Ano ang Ginapaabot ni Jehova sa Aton?

“Ano bala ang ginapatuman ni Jehova sa imo kundi ang paghimo sing katarungan kag ang paghigugma sa kaayo kag ang paglakat sing maugdang upod sa imo Dios?”​​—⁠MIQUEAS 6:8.

1, 2. Ngaa ang pila sang mga alagad ni Jehova naluyahan sing buot, apang ano ang makabulig sa ila?

SI Vera isa ka matutom nga Cristiano nga mga 75 anyos ang edad kag mapigaw sing panglawason. “Kon kaisa,” siling niya, “nagapamintana ako kag makita ko ang akon Cristianong mga kauturan nga nagabantala sa mga pamalay. Nagahibi ako bangod luyag ko nga mag-upod sa ila, apang ginalimitehan sang balatian ang akon pag-alagad kay Jehova.”

2 Nakabatyag ka na bala sing subong sini? Sa pagkamatuod, ang tanan nga nagahigugma kay Jehova luyag maglakat sa iya ngalan kag tumanon ang iya mga ginapatuman. Apang ano kon nagapigaw ang aton panglawas, tigulang na, ukon may mga responsabilidad sa pamilya? Mahimo nga maluyahan kita sing buot bangod ini nga mga kahimtangan nagaupang sa aton sa paghimo sang aton luyag sa pag-alagad sa Dios. Kon amo sini ang aton kahimtangan, ang pagbinagbinag sa Miqueas kapitulo 6 kag 7 mahimo gid nga makapalig-on. Ginapakita sini nga mga kapitulo nga ang mga ginapatuman ni Jehova rasonable kag sarang malab-ot.

Kon Paano Ginapakig-angutan sang Dios ang Iya Katawhan

3. Paano ginpakig-angutan ni Jehova ang rebelyuso nga mga Israelinhon?

3 Tan-awon naton anay ang Miqueas 6:​3-5 kag talupangda kon paano ginapakig-angutan ni Jehova ang iya katawhan. Dumduma nga sang panahon ni Miqueas ang mga Israelinhon rebelyuso. Walay sapayan sini, maawaon nga ginsilingan sila ni Jehova paagi sining mga pulong, “O akon katawhan.” Nakitluoy sia: “O akon katawhan, dumduma, palihug.” Sa baylo nga suknaan sila ni Jehova, gintinguhaan niya nga lab-uton ang ila tagipusuon paagi sa pagpamangkot, “Ano bala ang akon nahimo sa inyo?” Ginpalig-on pa gani Niya sila nga “magpamatuod batok” sa iya.

4. Ano dapat ang epekto sa aton sang halimbawa sang Dios sa kaawa?

4 Daw ano nga halimbawa ang ginpahamtang sang Dios sa aton tanan! Maawaon nga gintawag niya bisan ang rebelyuso nga katawhan sang Israel kag Juda sang panahon ni Miqueas nga “akon katawhan” kag nagasiling sing “palihug” sa ila. Kon amo, dapat gid kita magpakita sing kaawa kag kaayo sa aton mga pagpakig-angot sa mga katapo  sang kongregasyon. Ibutang ta, ang iban mahimo nga indi mahapos pakig-updan, ukon mahimo nga maluya sila sa espirituwal. Apang, kon ginahigugma nila si Jehova, dapat naton sila buligan kag pakitaan sing kaawa.

5. Ano ang panguna nga punto sang Miqueas 6:​6, 7?

5 Masunod, tan-awon naton ang Miqueas 6:​6, 7. Nagpautwas si Miqueas sing mga pamangkot, nga nagasiling: “Ano ang iatubang ko kay Jehova? Ano ang dalhon ko sa akon pagyaub sa Dios sa kahitaasan? Magaatubang bala ako sa iya nga may mga halad nga sinunog, nga may mga tinday nga isa ka tuig ang kagulangon? Mahamuot bala si Jehova sa linibo ka karnero nga lalaki, sa tignapulo ka libo nga mga suba sang lana? Ihatag ko bala ang akon panganay nga anak nga lalaki tungod sa akon paglalis, ang bunga sang akon tiyan tungod sa sala sang akon kalag?” Indi, indi gid mapahamut-an si Jehova paagi “sa linibo ka karnero nga lalaki, sa tignapulo ka libo nga mga suba sang lana.” Apang may butang nga makapahamuot sa iya. Ano ini?

