Adlaw sang Gradwasyon​—⁠Isa ka Matahom nga Adlaw

“GINPAKAMAAYO kita sing isa ka matahom nga adlaw. Masanag ang adlaw. Asul ang langit. Berde ang hilamon. Nagaamba ang mga pispis. Ang palibot nagapatimaan sang isa ka matahom nga adlaw, kag indi kita malugaw-an. Si Jehova indi isa ka Dios sang kalugaw-an. Isa sia ka Dios sang mga pagpakamaayo.”

Amo ini ang introduksion ni Utod Samuel Herd, isa ka katapo sang Nagadumala nga Hubon sang mga Saksi ni Jehova, sa iya pag-umpisa sang programa sang gradwasyon sang ika-117 nga klase sang Watchtower Bible School of Gilead. Ginhiwat ini sang Septiembre 11, 2004. Nalakip sa sining maayo nga programa ang makapalig-on nga pasad-sa-Biblia nga mga laygay subong man ang mga eksperiensia sang mga estudyante sa Gilead samtang nagaeskwela sila kag mga eksperiensia sang madugay na nga mga misyonero. Huo, isa ini ka matahom nga adlaw para sa 6,974 nga nagtambong sa Watchtower Educational Center sa Patterson, New York, kag sa mga pasilidad sa Brooklyn kag Wallkill, nga gin-angot paagi sa audio kag video.

Makapalig-on nga mga Pulong Para sa mga Estudyante

Si John Kikot, nga isa ka katapo sang Komite sang Sanga sa Estados Unidos, naghatag sing makapalig-on nga pamulongpulong sa tema nga “Hupti ang Kalipay Subong Misyonero.” Ginpatalupangod niya nga ang mga estudyante sang Gilead nakilal-an bangod sang ila kalipay, subong makita sa sini nga gradwasyon. Ang instruksion gikan sa Kasulatan sa tion sang ila pag-eskwela nagpahalipay sa mga estudyante, kag mabuligan na nila ang iban nga makaeksperiensia man sini nga kalipay. Paano? Paagi sa paghatag sang ila kaugalingon sa ministeryo subong mga misyonero. Si Jesus nagsiling: “May kapin nga kalipay sa paghatag sangsa pagbaton.” (Binuhatan 20:35) Mahuptan sang bag-ong mga misyonero ang ila kalipay kon padayon nila nga ilugon si Jehova nga Dios, ang maalwan kag “malipayon nga Dios,” nga nagahatag sing kamatuoran sa iban.​—⁠1 Timoteo 1:11.

Ang masunod nga may bahin sa programa amo ang isa pa ka katapo sang Nagadumala nga Hubon nga si David Splane, sa tema nga “Makapakigbagay Ka Bala?” Wala sing duhaduha nga maayo kag makalilipay ang pagpuyo kon may paghiusa, walay sapayan nga nagakinahanglan ini nga mangin ‘tanan kita nga butang sa tanan nga sahi sang tawo.’ (1 Corinto 9:22; Salmo 133:1) Ginsambit ni Utod Splane nga madamo nga tawo ang mapakig-angutan sang naggradwar nga mga estudyante sa ila pagmisyonero​—⁠mga tawo sa ila teritoryo, mga masigkamisyonero, mga kauturan sa ila bag-o nga kongregasyon, kag ang mga yara sa sanga talatapan nga nagatuytoy sa pagbantala kag pagpanudlo nga hilikuton. Naghatag sia sing praktikal nga mga panugda kon paano mahuptan ang maayo nga kaangtanan sa iban: Pagtuon sa lokal nga lenguahe, pagpakigbagay sa lokal nga kustombre, pagtahod sa pagkinaugalingon sang mga masigkamisyonero, kag pagkamapinasakupon sa mga nagapanguna.​​—⁠Hebreo 13:17.

