Mga Pamangkot Gikan sa mga Bumalasa

Ano ang buot silingon ni Jesus sang nagsiling sia sa iya mga disipulo: “Nakita ko si Satanas nga nahulog kaangay sang kilat gikan sa langit”?

Bag-o gid lang ginpili ni Jesus ang 70 ka disipulo, kag “ginpadala sila sing tagduhaduha sa una niya sa tagsa ka siudad kag duog nga iya kadtuan.” Sang nagbalik ang 70, nalipay gid sila sa kadalag-an sang ila pagbantala. “Ginuo, bisan pa ang mga demonyo nagpasakop sa amon paagi sa paggamit sang imo ngalan,” siling nila. Gani si Jesus nagsiling: “Nakita ko si Satanas nga nahulog kaangay sang kilat gikan sa langit.”​—⁠Lucas 10:​1, 17, 18.

Sa primero, daw natabo na ang ginapatuhuyan ni Jesus. Apang, 60 ka tuig pagkatapos ginhambal ni Jesus ang mga pulong sa ibabaw, ang tigulang na nga si apostol Juan naghambal sing kaanggid nga mga pulong sang sia nagsulat: “Gintagbong ang daku nga dragon, ang orihinal nga man-ug, ang ginatawag nga Yawa kag Satanas, nga nagapatalang sa bug-os napuy-an nga duta; gintagbong sia sa duta, kag ang iya mga anghel gintagbong upod sa iya.”​—⁠Bugna 12:9.

Sang ginsulat ini ni Juan, si Satanas nagapuyo pa sa langit. Ngaa masiling naton ini? Bangod ang Bugna isa ka tulun-an sang tagna, indi sang maragtas. (Bugna 1:1) Gani, sadtong panahon ni Juan, wala pa matagbong si Satanas sa duta. Ang matuod, ginapakita sang ebidensia nga natabo lang ini wala madugay pagkatapos ginpalingkod si Jesus subong Hari sa Ginharian sang Dios sang 1914.⁠ *​—⁠Bugna 12:1-10.

Ngaa, nian, naghambal si Jesus tuhoy sa pagtabog kay Satanas gikan sa langit nga daw subong bala nga natabo na ini? Ang iban nga mga iskolar nagsiling nga ginsabdong ni Jesus ang iya mga disipulo bangod daw nagpabugal sila. Nagapati sila nga, daw subong bala nga nagsiling sia: ‘Nadaug ninyo ang mga demonyo, apang indi kamo magpabugal. Si Satanas nangin bugalon, kag amo ini ang gintunaan sang iya hinali nga pagkapukan.’

Indi kita dapat mangin dogmatiko tuhoy sini. Apang, daw mahimo gid nga nagkalipay si Jesus upod sa iya mga disipulo kag ginpatuhuyan niya ang palaabuton nga kalaglagan ni Satanas. Mas nahibaluan ni Jesus sangsa iya mga disipulo ang daku nga pagdumot sang Yawa. Handurawa ang kalipay ni Jesus sang nabatian niya nga ang gamhanan nga mga demonyo wala sing mahimo sa iya di-himpit tawhanon nga mga disipulo! Ini nga pagkalutos sang mga demonyo paglaragway lamang sa palaabuton nga adlaw kon si Jesus, subong si Miguel nga arkanghel, magapakig-away kay Satanas kag itagbong sia sa duta gikan sa langit.

Sang nagsiling si Jesus nga nakita niya si Satanas nga “nahulog,” ginpadaku niya ang pat-od nga pagkapukan ni Satanas. Pareho man ini sa iban pa nga mga tagna sa Biblia nga nagatagna sang mga hitabo sa palaabuton nga daw natabo na. Halimbawa, talupangda ang pagsamo sa natabo na kag matabo pa nga mga hitabo sa tagna tuhoy sa Mesias sa Isaias 52:⁠13⁠–​​53:12. Mahimo nga nagpabutyag si Jesus sing pagsalig nga matabo ang pagtabog kay Satanas gikan sa langit suno sa katuyuan sang Iya Amay. Napat-od man ni Jesus nga sa gintalana nga tion sang Dios, si Satanas kag ang iya mga demonyo itagbong sa kadadalman kag sa ulihi laglagon sing dayon.​—⁠Roma 16:20; Hebreo 2:14; Bugna 20:1-3, 7-10.

[Nota]

^ par. 5 Tan-awa Ang Ihibalo nga Nagadul-ong sa Kabuhi nga Walay Katapusan, kapitulo 10, kag Revelation​​—⁠Its Grand Climax At Hand! kapitulo 27, nga ginbalhag sang mga Saksi ni Jehova.