Mga Pamangkot Gikan sa mga Bumalasa

Ngaa nagasiling ang mga Saksi ni Jehova nga literal kag indi simbuliko ang numero nga 144,000 nga ginsambit sa tulun-an nga Bugna?

Si apostol Juan nagsulat: “Nabatian ko ang kadamuon sang mga napat-inan, isa ka gatos kag kap-atan kag apat ka libo.” (Bugna 7:4) Sa Biblia, ang prase nga “mga napat-inan” nagapatuhoy sa isa ka grupo sang mga indibiduwal nga ginpili sa katawhan agod maggahom kaupod ni Cristo sa langit sa palaabuton nga Paraiso sa duta. (2 Corinto 1:​21, 22; Bugna 5:​9, 10; 20:6) Mahangpan nga literal ang ila kadamuon nga 144,000 bangod sang pila ka rason. Ang isa ka rason makita sa konteksto sang Bugna 7:4.

Sa tapos masugiran si apostol Juan sa palanan-awon tuhoy sini nga grupo sang 144,000 ka indibiduwal, nakita niya ang isa pa ka grupo. Ginlaragway ni Juan ining ikaduha nga grupo subong “isa ka dakung kadam-an, nga wala sing tawo nga makaisip, gikan sa tanan nga mga pungsod kag mga tribo kag mga katawhan kag mga hambal.” Ining dakung kadam-an nagapatuhoy sa mga makalampuwas sa palaabuton nga “dakung kapipit-an,” nga magalaglag sa malaut nga kalibutan karon.​—⁠Bugna 7:​9, 14.

Apang, talupangda ang pagpatuhay ni Juan sa bersikulo 4 kag 9 sang Bugna kapitulo 7. Ginsiling niya nga ang una nga grupo, ang “mga napat-inan,” may pat-od nga kadamuon. Apang, ang ikaduha nga grupo, “isa ka dakung kadam-an,” wala sing pat-od nga kadamuon. Ginadumdom ini, makatarunganon nga isiling nga literal ang numero nga 144,000. Kon ang numero nga 144,000 simbuliko kag nagpatuhoy sa isa ka grupo nga di-pat-od ang kadamuon, indi mapatuhay ining duha ka bersikulo. Gani, ginapakita gid sang konteksto nga literal ang numero nga 144,000.

Madamong iskolar sa Biblia, sang una kag karon, ang may amo man nga konklusion​—⁠nga ang numero literal. Halimbawa, nagakomento sa Bugna 7:​4, 9, ang taga-Britanya nga leksikograpo nga si Dr. Ethelbert W. Bullinger nagsiling sang mga 100 ka tuig sang una: “Isa ini ka simple nga kamatuoran: isa ka pat-od nga kadamuon nga tuhay sa di-pat-od nga kadamuon sa sini nga kapitulo.” (The Apocalypse or “The Day of the Lord,” pahina 282) Sining karon lang, si Robert L. Thomas, Jr., propesor sa Bag-ong Testamento sa The Master’s Seminary sa Estados Unidos, nagsulat: “Indi mabakod ang basihan sang pagsiling nga simbuliko ang numero.” Nagsiling pa sia: “Isa ini ka pat-od nga kadamuon [sa 7:4] nga tuhay sa di-pat-od nga kadamuon sa 7:9. Kon tamdon ini nga simbuliko, wala sing numero sa tulun-an ang mahimo tamdon nga literal.”​—⁠Revelation: An Exegetical Commentary, Tomo 1, pahina 474.

Ginapilit sang iban nga bangod simbuliko katama ang Bugna, ang tanan nga numero sa sini nga tulun-an, lakip ang numero nga 144,000, simbuliko man. (Bugna 1:​1, 4; 2:10) Apang, maathag nga indi husto ini nga konklusion. Matuod, madamo sing simbuliko nga numero  sa Bugna, apang may literal man nga mga numero sa sini. Halimbawa, ginsambit ni Juan “ang napulog-duha ka ngalan sang napulog-duha ka apostoles sang Kordero.” (Bugna 21:14) Maathag nga literal, indi simbuliko, ang numero nga 12 sa sini nga bersikulo. Isa pa, nagsulat si apostol Juan tuhoy sa “isa ka libo ka tuig” nga paghari ni Cristo. Literal man ini nga numero pasad sa maid-id nga pagbinagbinag sa Biblia.⁠ * (Bugna 20:​3, 5-7) Gani, depende sa konteksto sang isa ka numero sa Bugna kon bala literal ukon simbuliko ini nga numero.

Ang pagsiling nga literal ang numero nga 144,000 kag nagapatuhoy sa limitado nga kadamuon sang mga indibiduwal, nga mas gamay nga grupo kon ipaanggid sa “dakung kadam-an,” nahisanto man sa iban pa nga mga teksto sa Biblia. Halimbawa, sa ulihi nga bahin sang palanan-awon ni apostol Juan, ginlaragway nga ang 144,000 nga “ginbakal gikan sa mga katawhan subong nahaunang mga bunga.” (Bugna 14:​1, 4) Ang ekspresyon nga “nahaunang mga bunga” nagpatuhoy sa diutay nga ginpili nga sampol. Dugang pa, sang diri pa sa duta si Jesus, ginpatuhuyan niya ang mangin kaupod niya nga magagahom sa iya Ginharian sa langit kag gintawag sila nga “diutay nga panong.” (Lucas 12:32; 22:29) Sa pagkamatuod, ang mga tawo nga magagahom sa langit diutay kon ipaanggid sa mga tawo nga magapuyo sa palaabuton nga Paraiso sa duta.

Gani, ang konteksto sang Bugna 7:4 kag ang may labot nga mga pinamulong sa iban pa nga bahin sang Biblia nagapamatuod nga literal ang numero nga 144,000. Nagapatuhoy ini sa mangin kaupod ni Cristo sa langit nga magagahom sa paraiso nga duta, nga mapuno sing daku kag di-pat-od nga kadamuon sang malipayon nga katawhan nga nagasimba kay Jehova nga Dios.​—⁠Salmo 37:29.

[Nota]

^ par. 7 Para sa dugang nga impormasyon sa Isa ka Libo ka Tuig nga Paggahom ni Cristo, tan-awa ang Revelation​​—⁠Its Grand Climax At Hand! pahina 289-​90, nga ginbalhag sang mga Saksi ni Jehova.

[Blurb sa pahina 31]

Ang kadamuon sang may langitnon nga palanublion 144,000 lamang

[Retrato sa pahina 31]

Di-maisip ang “dakung kadam-an”

[Credit Line sang retrato sa pahina 31]

Stars: Courtesy of Anglo-Australian Observatory, photograph by David Malin