Ano ang Nagahatag sa Kabuhi sing Matuod nga Kahulugan?

SANG ginpamangkot si Jesse, isa ka 17-anyos nga estudyante sa hayskul, tuhoy sa kahulugan sang kabuhi, nagsabat sia, “Magpangalipay ka tubtob buhi ka.” Tuhay ang pagtamod ni Suzie. “Nagapati gid ako nga ang kahulugan sang kabuhi amo ang ginapanikasugan mo nga mangin amo ini,” siling niya.

Napaligban mo na bala kon ano ang kahulugan sang kabuhi? May isa lamang bala ka katuyuan para sa tanan nga katawhan? Ukon husto ayhan si Suzie​​—⁠nga ang kabuhi amo ang ginapanikasugan sang kada isa sa aton? Walay sapayan kon daw ano na ang gin-uswag sang aton sosiedad sa teknolohiya, daw may yara sa sulod naton nga nagapamangkot kon ano ang kahulugan sang kabuhi. Nagaabot sa aton kabuhi nga ang kalabanan sa aton nagapalibog, ‘Ngaa yari kita diri?’

Ang moderno nga siensia nagpanikasog gid agod sabton ini nga pamangkot. Ano ang resulta? “Suno sa ebolusyon, wala sing kahulugan ang aton pagluntad,” siling ni David P. Barash, isa ka propesor sang sikolohiya kag soolohiya. Para sa mga biologo nga nagapati sa ebolusyon, ang buhi nga mga tinuga may isa lamang ka katuyuan: mabuhi kag magbuad. Sa amo, si Propesor Barash nagsiling: “Sa isa ka daku nga uniberso nga wala sing katuyuan kag wala sing pag-ulikid sa mga tawo, responsibilidad naton nga hatagan sing kahulugan ang aton kabuhi paagi sa hilway kag hungod nga mga pagpili naton.”

Ang Ginhalinan sang Kahulugan kag Katuyuan sang Pagluntad

Amo lamang bala ini ang kahulugan sang kabuhi​​—⁠ang himuon kon ano ang naluyagan sang kada isa sa aton? Sa baylo nga pabay-an kita nga magdalangdalang sa isa ka uniberso nga wala sing katuyuan ukon kahulugan, madugay na ginpakita sang Biblia nga yari kita diri para sa isa ka katuyuan. Ang aton pagluntad indi resulta sang kinaugali nga aksidente sa kahawaan. Ginsugiran kita nga ang Manunuga naghinguyang sing madamo nga tinuig agod ihanda ang duta para sa tawo. Wala sing butang nga natabuan lang. Ginpat-od sang Dios nga ang tanan nga butang “tama gid kaayo.” (Genesis 1:31; Isaias 45:18) Ngaa? Bangod may katuyuan ang Dios para sa tawo.

Apang, sing talalupangdon, wala ginpredestinar sang Dios ang palaabuton sang tagsa ka indibiduwal, paagi sa iya pagpasilabot ukon paagi sa pila ka proseso sang kabuhi. Bisan pa naimpluwensiahan kita sang aton genetiko nga palanublion, kita ang may daku nga kontrol sang aton mga buhat. Hilway kita tanan sa pagpili sang aton kaugalingon nga dalanon sa kabuhi.

Bisan pa nga depende sa kada isa sa aton kon ano ang himuon naton sa aton kabuhi, sayop gid nga indi pag-ilakip ang aton Manunuga sa aton mga plano. Sa pagkamatuod, madamo ang nakatukib nga ang matuod nga kahulugan kag katuyuan sang kabuhi naangot sa kaangtanan sang isa sa Dios. Ang importante nga kaangtanan sang aton katuyuan sa kabuhi sa Dios ginapadaku sa personal nga ngalan sang Dios, nga Jehova, nga literal nga nagakahulugan, “Ginapahanabo Niya nga Mangin Amo.” (Exodo 6:⁠3; Salmo 83:18) Buot silingon, amat-amat niya nga ginatuman ang iya mga saad kag pirme niya ginatuman ang iya mga katuyuan. (Exodo 3:14; Isaias 55:​10, 11) Hunahunaa  ini. Ang ngalan nga Jehova isa ka garantiya sa aton tanan nga sia ang supremo kag dayon nga Tuburan sang makahulugan nga katuyuan sa kabuhi.

