Magdiretso sa kaundan

Magdiretso sa listahan sang kaundan

“Ang Dagway Sining Kalibutan Nagataliwan”

“Ang Dagway Sining Kalibutan Nagataliwan”

 “Ang Dagway Sining Kalibutan Nagataliwan”

“Ang buot ko silingon, mga kauturan, ang tion nga napat-od ginpalip-ot.”​​—⁠1 CORINTO 7:⁠29.

1, 2. Ano nga mga pagbag-o ang nakita mo samtang ikaw nagakabuhi?

ANO ang nakita mo nga mga pagbag-o samtang ikaw nagakabuhi? Masaysay mo bala ang pila sini? Halimbawa, yara ang pag-uswag sa medisina. Bangod sa mga panalawsaw sa sining patag, mas naglawig ang kabuhi sang mga tawo sa pila ka pungsod halin sa kubos pa sa 50 ka tuig sang nag-umpisa ang ika-20 nga siglo pakadto sa kapin sa 70 ka tuig karon! Hunahunaa man ang mga benepisyo naton gikan sa nagakaigo nga paggamit sang radyo, telebisyon, cell phone kag fax machine. Talalupangdon man ang mga pag-uswag sa edukasyon, transportasyon, tawhanon nga kinamatarong, kag bangod sini tanan nag-ayuhan ang pangabuhi sang minilyon.

2 Apang, indi tanan nga mga pagbag-o mapuslanon. Imposible nga indi matalupangdan ang makahalalit nga mga epekto sang nagadamo nga krimen, nagausmod nga moralidad, nagalapnag nga pag-abuso sa droga, nagadamo nga pagdiborsio, nagamahal nga mga balaklon, kag nagalapnag nga peligro sa terorismo. Bangod sini mahimo gid nga magaugyon ka sa ginsulat ni apostol Pablo sang una pa: “Ang dagway sining kalibutan nagataliwan [“nagabalhin,” NW].”​​—⁠1 Corinto 7:⁠31.

3. Ano ang buot silingon ni Pablo sang sia nagsulat nga “ang dagway sining kalibutan nagataliwan”?

3 Sang ginsulat ini ni Pablo, ginkomparar niya ang kalibutan sa isa ka entablado. Ang mga artista sa sini nga entablado​​—⁠ang bantog nga mga politiko, mga lider sang relihion kag halangdon nga mga tawo sa katilingban​​—⁠nagapasalida sa entablado, nagapasundayag sang ila mga papel, kag nagapanaug sa entablado para iban naman ang magpasalida. Nagpadayon ini sa sulod sang mga siglo. Sang una, mahimo dinekada nga maggahom ang isa ka dinastiya​​—⁠siniglo pa gani​​—⁠kag mahinay ang mga pagbag-o. Indi na karon, diin  ang kasaysayan mabalhin sa isa lang ka pisok kon patyon ang isa ka prominente nga lider! Huo, sa sining magamo nga mga tion, indi kita makapiho kon ano ang matabo buwas.

4. (a) Ano dapat ang mangin balanse nga pagtamod sang mga Cristiano tuhoy sa mga hitabo sa kalibutan? (b) Anong duha ka makapakumbinsi nga ebidensia ang aton binagbinagon karon?

4 Kon ang kalibutan isa ka entablado kag ang mga lider sini amo ang mga artista, nian ang mga Cristiano amo ang mga tumalan-aw.⁠ * Apang, bangod “sila indi iya sang kalibutan,” wala gid nila ginapadala ang ila buot sa pasundayag ukon bisan pa sa mga artista. (Juan 17:16) Sa baylo, malangkagon nila nga ginabantayan ang mga indikasyon nga nagahingapos na ang drama​​—⁠isa ka malaglagon nga paghingapos⁠​—⁠bangod nahibaluan nila nga dapat anay malaglag ining sistema antes paluntaron ni Jehova ang madugay na ginahulat nga matarong nga bag-ong kalibutan.⁠ * Gani binagbinagon naton ang duha ka ebidensia nga nagapamatuod nga kita nagakabuhi na sa tion sang katapusan kag malapit na ang bag-ong kalibutan. Ini amo (1) ang kronolohiya sa Biblia kag (2) ang nagalala nga mga kahimtangan sang kalibutan.​​—⁠Mateo 24:21; 2 Pedro 3:⁠13.

