Magdiretso sa kaundan

Magdiretso sa listahan sang kaundan

Ginpaambit Niya ang Iya mga Pagtuluuhan sa Iya mga Klasmeyt

Ginpaambit Niya ang Iya mga Pagtuluuhan sa Iya mga Klasmeyt

 Ginpaambit Niya ang Iya mga Pagtuluuhan sa Iya mga Klasmeyt

LUYAG mo bala buligan ang imo mga klasmeyt nga mahangpan sing maayo ang imo pasad sa Biblia nga mga pagtuluuhan? Si Magdalena, isa ka 18-anyos nga hayskul nga estudyante sa Poland, masami nga nagapakighambal sa iya mga klasmeyt tuhoy sa iya mga pagtuluuhan subong isa sa mga Saksi ni Jehova. Bangod sini, pirme sia ginapamangkot subong sang, ‘Ano ang kinahanglan agod mangin isa sa mga Saksi ni Jehova?’ kag ‘Wala bala kamo nagapati kay Jesucristo?’ Paano niya mabuligan ang iya mga klasmeyt? Nangamuyo si Magdalena kay Jehova para sa panuytoy kag nanghikot suno sa iya mga pangamuyo.​​—⁠⁠Santiago 1:5.

Isa ka adlaw, ginpamangkot ni Magdalena ang iya maestra nga nagatahod sang iya mga pagtuluuhan kon mahimo niya ipakita sa klase ang video nga Jehovah’s Witnesses​​​—⁠⁠The Organization Behind the Name.⁠⁠ * Nagpasugot ang maestra. Dayon ginsilingan ni Magdalena ang iya mga klasmeyt: “Ang isa ko ka abyan magapresentar sing isa ka 90-minutos nga programa sa klase. May ipakita nga video kag paghinun-anon tuhoy sa mga Saksi ni Jehova. Luyag ninyo mamati?” Ang tanan nagsabat sing huo. Ginsugdan ni Magdalena kag ni Wojciech, isa ka eksperiensiado nga bug-os tion nga ebanghelisador, ang paghanda para sa proyekto.

Ang plano amo nga sugdan ang presentasyon paagi sa 20-minutos nga pamulongpulong pasad sa brosyur nga Mga Saksi ni Jehova​​​—⁠⁠Sin-o Sila? Ano ang Ila Ginapatihan? * kag sundan ini sang pamangkot kag sabat nga paghinun-anon. Dayon ipakita ang video sa librarya sang eskwelahan. Ang tagsa ka estudyante sa klase hatagan sing regalo​​—⁠⁠isa ka daku nga sobre nga may unod nga pila ka brosyur, libro nga Questions Young People Ask​​​—⁠⁠Answers That Work, * kag pila ka tract kag magasin.

Sang adlaw sang presentasyon, ang nagtambong amo ang 14 ka klasmeyt, ang maestra, kag ang 4 ka iban pa nga estudyante nga natabuan nga yara sa librarya. Una nga ginpaathag ni Wojciech nga ang pila ka Polako nga mamalaybay kag manunulat naggamit sang ngalan sang Dios, nga Jehova, sa ila mga sinulatan. Ginsambit man niya ang pila ka daan na nga katekismo sang Katoliko nga makita ang ngalan sang Dios. Sang ginpaathag niya ang modernong-adlaw nga hilikuton sang mga Saksi ni Jehova, ginpakita niya ang mga brosyur sang nanuhaytuhay nga sanga talatapan kag mga retrato sang pila ka Assembly Hall.

Ginsundan ini sang mapagsik nga paghinun-anon. Gingamit ni Magdalena kag ni Wojciech ang Biblia sa pagsabat sa mga pamangkot. Nagpadayaw ini sa mga nagtambong kag nakumbinsi sila nga ang mga Saksi ni Jehova wala nagabantala sang ila kaugalingon nga mga ideya. Ano ang pila sang mga pamangkot, kag paano ini ginsabat?

Pamangkot: Ang Biblia puno sang di-maathag nga mga ekspresyon kag mga pagpaanggid, nga mahimo hangpon sa madamo nga paagi. Paano posible nga magkabuhi suno sa ginasiling sang Biblia?

