Madumduman Mo Bala?

Nalipay ka bala sa pagbasa sa ulihi nga mga gua sang Ang Lalantawan? Bueno, tilawi kon masabat mo ang masunod nga mga pamangkot:

Pila ka kapitulo ang tulun-an nga Miqueas, san-o ini ginsulat, kag ano ang kahimtangan sadto?

Ang tulun-an nga Miqueas may pito ka kapitulo. Ang tulun-an ginsulat ni manalagna Miqueas sang ikawalo nga siglo B.⁠C.⁠E., sang ang katipan nga katawhan sang Dios natunga sa duha ka pungsod​​—⁠ang Israel kag ang Juda.​​—⁠8/15, pahina 9.

Suno sa Miqueas 6:​8, ano ang ginapatuman sa aton sang Dios?

‘Maghimo kita sing katarungan.’ Ang paagi sang Dios sa paghimo sa mga butang amo ang talaksan sang katarungan, gani dapat naton sakdagon ang iya mga prinsipio sang pagkabunayag kag integridad. Ginasilingan niya kita nga ‘higugmaon ang kaayo.’ Ginpakita sang mga Cristiano ang mahigugmaon nga kaayo paagi sa pagbulig sa mga kinahanglanon sang iban, subong sang pagkatapos sang mga kalamidad. Agod ‘mangin maugdang kita sa paglakat upod kay’ Jehova, dapat naton hibaluon ang aton mga limitasyon kag magsalig sa iya.​​—⁠8/15, pahina 20-2.

Kon ang isa ka Cristiano madulaan sing trabaho, ano ang sarang niya himuon?

Mangin maalamon nga usisaon niya ang iya estilo sa pagkabuhi. Ayhan posible nga mapasimple niya ang iya pagkabuhi paagi sa pagsaylo sa isa ka mas gamay nga puluy-an ukon paagi sa pagdula sang di-kinahanglanon nga materyal nga mga pagkabutang. Importante gid nga indi magkabalaka tuhoy sa adlaw-adlaw nga mga kinahanglanon, nga nagasalig nga makabulig ang Dios agod matigayon ini. (Mateo 6:​33, 34)​​—⁠9/1, pahina 14-15.

Ano ang dapat naton dumdumon kon nagahatag ukon nagabaton sang mga regalo sa kasal?

Ang malahalon nga mga regalo wala ginakinahanglan, ukon wala dapat ginapaabot. Ang panimuot sang tagipusuon sang naghatag amo ang pinakaimportante. (Lucas 21:​1-4) Indi maayo nga ipahibalo ang ngalan sang nagregalo. Mahimo nga mahuy-an sia kon himuon ina. (Mateo 6:3)​​—⁠9/1, pahina 29.

Ngaa dapat kita magpadayon sa pagpangamuyo?

Ang regular nga pangamuyo makabulig sa pagpabakod sang aton kaangtanan sa Dios kag makasangkap sa aton sa pag-atubang sa mabudlay nga mga pagtilaw. Ang aton mga pangamuyo mahimo nga malip-ot ukon malawig, depende sa kinahanglanon kag mga kahimtangan. Ang pangamuyo nagapabakod sang pagtuo kag nagabulig sa aton nga atubangon ang mga problema.​​—⁠9/15, pahina 15-​18.

Paano naton dapat hangpon ang 1 Corinto 15:​29, nga sa pila ka bersion ginbadbad nga “ginbawtismuhan tungod sa mga patay”?

Ginpahangop ni apostol Pablo nga ang hinaplas nga mga Cristiano ginbawtismuhan, ukon gintugmawan, sa isa ka dalanon sang kabuhi nga magadul-ong sa isa ka kamatayon sa integridad kaangay ni Cristo. Pagkatapos sini, banhawon sila sa espiritu nga kabuhi kaangay sa ginhimo kay Cristo.​​—⁠10/1, pahina 29.

Paano naton nahibaluan nga ang pagkamangin Cristiano wala lamang nagalakip sang paglikaw sa paghimo sing mga sayop nga ginsambit sa 1 Corinto 6:​9-​11?

Wala nagsiling si apostol Pablo nga likawan lamang ang paghimo sing sayop subong sang pakighilawas, idolatriya, kag pagpahubog. Sa pagpakita nga kinahanglan ang dugang pa nga mga pagbag-o, nagpadayon sia sa masunod nga bersikulo: “Para sa akon ang tanan nga butang suno sa kasuguan; apang indi tanan nga butang may kaayuhan.”​​—⁠10/15, pahina 18-​19.

Sin-o ang pila ka babayi sang dumaan nga mga tion nga nagpahalipay sa tagipusuon sang Dios?

Sila nagalakip sang mga partera nga sanday Sifra kag Pua, nga nagsupak kay Paraon kag wala magpatay sa bag-ong bun-ag nga mga lalaki sang mga Israelinhon. (Exodo 1:​15-​20) Ang Canaanhon nga makihilawason nga si Rahab nag-amlig sa duha ka espiya nga Israelinhon. (Josue 2:​1-​13; 6:​22, 23) Nagpakita sing pagkamahinantupon, nagbulig si Abigail sa pagluwas sang mga kabuhi kag sa pag-amlig kay David gikan sa sala sa dugo. (1 Samuel 25:​2-​35) Mga huwaran sila para sa mga babayi karon.​​—⁠11/1, pahina 8-​11.

Paano nga “gikan sa langit nagpakig-away ang mga bituon” batok kay Sisera, suno sa Hukom 5:​20?

Ginahunahuna sang iban nga nagapatuhoy ini sa bulig sang Dios. Ang iban nagpanugda nga nagapatuhoy ini sa bulig sang mga anghel, pagkahulog sang mga bulalakaw, ukon sa pagsalig ni Sisera sa astrolohiko nga mga pagpamakot. Bangod wala nagahatag sing mga detalye ang Biblia, mahimo hangpon naton ining pinamulong nga pagpakita sing pagpasilabot sang Dios sa pila ka paagi para sa mga hangaway sang Israel.​​—⁠11/15, pahina 30.

Ngaa madamo gihapon nga tawo ang nagapangangkon nga nagapati sa Dios bisan pa nga lapnag karon ang di-pagsapak kag pagkawalay interes sa relihion sa bug-os nga kalibutan?

Ang pila nagakadto sa simbahan agod matigayon ang kalinong sa hunahuna. Ang iban nagalaum sang kabuhi nga dayon sa tapos sing kamatayon, ukon nagalaum sang maayong panglawas, manggad, kag kadalag-an. Sa pila ka duog, ginatinguhaan sang mga tawo nga mapun-an ang espirituwal nga kakulangan nga resulta sang pagbulos sing kapitalista nga mga paninguha sa Komunista nga ideolohiya. Ang paghibalo sining mga rason makabulig sa mga Cristiano nga makapaambit sing mapuslanon nga mga impormasyon sa mga ginabantalaan nila.​​—⁠12/1, pahina 3.