Isa ka Misteryo nga Nasolbar Na!

5. Ano ang “mga panag-on sang mga Gentil,” kag ngaa interesado kita sa sini?

5 Ang kronolohiya isa ka pagtuon tuhoy sa koneksion sang tion sa mga hitabo. Naghinambit si Jesus sang isa ka tion nga ang mga lider sa kalibutan magapasundayag sa entablado nga wala sing pag-interbenir sang Ginharian sang Dios. Gintawag ni Jesus ini nga tion nga “mga panag-on sang mga Gentil.” (Lucas 21:24) Kon matapos na ining “mga panag-on,” magagahom ang langitnon nga Ginharian sang Dios, upod kay Jesus subong amo ang may kinamatarong nga Manuggahom. Sa umpisa, si Jesus magagahom anay sa “tunga sang [iya] mga kaaway.” (Salmo 110:2) Nian, suno sa Daniel 2:​44, ‘dugmukon kag papason’ sang Ginharian ang tanan tawhanon nga gobierno, kag ini magagahom sing dayon.

6. San-o nag-umpisa ang “mga panag-on sang mga Gentil,” daw ano ini kalawig, kag san-o ini natapos?

6 San-o matapos ang “mga panag-on sang mga Gentil” kag san-o magaumpisa sa paggahom ang Ginharian sang Dios? Ang sabat, nga “natakpan kag napat-inan tubtob sa tion sang katapusan,” nagadalahig sang kronolohiya sa Biblia. (Daniel 12:9) Samtang nagahilapit ining “panag-on,” naghimo si Jehova sang mga tikang agod mapahibalo ang sabat sa isa ka grupo sang mapainubuson nga mga estudyante sa Biblia. Paagi sa bulig sang espiritu sang Dios, nahangpan nila nga nag-umpisa ang “mga panag-on sang mga Gentil” sang ginlaglag ang Jerusalem sang 607 B.⁠C.⁠E. kag ining “mga panag-on” magalawig sang 2,520 ka tuig. Pasad sa sini, nakalkular nila nga ang “mga panag-on sang mga Gentil” natapos sang 1914. Narealisar man nila nga ang 1914 amo ang umpisa sang katapusan sining sistema sang mga butang. Subong isa ka estudyante sang Biblia, mapaathag mo bala gikan sa Kasulatan kon paano kalkulahon ang petsa nga 1914?⁠ *

7. Ano nga mga teksto ang makabulig sa aton agod mahibaluan ang umpisa, kalawigon, kag katapusan sang makapito ukon pito ka panag-on sa tulun-an sang Daniel?

7 Ang isa ka basihan sang sabat makita sa tulun-an sang Daniel. Sanglit gingamit ni Jehova si Hari Nabocodonosor sang Babilonia agod laglagon ang Jerusalem sang nag-umpisa ang “mga panag-on,” sang 607 B.⁠C.⁠E., ginpahibalo Niya paagi sa sini nga hari nga ang mga pungsod magagahom nga wala sing pag-interbenir sang Dios sa sulod sang simbuliko nga “makapito” ukon kabug-usan nga pito ka simbuliko nga panag-on. (Ezequiel 21:​26, 27; Daniel 4:​16, 23-​25) Daw ano kalawig ining pito ka panag-on? Suno sa Bugna 11:​2, 3, kag 12:​6, 14, ang tatlo kag tunga ka panag-on ukon tion nagalawig sing 1,260 ka adlaw.  Gani, pilo dapat sini ang kalawigon sang pito ka panag-on, ukon 2,520 ka adlaw. Amo lang bala ini kalawig? Indi, bangod ginhatagan ni Jehova si propeta Ezequiel, isa ka kadungan ni Daniel, sang pagsulundan sa pag-interpretar sa simbulismo: “Ang tagsa ka adlaw sa isa ka tuig.” (Ezequiel 4:6) Gani, ang “makapito” ukon pito ka panag-on aktual nga nagalawig sang 2,520 ka tuig. Kon mag-isip kita sing 2,520 ka tuig sugod sang 607 B.⁠C.⁠E., makahinakop kita nga ang mga panag-on ukon gintalana nga tion natapos sang 1914.