Nian, ang instruktor sang Gilead nga si Lawrence Bowen  namangkot, “Ano ang Ginahunahuna Mo?” Ginpahanumdom niya ang mga estudyante nga ang mga ‘naghukom sa naggua nga panagway’ wala nagbaton kay Jesus subong Mesias. (Juan 7:24) Subong di-himpit nga mga tawo, dapat naton likawan ang ‘paghunahuna sa mga panghunahuna sang mga tawo’ sa baylo sang “panghunahuna sang Dios.” (Mateo 16:​22, 23) Bisan ang espirituwal nga mga tawo dapat magpadayon sa pagpasibu sang ila mga panghunahuna. Kaangay sang isa ka barko sa dagat, ang mga pagpasibu karon mahimo magkahulugan sang paglab-ot sa tulumuron ukon sang espirituwal nga pagkalunod. Ang padayon nga pagtuon sa Biblia sa husto nga paghangop sini magabulig sa aton sa paghunahuna sa “mga panghunahuna sang Dios.”

Si Wallace Liverance, isa pa ka instruktor sa Eskwelahan nga Gilead, naghinakop sining bahin sang programa. Ang iya tema, nga napasad sa Isaias 55:​1, amo ang “Ano ang Imo Baklon?” Ginpalig-on niya ang mga estudyante nga “baklon” ang paumpaw, kalipay, kag pagsakdag nga nagagikan sa matagnaon nga mensahe sang Dios para sa aton adlaw. Ginpaanggid sang tagna ni Isaias ining pulong sang Dios sa tubig, alak, kag gatas. Paano ini mabakal “kon wala sing kuarta kag wala sing bayad”? Ginpaathag ni Utod Liverance nga paagi ini sa paghatag sing igtalupangod sa tagna sang Biblia kag pagbaylo  sang unudnon nga mga panghunahuna kag mga dalanon sa mga panghunahuna kag mga dalanon sang Dios. (Isaias 55:​2, 3, 6, 7) Paagi sa paghimo sini, makapabilin ang bag-o nga mga misyonero sa ila mga asaynment sa iban nga pungsod. Masami ginahunahuna sang di-himpit nga mga tawo nga ang kalipay nagadepende sa pagtigayon sing mga kasulhayan sa materyal. “Indi ini pagpatihi,” laygay sang humalambal. “Indi kamo maghunahuna sing subong sini. Pat-ura nga may tion kamo para sa maid-id nga pagtuon sa matagnaon nga Pulong sang Dios. Makapaumpaw ini, makapabakod, kag makahatag sa inyo sang kalipay sa inyo asaynment subong mga misyonero.”

Makalilipay nga mga Eksperiensia sang mga Estudyante kag mga Interbyu

Ang mga estudyante regular nga nagapakigbahin sa pagbantala. Ginadumalahan ni Mark Noumair, isa pa ka instruktor sang Gilead, gin-akto sang pila ka estudyante ang mga eksperiensia nga nagapadaku sang tema nga “Wala Ginakahuya ang Maayong Balita.” (Roma 1:16) Nalipay ang mga tumalambong sa pagpamati kon paano nagpanaksi ining eksperiensiado nga mga ministro sa pamalaybalay, sa mga dalan, kag sa mga balaligyaan. Ginpanginpuslan sang mga estudyante nga nakahibalo sang iban nga lenguahe nga lab-uton ang mga tawo nga nagahambal sing dumuluong nga lenguahe sa teritoryo sang ila kongregasyon. Gingamit sing maayo sang iban ang pasad sa Biblia nga mga publikasyon sang mga Saksi ni Jehova sa mga pagduaw liwat kag sa pagsugod sing mga pagtuon sa Biblia sa puluy-an. “Wala [nila] ginakahuya” ang pagbantala sing maayong balita.

Si Utod William Nonkes, nga naasayn sa Service Department, nag-interbyu sa eksperiensiado nga mga misyonero gikan sa Burkina Faso, Latvia, kag Rusya. Naghatag sila sing praktikal nga mga laygay nga nasentro sa tema nga “Mahigugmaon nga Ginapadyaan ni Jehova ang mga Matutom.” Ang isa sa mga utod nga gin-interbyu nagpalig-on sa mga estudyante nga dumdumon ang 300 ka hangaway ni Gideon. Ang kada hangaway may asaynment nga nakabulig sa pagdaug sang pagpakig-away ni Gideon. (Hukom 7:​19-​21) Sing kaanggid, ang mga misyonero nga nagapabilin sa ila mga asaynment ginapadyaan man.

