lawas sang tawo, nga kontrolado sang sentralisado nga sistema sang nerbio, masibod sing igbalatyag, isa ka makina nga makakay-o sang iya kaugalingon, isa ka kompyuter nga makamuad sing kinaugalingon​​—⁠isa ka dalayawon kag misteryoso nga tinuga.” Ang Dios nga nagtuga sang “lawas sang tawo” naghimo gid sing milagro nga padayon nga nagapatingala sa aton. May iban pa nga sahi sang milagro nga nakita mo na, apang mahimo nga wala mo lang ini mamulalungan.

Puede Bala Mangin Milagro ang Isa ka Libro?

Wala na sing libro nga ginpanagtag sing subong ka lapnag sa Biblia. Ginatamod mo bala ini nga isa ka milagro? Masiling bala naton nga nagluntad ini bangod sa isa nga “labaw sa kinaugali”? Mga tawo matuod ang nagsulat sang Biblia, apang nangangkon sila nga ginsulat nila ang mga panghunahuna sang Dios kag indi ang ila. (2 Samuel 23:​1, 2; 2 Pedro 1:​20, 21) Hunahunaa ini. Mga 40 sila ka tawo nga nagkabuhi sa sulod sang kapin sa 1,600 ka tuig. Nanuhaytuhay ang ila obra kaangay sa mga manugbantay, soldado, mangingisda, mga alagad sibil, mga doktor, mga saserdote, kag mga hari. Apang napaalinton nila ang isa ka nahiusa nga mensahe sang paglaum nga matuod kag sibu.

Pasad sa mahalungon nga pagtuon, ginabaton sang mga Saksi ni Jehova ang Biblia, “indi subong pulong sang mga tawo, kundi, kon ano gid ini sa pagkamatuod, subong pulong sang Dios,” subong sang ginsulat ni apostol Pablo. (1 Tesalonica 2:13) Tinuig na nga ginpaathag sang ila mga publikasyon kon paano mapahisanto ang daw mga pagsumpakilay sa Biblia paagi sa kabug-usan nga mensahe sini. Ining paghisantuanay mismo pamatuod nga Dios gid ang awtor sang Biblia.⁠ *

Wala na sing iban pa nga libro nga gintinguhaan gid nga dulaon sangsa Biblia. Apang nagaluntad gihapon ini, bisan ang mga bahin lang sini, sa kapin sa 2,000 ka lenguahe. Ang pagkalampuwas sang Biblia subong isa ka libro kag pagtipig sa pagkaputli sang teksto sini, mga pamatuod nga gin-amligan ini sang Dios. Isa gid matuod ka milagro ang Biblia!

Isa ka Milagro nga “Buhi kag Gamhanan”

Ang mga milagro sang una​​—⁠milagruso nga mga pagpang-ayo kag pagbanhaw​​—⁠wala na nagakatabo. Apang may rason kita sa pagpati nga sa nagahilapit na nga bag-ong kalibutan sang Dios, ini nga mga milagro matabo liwat, sa bug-os na nga kalibutan. Magahatag ini sing permanente nga paumpaw nga indi pa naton mahantop karon.

Mahimo pa gani karon sang Biblia ang kaanggid  sa milagro paagi sa pagpahulag sa mga tawo nga bag-uhon ang ila personalidad. (Tan-awa ang halimbawa sa kahon nga “Ang Gahom Sang Pulong Sang Dios,” sa pahina 8.) Ang Hebreo 4:12 nagasiling: “Kay ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagalapus tubtob sa nautlan sang kalag kag espiritu, kag sang mga lutalutahan kag ila utok, kag may ikasarang sa paghantop sang mga hunahuna kag mga tinutuyo sang tagipusuon.” Huo, ang Biblia mapuslanon sa pagbag-o sing kabuhi sang kapin sa anom ka milyon ka tawo nga nagakabuhi sa bug-os nga kalibutan, nagahatag sing katuyuan sa ila kabuhi kag nagatanyag sa ila sing dalayawon nga paglaum sa palaabuton.

Ngaa indi pagtuguti ang Biblia nga magmilagro sa imo kabuhi?

[Nota]

^ par. 8 Kon luyag mo mangusisa sing dugang pa tuhoy sining daw mga pagsumpakilay agod mahibaluan kon paano ini mapahisanto, madamo nga halimbawa ang ginabinagbinag sa kapitulo 7 sang libro nga The Bible​​—⁠God’s Word or Man’s? nga ginbalhag sang mga Saksi ni Jehova.

[Kahon/Retrato sa pahina 7]

PATAY NA BALA UKON BUHI PA?

Suno sa Juan 19:​33, 34, patay na si Jesus sang “ginbuno sang isa ka soldado ang iya kilid paagi sa isa ka bangkaw, kag naggua gilayon ang dugo kag tubig.” Apang, ginapakita sang Mateo 27:​49, 50 nga buhi pa si Jesus sang natabo ini. Ngaa may pagsumpakilay?

