‘Mangamuyo Kamo sa Sining Paagi’

SAULADO mo bala ang pangamuyo nga Amay Namon? Amo ini ang modelo nga pangamuyo nga gintudlo ni Jesucristo. Sa iya bantog nga Sermon sa Bukid, si Jesus nagsiling: “Mangamuyo kamo, nian, sa sining paagi.” (Mateo 6:9) Bangod si Jesus ang nagtudlo sini, masami ini ginatawag nga Pangamuyo sang Ginuo, kilala man subong ang pangamuyo nga Amay Namon.​​—⁠Paternoster, sa Latin.

Saulado sang minilyon ka tawo sa bug-os nga kalibutan ang Amay Namon kag masami nila ini ginasulitsulit, ayhan adlaw-adlaw. Sining nagligad nga mga tinuig, madamo ang nagapangadi sini sing mabaskog sa mga eskwelahan kag sa publiko nga mga okasyon. Ngaa ginapabaloran gid ang pangamuyo nga Amay Namon?

Ang ikatlong-siglo nga teologo nga si Cyprian nagsulat: “May mas espirituwal pa bala nga pangamuyo sangsa isa nga ginhatag sa aton ni Cristo . . . ? May mas matinuuron pa bala nga pangamuyo sa Amay sangsa pangamuyo nga ginhatag sa aton sang Anak nga amo ang Kamatuoran?”​​—⁠Juan 14:6.

Sa mga katekismo sini, ginkabig sang Iglesia Katolika Romana ang Amay Namon subong “ang importante gid nga pangamuyo sang mga Cristiano.” Ginakilala sang The World Book Encyclopedia ang importante nga bahin sini nga pangamuyo sa tanan nga relihion sang Cristiandad, kag ginalaragway ini subong isa sa “importante nga mga pagpahayag sang Cristianong pagtuo.”

 Apang, dapat man naton batunon nga madamo sang nagapangadi sang Amay Namon ang wala gid makahangop sa sini. “Kon ginpadaku ka sa isa ka Cristiano nga pamilya ayhan nagaduroy lang nga mapangadi mo ang Amay Namon,” siling sang Ottawa Citizen nga pamantalaan sa Canada, “apang mahimo mabudlayan ka kon lagdayon mo kag hangpon ang imo ginapangadi.”

Importante gid bala nga mahangpan naton ang aton mga pangamuyo sa Dios? Ngaa ginhatag ni Jesus sa aton ang pangamuyo nga Amay Namon? Ano ang kahulugan sini para sa imo? Binagbinagon naton ining mga pamangkot.