Agod Magdaug, Ipakita ang Pagpugong sa Kaugalingon!

“Ang tagsa ka tawo nga nagapakigbahin sa isa ka paindis-indis nagapugong sang kaugalingon sa tanan nga butang.”​—⁠1 CORINTO 9:25.

1. Nahisanto sa Efeso 4:22-24, paano nagsugot ang minilyon nga himuon ang kabubut-on ni Jehova?

KON ginbawtismuhan ka subong isa sa mga Saksi ni Jehova, ginpahibalo mo sing dayag nga handa ka sa pagpakigbahin sa isa ka paindis-indis nga ang premyo amo ang kabuhi nga dayon. Nagsugot ka nga himuon ang kabubut-on ni Jehova. Antes magdedikar kay Jehova, madamo sa aton ang naghimo sing daku nga mga pagbag-o agod ang aton dedikasyon mangin makahulugan kag kalahamut-an sa Dios. Ginsunod naton ang laygay ni apostol Pablo sa mga Cristiano: “Ubahon ninyo ang daan nga personalidad nga nahisuno sa inyo una nga dalanon sang paggawi kag ginapalain suno sa iya madaya nga mga kailigbon . . . Magsuklob sing bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efeso 4:22-24) Nagakahulugan ini nga, antes kita magdedikar sa Dios, dapat naton talikdan ang anay di-kalahamut-an nga dalanon sang kabuhi.

2, 3. Paano ginapakita sang 1 Corinto 6:9-12 nga ang duha ka sahi sang mga pagbag-o dapat himuon agod kahamut-an sang Dios?

2 Ang pila ka aspekto sang daan nga personalidad nga dapat ubahon sang mga luyag mangin mga Saksi ni Jehova direkta nga ginapakamalaut sang Pulong sang Dios. Ginsambit ni Pablo ang iban sini sa iya sulat sa mga taga-Corinto, nga nagasiling: “Wala sing mga makihilawason, ni mga sumilimba sa idolo, ni mga makihilahion, ni mga lalaki nga ginagamit ang kaugalingon para sa di-kinaugali nga mga katuyuan, ni mga lalaki nga nagahulid sa mga lalaki, ni mga makawat, ni mga tawo nga sakon, ni mga palahubog, ni mga mapasipalahon, ni mga nagapangilkil ang makapanubli sang ginharian sang Dios.” Nian ginpakita niya nga ang unang-siglo nga mga Cristiano naghimo sing kinahanglanon nga mga pagbag-o sa personalidad, sa pagsiling sing dugang: “Apang amo sina anay ang pila sa inyo.” Talupangda ang tinaga nga anay.​—⁠1 Corinto 6:9-11.

3 Ginpahangop ni Pablo nga kinahanglan man ang dugang nga mga pagbag-o, kay nagsiling pa sia: “Ang tanan nga butang matarong para sa akon; apang indi tanan nga butang sa kaayuhan.” (1 Corinto 6:12) Busa, kinahanglan pangindian sang madamo karon nga luyag mangin Saksi ni Jehova ang mga butang nga bisan pa matarong wala sing kapuslanan ukon wala sing dayon nga kabilihanan.  Mahimo ini mag-ubos sing tion kag mag-upang sa ila nga tinguhaan nga himuon ang mas importante nga mga butang.

4. Sa ano nagaugyon kay Pablo ang dedikado nga mga Cristiano?

4 Ang dedikasyon sa Dios ginahimo sing kinabubut-on, indi sing paganot, subong nga daw nagakinahanglan ini sing daku nga sakripisyo. Ang dedikado nga mga Cristiano nagaugyon kay Pablo, nga nagsiling sa tapos sia nangin sumulunod ni Cristo: “Tungod [kay Jesus] ginbaton ko ang kadulaan sang tanan nga butang kag ginabilang ko sila nga mga sagbot, agod nga maagom ko si Cristo.” (Filipos 3:8) Malipayon nga ginpangindian ni Pablo ang mga butang nga may diutay nga kabilihanan agod padayon niya nga mahimo ang kabubut-on sang Dios.