Sabat: Ang iban nagasiling nga ang Biblia kaangay sa isa ka byolin nga mahimo ka makatokar sing bisan ano nga tono nga luyag mo. Apang hunahunaa ini: Kon luyag mo mahibaluan kon ano ang buot silingon sang manunulat sa iya  ginsiling, indi bala labing maayo nga pamangkuton sia? Indi kaangay sa patay na nga mga manunulat sang mga sinulatan sang tawo, ang Awtor sang Biblia, si Jehova nga Dios, buhi. (Roma 1:​20; 1 Corinto 8:​5, 6) Ang konteksto sang isa ka kasulatan makapakita sing husto nga interpretasyon. Dugang pa, masami nga ginabinagbinag sang Biblia ang pareho nga tema sa pila ka bahin, gani ang pagpaanggid sa mga kasulatan makabulig. Sa amo ginatugutan naton nga tuytuyan sang Dios ang aton panghunahuna, subong bala nga sia mismo ang nagapaathag sang kasulatan sa aton. Sa paghimo sini, mahibaluan naton ang iya kabubut-on kag magkabuhi suno sa sini subong ginapakita sa Biblia, indi bala?

Pamangkot: Ano ang kinatuhayan sang mga Cristiano sa mga Saksi ni Jehova?

Sabat: Mga Cristiano kami! Apang sa baylo nga mangangkon lamang nga mga Cristiano, ginatinguhaan sang mga Saksi ni Jehova nga magkabuhi nahisuno sa ila ginapatihan kag sa ginatudlo sang Dios sa ila para sa ila kaayuhan. (Isaias 48:​17, 18) Sanglit ang tanan nila nga panudlo napasad sa Biblia, nahibaluan nila nga yara sa ila ang kamatuoran.​​—⁠⁠Mateo 7:​13, 14, 21-23.

Pamangkot: Ngaa ginakadtuan ninyo ang mga estranghero kag nagainsister nga makighambal sa ila? Indi bala ini pagpilit sang inyo pagtuluuhan sa iban?

Sabat: Sa banta mo sayop bala kon may isa nga makighambal sing matinahuron sa imo sa dalan kag pangabayon ang imo opinyon tuhoy sa isa ka butang? (Jeremias 5:⁠1; Sofonias 2:​2, 3) (Dayon ginpakita ni Wojciech kag ni Magdalena kon paano nila ginapamangkot ang nagalabay kon bala nagaulikid ang Dios sa mga nag-antos sa baha kasan-o lang sa Poland.) Kon mabatian na ang opinyon sang tawo, ginapatalupangod namon ang Biblia. Kon ang isa indi luyag makighambal, nagapaalam kami kag maglakat. (Mateo 10:11-14) Pagpamilit bala ina sa iban nga makighambal? Ukon indi na lang bala dapat makighambal ang mga tawo?

Pamangkot: Ngaa wala kamo nagasaulog sang mga kapiestahan?

Sabat: Ginasaulog namon ang isa lamang ka okasyon nga ginasugo sang Biblia nga saulugon​​—⁠⁠ang Memoryal sang kamatayon ni Jesucristo. (1 Corinto 11:23-​26) Kon tuhoy sa mga kapiestahan, mahibaluan mo ang ginsugdan sini paagi sa mga insiklopedia kag iban pa nga masaligan nga mga tiliman-an. Kon himuon mo ini, mahangpan mo kon ngaa wala namon ginasaulog ini nga mga okasyon.​​—⁠⁠2 Corinto 6:​14-​18.

Madamo pa nga pamangkot ang ginsabat. Naglawig ang paghinun-anon amo nga ginpaisol ang pagpagua sing video.

Ano ang reaksion sang mga estudyante? Pasugiron naton si Magdalena: “Nakibot ako nga ang iban nga mga estudyante nga masami nagalangolango kag nagayubit sa iban nagpamangkot sing serioso. Bisan pa ginapangangkon nila nga mga ateista sila, sa tion sang paghinun-anon nagpakita sila sing pagtuo sa Dios!” Mapinasalamaton nga ginbaton sang mga nagtambong ang mga regalo​​—⁠⁠may kabug-usan nga 35 ka libro, 63 ka brosyur, kag 34 ka magasin ang napahamtang sa ila.

Makalilipay gid nga mga resulta sang isa ka proyekto sa eskwelahan! Wala lamang ini nagbulig sa mga klasmeyt ni Magdalena nga makilala sing maayo kag mahangpan ang mga Saksi ni Jehova kundi nagpalig-on man ini sa madamo nga pamatan-on nga hunahunaon ang katuyuan sang kabuhi. Ngaa indi mo pagpanikasugan nga mabuligan ang imo mga klasmeyt nga makatuon sing dugang pa tuhoy sa imo ginapatihan?

[Mga nota]

^ par. 3 Ginbalhag sang mga Saksi ni Jehova.

^ par. 4 Ginbalhag sang mga Saksi ni Jehova.

^ par. 4 Ginbalhag sang mga Saksi ni Jehova.

[Retrato sa pahina 31]

Si Magdalena kag si Wojciech nagahanda para sa paghinun-anon