Ang Pagkadaku ni Jehova Di-matungkad

“Daku ang GINUO, kag dayawon sing daku, kag ang iya pagkadaku di-matungkad.”—SALMO 145:3.

1, 2. Ano nga sahi sang tawo si David, kag paano niya ginatamod ang iya kaangtanan sa Dios?

ANG nagkomposo sang Salmo 145 isa sang mga bantog nga tawo sa maragtas. Sang bata pa sia, nakig-away sia sa armado nga higante kag napatay niya ini. Kag bilang isa ka mangangaway nga hari, madamo nga kaaway ang ginlupig sining salmista. Sia amo si David, ang ikaduha nga hari sang dumaan nga Israel. Nagpabilin ang reputasyon ni David bisan patay na sia, amo nga minilyon bisan karon ang may nahibaluan tuhoy sa iya.

2 Walay sapayan sang mga hinimuan ni David, mapainubuson sia. Nagapatuhoy kay Jehova, sia nag-amba: “Kon pamalandungon ko ang imo kalangitan, ang binuhatan sang imo mga tudlo, ang bulan kag ang kabituunan nga imo ginpatok; ano bala ang tawo nga ginasapak mo sia, kag ang anak sang tawo nga ginaduaw mo sia?” (Salmo 8:3, 4) Sa baylo nga maghunahuna nga daku sia, ginpatungod ni David kay Jehova ang kaluwasan gikan sa tanan niya nga mga kaaway kag nagsiling sa Dios: “Ikaw naghatag man sa akon sang taming sang imo kaluwasan, kag ang imo pagpaubos nagpakadaku sa akon.” (2 Samuel 22:​1, 2, 36) Si Jehova nagpakita sang pagpaubos paagi sa pagkaluoy sa mga makasasala, kag gin-apresyar ni David ang di-bagay nga kaayo sang Dios.

‘Dayawon Ko ang Dios nga Hari’

3. (a) Ano ang pagtamod ni David tuhoy sa iya paghari sa Israel? (b) Tubtob san-o ang handum ni David nga dayawon si Jehova?

3 Bisan pa nga gintangdo sang Dios si David nga hari, gintamod niya si Jehova subong amo ang matuod nga Hari sang Israel. Si David nagsiling: “Imo, O GINUO, ang ginharian kag ikaw ginbayaw subong nga pangulo labaw sa tanan.” (1 Cronica 29:11) Kag gintahod gid ni David ang Dios subong Gumalahom! “Dayawon ko ikaw, Dios nakon, O Hari nakon,” amba niya, “kag pakamaayuhon ko ang imo ngalan sa gihapon kag sa gihapon. Sa tagsa ka adlaw pakamaayuhon ko ikaw, kag dayawon ko ang imo ngalan sa gihapon kag sa gihapon.” (Salmo 145:​1, 2) Handum ni David nga dayawon si Jehova nga Dios sa bug-os nga adlaw kag sing dayon.

4. Anong sayop nga panumbungon ang ginapahayag sang Salmo 145?

4 Ang Salmo 145 isa ka epektibo gid nga sabat sa pangangkon ni Satanas nga ang Dios isa ka makagod nga gumalahom nga nagadingot sang kahilwayan sa iya mga tinuga. (Genesis 3:1-5) Ini nga salmo nagabuyagyag man sang binutig ni Satanas  nga ang mga nagatuman sa Dios nagahimo lamang kuno sini bangod sang ila makuha, indi bangod ginahigugma nila ang Dios. (Job 1:​9-​11; 2:​4, 5) Kaangay ni David, ang matuod nga mga Cristiano karon nagahatag sing sabat sa sayop nga mga panumbungon sang Yawa. Ginapakabahandi nila ang ila paglaum nga kabuhi nga walay katapusan sa idalom sang paggahom sang Ginharian bangod luyag nila nga dayawon sing dayon si Jehova. Sa karon, minilyon na ang nagahimo sini paagi sa pagtuo sa halad gawad ni Jesus kag paagi sa pag-alagad sing matinumanon kay Jehova bangod sang ila gugma subong iya dedikado, bawtismado nga mga sumilimba.—Roma 5:8; 1 Juan 5:3.