5. Sa ano nga sahi sang palumba madinalag-on nga nakigbahin si Pablo, kag paano man naton ini mahimo?

5 Si Pablo nagpakita sing pagpugong sa kaugalingon sa iya espirituwal nga palumba kag nakasiling sia sang ulihi: “Nakapakig-away ako sang maayo nga pag-away, nadalagan ko ang dalaganon tubtob sa katapusan, natuman ko ang pagtuo. Kutob karon natigana sa akon ang purongpurong sang pagkamatarong, nga ihatag sa akon sang Ginuo, ang hukom nga matarong, subong padya sa sina nga adlaw, apang indi lamang sa akon kundi sa tanan man nga nagahigugma sang iya pagpahayag.” (2 Timoteo 4:​7, 8) Masiling man bala naton ini sa pila ka adlaw? Masiling naton ini kon may pagtuo nga magpakita kita sing pagpugong sa kaugalingon samtang nagadalagan kita sa aton Cristianong palumba sing walay untat kag tubtob sa katapusan.

Kinahanglan ang Pagpugong sa Kaugalingon Agod Mahimo ang Maayo

6. Ano ang pagpugong sa kaugalingon, kag sa anong duha ka paagi dapat naton ini mapakita?

6 Ang Hebreo kag Griego nga mga tinaga nga ginbadbad sing “pagpugong sa kaugalingon” sa Biblia literal nga nagakahulugan nga ang isa ka tawo may gahom ukon kontrol sa iya kaugalingon. Masami ini nagapaalinton sing panghunahuna nga punggan ang kaugalingon agod indi makahimo sing malain. Apang maathag gid nga kinahanglan man ang pagpugong sa kaugalingon agod magamit naton ang aton lawas sa paghimo sing maayo. Ang kinaugali nga huyog sang di-himpit nga mga tawo amo ang paghimo sing malain, gani may yara kita duha ka sahi sang paghimud-os. (Manugwali 7:29; 8:11) Samtang ginalikawan ang paghimo sing malain, dapat man naton piliton ang aton kaugalingon sa paghimo sing maayo. Ang matuod, ang pagkontrol sa aton lawas agod maghimo sing maayo amo ang isa sang labing maayo nga paagi agod malikawan ang paghimo sing malain.

7. (a) Tungod sa ano kita dapat mangamuyo, kaangay ni David? (b) Ano ang mapamalandungan naton nga makabulig sa aton sa pagpakita sing dugang pa nga pagpugong sa kaugalingon?

7 Sing maathag, ang pagpugong sa kaugalingon kinahanglanon gid agod matuman naton ang aton dedikasyon sa Dios. Dapat kita mangamuyo kaangay ni David: “Tugaha sa akon ang isa ka putli nga tagipusuon, O Dios, kag ibutang sa sulod ko ang isa ka bag-o nga espiritu, ang isa nga mabakod.” (Salmo 51:10) Mapamalandungan naton ang mga benepisyo sang paglikaw sa mga butang nga imoral ukon makapaluya sa lawas. Hunahunaa ang posible nga  mga halit sang indi paglikaw sa sini nga mga butang: malubha nga mga balatian, magamo nga mga relasyon, hilaw nga kamatayon pa gani. Sa pihak nga bahin, hunahunaa ang madamo nga mga benepisyo sang padayon nga paglakat sa dalan sang kabuhi nga ginapahamtang ni Jehova. Apang, siempre pa, indi naton dapat pagkalimtan nga ang aton tagipusuon malimbungon. (Jeremias 17:9) Dapat determinado kita nga batuan ang mga panikasog sini nga pakadiutayon ang pagkaserioso sang pagsunod sa mga talaksan ni Jehova.