Dapat Kita Maghimo sing Katarungan

6. Ano ang tatlo ka ginapatuman sang Dios nga makita sa Miqueas 6:8?

6 Sa Miqueas 6:​8, matun-an naton ang ginapaabot ni Jehova sa aton. Si Miqueas namangkot: “Ano bala ang ginapatuman ni Jehova sa imo kundi ang paghimo sing katarungan kag ang paghigugma sa kaayo kag ang paglakat sing maugdang upod sa imo Dios?” Ining tatlo ka ginapatuman nagadalahig sang aton ginabatyag, ginahunahuna, kag ginabuhat. Dapat magbatyag kita sing huyog nga ipakita ini nga mga kinaiya, maghunahuna kon paano ini ipakita, kag manghikot sa pagpakita sini. Binagbinagon naton sing isa-isa ining tatlo ka ginapatuman.

7, 8. (a) Ano ang kahulugan sang “paghimo sing katarungan”? (b) Anong walay katarungan nga mga buhat ang lapnag sang adlaw ni Miqueas?

7 “Ang paghimo sing katarungan” nagakahulugan nga maghimo sing matarong. Ang paagi sang Dios sa paghimo sa mga butang amo ang talaksan sang katarungan. Apang, ang mga kadungan ni Miqueas naghimo indi sing katarungan kundi sing walay katarungan. Sa ano nga mga paagi? Binagbinaga ang Miqueas 6:⁠10. Sa katapusan sining bersikulo, ginalaragway ang mga negosyante nga nagagamit sing “kulang nga sulukban sang epa,” isa nga tuman ka gamay. Nagasiling pa ang bersikulo 11 nga nagagamit sila sing “may daya nga pabug-at nga mga bato.” Kag suno sa bersikulo 12, “malimbungon ang ila dila.” Sa amo, ang madaya nga mga sulukban, madaya nga mga timbangan, kag pagbinutig lapnag sa patag sang negosyo sang adlaw ni Miqueas.

8 Indi lamang makita sa tiendahan ang di-matarong nga mga buhat. Kinaandan man ini sa hukmanan. Ginapakita sang Miqueas 7:3 nga ang “prinsipe may ginapangayo, kag ang isa nga nagahukom nagahimo sini tungod sa balos.” Ginahamhaman ang mga hukom agod ipadapat nila ang di-makatarunganon nga mga pamatbat sa inosente nga mga tawo. “Ang isa nga daku,” ukon ang impluwensiado nga banwahanon, nagapakigbahin sa mga krimen. Sa katunayan, si Miqueas nagsiling nga ang prinsipe, ang hukom, kag ang isa nga daku ‘nagatalaud,’ ukon nagapahituhog, sang ila malaut nga mga buhat.

9. Paano naapektuhan ang Juda kag Israel sang walay katarungan nga mga buhat sang mga malauton?

9 Ang walay katarungan nga mga buhat sang malaut nga mga lider nag-apektar sa bug-os nga Juda kag Israel. Ang Miqueas 7:5 nagasiling nga ang kakulang sang katarungan nagdul-ong sa kakulang sang pagsalig sa ulot sang mga magkaupod, suod nga mga abyan, kag bisan gani sang mga magtiayon. Ginapakita sang bersikulo 6 nga nagdul-ong ini sa isa ka kahimtangan nga ang mga himata nga subong kasuod sang mga anak nga lalaki kag mga amay, mga anak nga babayi kag mga iloy, nagatamay sa isa kag isa.

10. Sa walay katarungan nga kahimtangan karon, paano nagagawi ang mga Cristiano?

10 Kamusta naman karon? Indi bala naton makita ang kaanggid nga mga kahimtangan? Kaangay ni Miqueas, napalibutan kita sing kakulang sang katarungan, sing walay pagsalig nga kahimtangan, kag sing pagkalusod sang katilingban kag pamilya. Apang, subong mga alagad sang Dios sa tunga sining di-matarong nga kalibutan, wala naton ginatugutan nga makasulod sa Cristianong kongregasyon ang espiritu sang di-makatarunganon nga pagpakig-angot sining kalibutan. Sa baylo, ginasakdag naton ang mga prinsipio sang pagkabunayag kag integridad, kag ginapadayag ini sa aton matag-adlaw nga mga hilikuton. Sa pagkamatuod, ‘nagagawi kita sing bunayag sa tanan nga butang.’ (Hebreo 13:18) Wala ka bala nagaugyon nga paagi sa paghimo sing katarungan naagom naton ang bugana nga mga pagpakamaayo nga resulta sang isa ka paghiliutod nga nagapakita sing matuod nga pagsalig?

