Sugilanon sang Kabuhi

Malipayon ang Isa nga ang Iya Dios Amo si Jehova

PANUGIRON NI TOM DIDUR

Ang pangkomunidad nga tinukod naarkilahan na. Mga 300 ang ginpaabot nga magatambong sa asambleya sa Porcupine Plain, Saskatchewan, Canada. Sang Mierkoles nag-ulan sing niebe, kag sang Biernes mabaskog kaayo ang hangin nga may dala nga niebe kag halos puti na lang ang imo makita. Ang temperatura nagnubo sing minus 40 degrees Celsius. Beinte-otso ang nagtambong, pati na ang pila ka kabataan. Amo ini ang akon una nga asambleya subong bag-o nga manugtatap sang sirkito, kag 25-anyos lamang ako. Antes ko isugid sa inyo ang natabo, pasugira anay ako kon paano ko natigayon ining pinasahi nga pribilehiyo sa pag-alagad.

IKAPITO ako sa walo ka kabataan, nga lalaki tanan. Ang subang amo si Bill, nga ginsundan ni Metro, ni John, ni Fred, ni Mike, kag ni Alex. Natawo ako sang 1925, kag si Wally ang kinagot. Nagapuyo kami malapit sa banwa sang Ukraina, Manitoba, diin may magamay nga uma ang amon mga ginikanan, nga sanday Michael kag Anna Didur. Nagtrabaho si Tatay sa riles bilang nagamentinar sang isa ka partikular nga kalabaon sang riles. Sanglit ang isa ka payag sa naligwin nga riles indi nagakaigo para sa daku nga pamilya, nag-istar kami sa uma. Pirme wala si Tatay sa balay, gani si Nanay ang nagpadaku sa amon. Sa pulupanag-on nagakadto sia kay Tatay sa sulod sang isa ka semana ukon kapin pa, apang ginpat-od niya nga makahibalo kami magluto sing kalan-on ukon tinapay, kag makahibalo sing mga ulubrahon sa balay. Kag sanglit mga katapo kami sang  Griegong Katoliko nga Iglesia, bahin sang paghanas sa amon ni Nanay sang bata pa kami ang pagsaulo sa mga pangadi kag pagpakigbahin sa iban pa nga mga rito.

Pagkabati sa Kamatuoran sang Biblia

Napukaw ang akon handum nga mahangpan ang Biblia sang bataon pa ako. Ang amon kaingod nga isa sang mga Saksi ni Jehova, regular nga nagaduaw sa amon pamilya agod magbasa sing mga bahin sang Biblia nahanungod sa Ginharian sang Dios, Armagedon, kag sa mga pagpakamaayo sang bag-ong kalibutan. Indi interesado si Nanay sa iya ginasiling, apang nagganyat kay Mike kag kay Alex ang mensahe. Sa katunayan, ginpahulag sila sang ila natun-an nga pangindian ang pag-alagad sa militar bangod sang ila konsiensia sadtong ikaduha nga bug-os kalibutan nga inaway. Bangod sini, ginpamatbatan si Mike nga mapriso sa malip-ot nga tion, samtang si Alex ginpadala sa kampo sang pilit nga pagpangabudlay sa Ontario. Sang ulihi, ginbaton man ni Fred kag ni Wally ang kamatuoran. Apang, ang akon tatlo ka magulang wala magbaton sini. Sa sulod sang pila ka tuig, nagpamatok pa gani si Nanay sa kamatuoran apang sang ulihi nakibot kami tanan sang nanindugan sia dampig kay Jehova. Ginbawtismuhan sia sa edad nga 83. Napatay si Nanay sa edad nga 96. Ginbaton man ni Tatay ang kamatuoran antes sia mapatay.

Sa edad nga 17, nagkadto ako sa Winnipeg agod mangita sing obra kag makig-upod sa mga makabulig sa akon sa pagtuon sa Biblia. Ginadumilian ang mga Saksi ni Jehova sadto nga tion, apang tayuyon nga ginahiwat ang mga miting. Ang una nga miting nga gintambungan ko ginhiwat sa pribado nga puluy-an. Sanglit ginpadaku ako sa Griegong Katoliko nga pagtuluuhan, ang mga nabatian ko sang primero daw makatilingala. Apang, amat-amat ko nga nahangpan kon ngaa ang klero-lego nga kahimusan indi suno sa Kasulatan kag kon ngaa wala ginakahamut-an sang Dios ang pagbendisyon sang klero sa mga panikasog sa inaway. (Isaias 2:⁠4; Mateo 23:​8-​10; Roma 12:​17, 18) Ang pagkabuhi sa Paraiso sa duta daw mas praktikal kag makatarunganon sangsa magkadto sa malayo nga duog sa walay katubtuban.

