Paghangop sa Katuyuan sang Disiplina

ANO ang ginahunahuna mo kon makabati ka sing tinaga nga “disiplina”? Ginhatag sang isa ka diksionaryo ang kahulugan sang disiplina subong “isa ka buhat sang pagpatuman sa mga tawo sing mga pagsulundan ukon mga talaksan sang paggawi, kag pagsilot sa ila kon indi nila ini pagtumanon.” Bisan pa indi lamang ini ang ginabaton nga kahulugan, madamo nga mga tawo karon ang may negatibo nga paghangop tuhoy sa disiplina.

Apang, tuhay ang ginasiling sang Biblia tuhoy sa disiplina. “Ang disiplina ni Jehova, O anak ko, indi pagsikwaya,” sulat sang maalam nga si Hari Solomon. (Hulubaton 3:11) Ini nga mga pulong wala nagapatuhoy sa disiplina sa kabilugan, kundi sa “disiplina ni Jehova,” buot silingon, sa disiplina nga napasad sa mataas nga mga prinsipio sang Dios. Ini lamang nga disiplina ang nagabunga sing espirituwal nga mga benepisyo, kag kalahamut-an pa gani. Sa kabaliskaran, ang disiplina nga napasad sa panghunahuna sang tawo nga nagasumpakil sa mataas nga mga prinsipio ni Jehova masami nga abusado kag makahalalit. Amo ina ang rason kon ngaa madamo ang may negatibo nga panimuot sa disiplina.

Ngaa ginapalig-on kita nga batunon ang disiplina ni Jehova? Sa Kasulatan, ang pagdisiplina sang Dios ginalaragway subong isa ka pagpahayag sang gugma sang Dios sa iya tawhanon nga mga tinuga. Sa amo, si Solomon nagsiling pa: “Ang isa nga ginahigugma ni Jehova ginasabdong niya, subong sang ginahimo sang amay sa anak nga iya ginakahamut-an.”​—⁠Hulubaton 3:12.

Disiplina Ukon Silot​—⁠Diin sa Sini?

Ang disiplina nga ginapahayag sa Biblia may madamo nga aspekto​—⁠pagtuytoy, pagtudlo, paghanas, pagsabdong, pagtadlong, kag pagsilot pa gani. Apang, sa tagsa sini nga aspekto, ang disiplina ni Jehova ginapahulag sang gugma, kag tulumuron sini nga makabenepisyo ang nagabaton sini. Ang nagatadlong nga disiplina ni Jehova wala lamang gintuyo sa pagsilot.

Sa pihak nga bahin, ang mga buhat sang pagsilot sang Dios wala pirme gintuyo sa pagtadlong ukon sa pagtudlo sa nagabaton sini. Halimbawa, kutob sang adlaw nga nagpakasala si Adan kag si Eva, nag-antos sila sa mga resulta sang ila paglapas. Ginpagua sila ni Jehova gikan sa paraiso nga hardin sang Eden, kag nag-antos sila sa mga epekto sang di-kahimpitan, balatian, kag katigulangon. Pagligad sang ginatos ka tuig sang masakit nga pagluntad, nawala sila sing dayon. Sa pagkamatuod, ini tanan silot sang Dios, apang indi yadto nagatadlong nga disiplina. Bangod hungod sila nga naglapas kag wala maghinulsol, sanday Adan kag Eva indi na matadlong.

Ang iban pa nga mga rekord sang mga buhat sang pagsilot ni Jehova nagalakip sang Anaw sang panahon ni Noe, paglaglag sa Sodoma kag Gomorra, kag sang paglaglag sa mga hangaway sang Egipto sa Dagat nga Mapula. Ining mga ginhimo ni Jehova wala gintuyo sa pagtuytoy, pagtudlo, ukon paghanas sa mga nagbaton sini. Tuhoy sa sining mga buhat sang pagsilot sang Dios, si apostol Pedro nagsulat: “Wala sia magpugong sa pagsilot sa dumaan nga kalibutan, kundi gintipigan si Noe, isa ka manugbantala sang pagkamatarong, kaupod sang pito pa nga iban sang gin-anaw niya ang kalibutan sang di-diosnon nga mga tawo; kag paagi sa paghimo nga abo sa mga siudad sang Sodoma kag Gomorra ginpakamalaut niya sila, nga nagahatag sing sulundan para sa di-diosnon nga mga tawo tuhoy sa mga butang nga magaabot.”​—⁠2 Pedro 2:​5, 6.