5, 6. Ano ang mga kahigayunan nga mapakamaayo kag madayaw si Jehova?

5 Hunahunaa ang madamo naton nga mga kahigayunan nga mapakamaayo kag madayaw si Jehova subong iya mga alagad. Sarang naton ini mahimo sa pangamuyo kon natandog gid kita sang aton nabasahan sa iya Pulong, ang Biblia. Ang pagdayaw kag pagpasalamat sarang mapabutyag kon natandog kita sang pagpakig-angot sang Dios sa iya mga katawhan ukon kon nakunyag kita sa isa ka bahin sang iya makatilingala nga tinuga. Ginapakamaayo man naton si Jehova nga Dios kon ginahinun-anunan naton ang iya mga katuyuan upod sa mga masigkatumuluo sa Cristianong mga miting ukon sa aton pribado nga mga pagpakigsugilanon. Sa katunayan, ang tanan nga “mga buhat nga maayo” nga ginahimo para sa intereses sang Ginharian sang Dios nagadala sing kadayawan kay Jehova.—Mateo 5:​16.

6 Ang bag-o nga mga halimbawa sinang mga buhat nga maayo nagalakip sa pagpatindog sang katawhan ni Jehova sing madamo nga mga duog sang pagsimba sa imol nga mga pungsod. Ang kalabanan sini nahimo paagi sa pinansial nga bulig sang mga masigkatumuluo sa iban nga mga pungsod. Ang pila ka Cristiano nagbulig paagi sa pagboluntaryo nga magkadto sa sining mga duog agod makigbahin sa pagpatindog sing mga Kingdom Hall. Kag ang labing importante sa tanan nga mga buhat nga maayo amo ang pagdayaw kay Jehova paagi sa pagbantala sing maayong balita sang iya Ginharian. (Mateo 24:14) Subong sang ginapakita sang masunod pa nga mga bersikulo sang Salmo 145, ginaapresyar ni David ang pagginahom sang Dios kag ginadayaw ang Iya pagkahari. (Salmo 145:11, 12) Ginaapresyar mo man bala ang mahigugmaon nga paggahom sang Dios? Kag regular ka bala nga nagapakighambal sa iban tuhoy sa iya Ginharian?

Mga Halimbawa sang Pagkadaku sang Dios

7. Maghatag sing daku gid nga rason sa pagdayaw kay Jehova.

7 Ang Salmo 145:3 nagahatag sa aton sing daku gid nga rason sa pagdayaw kay Jehova. Si David nag-amba: “Daku ang GINUO, kag dayawon sing daku, kag ang iya pagkadaku di-matungkad.” Ang pagkadaku ni Jehova wala sing limitasyon. Indi gid ini matungkad, mahangpan, ukon matakus sang mga tawo. Apang makabenepisyo gid kita karon paagi sa pagbinagbinag sing mga halimbawa sang di-matungkad nga pagkadaku ni Jehova.

8. Ano ang ginapahayag sang uniberso tuhoy sa pagkadaku kag pagkagamhanan ni Jehova?

8 Tilawi nga dumduma ang isa ka wala sing bulan nga kagab-ihon diin nagtangla ka sa wala sing panganod nga kalangitan. Wala ka bala nahayanghag sa kadamuon sang mga bituon nga nakita mo sa maitom nga kahawaan? Wala ka bala napahulag nga dayawon si Jehova bangod sang iya pagkadaku sa pagtuga sining tanan nga mga butang sa kalangitan? Apang, ang imo nakita diutay lamang nga porsiento sang mga bituon sa galaksiya diin yara ang duta. Dugang pa, ginabulubanta nga may kapin sa isa ka gatos ka bilyon nga galaksiya, kag tatlo lamang sa sini ang makita nga wala ginateleskopyo. Sa pagkamatuod, ang di-maisip nga mga bituon kag galaksiya nga nagahuman sang tuman kadaku nga uniberso mga pamatuod sang gahom ni Jehova sa pagtuga kag sang iya di-matungkad nga kadakuon.—Isaias 40:26.

9, 10. (a) Ano nga mga aspekto sang pagkadaku ni Jehova ang ginapakita may kaangtanan kay Jesucristo? (b) Paano maapektuhan ang aton pagtuo sa pagkabanhaw ni Jesus?