Ang pagbaton lamang nga nagaluntad ang Manunuga may daku na nga epekto sa pagtamod sang isa ka tawo sa kabuhi. Si Linet, nga 19-anyos, nagsiling: “Ang makita ang tanan nga makatilingala nga mga butang nga gintuga ni Jehova kag ang ila katuyuan nagatudlo sa akon nga ako man gintuga nga may katuyuan.” Si Amber nagdugang: “Kon maghambal ang mga tawo nga wala sila makahibalo nga nagaluntad ang Dios, nagapasalamat ako nga nahibaluan ko. Ang pamatuod nga si Jehova nagaluntad makita sa mga butang nga iya ginhimo.” (Roma 1:20) Sa pagkamatuod, ang pagkahibalo nga nagaluntad ang Manunuga isa ka butang, apang kinahanglan man ang pagpalambo sing makahulugan nga kaangtanan sa iya.

Pagpakig-abyan sa Dios

Makabulig man sini ang Biblia. Ang nagabukas nga mga kapitulo sini nagaaman sing maathag nga pamatuod nga si Jehova nga Dios isa ka mahigugmaon nga Amay. Halimbawa, wala niya pagtugaha sanday Adan kag Eva kag pagkatapos pabay-an sila nga magpakotpakot kon sin-o sia. Sa baylo, tayuyon sia nga nakigkomunikar sa ila. Wala niya sila ginpabay-an sa Eden nga magmatumato samtang ginahimo niya ang iban nga mga butang. Sa baylo, ginhatagan niya sila sing espesipiko nga pagtuytoy kon ano ang labing maayo nga paagi sang pagkabuhi. Ginhatagan niya sila sing makaalayaw nga hilikuton, kag ginhimos man niya ang padayon nga pagtudlo sa ila. (Genesis 1:26-30; 2:7-9) Indi bala nga amo gid ini ang paabuton mo sa isa ka sangkol, mahigugmaon nga ginikanan? Hunahunaa karon kon ano ang kahulugan sini. “Ang pagkahibalo nga gintuga ni Jehova ang duta kag nagdesinyo sa aton nga may ikasarang sa pagkalipay sa iya mga tinuga,” siling ni Denielle, “nagatudlo sa akon nga luyag niya nga magkalipay kita.”

Dugang pa, kaangay sang maayo nga amay, luyag ni Jehova nga ang tanan niya nga mga anak may yara personal nga kaangtanan sa iya. Sa sini nga katuyuan, ang Binuhatan 17:27 nagapasalig sa aton: “Indi sia malayo sa tagsatagsa sa aton.” Ano ang mahimo nga epekto sini? Si Amber nagsiling: “Ang pagkilala kay Jehova nagpasalig sa akon nga wala gid ako nagaisahanon sing bug-os. Bisan ano man ang matabo, may isa nga pirme ko madangpan.” Dugang pa, samtang nagadugang ang imo ihibalo kay Jehova, masapwan mo nga sia maluluy-on, makatarunganon, kag maayo. Makasalig ka gid sa iya. “Sang mangin suod ko nga abyan si Jehova,” siling ni Jeff, “nahibaluan ko nga wala na sing iban pa nga mas handa sa pagbulig sa akon.”

Sing makapasubo, madamo sing negatibo nga mga butang ang ginhambal nahanungod kay Jehova. Sia ang ginabasol sa daku gid nga pag-antos sang mga tawo kag sa indi maayo nga mga buhat sang relihion. Ginpabangod man sa iya ang pila ka tuman nga mga pagpamintas sa maragtas sang tawo. Apang ang Deuteronomio 32:​4, 5 nagapaathag: “Ang tanan niya nga dalanon katarungan. . . . Nagpanghikot sila sing malaglagon sa bahin nila; Sila indi niya mga anak, ang kasawayan ila.” Busa, obligado kita nga usisaon ang mga katunayan para sa aton kaugalingon.​—⁠Deuteronomio 30:​19, 20.