8. Ano nga katunayan ang ginatudlo sa aton sang eksperiensia? Iilustrar.

8 Naeksperiensiahan mismo sang kalabanan sa aton nga ang nagapaganot nga unod masunson nga nagapaluya sa kakugi sang isa ka kinabubut-on nga espiritu. Binagbinaga, halimbawa, ang pagbantala sing Ginharian. Nalipay si Jehova sa kahanda sang mga tawo sa pagpakigbahin sa sining nagahatag-kabuhi nga hilikuton. (Salmo 110:⁠3; Mateo 24:14) Para sa kalabanan sa aton, ang pagtuon sa pagbantala sing dayag indi mahapos. Nagkinahanglan ini​—⁠kag ayhan nagakinahanglan gihapon​—⁠nga dapat naton kontrolon ang aton lawas, ‘sakiton’ ini kag ‘himuon ini nga ulipon,’ sa baylo nga tugutan ini nga himuon ang pinakamahapos nga dalanon.​—⁠1 Corinto 9:​16, 27; 1 Tesalonica 2:2.

“Sa Tanan nga Butang”?

9, 10. Ano ang nalakip sa pagpakita sing ‘pagpugong sa kaugalingon sa tanan nga butang’?

9 Ang laygay sang Biblia nga magpakita sing ‘pagpugong sa kaugalingon sa tanan nga butang’ nagapakita nga kapin pa sa pagkontrol sa aton kaakig kag pag-untat sa paghimo sing imoral nga mga butang ang kinahanglan. Mahimo kita maghunahuna nga natigayon na naton ang pagpugong sa kaugalingon sa sining mga bahin, kag gani, nagapasalamat gid kita. Apang, kamusta naman sa iban pa nga mga bahin sang kabuhi diin indi pa maathag nga kinahanglan naton ang pagpugong sa kaugalingon? Sa pag-ilustrar, pananglitan nagapuyo kita sa isa ka manggaranon nga pungsod nga may mataas nga talaksan sang pangabuhi. Indi bala maalamon nga tun-an naton nga pangindian ang di-kinahanglanon nga paggasto? Dapat tudluan sang mga ginikanan ang ila mga kabataan nga indi magbakal sing bisan ano nga butang nga makita nila bangod lamang nga matigayon ini, matahom, ukon masarangan nila baklon. Siempre pa, agod mangin epektibo ini nga instruksion, ang mga ginikanan dapat magpakita sing maayo nga halimbawa.​—⁠Lucas 10:38-42.

10 Ang pagtuon nga magkabuhi nga wala ang pila ka butang makapabakod sang aton determinasyon. Labi man naton nga apresyahon ang materyal nga mga butang nga ginapanag-iyahan naton kag labi nga mangin mahinuklugon sa mga tawo nga dapat magkabuhi nga wala ang pila ka butang, indi bangod luyag nila, kundi bangod kinahanglan. Matuod, ang maugdang nga pagkabuhi nagasumpakil sa popular nga mga panimuot subong sang “mangin mabuot ka sa imo kaugalingon” ukon “bagay sa imo ang pinakamaayo.” Ginapasanyog sang mga pasayod ang handum para sa gilayon nga kaayawan, apang ginahimo ini sa tuyo nga makaganansia. Makaupang ini sa aton mga panikasog nga magpakita sing pagpugong sa kaugalingon. Ang isa ka magasin gikan sa isa ka manggaranon nga pungsod sa Europa nagsiling sining karon lang: “Kon ang pagkontrol sa di-maayo nga mga huyog nagakinahanglan sing nasulod nga paghimud-os para sa mga nagapuyo sa sobra nga kapigaduhon, daw ano pa gid para sa mga nagapuyo sa manggaranon nga mga pungsod karon!”