9 Binagbinaga ang iban nga aspekto sang pagkadaku ni Jehova—yadtong nagadalahig kay Jesucristo. Ang pagkadaku sang Dios ginpakita sa pagtuga sa iya Anak kag paggamit sa iya sa sulod sang malawig gid nga tion subong Iya “pangulo nga manugpangabudlay.” (Hulubaton 8:22-31) Ang pagkadaku sang gugma ni Jehova ginpasundayag sang ginhatag niya ang iya bugtong nga Anak subong halad gawad para sa katawhan. (Mateo 20:28; Juan 3:​16; 1 Juan 2:​1, 2) Kag labaw sa aton  paghangop amo ang mahimayaon kag di-mamalatyon nga espiritu nga lawas nga gindesinyo ni Jehova para kay Jesus sang ginbanhaw sia.—1 Pedro 3:​18.

10 Ang pagkabanhaw ni Jesus nagalakip sang madamo nga talalupangdon nga aspekto sang di-matungkad nga pagkadaku ni Jehova. Wala sing duhaduha nga ginbalik ni Jehova ang memorya ni Jesus tuhoy sa hilikuton nga nagadalahig sa pagpanuga sa di-makita kag makita nga mga butang. (Colosas 1:​15, 16) Ini nagalakip sa iban nga espiritu nga mga tinuga, sa uniberso, sa mabungahon nga duta, kag sa tanan nga sahi sang pisikal nga kabuhi sa aton globo. Dugang pa sa pagpasag-uli sing ihibalo sang iya Anak tuhoy sa bug-os nga maragtas sang langitnon kag dutan-on nga kabuhi nga nasaksihan antes mangin tawo ang iya Anak, gindugang pa ni Jehova ang naeksperiensiahan ni Jesus subong himpit nga tawo. Huo, ang di-matungkad nga pagkadaku ni Jehova ginpakita sa pagkabanhaw ni Jesus. Dugang pa, yadtong dakung buhat isa ka garantiya nga ang pagbanhaw sa iban posible. Dapat ini magpalig-on sang aton pagtuo nga mabanhaw sang Dios ang minilyon nga napatay nga yara sa iya himpit nga memorya.​—Juan 5:​28, 29; Binuhatan 17:31.

Makatilingala kag Gamhanan nga mga Buhat

11. Anong daku nga buhat ang ginsugdan ni Jehova sang Pentecostes 33 C.E.?

11 Sugod sang pagkabanhaw ni Jesus, si Jehova naghimo sing iban pa nga dalagku kag makatilingala nga mga buhat. (Salmo 40:5) Sang Pentecostes 33 C.E., ginpaluntad ni Jehova ang isa ka bag-o nga pungsod, ang “Israel sang Dios,” nga ginahuman sang mga disipulo ni Cristo nga ginhaplas sang balaan nga espiritu. (Galacia 6:16) Sa isa ka gamhanan nga paagi, ining bag-o nga espirituwal nga pungsod ginpasangkad sa kalibutan sadto anay. Walay sapayan sang apostasya nga nagresulta sa pagluntad sang Cristiandad pagkatapos sang kamatayon sang mga apostoles ni Jesus, nagpadayon si Jehova sa paghimo sing makatilingala nga mga buhat agod mapat-od ang katumanan sang iya katuyuan.

12. Ano ang ginapamatud-an sang katunayan nga ang Biblia sarang matigayon sa tanan dalagku nga lenguahe sa duta?

12 Halimbawa, ang kanon sang Biblia gintipigan kag sang ulihi ginbadbad sa tanan dalagku nga mga pinulungan sa duta karon. Ang pagbadbad sa Biblia masami nga ginhimo sa mabudlay nga mga kahimtangan kag sa idalom sang katalagman nga mapatay gikan sa mga ahente ni Satanas. Pat-od nga indi mahimo ang pagbadbad sa Biblia sa kapin sa 2,000 ka lenguahe kon indi kabubut-on sang di-matungkad nga dakung Dios, si Jehova!