 Paano Mabatian sang mga Tawo “ang Tingog Mismo ni Jehova”?

11. Paano nagakatuman ang Miqueas 7:12?

11 Nagtagna si Miqueas nga walay sapayan sang di-makatarunganon nga mga kahimtangan, ang hustisya maagom sang tanan nga sahi sang tawo. Gintagna sang propeta nga ang mga tawo tipunon “gikan sa dagat pa dagat, kag gikan sa bukid pa bukid” agod mangin mga sumilimba ni Jehova. (Miqueas 7:12) Sa karon, sa katapusan nga katumanan sini nga tagna, indi lamang isa ka pungsod ang nagabenepisyo sa wala sing pinilian nga hustisya sang Dios, kundi ang mga indibiduwal sang tanan nga pungsod. (Isaias 42:1) Paano?

12. Paano ang “tingog mismo ni Jehova” mabatian karon?

12 Bilang sabat, binagbinaga ang una nga mga pinamulong ni Miqueas. Ang Miqueas 6:9 nagasiling: “Sa siudad ang tingog mismo ni Jehova nagapanawag, kag ang tawo nga may praktikal nga kaalam magakahadlok sa imo ngalan.” Paano ang mga tawo sang tanan nga pungsod makabati sa “tingog mismo ni Jehova,” kag paano ini naangot sa paghimo naton sing katarungan? Sa pagkamatuod, indi mabatian sing literal sang mga tawo karon ang tingog sang Dios. Apang, paagi sa aton bug-os kalibutan nga pagbantala nga hilikuton mabatian sang mga indibiduwal gikan sa tanan nga rasa kag kahimtangan sang kabuhi ang tingog ni Jehova. Subong resulta, ang mga nagapamati ‘nagakahadlok sa ngalan sang Dios,’ kag may masimbahon nga pagtahod sa sini. Nagapanghikot gid kita sing makatarunganon kag mahigugmaon paagi sa pag-alagad subong makugi nga mga manugbantala sang Ginharian. Paagi sa pagpakilala sang ngalan sang Dios sa tanan nga wala sing pinilian, ‘nagahimo kita sing katarungan.’

 Dapat Naton Higugmaon ang Kaayo

13. Ano ang kinatuhayan sa ulot sang mahigugmaon nga kaayo kag gugma?

13 Masunod, binagbinagon naton ang ikaduha nga ginapatuman nga ginsambit sa Miqueas 6:8. Ginapaabot ni Jehova sa aton nga ‘higugmaon ang kaayo.’ Ang Hebreo nga tinaga nga ginbadbad “kaayo” ginbadbad man nga “mahigugmaon nga kaayo,” ukon “mainunungon nga gugma.” Ang mahigugmaon nga kaayo isa ka aktibo nga pagtamod sa iban, isa ka maawaon nga pagkabalaka sa ila. Ang mahigugmaon nga kaayo tuhay sa kinaiya nga gugma. Ngaa? Ang gugma isa ka masangkad nga termino, nga maaplikar bisan sa mga butang kag mga ideya. Halimbawa, ang Kasulatan nagahambal tuhoy sa isa ka tawo nga “nagahigugma sang alak kag lana” kag subong man tuhoy sa tawo nga “nagahigugma sang kaalam.” (Hulubaton 21:17; 29:3) Sa pihak nga bahin, ang mahigugmaon nga kaayo nagadalahig pirme sa mga tawo, ilabi na ang mga nagaalagad sa Dios. Busa, ang Miqueas 7:20 nagasiling tuhoy sa “mahigugmaon nga kaayo nga ginhatag kay Abraham”​​—⁠isa ka tawo nga nag-alagad kay Jehova nga Dios.

14, 15. Paano ginapakita ang mahigugmaon nga kaayo, kag ano ang ginsambit nga pamatuod sini?