11. Ngaa ang pagtuon sa pagkabuhi nga wala ang pila ka butang mapuslanon, apang ngaa mabudlay ini?

11 Kon nabudlayan kita nga mahibaluan kon ano ang aton luyag kag kon ano gid ang aton kinahanglan, ayhan mapuslanon nga maghimo kita sing mga tikang agod pat-uron nga wala kita nagapanghikot nga wala anay ginapamensaran kon ano ang mangin resulta. Halimbawa, kon luyag naton tapnaon ang huyog sa walay pagpugong nga paggasto, mahimo kita mamat-od nga indi magpamalaklon sing utang, ukon kon nagapamalaklon, mahimo kita magdala sing iguigo lang nga kuarta. Dumduma nga “ang diosnon nga debosyon upod ang pagkanaayawan sa kaugalingon,” siling ni Pablo, ‘isa ka paagi sang daku nga daug.’ Sia nangatarungan: “Wala kita sing nadala sa kalibutan, kag wala man kita sing madala nga bisan ano nga butang pagua. Gani, kon may pagkaon kag panapton, mangin kontento na kita sa sining mga butang.” (1 Timoteo 6:6-8) Kontento bala kita? Ang pagtuon sa pagkabuhi sing simple, nga wala nagapatuyang sa kaugalingon​—⁠bisan ano man ini​—⁠nagakinahanglan sing determinasyon kag pagpugong sa kaugalingon. Apang, isa ini ka leksion nga takus tun-an.

12, 13. (a) Sa anong mga paagi ang Cristianong mga miting nagakinahanglan sing pagpugong sa kaugalingon? (b) Sa ano pa nga mga bahin kinahanglan naton nga palambuon ang pagpugong sa kaugalingon?

 12 Kinahanglan man ang pagpugong sa kaugalingon kon nagatambong sa Cristianong mga miting, mga asambleya, kag mga kombension. Halimbawa, ini nga kinaiya kinahanglan agod indi naton pagpalagawon ang aton pensar sa tion sang programa. (Hulubaton 1:5) Mahimo kinahanglan ang pagpugong sa kaugalingon nga indi pagtublagon ang iban paagi sa paghutik sa aton mga tupad kag sa baylo, ituon naton ang aton bug-os nga igtalupangod sa humalambal. Ang pagbag-o sang aton iskedyul agod makaabot kita sing husto sa oras mahimo nagakinahanglan sing pagpugong sa kaugalingon. Dugang pa, mahimo kinahanglan ang pagpugong sa kaugalingon agod magpain kita sing tion sa paghanda para sa mga miting kag nian sa pagpakigbahin sa sini.

13 Ang pagpakita sing pagpugong sa kaugalingon sa magagmay nga mga butang nagapabakod sang aton ikasarang nga mapakita man ini sa mas dalagku nga mga butang. (Lucas 16:10) Busa, maayo gid nga disiplinahon naton ang aton kaugalingon nga basahon pirme ang Pulong sang Dios kag ang mga publikasyon tuhoy sa Biblia, ginatun-an ini kag ginapamalandungan ang aton natun-an! Maalamon gid nga disiplinahon naton ang aton kaugalingon may kaangtanan sa di-nagakaigo nga mga trabaho, mga pagpakig-abyan, mga panimuot, kag personal nga mga batasan ukon disiplinahon naton ang aton kaugalingon nga mapangindian ang mga buhat nga magaubos sang aton hamili nga tion para sa pag-alagad sa Dios! Ang pagpabilin nga masako sa pag-alagad kay Jehova isa gid ka maayo nga proteksion batok sa mga butang nga makapahilayo sa aton gikan sa espirituwal nga paraiso sang bug-os kalibutan nga kongregasyon ni Jehova.

Mangin Hamtong sa Paagi sa Pagpugong sa Kaugalingon

14. (a) Paano dapat makatuon ang mga kabataan sing pagpugong sa kaugalingon? (b) Ano nga mga benepisyo ang matigayon kon matun-an sang mga kabataan ini nga mga leksion samtang bata pa?