13. Sugod sang 1914, paano napasundayag ang pagkadaku ni Jehova may kaangtanan sa iya mga katuyuan sa Ginharian?

13 Ang pagkadaku ni Jehova ginpasundayag man may kaangtanan sa mga katuyuan sang iya Ginharian. Halimbawa, sang tuig 1914, gintangdo niya ang iya Anak, si Jesucristo, subong langitnon nga Hari. Wala madugay pagkatapos sadto, nanghikot si Jesus batok kay Satanas kag sa iya mga demonyo. Gintabog sila gikan sa langit kag ginbutang sa duta, diin nagahulat sila nga itagbong sa kadadalman. (Bugna 12:​9-​12; 20:​1-3) Sugod sadto, ang hinaplas nga mga sumulunod ni Jesus nakaeksperiensia sang dugang nga paghingabot. Apang, ginsakdag sila ni Jehova sa sining tion sang di-makita nga presensia ni Cristo.—Mateo 24:3; Bugna 12:17.

14. Anong makatilingala nga buhat ang ginhimo ni Jehova sang 1919, kag ano ang nahimo sini?

14 Sang tuig 1919, naghimo pa gid si Jehova sing isa ka makatilingala nga buhat nga nagpakita  sang iya pagkadaku. Ang hinaplas nga mga sumulunod ni Jesus, nga nangin di-aktibo sa espirituwal, ginpasag-uli. (Bugna 11:​3-​11) Sa mga tinuig sugod sadto, ang mga hinaplas makugi nga nagbantala sang maayong balita sang natukod na nga langitnon nga Ginharian. Ang iban nga hinaplas gintipon agod makompleto ang kadamuon nga 144,000. (Bugna 14:​1-3) Kag paagi sa hinaplas nga mga sumulunod ni Cristo, nagpahamtang si Jehova sing sadsaran sang “bag-ong duta,” isa ka matarong nga katilingban sang mga tawo. (Bugna 21:1) Apang ano ang matabo sa “bag-ong duta” pagkatapos nga ang matutom nga mga hinaplas makadto tanan sa langit?

15. Ano nga hilikuton ang ginpangunahan sang hinaplas nga mga Cristiano, kag ano ang mga resulta?

15 Sang 1935, ang Agosto 1 kag Agosto 15 nga isyu sini nga balasahon nagaunod sang panguna nga mga artikulo nga nagapatuhoy sa “dakung kadam-an,” nga ginsambit sa Bugna kapitulo 7. Ginpangita sing makugi sang hinaplas nga mga Cristiano kag ginpaupod sa ila ining mga masigkasumilimba nga gikan sa tanan nga mga pungsod, tribo, katawhan, kag pinulungan. Ining “dakung kadam-an” makalampuwas sa nagahilapit nga “dakung kapipit-an,” (NW) upod ang paglaum nga mabuhi sing dayon sa Paraiso subong permanente nga mga katapo sang “bag-ong duta.” (Bugna 7:​9-​14) Bangod sang pagbantala sing Ginharian kag paghimo sing disipulo nga hilikuton nga ginapangunahan sang hinaplas nga mga Cristiano, kapin na karon sa anom ka milyon ang nagalaum sang walay katapusan nga kabuhi sa dutan-on nga paraiso. Sin-o ang dapat padunggan sining pag-uswag walay sapayan sang paghingabot ni Satanas kag sang iya garok nga kalibutan? (1 Juan 5:​19) Si Jehova lamang ang makahimo sini tanan, nga nagagamit sang iya balaan nga espiritu.​—Isaias 60:22; Zacarias 4:6.

Ang Mahimayaon nga Pagkahari kag Kadungganan ni Jehova

16. Ngaa indi makita sing literal sang mga tawo ang ‘mahimayaon nga pagkahari sang kadungganan ni Jehova’?

16 Ano man ini, ang “makatilingala nga mga binuhatan” kag “gamhanan nga mga buhat” ni Jehova indi gid malipatan. Si David nagsulat: “Ang isa ka kaliwatan magadayaw sang imo mga binuhatan sa isa, kag magapahayag sang imo gamhanan nga mga buhat. Sang mahimayaon nga pagkahari sang imo kadungganan, kag sang imo makatilingala nga mga binuhatan, magapamalandong ako. Ang mga tawo magapamulong sang gahom sang imo makakulugmat nga mga binuhatan, kag ako magapahayag sang imo pagkadaku.” (Salmo 145:​4-6) Apang, daw ano kadamo ang nahibaluan ni David tuhoy sa mahimayaon nga pagkahari ni Jehova, sanglit ang “Dios Espiritu” kag busa indi makita sang tawhanon nga mga mata?—Juan 1:​18; 4:​24.