Natuman ang Katuyuan sang Dios

Apang, bisan ano man ang aton himuon, wala gid sing makapugong sa Dios sa pagtuman sang iya katuyuan para sa duta kag sa katawhan. Kay man, sia ang Manunuga. Ano, nian, ini nga katuyuan? Ginpatuhuyan ini ni Jesucristo sa iya Sermon sa Bukid sang sia nagsiling: “Malipayon ang mga malulo, kay sila magapanubli sang duta.” Sang ulihi, sa iya apostol nga si Juan, ginsugid niya nga determinado gid ang Dios “sa paglaglag sa mga nagalaglag sang duta.” (Mateo 5:⁠5; Bugna 11:18) Bangod kaupod si Jesus sang Dios sa tion sang pagpanuga, nahibaluan gid niya nga kutob sa ginsuguran katuyuan sang Dios nga himpit nga pamilya ang magapuyo sa isa ka paraiso nga duta sing dayon. (Genesis 1:​26, 27; Juan 1:1-3) Kag ang Dios wala nagabag-o. (Malaquias 3:6). “Suno gid sa akon ginpainuino,” saad sang Dios sa aton, “amo ini ang mahanabo; kag suno gid sa akon gintuyo, amo ini ang matabo.”​—⁠Isaias 14:24.

Sa aton tion, ginsugdan na ni Jehova ang pagpasad sang pundasyon sang isa ka nahiusa nga katilingban nga napasad, indi sa kakagod kag pagkamahamkunon nga lapnag gid sa kalibutan karon, kundi sa gugma sa Dios kag sa isigkatawo.  (Juan 13:35; Efeso 4:​15, 16; Filipos 2:1-4) Isa ini ka boluntaryo nga katilingban sang mauswagon kag makugi nga mga indibiduwal nga may isa ka katuyuan​​—⁠pagbantala sing maayong balita sang nagapakari nga Ginharian sang Dios antes malaglag ining sistema sang mga butang. (Mateo 24:14; 28:​19, 20) Sa kapin sa 230 ka kadutaan, kapin sa anom ka milyon nga Cristiano ang nagasimba na sing tingob sa isa ka mahigugmaon, nahiusa kag internasyonal nga paghiliutod.

Hatagi sing Kahulugan ang Imo Kabuhi

Kon nagapangita ka sing daku pa nga kahulugan sa imo kabuhi, ginaagda ka ni Jehova nga Dios nga makig-upod sa iya katawhan​​—⁠ang iya “matarong nga pungsod”​—⁠karon. (Isaias 26:2) Apang, ayhan magapalibog ka, ‘Ano ang kahimtangan sang kabuhi sa sining Cristianong katilingban? Luyag ko gid bala nga mangin katapo sini?’ Pamatii ang ginsiling sang pila ka pamatan-on:

Quentin: “Ang kongregasyon amo ang akon dalangpan gikan sa kalibutan. Ang paghunahuna nga aktibo nga nadalahig si Jehova sa akon kabuhi nagabulig sa akon sa paghantop nga nagaluntad sia kag luyag niya nga magkalipay ako.”

Jeff: “Ang kongregasyon amo ang pinakamaayo nga duog nga makadtuan ko agod mapalig-on ako. Yara ang akon mga kauturan, nga nagahatag sang ila pagsakdag kag pagdayaw. Sila gid ang akon dugang nga pamilya.”

Linet: “Ang kalipay nga makita ang isa nga nagabaton sang kamatuoran sang Biblia kag nagadesisyon nga mag-alagad kay Jehova indi gid mapaanggid sa bisan ano nga butang. Nagahatag ini sing daku nga kaayawan sa akon kabuhi.”

Cody: “Wala gid sing pulos ang akon kabuhi kon wala si Jehova. Magadalangdalang ako kaangay sang iban sa pagpangita sing kalipay, apang indi ini masapwan. Sa baylo, ginhatagan ako ni Jehova sing hamili nga pribilehiyo nga mangin abyan niya, kag nagahatag ini sing kahulugan sa akon kabuhi.”

Ngaa indi mangusisa para sa imo kaugalingon? Matukiban mo nga paagi sa pagpakigsuod sa imo Manunuga, si Jehova nga Dios, masapwan mo ang matuod nga kahulugan sang kabuhi.

[Mga retrato sa pahina 31]

Ang kaangtanan sa Dios nagahatag sing kahulugan sa aton kabuhi

[Credit Line sang retrato sa pahina 29]

NASA photo