14 Suno sa Miqueas 7:​18, ang manalagna nagsiling nga ang Dios ‘nagakahamuot sa mahigugmaon nga kaayo.’ Sa Miqueas 6:​8, ginsilingan kita nga indi lamang magpakita sing mahigugmaon nga kaayo kundi higugmaon ini nga kinaiya. Ano ang matun-an naton sa sini nga mga kasulatan? Ang mahigugmaon nga kaayo ginapakita sing kinabubut-on bangod luyag naton nga ipakita ini. Kaangay ni Jehova, nalipay kita sa pagpakita sing mahigugmaon nga kaayo sa mga nagakinahanglan.

15 Sa karon, ining mahigugmaon nga kaayo isa ka tanda sang katawhan sang Dios. Binagbinaga ang isa lang ka halimbawa. Sang Hunyo 2001, bangod sang bagyo nagbaha sa Texas, E.⁠U.⁠A., nga nagguba sang linibo ka puluy-an, pati na ang ginatos ka puluy-an sang mga Saksi ni Jehova. Agod buligan ang ila Cristianong mga kauturan nga nagakinahanglan, mga 10,000 ka Saksi ang kinabubut-on kag wala-bayad nga naghinguyang sang ila tion kag kusog. Sa sulod sang kapin sa tunga sa tuig, ang mga boluntaryo nagpangabudlay sing maukod, nga nagahinguyang sang ila mga adlaw, gab-i, kag mga talipuspusan sang semana sa pagpatindog sing 8 ka Kingdom Hall kag kapin sa 700 ka puluy-an para sa ila Cristianong mga kauturan. Ang mga indi makahimo sini nga trabaho naghatag sing pagkaon, mga kinahanglanon nga butang, kag kuarta. Ngaa ginbuligan sining linibo ka Saksi ang ila mga kauturan? Bangod ‘ginahigugma nila ang kaayo.’ Kag makalilipay gid mahibaluan nga ining mga buhat sang mahigugmaon nga kaayo ginapakita sang aton mga kauturan sa bug-os nga kalibutan! Huo, ang paghimo sa ginapatuman nga ‘higugmaon ang kaayo’ indi isa ka lulan, kundi isa ka kalipay!

Mangin Maugdang sa Paglakat Upod sa Dios

16. Ano nga ilustrasyon ang nagabulig sa pagpadaku sa kinahanglanon nga mangin maugdang sa paglakat upod sa Dios?

16 Ang ikatlo nga ginapatuman nga narekord sa Miqueas 6:8 amo ang “paglakat sing maugdang upod sa imo Dios.” Nagakahulugan ini nga dapat naton kilalahon ang aton mga limitasyon kag magsandig sa Dios. Sa pag-ilustrar: Panan-awa sing makadali ang isa ka bata nga babayi nga nagauyat sing hugot sa kamot sang iya amay samtang nagasulay sila sa bagyo. Nahibaluan gid sang bata nga ang iya kusog limitado, apang nagasalig sia sa iya amay. Dapat hibaluon man naton ang aton mga limitasyon kag magsalig sa aton langitnon nga Amay. Paano naton mahuptan ini nga pagsalig? Ang isa ka paagi amo ang pagdumdom pirme kon ngaa maalamon ang magpabilin nga suod sa Dios. Ginapahanumdom ni Miqueas sa aton ang tatlo ka rason: Si Jehova amo ang aton Manluluwas, ang aton Manugtuytoy, kag ang aton Manug-amlig.

17. Paano ginluwas, gintuytuyan, kag gin-amligan ni Jehova ang iya katawhan sang dumaan nga panahon?

17 Suno sa Miqueas 6:​4, 5, ang Dios nagsiling: “Ginpagua ko ikaw gikan sa duta sang Egipto.” Huo, si Jehova ang Manluluwas sang Israel. Nagsiling pa si Jehova: “Ginpadala ko sa imo sanday Moises, Aaron kag Miriam.” Gingamit si Moises kag si Aaron sa pagtuytoy sa pungsod, kag ginpangunahan ni Miriam ang mga babayi sang Israel sa isa ka saot para sa kadalag-an. (Exodo 7:​1, 2; 15:​1, 19-21; Deuteronomio 34:10) Naghatag si Jehova sing panuytoy paagi sa iya mga alagad. Sa bersikulo 5, ginpahanumdom ni Jehova ang pungsod sang Israel nga gin-amligan niya sila batok kay Balak kag kay Balaam kag nga gin-amligan niya ang mga Israelinhon sa katapusan nga bahin sang ila pagpanglakatan halin sa Sitim sa Moab pakadto sa Gilgal sa Ginsaad nga Duta.