17, 18. Paano naglambo ang apresasyon ni David sa ‘mahimayaon nga pagkahari sang kadungganan ni Jehova’?

17 Bisan pa nga indi niya makita ang Dios, may mga paagi nga napalambo ni David ang iya apresasyon sa kadungganan ni Jehova. Halimbawa, mahimo nabasa niya sa Kasulatan ang rekord sang gamhanan nga mga buhat sang Dios, subong sang paglaglag sa malaut nga kalibutan paagi sa anaw. Mahimo man nga natalupangdan ni David kon paano nahuy-an ang butig nga mga dios sang Egipto sang ginluwas sang Dios ang mga Israelinhon gikan sa pagkaulipon sa Egipto. Ining mga hitabo nagpamatuod sang kadungganan kag pagkadaku ni Jehova.

18 Wala sing duhaduha nga naglambo ang apresasyon ni David sa kadungganan sang Dios indi lamang bangod sa pagbasa sing Kasulatan kundi paagi man sa pagpamalandong sa sini. Halimbawa, mahimo nga ginpamalandungan niya kon ano ang natabo sang ginhatag ni Jehova ang Kasuguan sa Israel. May mga daguob, kilat, madamol nga panganod, kag tuman katunog nga huni sang budyong. Ang Bukid Sinai nagtay-og kag nag-aso. Bangod nagatipon sa tiilan sang bukid, nabatian pa gani sang mga Israelinhon ang “napulo ka sugo” gikan sa tunga sang kalayo kag panganod samtang nagahambal si Jehova paagi sa anghel. (Deuteronomio 4:​32-​36; 5:​22-​24; 10:4; Exodo 19:16-​20; Binuhatan 7:​38, 53) Daw ano nga pagpadayag sang pagkahalangdon ni Jehova! Ang mga mahigugmaon sa Pulong sang Dios nga nagapamalandong sining mga hitabo mapahulag gid sa ‘mahimayaon nga pagkahari sang kadungganan ni Jehova.’ Karon, sa pagkamatuod, may bug-os na kita nga Biblia, nga nagaunod sang mahimayaon nga mga palanan-awon nga nagapadayaw sa aton sa pagkadaku ni Jehova.—Ezequiel 1:​26-​28; Daniel 7:​9, 10; Bugna, kapitulo 4.

19. Ano ang magapalambo sang aton apresasyon sa pagkadungganon ni Jehova?

19 Ang isa pa ka paagi nga mahimo nagpadayaw kay David sa kadungganan sang Dios amo ang pagtuon sang mga kasuguan nga ginhatag sang Dios sa mga Israelinhon. (Deuteronomio 17:18-​20; Salmo 19:​7-​11) Ang pagkamatinumanon sa mga kasuguan ni Jehova nagpadungog sa pungsod sang Israel kag nagpatuhay sa ila gikan sa tanan nga katawhan. (Deuteronomio 4:​6-8) Kaangay ni David, ang pagbasa sing regular sa Kasulatan, pagpamalandong sing madalom sa sini, kag pagtuon sing makugi sa sini magapadalom sang aton apresasyon sa kadungganan ni Jehova.

Daw Ano Kadaku ang Moral nga mga Kinaiya sang Dios!

20, 21. (a) Ang Salmo 145:7-9 nagapahayag sang pagkadaku ni Jehova may kaangtanan sa ano nga mga kinaiya? (b) Ano ang epekto sang mga kinaiya sang Dios nga ginsambit diri sa tanan nga nagahigugma sa iya?