Nakompirmar ang “Tion sang Katapusan”

8. Paano mo mapamatud-an nga naglala ang mga kahimtangan sa kalibutan sugod sang 1914?

8 Ginakompirmar sang mga hitabo sa kalibutan sugod sang 1914 padayon nga husto ining paghangop nga pasad sa kronolohiya sang Biblia. Si Jesus mismo nagsiling nga ang mga tanda sang “katapusan sang panuigon” amo ang mga inaway, gutom, kag piste. (Mateo 24:​3-8; Bugna 6:​2-8) Nahanabo gid ini sugod sang 1914. Naghatag pa sing dugang nga impormasyon si apostol Pablo, nga nagasiling nga magabalhin gid sing daku ang pagtinamdanay sang mga tawo. Ang iya paglaragway sang mga pagbalhin nga nasaksihan naton tanan husto gid.​​—⁠2 Timoteo 3:​1-5.

9. Ano ang masiling sang mga naga-obserbar tuhoy sa mga kahimtangan sa kalibutan sugod sang 1914?

9 Ang “dagway sining kalibutan” nagbalhin gid bala sing daku sugod sang 1914? Sa libro nga The Generation of 1914, si Propesor Robert Wohl nagsiling: “Indi makakas sa hunahuna sang mga nakaeksperiensia sa inaway ang pagpati nga isa ka kalibutan ang nagtaliwan kag isa pa ang nagsugod sang Agosto 1914.” Ginkompirmar ini ni Dr. Jorge A. Costa e Silva, direktor sa kapagros sa hunahuna sang World Health Organization, nga nagsulat: “Kadasig gid sang mga pagbalhin sa aton tion, nga nangin kabangdanan sang tuman nga mga kabalaka kag kahuol nga wala pa gid maeksperiensiahan sa maragtas sang tawo.” Personal mo bala ini nga naeksperiensiahan?

10. Paano kita ginapaathagan sang Biblia tuhoy sa kabangdanan sang nagalala nga mga kahimtangan sa kalibutan sugod sang 1914?

10 Sin-o ang kontrabida sa likod sang nagalala nga mga kahimtangan sa kalibutan? Ginabuyagyag sang Bugna 12:​7-9 kon sin-o ang balasulon: “May inaway sa langit, si Miguel [si Jesucristo] kag ang iya mga manugtunda nga nagpakig-away batok sa dragon [si Satanas nga Yawa]; kag ang dragon kag ang iya mga manugtunda nagpakig-away, apang gindaug sila kag wala na sing duog sa ila sa langit. Kag ginhulog ang dakung dragon, . . . ang manugdaya sang bug-os nga kalibutan.” Gani si Satanas nga Yawa amo ang nagapanggamo, kag ang pagtabog sa iya gikan sa langit sang 1914 nagkahulugan sang ‘kailo para sa duta kag dagat, kay ang Yawa nagpanaug sa inyo sa dakung kasingkal, bangod nga nakahibalo sia nga may malip-ot lamang sia nga tion.’​​—⁠Bugna 12:​10, 12.

Kon Paano Ipasundayag ang Hingapusan nga Eksena

11. Ano nga mga metodo ang ginagamit ni Satanas sa pagpatalang sa “bug-os nga kalibutan”? (b) Ano nga pinasahi nga lihok ni Satanas ang ginpatalupangod ni apostol Pablo?