18. Paano nagapanghikot ang Dios subong aton Manluluwas, Manugtuytoy, kag Manug-amlig karon?

18 Samtang nagalakat kita upod sa Dios, ginaluwas niya kita gikan sa kalibutan ni Satanas, ginatuytuyan kita paagi sa iya Pulong kag sa iya organisasyon, kag ginaamligan kita subong isa ka grupo kon ginasalakay kita sang mga manugpamatok. Sa amo, may nagakaigo kita nga rason nga mag-uyat sing hugot sa kamot sang aton langitnon nga Amay samtang nagalakat kita kaupod niya sa magamo nga katapusan nga bahin sang aton pagpanglakaton pakadto sa labaw pa sa dumaan nga Ginsaad nga Duta​​—⁠ang matarong nga bag-ong kalibutan sang Dios.

19. Sa ano nga paagi naangot ang kaugdang sa aton mga limitasyon?

19 Ang paglakat sing maugdang upod sa Dios nagabulig sa aton nga mangin realistiko sa pagtamod sa aton mga kahimtangan. Ini bangod ang pagpakita sing kaugdang nagalakip sang paghibalo sa aton mga limitasyon. Ang katigulangon ukon mapigaw nga panglawas nagalimite sang aton sarang mahimo sa pag-alagad kay Jehova. Apang, sa baylo nga maluyahan kita sing buot, dapat dumdumon naton nga ginabaton ni Jehova ang aton mga panikasog kag mga sakripisyo ‘suno sa yara sa aton, indi suno sa wala sa aton.’ (2 Corinto 8:12) Sa pagkamatuod, ginapaabot ni Jehova nga alagaron naton sia sing bug-os kalag, nga nagahimo sang kon ano ang ginatugot sang aton mga kahimtangan. (Colosas 3:23) Kon ginahimo naton sing hanuot kag  makugi ang tanan naton nga masarangan sa pag-alagad sa iya, pakamaayuhon kita sing bugana sang Dios.​​—⁠Hulubaton 10:22.

Ang Nagahulat nga Panimuot Nagahatag sing mga Pagpakamaayo

20. Ang paghibalo tuhoy sa ano nga mabuligan kita nga magpakita sing nagahulat nga panimuot kaangay ni Miqueas?

20 Ang pag-agom sing mga pagpakamaayo ni Jehova nagapahulag sa aton nga ilugon ang panimuot ni Miqueas. Sia nagsiling: “Magapakita ako sing nagahulat nga panimuot sa Dios sang akon kaluwasan.” (Miqueas 7:7) Paano ining mga pinamulong naangot sa paglakat naton sing maugdang upod sa Dios? Ang pagpakita sing nagahulat nga panimuot, ukon pagpailob, nagabulig sa aton nga indi magbatyag sing kabang-awan bangod ang adlaw ni Jehova wala pa mag-abot. (Hulubaton 13:12) Sing tampad, ginahandum naton tanan ang katapusan sining malaut nga kalibutan. Apang, kada semana linibo ka tawo ang nagasugod pa lang sa paglakat upod sa Dios. Ang paghibalo sini nagahatag sa aton sing rason nga magpakita sing nagahulat nga panimuot. Ang isa ka madugay na nga Saksi nagsiling may kaangtanan sa sini: “Sa paghinumdom ko sang kapin sa 55 ka tuig sa pagbantala nga hilikuton, kumbinsido gid ako nga wala sing nadula sa akon sa paghulat kay Jehova. Sa kabaliskaran, nalikawan ko pa ang madamo nga masakit nga eksperiensia.” Natabo man bala ini sa imo?

21, 22. Paano nagakatuman karon ang Miqueas 7:14?

