Mga Pamangkot Gikan sa mga Bumalasa

Paano dapat tamdon sang mga Cristiano ang pagsuksok sing mga birthstone?

Sa pila ka kultura, ang mga birthstone ginaangot sa bulan nga natawhan sang isa. Kon bala magasuksok ang isa ka Cristiano sang singsing nga may hiyas nga bato isa ka personal nga desisyon. (Galacia 6:5) Sa paghimo sina nga desisyon, may importante nga mga butang nga dapat binagbinagon.

Ang Encyclopaedia Britannica nagasiling nga ang birthstone isa ka “hiyas nga bato nga may kaangtanan sa petsa sang pagkabun-ag sang isa, nga ang pagsuksok sini kinaandan nga ginahunahuna nga magadala sing suerte ukon kapagros.” Ining insiklopedia nagadugang: “Madugay na nga ginatamod sang mga astrologo nga may labaw sa kinaugali nga gahom ining hiyas nga mga bato.”

Ilabi na sang dumaan nga panahon, madamo ang nagpati nga ang isa ka birthstone nagadala sang suerte sa nagasuksok sini. Nagapati bala sa sini ang isa ka matuod nga Cristiano? Wala, bangod nahibaluan niya nga ginpakamalaut ni Jehova ang mga nagbiya sa iya kag nagasalig sa “dios sang Suerte.”​​—⁠Isaias 65:11.

Sang Edad Media, ang mga manugpakot sang kapalaran nagpili sang isa ka hiyas para sa tagsa ka bulan sang tuig. Ginpalig-on nila ang mga tawo nga isuksok ang hiyas sang bulan nga ila natawhan, agod kuno maamligan ang nagasuksok gikan sa kahalitan. Apang pasad sa Kasulatan sayop para sa isa ka Cristiano nga magsunod sa panuytoy sang propesyonal nga mga manugpakot sang mga hitabo, bangod ginapakamalaut sila sang Biblia.​​—⁠Deuteronomio 18:​9-​12.

Indi man nagakaigo para sa mga Cristiano nga hatagan sing pinasahi nga importansia ang isa ka singsing bangod may birthstone ini. Ang mga Saksi ni Jehova wala nagasaulog sang mga kaadlawan. Bangod ini nga mga selebrasyon nagahatag sing sobra nga igtalupangod sa isa ka indibiduwal kag ang narekord lamang sa Biblia nga nagsaulog sang kaadlawan amo ang mga manuggahom nga wala nag-alagad sa Dios.​​—⁠Genesis 40:20; Mateo 14:​6-​10.

Ang iban nagapensar nga ang pagsuksok sing singsing nga may tampok nga birthstone may maayo nga epekto sa personalidad sang nagasuksok. Apang, ang matuod nga mga Cristiano wala nagapati sa sini, bangod nahibaluan nila nga “ang bag-o nga personalidad” ginasul-ob sa idalom sang impluwensia sang balaan nga espiritu sang Dios kag paagi sa pag-aplikar sing mga prinsipio sang Kasulatan.​​—⁠Efeso 4:​22-​24.

Ang pinakaimportante nga butang amo ang motibo. Kon nagadesisyon kon bala magasuksok sing singsing nga may birthstone, ang isa ka Cristiano mahimo mamangkot sa iya kaugalingon, ‘Luyag ko bala isuksok ining singsing bangod lamang nga nanamian ako sang hiyas, bisan pa nga may birthstone ini? Ukon naimpluwensiahan bala ako sang mga disparatis nga ginapatihan sang pila ka tawo sa sining mga hiyas?’

Dapat usisaon sang isa ka Cristiano ang iya tagipusuon agod mapat-od niya ang iya motibo. “Labaw sa tanan nga dapat bantayan, amligi ang imo tagipusuon,” siling sang Kasulatan, “kay nagagikan sa sini ang mga tuburan sang kabuhi.” (Hulubaton 4:23) Sa paghimo sing desisyon tuhoy sa mga birthstone, ang tagsa ka Cristiano makabenepisyo kon usisaon niya ang iya motibo kag ang posible nga mga epekto sang iya dalanon sa iya mismo kaugalingon kag sa iban.​​—⁠Roma 14:13.