Ang Pagpangita sing Maayo nga mga Lider

“Maghalin ka na, siling ko, wala na kami sing kinahanglan sa imo. Sa ngalan sang Dios, maglakat ka na!”​​​—⁠⁠Oliver Cromwell; ginkutlo ni Leopold Amery, katapo sang Parlamento sang Britanya.

Walo na ka bulan ang malaglagon nga Bug-os Kalibutan nga Inaway II, kag daw mapierde na ang Britanya kag ang mga kaalyado sini. Sa opinyon ni Leopold Amery kag sang iban pa sa panguluhan, kinahanglan ang bag-o nga lider. Busa, sang Mayo 7, 1940, sa House of Commons, ginkutlo ni G. Amery ang mga pinamulong sa ibabaw kay Prime Minister Neville Chamberlain. Tatlo ka adlaw sang ulihi, nagbiya sa palangakuan si G. Chamberlain, kag si Winston Churchill ang nagbulos sa iya.

KINAHANGLAN gid sang katawhan ang isa ka lider, apang indi nga bisan sin-o lang. Bisan sa pamilya, ang amay dapat mangin sangkol sa pagpanguna agod mangin malipayon ang iya asawa kag kabataan. Gani, hunahunaa lang kon ano ang dapat himuon sang isa ka lider sa pungsod ukon sa kalibutan! Indi katingalahan nga mabudlay gid mangita sang maayo nga mga lider.

Bangod sini, sa sulod sang linibo ka tuig, di-maisip nga mga koronasyon, mga rebolusyon, mga pag-agaw sang panguluhan, mga pagtangdo, mga eleksion, mga asasinasyon, kag mga pagbag-o sang rehimen ang natabo. Naggahom kag naghalin ang mga hari, primer ministro, prinsipe, presidente, sekretaryo-heneral, kag mga diktador. Ang wala ginapaabot nga mga pagbag-o nagpahalin bisan sa gamhanan nga mga manuggahom. (Tan-awa ang kahon nga “Hinali nga Nadulaan Dayon Sing Gahom,” sa pahina 5.) Apang, ang sangkol kag mapinadayunon nga paggahom mabudlay gid maagom.

“Dapat Kontento Na Lang Kita”​—⁠⁠Ukon Mangita sing Iban?

Busa, indi katingalahan nga madamo ang nadulaan sang paglaum kon tuhoy sa pagpangita sing maayo nga lider. Sa pila ka pungsod, ang di-pagsapak kag pagkawalay paglaum sang mga tawo makita gid sa tion sang eleksion. Si Geoff Hill, isa ka dyurnalista sa Aprika, nagsiling: “Ang di-pagsapak ukon indi pagboto nagalapnag kon ang mga tawo nagabatyag nga wala sing mahimo agod bag-uhon ang kapiot sa ila pagkabuhi. . . . Sa Aprika, kon ang mga tawo indi magboto, wala ini nagakahulugan nga kontento sila. Sa masami, pagpangayo ini sing bulig sang mga nagabatyag nga wala sing  may nagapamati.” Sing kaanggid, ang isa ka kolumnista sa pamantalaan sa Estados Unidos nagsulat tuhoy sa nagahilapit nga eleksion: “Tani isa ka sangkol nga kandidato ang magpadalagan.” Sia nagdugang: “Wala sing amo sina. Wala gid. Dapat kontento na lang kita.”

Sa pagkamatuod, dapat na lang bala makontento ang mga tawo sa di-himpit nga mga lider? Ang katunayan bala nga wala sing tawhanon nga mga lider ang makahatag sing tanan nga kinahanglanon sang ila mga sakop nagapakita nga wala na gid sing maayo nga lider? Indi. Ang pagdumalahan nga labing maayo sarang matigayon. Ang masunod nga artikulo magabinagbinag kon sin-o ang nagakabagay nga lider sang katawhan kag kon paano ang iya pagdumala makabenepisyo sa minilyon ka katawhan sang tanan nga rasa​​—⁠⁠lakip ikaw.

[Mga retrato sa pahina 3]

Wala sa ibabaw: Neville Chamberlain

Tuo sa ibabaw: Leopold Amery

Idalom: Winston Churchill

[Credit Lines]

Chamberlain: Photo by Jimmy Sime/Central Press/Getty Images; Amery: Photo by Kurt Hutton/Picture Post/Getty Images; Churchill: The Trustees of the Imperial War Museum (MH 26392)