Magdiretso sa kaundan

Magdiretso sa listahan sang kaundan

Pagbuhat sang Maayo sa mga Tion sang Pagkinahanglan

Pagbuhat sang Maayo sa mga Tion sang Pagkinahanglan

 Pagbuhat sang Maayo sa mga Tion sang Pagkinahanglan

“MAGBUHAT kita sang maayo ayon sa tanan,” siling ni apostol Pablo, apang “labi na gid sa mga tagapanimalay sang pagtuo.” (Galacia 6:​10) Ginatinguhaan gid sang mga Saksi ni Jehova sa bug-os nga kalibutan nga iaplikar ining mga prinsipio sa ila kabuhi, ang pagbuhat sing maayo sa tanan, ilabi na gid sa ila masigkatumuluo. Pirme ini makita sa mga tion sang pagkinahanglan. Binagbinagon naton ang pila ka halimbawa sining karon lang gikan sa tatlo ka pungsod.

Sang Disiembre 2002, isa ka mabaskog nga bagyo ang naglaslas sa Guam, nga may hangin nga nagalabaw sa 300 kilometros por ora. Madamo nga balay ang nagkalaguba, ang iban nawasak gid. Ang mga kongregasyon didto madasig nga nag-organisar sang mga grupo sang mga manugpaninlo agod buligan ang Saksi nga mga pamilya nga labi nga nahalitan. Ang sanga sa Guam nagpadala sing mga materyales kag mga tawo agod kay-uhon ang naguba nga mga balay, kag nagbulig man ang sanga sa Hawaii. Pagligad sang mga pila ka semana, isa ka grupo sang mga panday ang nag-abot halin sa Hawaii agod magbulig sa pagpanukod liwat, kag agod mabuligan sila, ang iban nga tumandok nga mga utod nagbakasyon sa ila mga trabaho. Ang espiritu sang malipayon nga kooperasyon nangin isa ka panaksi sa bug-os nga komunidad.

Sa isa ka banwa sang siudad sang Mandalay, Myanmar, may sunog nga natabo indi malayo sa isa ka Kingdom Hall. Malapit sa sunog ang balay sang isa ka di-aktibo nga utod nga babayi kag sang iya pamilya. Ang hangin nagahuyop sa direksion sang iya balay, amo nga nagdalagan sia sa Kingdom Hall agod mangayo sing bulig. Sa sini nga tion, ginakay-o ang Kingdom Hall, amo nga madamo didto sing mga kauturan. Nakibot sila sang makita nila ang utod nga babayi kay wala sila nakahibalo nga diri gali sia nayon nagapuyo. Madasig nga nagbulig ang mga kauturan sa pagpangsaylo sang mga pagkabutang sang pamilya sa isa ka hilway sa peligro nga duog. Sang nabatian sang indi Saksi nga bana ang sunog, nagdalidali sia pauli diin nakita niya ang mga kauturan nga nagabulig sa iya pamilya. Nagdayaw sia kag nagpasalamat, kag daw nahaw-asan bangod masami ginahingalitan sang mga kawatan ini nga mga kahigayunan. Ang kaayo nga ginpakita sang mga kauturan nagpahulag sa utod nga babayi kag sa iya anak nga lalaki nga makig-upod liwat sa Cristianong kongregasyon, kag nagatambong na sila karon sa tanan nga miting.

Sang nagligad nga tuig sang pag-alagad, gin-atubang sang madamo sa Mozambique ang tiggulutom bangod sang mga tigpalamangag kag nahalitan nga uma. Madasig nga naghulag ang lokal nga sanga talatapan sang mga Saksi ni Jehova paagi sa paghatag sing mga pagkaon sa mga nagakinahanglan. Ang pagkaon ginpanagtag sa mga Kingdom Hall, kon kaisa pagkatapos sang  mga miting sang kongregasyon. Ang isa ka utod nga babayi nga nagasolo nga ginikanan nagsiling: “Nagkadto ako sa miting nga napung-awan, indi ako kahibalo kon diin mangita sing ipakaon ko sa akon kabataan kon magpauli kami.” Ang mahigugmaon nga bulig nga ginhatag sang mga kauturan nagpapagsik sa iya. “Daw pagkabanhaw yadto para sa akon!” siling niya.

Ang mga Saksi ‘nagabuhat man sing maayo’ sa espirituwal paagi sa pagpaambit sing mensahe sang paglugpay kag paglaum nga masapwan sa Biblia. Nagapati sila sa ginapatihan sang maalam nga tawo sang dumaan nga tion: “Ang nagapamati sa [diosnon nga kaalam] magapuyo sing malig-on kag magmalinong, sa wala sing kahadlok sa malaut [“kalamidad,” NW].”—Hulubaton 1:33.

[Retrato sa pahina 31]

1, 2. Pagpanagtag sing pagkaon sa mga nagakinahanglan sa Mozambique

3, 4. Ginwasak sang bagyo sa Guam ang madamo nga puluy-an

[Credit Lines]

Child, left: Andrea Booher/FEMA News Photo; woman, above: AP Photo/Pacific Daily News, Masako Watanabe