20 Subong sang aton nakita, ang unang anom ka bersikulo sang Salmo 145 nagahatag sa aton sing malig-on nga rason sa pagdayaw kay Jehova tuhoy sa mga butang may kaangtanan sa iya di-matungkad nga pagkadaku. Ang bersikulo 7 tubtob 9 nagapahayag sang pagkadaku sang Dios paagi sa pagpatuhoy sa iya mga kinaiya sa moral. Si David nag-amba: “Ibungat nila ang handumanan sang imo dakung pagkaayo, kag magaamba sang imo pagkamatarong. Ang GINUO mainayuhon kag maluluy-on, makuli sa pagpangakig kag daku sa malig-on nga paghigugma. Ang GINUO maayo sa tanan, kag ang iya mahinuklugon nga mga kaluoy sa ibabaw sang iya tanan nga binuhatan.”

21 Diri una nga ginpatalupangod ni David ang pagkaayo kag pagkamatarong ni Jehova—mga kinaiya nga ginduhaduhaan ni Satanas nga Yawa. Ano ang epekto sining mga kinaiya sa tanan nga nagahigugma sa Dios kag nagapasakop sa iya pagginahom? Ti, ang kaayo ni Jehova kag ang iya matarong nga paagi sa paggahom nagapahalipay sa iya mga sumilimba amo kon ngaa indi sila makauntat sa pagdayaw sa iya. Dugang pa, ang kaayo ni Jehova ginapakita “sa tanan.” Ginalauman nga ini makabulig sa madamo pa nga maghinulsol kag mangin mga sumilimba sang matuod  nga Dios antes mangin ulihi ang tanan.—Binuhatan 14:15-​17.

22. Paano ginapakig-angutan ni Jehova ang iya mga alagad?

22 Gin-apresyar man ni David ang mga kinaiya nga ginpadaku mismo sang Dios sang Sia “nag-agi sa atubangan niya [Moises], kag nagbantala: ‘Ang GINUO, ang GINUO, Dios nga maluluy-on kag mainayuhon, makuli sa pagpangakig, kag bugana sa malig-on nga paghigugma kag sa pagkatutom.’” (Exodo 34:6) Sa amo, si David sarang makasiling: “Ang GINUO mainayuhon kag maluluy-on, makuli sa pagpangakig kag daku sa malig-on nga paghigugma.” Bisan pa di-matungkad ang pagkadaku ni Jehova, ginapabaloran niya ang iya mga alagad paagi sa pagpakig-angot sa ila sing mainayuhon. Puno sia sing kaluoy, handa nga magpatawad sa mahinulsulon nga mga makasasala pasad sa halad gawad ni Jesus. Si Jehova makuli man sa pagpangakig, kay ginahatagan niya sing kahigayunan ang iya mga alagad nga malandas ang mga kaluyahon nga makaupang sa ila pagsulod sa iya bag-o nga kalibutan sang pagkamatarong.—2 Pedro 3:​9, 13, 14.

23. Anong hamili nga kinaiya ang binagbinagon naton sa masunod nga artikulo?

23 Gindayaw ni David ang mahigugmaon nga kaayo, ukon mainunungon nga gugma sang Dios. Ang matuod, ang nabilin nga mga bersikulo sang Salmo 145 nagapakita kon paano ginapakita ni Jehova ini nga kinaiya kag kon paano ang iya matutom nga mga alagad nagabalos sa iya mahigugmaon nga kaayo. Pagabinagbinagon ini sa masunod nga artikulo.

 Paano Mo Sabton?

• Ano ang mga kahigayunan agod madayaw si Jehova sa “bug-os nga adlaw”?

• Ano nga mga halimbawa ang nagapakita nga di-matungkad ang pagkadaku ni Jehova?

• Paano naton mapalambo ang apresasyon sa mahimayaon nga pagkadungganon ni Jehova?

[Mga Pamangkot sa Pagtinuon]

[Retrato sa pahina 10]

Ang mga galaksiya sang uniberso nagapamatuod sa pagkadaku ni Jehova

[Credit Line]

Courtesy of Anglo-Australian Observatory, photograph by David Malin

[Retrato sa pahina 12]

Paano napadayag ang pagkadaku ni Jehova may kaangtanan kay Jesucristo?

[Retrato sa pahina 13]

Sang nabaton sang mga Israelinhon ang Kasuguan sa Bukid Sinai, napamatud-an nila ang mahimayaon nga pagkadungganon ni Jehova