Daw Ano Kalawig nga Sarang Mabuhi ang Tawo?

SANG Marso 3, 1513, ginsugdan sang Katsila nga manuglagulad nga si Juan Ponce de León ang isa ka talalupangdon nga ekspedisyon. Naglayag sia halin sa Puerto Rico nga nagalaum nga makalab-ot sa isla sang Bimini. Suno sa leyenda, ginpangita niya kuno ang isa ka milagruso nga tuburan​—⁠ang Tuburan sang Pagkapamatan-on. Apang, nagdungka sia sa ginatawag karon nga estado sang Florida, E.⁠U.⁠A. Siempre, wala niya nakita ang wala nagaluntad nga tuburan.

Sa karon, ang mga tawo sa kabilugan wala nagakabuhi sing sobra sa 70 ukon 80 anyos. Bisan pa nasulat sa Biblia nga may mga tawo nga nagkabuhi sing malawig katama, ang 2002 Guinness Book of World Records nagsiling nga 122 anyos kag 164 ka adlaw ang edad sang pinakatigulang nga tawo nga nabuhi. (Genesis 5:​3-​32) Apang, ang bioethicist nga si John Harris nagsiling: “Ang bag-o karon nga pagpanalawsaw nagapakita nga posible magluntad ang isa ka katilingban nga ang katigulangon​—⁠kag bisan gani ang kamatayon​—⁠mangin isa na ka butang nga malikawan.” Madamo nga manugpanalawsaw sang ika-21 nga siglo ang nagasambit sang “posibilidad sang imortalidad,” “walay limitasyon nga kabuhi sang mga tawo sa tuig 2099,” “isa ka kapasidad nga makapabuad sing mga selula sing walay untat,” kag ang mga kaangay sini.

Sa iya libro nga The Dream of Eternal Life, si Mark Benecke nagsiling: “Ang halos tanan nga selula sang lawas nagabag-o sing makapila ka beses sa bug-os nga pagkabuhi. . . . Pagligad sang mga pito ka tuig, sa pagkamatuod may bag-o na naman kita nga lawas.” Apang, indi ini matuod bangod ang mga selula nagauntat sa pagbuad pagligad sang pat-od nga kadamuon sang pagtunga. Kon indi subong sini ang nagakatabo, siling ni Benecke, “ang tawhanon nga lawas sarang kuntani makabag-o sang kaugalingon sini sa malawig gid nga tion​—⁠bisan gani sing dayon.”

Binagbinaga man ang makatilingala nga kapasidad sang utok sang tawo, nga diin daku katama ang kapasidad sini sangsa magamit naton sa aton malip-ot nga kabuhi. Suno sa Encyclopædia Britannica, ang utok sang tawo “may daku  katama nga ikasarang sangsa magamit sa bug-os nga kabuhi sang isa ka tawo.” (1976 nga Edisyon, Tomo 12, pahina 998) Ang libro nga How the Brain Learns, ni David A. Sousa, nagasiling: “Ang kapasidad sang utok sa paghupot sang impormasyon daw wala sing limitasyon.”​​—⁠Pahina 78, Ikaduha nga Edisyon, copyright 2001.

Kon ibase sa aton pisikal nga pagkahuman, ngaa indi mapaathag sang siensia kon ngaa nagakapatay kita? Kag ngaa bala tuman kadaku ang kapasidad sang aton utok? Posible ayhan nga gindesinyo kita para magkuha sing ihibalo sing dayon? Ngaa abi makahunahuna kita sing kabuhi nga walay katapusan?

Ang Biblia nagasiling: “Bisan ang tion nga wala sing latid ginbutang [sang Dios] sa ila tagipusuon, agod indi gid matukiban sang katawhan ang binuhatan nga ginhimo sang matuod nga Dios kutob sa ginsuguran tubtob sa katapusan.” (Manugwali 3:11) Ginapakita sini nga ginbutang sang Dios sa aton ang paghunahuna sang kabuhi nga walay katapusan. Paagi sa sini, may bag-o kita pirme nga matun-an tuhoy sa Dios kag sa iya mga binuhatan. Kon magkabuhi kita sing di-maisip nga tuig​—⁠huo, sing walay katapusan​—⁠indi kita maubusan sing matun-an tuhoy sa dalayawon nga mga tinuga sang Dios.

Ginapakita man sang mga pulong ni Jesucristo nga ang tawo posible mabuhi sing dayon. Nagsiling sia: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Kamusta ikaw? Luyag mo bala mabuhi sing walay katapusan?

[Mga retrato sa pahina 3]

Ginpangita ni Juan Ponce de León ang tuburan sang pagkapamatan-on

[Credit Line]

Ponce de León: Harper’s Encyclopædia of United States History