Ginadilian sa Mosaikong Kasuguan ang pagbilin sa isa ka kriminal sa bug-os nga gab-i sa palatyan nga usok. (Deuteronomio 21:​22, 23) Amo nga sang panahon ni Jesus, kon buhi pa ang ginlansang nga kriminal tubtob sa hapon, kinaandan na nga ginabalbag ang iya mga batiis agod madali sia mapatay. Indi na niya matiso ang iya kaugalingon agod makaginhawa sing maayo. Naghunahuna gid ang mga soldado nga patay na si Jesus amo nga wala nila ginbalbag ang iya mga batiis apang ginbalbag nila ang mga batiis sang duha ka malauton nga nalansang sa tupad niya. Posible nga ginbuno sang soldado ang iya kilid agod madula ang tanan nga pagduhaduha kag pat-uron nga indi na gid sia maumpawan sa ulihi kag basi ipanugidsugid nga nabanhaw kuno sia.

Ang Mateo 27:​49, 50 may tuhay nga pagpasunod sing mga hitabo. Nagasiling ini: “Nagkuha sing bangkaw ang isa pa ka tawo kag ginbuno ang iya kilid, kag naggua ang dugo kag tubig. Nagsinggit liwat sing mabaskog si Jesus, kag gintugyan ang iya espiritu.” Apang ang italiko nga dinalan wala sa tanan nga dumaan nga manuskrito sang Biblia. Nagapati ang madamo nga awtoridad nga gindugang ini sang ulihi gikan sa Ebanghelyo ni Juan apang nabutang sa sayop nga duog. Busa, ginabutang sang madamo nga badbad ini nga dinalan sa mga braket ukon parentesis, nagabutang sing nagapaathag nga footnote, ukon wala na lang ini ginalakip.

Ang master text nanday Westcott kag Hort, nga amo ang panguna nga ginbasihan sang New World Translation, nagbutang sini nga dinalan sa doble nga braket. Nagsiling ini sa footnote nga ang dinalan “dapat gid haumhaumon nga ginsal-ot lamang sang mga escriba.”

Gani makusog gid ang pamatuod nga husto ang Juan 19:​33, 34 kag nga patay na si Jesus sang ginbuno sia sing bangkaw sang Romanong soldado.

 [Kahon/Retrato sa pahina 8]

ANG GAHOM SANG PULONG SANG DIOS

Si Detlef, nga isa ka tin-edyer gikan sa nabungkag nga pamilya, nadalahig sa droga, alkohol, kag heavy metal nga musika.⁠ * Nangin katapo sia sang gang sang mga bulog, kag bangod sang iya kasingki gindakop sia sang mga pulis.

Sang 1992, 60 ka bulog ang nadalahig sa isa ka daku nga away batok sa 35 ka punker sa isa ka kalan-an kag ilimnan sa aminhan-nasidlangan sang Alemanya. Nakastiguhan sing todo ang isa sa mga punker nga si Thomas amo nga napatay sia. Sa tapos sang bista nga ginbalita sing lapnag, ginsentensiahan nga mabilanggo ang pila ka lider, lakip si Detlef.

Sang bag-o pa lang nakagua sa prisuhan si Detlef, ginhatagan sia sang isa ka Saksi ni Jehova sing pampleta. Ang pampleta may tig-ulo “Ngaa ang Kabuhi Puno Gid Sing mga Problema?” Nakita gilayon ni Detlef nga matuod ang ginsiling sini, kag gintun-an niya ang Biblia upod sa mga Saksi. Nagpabag-o ini sing bug-os sang iya kabuhi. Nangin makugi sia nga Saksi ni Jehova kutob sang 1996.

Si Siegfried, nga isa ka anay punker nga amigo gid ni Thomas, ang pamatan-on nga napatay; nangin Saksi man sang ulihi kag karon isa na ka gulang sa kongregasyon. Sang nagpamulongpulong pasad sa Biblia si Siegfried sa kongregasyon ni Detlef (natabuan nga nagatambong man didto kon kaisa ang iloy ni Thomas), gin-agda sia ni Detlef nga manyaga. Sang nagligad nga mga napulo ka tuig, mabudlay gid kontrolon ang ila dumot. Karon, talalupangdon gid ang ila utudnon nga gugma.

Ginakalangkagan nanday Detlef kag Siegfried ang pagkabanhaw ni Thomas sa paraiso nga duta. Si Detlef nagsiling: “Nagahibi ako sa paghunahuna lamang sini. Ginakasubo ko gid ang akon ginhimo.” Luyag nila nga duha nga buligan si Thomas sa amo nga tion, kaangay sang pagbulig nila karon sa iban nga makilala si Jehova kag magkalipay sa paglaum nga ginaaman sang Biblia.

Sa pagkamatuod, gamhanan gid ang Pulong sang Dios!

[Nota]

^ par. 25 Gin-islan ang mga ngalan.

[Retrato sa pahina 6]

Ang lawas sang tawo isa ka makatilingala nga tinuga

[Credit Line]

Anatomy Improved and Illustrated, London, 1723, Bernardino Genga