11 Bangod nakahibalo nga malapit na ang iya katapusan, sugod sang 1914 nangin masako pa gid si Satanas sa iya pagtinguha nga mapatalang  ang “bug-os nga kalibutan.” Subong pinakaeksperto nga manugdaya, di-kitaon nga ginamaniobra ni Satanas ang mga eksena, nga ginabutang sa entablado ang mga lider sang kalibutan kag ang mga nagapanguna sa mga pagbag-o agod magpasundayag. (2 Timoteo 3:​13; 1 Juan 5:19) Ang isa sa iya mga tuyo amo nga patalangon ang mga tawo sa pagpati nga makahatag sa ila sing matuod nga paghidait ang iya gobierno. Sa kabilugan, nagmadinalag-on ang iya propaganda, bangod nagalaum gihapon ang mga tawo sang maayo nga palaabuton bisan lapnag ang ebidensia nga ang mga kahimtangan padayon nga nagalala. Gintagna ni apostol Pablo nga antes laglagon ining sistema sang mga butang, may talalupangdon anay nga sataniko nga propaganda. Sia nagsulat: “Sang nagasiling ang katawhan, ‘May paghidait kag kalig-on,’ nian sa hinali ang kalaglagan magaabot sa ila subong nga ang kasakit sa pag-anak nagaabot sa babayi nga nagadala.”​​—⁠1 Tesalonica 5:⁠3; Bugna 16:13.

12. Ano nga mga pagtinguha karon ang ginahimo agod magmahidaiton ang aton tion?

12 Sining karon lang, masami nga gingamit sang mga politiko ang prase nga “paghidait kag kalig-on” sa pagpatuhoy sa nanuhaytuhay nga tawhanon nga mga katuyuan. Gintawag pa gani nila ang 1986 nga Internasyonal nga Tuig sang Paghidait, bisan ini nga tuig wala magdala sang internasyonal nga paghidait. Ini bala nga mga pagtinguha sang mga lider sa kalibutan amo na ang bug-os nga katumanan sang 1 Tesalonica 5:​3, ukon ginapatuhuyan bala ni Pablo ang isa ka talalupangdon gid nga espesipiko nga hitabo nga makakuha sing atension sang bug-os kalibutan?

13. Sang gintagna ni Pablo ang deklarasyon nga “Paghidait kag kalig-on,” sa ano niya ginkomparar ang kalaglagan nga magasunod, kag ano ang matun-an naton gikan sa sini?

13 Sanglit ang mga tagna sa Biblia masami nga mahangpan lamang sing bug-os pagkatapos nga matuman ini ukon samtang nagakatuman ini, hulat-hulaton kag tan-awon naton. Apang, talalupangdon nga ginkomparar ni Pablo ang pag-abot sang hinali nga kalaglagan pagkatapos sang deklarasyon sang “Paghidait kag kalig-on!” sa kasakit sa pagpanganak sang isa ka babayi. Sa sulod sang mga siam ka bulan, amat-amat nga mabatyagan sang isa ka mangin iloy ang bata nga nagadaku sa iya tiyan. Mahimo niya mabatian ang pagpitik sang tagipusuon sang iya lapsag ukon mabatyagan nga nagahulag ini sa tiyan. Ayhan nagapanipa pa ini. Mangin masunson ang mga paghulag sini sa tiyan tubtob, isa ka adlaw, makabatyag sia sing tuman nga kasakit, nagapatimaan nga nag-abot na ang ginahulathulat nga hitabo​​—⁠ang pagkabun-ag sang iya lapsag. Gani, sa ano man nga paagi matuman ang matagnaon nga deklarasyon sang “Paghidait kag kalig-on,” magadul-ong ini sa hinali, masakit apang sa ulihi malipayon gid nga hitabo​​—⁠ang pagdula sa kalautan kag pag-umpisa sang isa ka bag-o nga sistema sa kalibutan.