21 Ang paglakat upod kay Jehova nagahatag gid sa aton sing benepisyo. Subong sang mabasa naton sa Miqueas 7:​14, ginapaanggid ni Miqueas ang katawhan sang Dios sa mga karnero nga nagapuyo sing malig-on upod sa ila manugbantay. Sa daku nga katumanan sini nga tagna karon, ang nagkalabilin sang espirituwal nga Israel kag subong man ang “iban nga mga karnero” nakasapo sing kalig-unan sa ila masaligan nga Manugbantay, si Jehova. Nagapuyo sila nga “silahanon lang sa kagulangan​​—⁠sa tunga sang isa ka katamnan,” nga napain sa espirituwal gikan sa sining kalibutan nga labi pa nga nagagamo kag makatalagam.​​—⁠Juan 10:16; Deuteronomio 33:28; Jeremias 49:31; Galacia 6:16.

22 Ang katawhan ni Jehova may kabuganaan man, subong sang gintagna sang Miqueas 7:14. Nagahambal tuhoy sa mga karnero, ukon katawhan, sang Dios, si Miqueas nagsiling: “Pakan-a sila sa Basan kag sa Gilead.” Subong nga ang mga karnero sa Basan kag sa Gilead nagahalab sing matambok nga mga halalbon kag nagatambok, naagom man sang katawhan sang Dios karon ang espirituwal nga kabuganaan​​—⁠nga isa pa ka pagpakamaayo sa mga nagalakat sing maugdang upod sa Dios.​​—⁠Numeros 32:⁠1; Deuteronomio 32:14.

23. Ano nga leksion ang matun-an naton gikan sa pagbinagbinag sa Miqueas 7:​18, 19?

23 Sa Miqueas 7:​18, 19, ginpadaku sang manalagna ang handum ni Jehova nga patawaron ang mga nagahinulsol. Ang bersikulo 18 nagasiling nga si Jehova “nagapatawad sang kasaypanan” kag “nagapaligad sang paglapas.” Suno sa bersikulo 19, ‘itagbong niya sa kadadalman sang dagat ang tanan nila nga sala.’ Anong isa ka leksion ang makuha naton sa sini? Mahimo naton pamangkuton ang aton kaugalingon kon bala ginailog naton si Jehova sa sini nga bahin. Ginapatawad bala naton ang mga nakasala sa aton? Kon mahinulsulon sila kag nagatinguha nga magpangayo sing pasaylo, dapat gid naton ipabanaag ang kahanda ni Jehova sa pagpatawad sing bug-os kag sing dayon.

24. Paano ka nakabenepisyo gikan sa tagna ni Miqueas?

24 Paano kita nakabenepisyo gikan sa pagbinagbinag sang tagna ni Miqueas? Ginpahanumdom kita sini nga si Jehova nagahatag sing matuod nga paglaum sa mga nagapalapit sa iya. (Miqueas 2:1-13) Ginapalig-on kita sini nga himuon naton ang tanan nga posible sa pagpauswag sang matuod nga pagsimba agod makalakat kita sa ngalan sang Dios sing dayon. (Miqueas 4:1-4) Kag ginapasalig kita nga bisan ano man ang aton mga kahimtangan, sarang naton mahimo ang mga ginapatuman ni Jehova. Huo, ang tagna ni Miqueas nagapabakod gid sa aton nga maglakat sa ngalan ni Jehova.

Paano Mo Sabton?

• Suno sa Miqueas 6:​8, ano ang ginapatuman ni Jehova sa aton?

• Ano ang kinahanglan sa ‘paghimo naton sing katarungan’?

• Paano naton mapakita nga ‘ginahigugma naton ang kaayo’?

• Ano ang nadalahig sa ‘paglakat sing maugdang upod sa Dios’?

[Mga Pamangkot sa Pagtinuon]

[Mga retrato sa pahina 21]

Walay sapayan sang malaut nga kahimtangan sang adlaw niya, natuman ni Miqueas ang mga ginapatuman ni Jehova. Gani ikaw man

 [Retrato sa pahina 23]

Himua ang katarungan paagi sa pagpanaksi sa tanan nga sahi sang tawo

[Retrato sa pahina 23]

Ipakita nga ginahigugma mo ang kaayo paagi sa paghatag sing mga kinahanglanon sang iban

[Retrato sa pahina 23]

Himua ang imo masarangan samtang maugdang nga ginakilala ang imo mga limitasyon