Sa anong kahulugan nga ining mga buhat sang pagsilot “nagahatag sing sulundan para sa di-diosnon nga mga tawo tuhoy sa mga butang nga  magaabot”? Sa sulat ni Pablo sa mga taga-Tesalonica ginatudlo niya ang aton adlaw subong amo ang tion nga ang Dios, paagi sa iya Anak nga si Jesucristo, ‘magatimalos sa mga wala nagakilala sa Dios kag sa mga wala nagatuman sa maayong balita.’ Si Pablo nagsiling pa: “Ini gid sila magaantos sing silot nga walay katapusan nga kalaglagan.” (2 Tesalonica 1:​8, 9) Maathag nga ini nga silot wala gindesinyo sa pagtudlo ukon sa pagtadlong sa mga nagabaton sini. Apang, kon ginahingyo ni Jehova ang iya mga sumilimba nga batunon ang iya disiplina, wala niya ginapatuhuyan ang pagsilot sa di-mahinulsulon nga mga makasasala.

Talalupangdon nga ang Biblia wala lamang nagalaragway kay Jehova subong manugsilot. Sa baylo, pirme gid sia ginalaragway subong isa ka mahigugmaon nga manunudlo kag mapailubon nga manughanas. (Job 36:22; Salmo 71:17; Isaias 54:13) Huo, ang pagdisiplina sang Dios nga ginahatag subong isa ka pagtadlong pirme ginaupdan sang gugma kag pagpailob. Paagi sa paghangop sa katuyuan sang disiplina, mas mahapos batunon kag ihatag sang mga Cristiano ang disiplina upod ang nagakaigo nga panimuot.

Ang Disiplina sang Mahigugmaon nga mga Ginikanan

Sa sulod sang pamilya kag sa sulod sang Cristianong kongregasyon, kinahanglan nga mahangpan sang tanan ang katuyuan sang disiplina. Ilabi na nga matuod ini sa mga may awtoridad, subong sang mga ginikanan. Ang Hulubaton 13:24 nagasiling: “Ang isa nga nagapugong sang iya bilugon nagadumot sang iya anak, apang ang isa nga nagahigugma sa iya nagadisiplina sa iya.”

Paano ihatag sang mga ginikanan ang disiplina? Ang Biblia nagapaathag: “Kamo, mga amay, dili ninyo pagpaakiga ang inyo mga anak, kundi padayon sila nga padakua sa disiplina kag sa nagatadlong nga panghunahuna ni Jehova.” (Efeso 6:4) Ini nga laygay ginsulit paagi sa sining mga pulong: “Mga amay, dili ninyo pagpaakiga ang inyo mga anak, agod nga indi magluya ang ila buot.”​—⁠Colosas 3:21.

Ang Cristianong mga ginikanan nga nakahangop sang katuyuan sang disiplina indi manghikot sing mapintas. Ang prinsipio nga ginsiling sa 2 Timoteo 2:​24 maaplikar sa paagi sang pagdisiplina sang mga ginikanan. Si Pablo nagsulat: “Ang ulipon sang Ginuo indi dapat makig-away, kundi dapat mangin mainayuhon sa tanan, sangkol sa pagpanudlo.” Ang nagasilabo nga kaakig, nagapaninggit, kag nagapang-insulto ukon nagapakanubo nga mga pulong indi gid mahigugmaon nga disiplina kag indi nagakaigo sa Cristianong pagkabuhi.​—⁠Efeso 4:​31; Colosas 3:8.

Ang pagtadlong sang mga ginikanan wala lamang nagalakip sang silot nga kinahanglan ihatag gid kag sa gilayon. Ang kalabanan nga mga kabataan nagakinahanglan sing sulitsulit nga laygay antes nila tadlungon ang ila  panghunahuna. Sa amo, ang mga ginikanan dapat maghinguyang sing tion, magpailob, kag hunahunaon gid ang paagi sang paghatag nila sing disiplina. Dapat nila dumdumon nga ang mga kabataan dapat padakuon sa “disiplina kag sa nagatadlong nga panghunahuna ni Jehova.” Nagakahulugan ini sang paghanas nga nagalawig sing tinuig.

Ang Cristianong mga Manugbantay Nagadisiplina nga May Kalulo

Amo man sini nga mga prinsipio ang naaplikar sa Cristianong mga gulang. Subong mahigugmaon nga mga manugbantay, ginapanikasugan nila nga palig-unon ang panong paagi sa pagpanudlo, pagtuytoy, kag pagsabdong kon kinahanglanon. Sa paghimo sini, ginadumdom nila ang matuod nga katuyuan sang disiplina. (Efeso 4:​11, 12) Kon ginahatagan lamang nila sing igtalupangod ang paghatag sing silot, ginasilutan lamang nila ang nakasala kag wala na sing iban pa nga ginahimo. Ang pagdisiplina nga napasad sa mataas nga mga prinsipio sang Dios wala lamang nagadalahig sa sini. Ginapahulag sang gugma, ang mga gulang padayon nga nagapanikasog agod mabuligan ang nakasala. Bangod nagakabalaka gid sila, masami nga nagaiskedyul sila sing pila ka sesyon sang pagpalig-on kag paghanas.