14. Paano nagaalagisod ang palaabuton nga mga hitabo, kag ano ang mangin resulta?

14 Ang nagahilapit nga kalaglagan makakulugmat para sa matutom nga mga Cristiano nga mga tumalan-aw. Una, salakayon sang mga hari sang duta (ang politikal nga bahin sang organisasyon ni Satanas) ang mga sumalakdag sang Babilonia nga Daku (ang relihioso nga bahin) kag laglagon sila. (Bugna 17:​1, 15-​18) Gani sa makakilibot nga pagbag-o sang mga hitabo, ang ginharian ni Satanas mabahinbahin kag magailinaway, kag wala gid si Satanas sing mahimo agod mapunggan ini. (Mateo 12:​25, 26) Pahulagon ni Jehova ang mga tagipusuon sang mga hari sang duta sa “paghimo sang iya katuyuan,” nga amo, ang pagdula sa duta sang iya relihioso nga mga kaaway. Pagkatapos malaglag ang butig nga relihion, pangunahan ni Jesucristo ang iya langitnon nga kasuldadusan sa paglaglag sing bug-os sa nabilin nga bahin sang organisasyon ni Satanas​​—⁠ ang komersial kag politikal nga mga elemento. Sa hingapusan, kuhaan sing gahom si Satanas. Sa sining hitabo, ang entablado tabunan na sing telon, kag ang malawig gid nga drama natapos na.​​—⁠Bugna 16:14-​16; 19:11-​21; 20:​1-3.

15, 16. Ano dapat ang epekto sa aton pagkabuhi sang pahanumdom nga “ang tion nga napat-od ginpalip-ot”?

15 San-o ini tanan matabo? Wala kita makahibalo sang adlaw ukon oras. (Mateo 24:36) Apang, nahibaluan naton nga “ang tion nga napat-od ginpalip-ot.” (1 Corinto 7:29) Gani, importante nga gamiton naton sing maalamon ang nabilin nga tion. Paano? Subong sang paathag ni apostol Pablo, dapat ‘himuslan naton ang kahigayunan’ para sa mas importante nga mga butang kag himuon nga mapuslanon ang tagsa ka adlaw. Ngaa? “Bangod ang mga adlaw malaut.” Kag bangod  nahangpan kon ano ang kabubut-on ni Jehova para sa aton, indi naton pag-usikan ang diutay nga malahalon nga tion nga nabilin.​​—⁠Efeso 5:​15-​17; 1 Pedro 4:​1-4.

16 Bangod nahibaluan naton nga kalaglagan ang padulungan sining bug-os nga sistema sang mga butang sang kalibutan, paano kita personal nga maapektuhan? Si apostol Pedro nagsulat para sa aton kaayuhan: “Sanglit ini tanan nga butang tunawon sa among bagay, ano bala nga sari sang mga tawo dapat mangin-amo kamo sa balaan [nga paggawi] kag diosnon nga mga kabuhi!” (2 Pedro 3:11) Dapat nga kita mangin amo gid sini nga sahi sang mga tawo! Nahisanto sa maalam nga laygay ni Pedro, kinahanglan (1) bantayan gid naton ang aton paggawi agod mapat-od naton nga ini balaan kag (2) pat-uron naton nga ang kabangdanan sang aton kakugi sa pag-alagad kay Jehova amo ang aton hanuot nga gugma sa iya.

17. Batok sa ano nga mga siod ni Satanas dapat magbantay ang matutom nga mga Cristiano?

17 Ang gugma sa Dios magapugong sa aton nga indi mahulog ang aton buot sa kalibutan bangod sang makagalanyat nga mga butang sini. Bangod sa madangatan sining presente nga sistema sang mga butang, makatalagam para sa aton nga maganyat sa makailila nga kalibutanon, mahuyugon-sa kalipayan nga pagkabuhi. Bisan nagakabuhi kag nagatrabaho sa kalibutan, dapat naton tumanon ang maalam nga laygay nga indi paggamiton sing bug-os ang kalibutan. (1 Corinto 7:31) Sa pagkamatuod, kinahanglan tinguhaan gid naton nga indi kita mapatalang sang mga propaganda sang kalibutan. Ini nga kalibutan indi magmadinalag-on sa pagsolbar sa mga problema sini. Indi ini makapadayon sa pagluntad tubtob san-o. Ngaa makasiguro gid kita? Bangod amo ini ang ginasiling sang inspirado nga Pulong sang Dios: “Ang kalibutan nagataliwan, kag ang kailigbon sini; apang ang nagahimo sang kabubut-on sang Dios nagapadayon sa gihapon.”​​—⁠1 Juan 2:⁠17.