14 Ang bag-ong bun-ag nga lapsag wala sing pagpugong sa kaugalingon. Ang isa ka pulyeto sang mga eksperto tuhoy sa paggawi sang mga bata nagapaathag: “Ang pagpugong sa kaugalingon indi matigayon sing awtomatiko ukon sing hinali. Ang mga lapsag kag mga bata nagakinahanglan sing panuytoy kag suportar sang mga ginikanan agod sugdan ang proseso sang pagtuon sing pagpugong sa kaugalingon. . . . Paagi sa pagtuytoy sang mga ginikanan sa proseso, ang pagpugong sa kaugalingon nagauswag sa bug-os nga tinuig sang pag-eskwela.” Ginpakita sang isa ka pagtuon sa apat-ka-tuig nga mga kabataan nga ang mga nakatuon sa pagpakita sing pagpugong sa kaugalingon “nagdaku nga mas madali magpasibu, mas popular, mapasimpalaron, may kompiansa kag masaligan nga mga tin-edyer.” Ang mga wala makatuon sini nga leksion “mas daku ang posibilidad nga mangin masinulub-on, madali mabang-awan kag matig-a sing ulo. Madali  sila mahul-an kag nagalikaw sila sa mga hangkat.” Kon amo, agod mangin isa ka adulto nga makahibalo mag-atubang sa mga problema sa kabuhi, ang bata dapat magtuon sa pagpakita sing pagpugong sa kaugalingon.

15. Ano ang ginapakita sang kakulang sing pagpugong sa kaugalingon, nga tuhay sa anong tulumuron nga ginahatag sa Biblia?

15 Subong man, agod mangin hamtong kita nga mga Cristiano, dapat magtuon kita sa pagpakita sing pagpugong sa kaugalingon. Kon wala ini, ginapakita naton nga kita espirituwal nga mga lapsag pa gihapon. Ang Biblia nagalaygay sa aton nga ‘magpakahamtong sa mga ikasarang sa paghangop.’ (1 Corinto 14:20) Ang aton tulumuron amo nga “makadangat kita . . . sa paghiusa sa pagtuo kag sa sibu nga ihibalo tuhoy sa Anak sang Dios, sa isa ka hamtong nga tawo, sa talaksan sang kataason sang kabug-usan ni Cristo.” Ngaa? “Agod nga indi na kita mangin mga bata, nga ginabolabola sang mga balod kag ginapalidpalid sang tagsa ka hangin sang panudlo paagi sa pagdaya sang mga tawo, paagi sa pagkamalalangon sa pagpadihot sing sayop.” (Efeso 4:​13, 14) Maathag nga ang pagtuon sa pagpakita sing pagpugong sa kaugalingon kinahanglanon gid sa aton espirituwalidad.

Pagpalambo sing Pagpugong sa Kaugalingon

16. Paano si Jehova nagahatag sing bulig?

16 Agod mapalambo ang pagpugong sa kaugalingon, kinahanglan naton ang bulig sang Dios, kag matigayon naton ini. Kaangay sang isa ka himpit nga espeho, ginapakita sa aton sang Pulong sang Dios kon diin kita dapat maghimo sing personal nga mga pagbag-o, kag nagahatag ini sing laygay kon paano ini himuon. (Santiago 1:22-25) Ang mahigugmaon nga paghiliutod handa man pirme sa pagbulig. Ang Cristianong mga gulang nagapakita sing pagkamahinangpanon kon nagahatag sing personal nga bulig. Si Jehova mismo nagahatag sing bugana sang iya balaan nga espiritu kon mangabay kita sini sa pangamuyo. (Lucas 11:13; Roma 8:26) Busa, himuslan naton sing malipayon ini nga mga aman. Ang mga panugda sa pahina 21 mahimo makabulig.