“Mangin Tanan nga Butang sa Tanan nga Sahi Sang Tawo” amo ang tema nga ginpadaku sa mga interbyu nga gindumalahan ni Samuel Roberson, nga isa ka instruktor sa Patterson. Gin-interbyu niya ang apat ka katapo sang Komite sang Sanga, gikan sa Senegal, Guam, Liberia, kag Madagascar. Mga 170 tanan ka misyonero ang nagaalagad sa sining mga pungsod. Nakatuon ang naggradwar nga mga estudyante sa mga komento kon paano nagabulig ang mga Komite sang Sanga sa bag-o nga mga misyonero sa pagpasibu sa ila mga asaynment. Masami ini nagakahulugan sing pagtuon sa mga kustombre nga mahimo indi kinaandan sa Katundan. Halimbawa, sa pila ka pungsod kinaandan na nga makita ang mga lalaki, lakip na ang mga kauturan, nga nagauyatay sing kamot samtang nagalakat. Sa pila ka lugar sa idalom sang pagdumala sang sanga sa Guam, may tumalagsahon nga mga pagkaon nga ginaserbe. Apang kon nakapasibu ang iban, makapasibu man ang bag-o nga mga misyonero.

Si Guy Pierce, isa ka katapo sang Nagadumala nga Hubon, nagpasangkad sang tema nga “Magpabilin nga Mainunungon sa ‘Ginharian Sang Aton Ginuo.’” Ginpahanumdom niya ang mga tumalambong: “Si Jehova nagpanuga nga may katuyuan. May katuyuan sia para sa iya mga tinuga. Wala nagbag-o ang iya katuyuan sa sini nga globo. Indi mapunggan ang katumanan sini. Wala sing makabag-o sa sini.” (Genesis 1:28) Ginpalig-on ni Utod Pierce ang tanan nga magpasakop sing mainunungon sa pagkasoberano sang Dios walay sapayan sang mga kabudlayan nga nag-utwas bangod sang sala sang una nga tawo nga si Adan. “Nagakabuhi kita sa oras sang paghukom. Diutay na lang ang nabilin nga tion agod lab-uton ang mga bunayag sing tagipusuon kag buligan sila nga mahibaluan ang kamatuoran. Gamita ang tion sing epektibo agod malab-ot ang iban sang maayong balita sang Ginharian,” laygay ni Utod Pierce. Ang mga mainunungon nga nagasuporta sa Ginharian sang Dios makasalig gid sa iya pagsakdag.​—⁠Salmo 18:25.

Sa nagahinakop nga bahin, ginbasa sang tsirman ang mga panamyaw kag mga pangamusta gikan sa mga sanga sa bug-os nga kalibutan. Nian ginpanagtag niya ang mga diploma sa naggradwar nga mga estudyante, nga ang isa sa ila nagbasa dayon sing isa ka sulat gikan sa klase, nga nagapabutyag sang tinagipusuon nga apresasyon sa paghanas nga ila nabaton. Nagakaigo gid ini nga konklusion sa isa ka matahom gid nga adlaw nga indi gid malipatan sang tanan nga nagtambong.

[Kahon sa pahina 23]

ESTADISTIKA SANG KLASE

Kadamuon sang mga pungsod nga gintiglawas: 11

Kadamuon sang mga pungsod nga ginpadalhan: 22

Kadamuon sang mga estudyante: 48

Promedyo nga edad: 34.8

Promedyo nga tuig sa kamatuoran: 18.3

Promedyo nga tuig sa bug-os tion nga ministeryo: 13.4

[Retrato sa pahina 24]

Ika-117 nga Naggradwar nga Klase Sang Watchtower Bible School of Gilead

Sa listahan sa ubos, ang mga raya ginanumeruhan halin sa atubangan pa-likod, kag ang mga ngalan ginalista halin sa wala pa-tuo sa kada raya.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.