Ang Labing Maayo nga mga Butang Magaabot!

18, 19. Ano nga mga pagbag-o ang ginalauman mo sa bag-o nga kalibutan, kag ngaa takus gid ini nga hulaton?

18 Malapit na laglagon ni Jehova si Satanas kag ang iya mga sumalakdag. Pagkatapos sini, upod ang pagpakamaayo sang Dios, umpisahan nga bag-uhon sang matutom nga mga nakaluwas sa katapusan sining sistema ang “danyag” sa entablado nga magapadayon sing dayon. Dulaon na sa eksena ang inaway; ang Dios “nagapatunong sang mga inaway tubtob sa ukbong sang duta.” (Salmo 46:9) Sa baylo sang gutom, “may bugana nga uyas sa duta; . . . magahapayhapay ini.” (Salmo 72:16) Wala na sing mga prisuhan, estasyon sang pulis, naglaton nga balatian paagi sa pagpakigsekso, drug lord, korte sa diborsio, bista sa mga negosyo nga naputo, kag terorismo.—⁠Salmo 37:29; Isaias 33:24; Bugna 21:​3-5.

19 Wala na sing sulod ang mga lulubngan, kag binilyon ka mga ginbanhaw​​—⁠dugang pa nga mga artista​​—⁠ang makita sa entablado. Magakinasadya gid samtang nagakitaay ang lainlain nga mga henerasyon kag samtang hugot nga nagahinaksanay ang mga hinigugma nga madugay na nahidlaw sa isa kag isa! Sa ulihi, ang tanan nga nagakabuhi magasimba kay Jehova. (Bugna 5:13) Kon bug-os na ang mga pagbag-o, buksan liwat ang telon kag makita ang bug-os kalibutan nga paraiso. Ano ang imo mabatyagan samtang ginatulok mo ang talan-awon? Walay duhaduha nga makasiling ka, ‘Madugay gid ang akon paghulat sini, apang takus gid ini nga hulaton!’

[Mga nota]

^ par. 4 Sa tuhay nga konteksto, ginpatuhuyan ni Pablo ang hinaplas nga mga Cristiano subong “talan-awon sang kalibutan, sa mga manugtunda kag mga tawo.”​​—⁠1 Corinto 4:9.

^ par. 4 Halimbawa, tuhoy sa kon sin-o ang “hari sang aminhan,” nga ginsambit sa Daniel 11:​40, 44, 45, tan-awa ang libro nga Binagbinaga ang Tagna ni Daniel, pahina 280-1.

^ par. 6 Ang Biblia mismo nagapakita nga napukan ang Jerusalem 70 ka tuig antes magbalik ang gintapok nga mga Judiyo sang 537 B.⁠C.⁠E. (Jeremias 25:​11, 12; Daniel 9:​1-3) Para sa detalyado nga pagbinagbinag tuhoy sa “mga panag-on sang mga Gentil,” tan-awa ang pahina 95-​7 sang Reasoning From the Scriptures, nga ginbalhag sang mga Saksi ni Jehova.

Paano Mo Sabton?

• Paano nangin matuod sa aton panahon ang pinamulong ni Pablo nga “ang dagway sining kalibutan nagataliwan”?

• Paano ginapatalupangod sang kronolohiya sa Biblia ang katapusan sang “mga panag-on sang mga Gentil”?

• Paano ang nagabag-o nga mga kahimtangan sa kalibutan nagakompirmar nga ang 1914 amo ang umpisa sang “tion sang katapusan”?

• Paano kita maapektuhan sang ihibalo nga “ang tion nga napat-od ginpalip-ot”?

[Mga Pamangkot sa Pagtinuon]

[Retrato sa pahina 20]

Sa katapusan​​—⁠nasolbar gid man ang misteryo!