Suno sa laygay nga mabasa sa 2 Timoteo 2:​25, 26, bisan nagapakig-angot sa mga indi handa nga magbaton sing disiplina, ang mga gulang dapat magtudlo “sing malulo.” Nian ginasiling sang teksto ang katuyuan sang disiplina: “Basi hatagan sila sang Dios sing paghinulsol nga nagadul-ong sa sibu nga ihibalo sa kamatuoran, kag maulian sila sa ila husto nga panimuot gikan sa siod sang Yawa.”

Kon kaisa, kinahanglan nga sikwayon gikan sa kongregasyon ang di-mahinulsulon nga nakahimo sing sala. (1 Timoteo 1:​18-​20) Bisan ini nga buhat dapat kabigon nga disiplina, indi lamang silot. Sa pulupanag-on, ginatinguhaan sang mga gulang nga duawon ang ginsikway nga mga indibiduwal nga wala na nagahimo sing sala. Sa tion sini nga mga pagduaw, ang mga gulang nagapanghikot suno sa matuod nga katuyuan sang disiplina paagi sa paghatag sing mga tikang nga kinahanglan himuon sang isa sa pagbalik sa Cristianong kongregasyon.

Si Jehova Amo ang Himpit nga Hukom

Ang mga ginikanan, Cristianong mga manugbantay, kag ang iban pa nga may awtoridad pasad sa Kasulatan sa paghatag sing disiplina dapat magtamod sa sining salabton sing serioso. Indi sila dapat maghaumhaum sa paghusgar sa iban subong indi na matadlong. Busa, ang ila pagdisiplina indi gid dapat matimaluson ukon mapintas nga silot.

Matuod, ginapatuhuyan sang Biblia si Jehova subong ang isa nga magahatag sing mabug-at kag katapusan nga silot. Sa katunayan, ang  Kasulatan nagasiling nga “isa ka makahaladlok nga butang nga mahulog sa mga kamot sang Dios nga buhi.” (Hebreo 10:31) Apang wala sang tawo nga magtinguha nga ipaanggid ang iya kaugalingon kay Jehova sa sini ukon sa bisan ano nga bahin. Kag wala sang isa nga may rason sa pagbatyag nga makahaladlok nga butang ang mahulog sa mga kamot sang isa ka ginikanan ukon sang isa ka gulang sa kongregasyon.

Si Jehova may ikasarang sa pagbalanse sang mga butang kon nagahatag sing disiplina. Ang mga tawo wala. Mabasa sang Dios ang tagipusuon kag mapat-od niya kon ang isa indi na gid matadlong kag sa amo magabaton sang pat-od kag katapusan nga silot. Ang mga tawo, sa pihak nga bahin, wala sing ikasarang sa paghatag sini nga paghukom. Bangod sini, kon kinahanglan ang pagdisiplina, ang may awtoridad sa sini dapat maghimo sini pirme sa tuyo nga magtadlong.

Pagbaton sa Disiplina ni Jehova

Kinahanglan naton tanan ang disiplina ni Jehova. (Hulubaton 8:33) Sa katunayan, dapat naton handumon ang disiplina nga napasad sa Pulong sang Dios. Samtang ginatun-an naton ang Pulong sang Dios, mabaton naton ang disiplina nga direkta nga nagahalin kay Jehova paagi sa Kasulatan. (2 Timoteo 3:​16, 17) Apang, kon kaisa nagabaton kita sing disiplina gikan sa mga masigka-Cristiano. Ang paghangop sa matuod nga katuyuan sini nga disiplina magabulig sa aton nga batunon ini sing kinabubut-on.

Si apostol Pablo nagbaton: “Matuod, wala sing disiplina ang daw makalilipay sa karon, kundi masakit.” Nian nagsiling pa sia: “Apang pagkatapos sa mga nahanas sa sini nagapatubas ini sing mahidaiton nga bunga, nga amo, ang pagkamatarong.” (Hebreo 12:11) Ang disiplina ni Jehova isa ka pagpakita sang iya tudok nga gugma sa aton. Nagabaton man kita ukon nagahatag sing disiplina, dumdumon naton ang katuyuan sang disiplina nga napasad sa mataas nga mga prinsipio sang Dios kag pamatian ang maalamon nga laygay sang Biblia: “Kapti sing malig-on ang disiplina; dili ini pagbuy-i. Amligi ini, kay ini mismo ang imo kabuhi.”​—⁠Hulubaton 4:13.

[Mga retrato sa pahina 21]

Ang di-mahinulsulon nga mga makasasala nagabaton sang silot sang Dios, indi sang iya nagatadlong nga disiplina

[Mga retrato sa pahina 22]

Ginapahulag sang gugma, ang mga gulang nagahinguyang sing tion sa pagpanalawsaw kag sa pagbulig sa mga nakahimo sing sala

[Mga retrato sa pahina 23]

Ang mga ginikanan mapailubon kag mahigugmaon nga nagahatag sing ‘disiplina kag nagatadlong nga panghunahuna ni Jehova’