17. Ano nga pagpalig-on ang ginahatag sa aton sang Hulubaton 24:16?

17 Makalulugpay gid mahibaluan nga ginaapresyar ni Jehova ang aton mga panikasog kon magtinguha kita nga pahamut-an sia! Magapahulag ini sa aton nga padayon nga panikasugan nga mapalambo ang dugang pa nga pagpugong sa kaugalingon. Bisan daw ano man kasunson kita masandad, indi gid kita dapat mag-untat sa aton mga pagpanikasog. “Ang matarong mahimo mapukan bisan sing makapito, kag pat-od nga magabangon sia.” (Hulubaton 24:16) Sa tagsa ka tion nga magmadinalag-on kita sa pagpahamuot kay Jehova, may rason kita nga magkalipay. Makasiguro man kita nga si Jehova nahamuot sa aton. Ang isa ka Saksi nagsiling nga antes niya gindedikar ang iya kabuhi kay Jehova, sa tagsa ka tion nga indi sia makapanigarilyo sa sulod sang isa ka semana, ginabaklan niya ang iya kaugalingon sing butang nga mapuslanon paagi sa kuarta nga nasupot niya bangod sang iya pagpugong sa kaugalingon.

18. (a) Ano ang nadalahig sa aton paghimud-os nga matigayon ang pagpugong sa kaugalingon? (b) Ano nga pasalig ang ginahatag ni Jehova?

18 Labaw sa tanan, dapat naton dumdumon nga ang pagpugong sa kaugalingon nagadalahig sang hunahuna kag emosyon. Makita naton ini sa ginsiling ni Jesus: “Ang tagsatagsa nga padayon nga nagatan-aw sa isa ka babayi nga may daku nga pagkaibog sa iya nakahimo na sa iya sing panghilahi sa iya tagipusuon.” (Mateo 5:28; Santiago 1:​14, 15) Mas mahapos makontrol sang isa ka tawo ang iya bug-os nga lawas kon matun-an niya nga kontrolon ang iya hunahuna kag balatyagon. Busa pabakuron naton ang aton determinasyon nga likawan indi lamang ang paghimo sing malain kundi bisan ang paghunahuna tuhoy sini. Kon magsulod ang malain nga mga panghunahuna, sikwaya ini gilayon. Malikawan naton ang pagsulay kon mapangamuyuon nga ituon naton pirme ang aton mga mata kay Jesus. (1 Timoteo 6:11; 2 Timoteo 2:22; Hebreo 4:​15, 16) Samtang ginahimo naton ang aton bug-os nga masarangan, ginasunod naton ang laygay sa Salmo 55:22: “Ihaboy ang imo lulan kay Jehova, kag sia magaalay-ay sa imo. Indi gid sia magtugot nga malingkang ang matarong.”

Madumduman Mo Bala?

• Sa anong duha ka paagi dapat naton ipakita ang pagpugong sa kaugalingon?

• Ano ang buot silingon sang pagpakita sing ‘pagpugong sa kaugalingon sa tanan nga butang’?

• Anong praktikal nga mga panugda sa pagpalambo sing pagpugong sa kaugalingon ang ginhatagan mo sing pinasahi nga igtalupangod sa tion sang aton pagtuon?

• Diin nagasugod ang pagpugong sa kaugalingon?

[Mga Pamangkot sa Pagtinuon]

[Kahon/Mga retrato sa pahina 21]

Kon Paano Pabakuron ang Pagpugong sa Kaugalingon

• Palambua ini bisan sa magagmay nga mga butang

• Pamalandungi ang karon kag palaabuton nga mga benepisyo sini

• Busli ang ginadumilian sang Dios sing mga butang nga ginapalig-on niya

• Sikwaya gilayon ang malain nga mga ideya

• Hunahunaa pirme ang makapalig-on sa espirituwal nga mga butang

• Batuna ang bulig nga mahatag sang hamtong nga mga masigka-Cristiano

• Likawi ang makasululay nga mga kahimtangan

• Mangamuyo sing bulig sang Dios sa tion sang pagsulay

[Mga retrato sa pahina 19]

Ang pagpugong sa kaugalingon nagapahulag sa aton sa paghimo sing maayo