Bangod kumbinsido ako nga amo ini ang kamatuoran, nagdedikar ako kay Jehova kag nagpabawtismo sang 1942 sa Winnipeg. Sang 1943 ginkuha ang pagdumili sa mga Saksi ni Jehova sa Canada, kag nag-uswag ang pagbantala nga hilikuton. Nagtudok man sa akon tagipusuon ang kamatuoran sang Biblia. Nangin alagad ako sa kongregasyon kag may pribilehiyo man nga makigbahin sa mga kampanya para sa pamulongpulong publiko kag manghikot sa wala matangdo nga teritoryo. Ang pagtambong sa dalagku nga mga kombension sa Estados Unidos nakabulig gid sing daku sa akon pag-uswag sa espirituwal.

Pagpasangkad sang Akon Pag-alagad kay Jehova

Sang 1950, nagpalista ako bilang payunir nga ministro, kag sang Disiembre sadto nga tuig, gin-agda ako nga mag-alagad subong manugtatap sang sirkito. Ginhanas ako malapit sa Toronto ni Charlie Hepworth, isa ka eksperiensiado kag matutom nga utod. Nalipay man ako nga ang katapusan nga semana sang akon paghanas ginhinguyang upod sa akon utod nga si Alex, nga isa na ka manugtatap sang sirkito sadto sa Winnipeg.

Indi ko gid malipatan ang akon una nga sirkito nga asambleya nga ginlaragway sa pamuno. Natural lang nga mahangawa ako sa resulta. Bueno, ginhuptan kami nga masako kag malipayon sang amon manugtatap sang distrito, nga si Utod Jack Nathan. Ginsumaryo namon ang programa sang asambleya upod sa presente nga mga may bahin. Nagbulosbulos kami sa pagsaysay sing mga eksperiensia, pag-ensayo sa pamalaybalay nga mga presentasyon kag pagbalik-duaw, kag pagpasundayag kon paano dumalahan ang mga pagtuon sa Biblia sa puluy-an. Nag-amba kami sing mga ambahanon sang Ginharian. Madamo sing pagkaon. Nagpangape kami kag nagkaon sing empanada halos kada duha ka oras. Ang iban nagtulog sa mga bangko kag sa plataporma, samtang ang iban naman nagtulog sa salog. Sang Domingo medyo nagkanay ang bagyo amo nga 96 ang  nagtambong sa pamulongpulong publiko. Ini nga eksperiensia nagtudlo sa akon kon paano malandas ang mabudlay nga mga kahimtangan.

Ang akon masunod nga asaynment sa sirkito amo ang naaminhan nga Alberta, British Columbia, kag ang Yukon Territory, ang lugar nga may adlaw sa tungang-gab-i. Ang paglakbay sa kudolkudol nga Alaska Highway halin sa Dawson Creek, British Columbia, pakadto sa Whitehorse, Yukon (1,477 kilometros nga distansia), kag ang pagpanaksi sa dalanon nagakinahanglan sing pagbatas kag paghalong. Ang pagdalhay sang niebe, madanlog nga kilid sang kabukiran, kag indi maathag nga panan-aw bangod sang nagatupa nga niebe isa gid ka hangkat.

Nakibot ako nga makita kon paano ang kamatuoran naglab-ot sa Malayo nga Aminhan. Isa ka bes, ginduaw namon ni Walter Lewkowicz ang simple kag magamay nga payag malapit sa Lower Post, British Columbia, sa higad sang Alaska Highway malapit sa dulunan sang Yukon Territory. Nahibaluan namon nga may nagaistar sa payag bangod nakita namon ang nagaigpat nga suga sa magamay nga bintana. Mga alas nuebe sadto sang gab-i, kag nanuktok kami sa puertahan. May nagsinggit nga lalaki nga nagapasulod sa amon, gani nagsulod kami. Nakibot kami nga makita ang isa ka tigulang nga lalaki nga nagauntayan sa iya katre kag nagabasa sing Lalantawan nga magasin! Sa katunayan mas bag-o pa nga gua sang magasin ang yara sa iya sangsa ginatanyag namon. Ginpaathag niya nga ginabaton niya ang iya sulat paagi sa airmail. Sanglit kapin na sa walo ka adlaw nga wala kami sa kongregasyon, wala pa kami sang pinakabag-o nga mga magasin. Nagpakilala ang lalaki nga sia si Fred Berg, kag bisan nagabaton sia sing suskripsion sa sulod na sang pila ka tuig, una ini nga higayon nga ginduaw sia sang mga Saksi ni Jehova. Ginhingyo kami ni Fred nga magpaligad sing gab-i sa iya payag. Madamo kami sing napaambit sa iya nga mga kamatuoran gikan sa Kasulatan kag naghimo kami sing kahimusan nga duawon sia sang iban nga mga Saksi nga regular nga nagaagi sa iya lugar.

Sa sulod sang pila ka tuig nag-alagad ako sa tatlo ka magamay nga mga sirkito. Halin ini sa Grande Prairie, Alberta, sa sidlangan pakadto sa Kodiak, Alaska, sa katundan, kapin sa 3,500 kilometros nga distansia.

Nalipay ako sa paghibalo nga sa naligwin nga mga lugar, subong nga sa bisan diin, ang di-bagay nga kaayo  ni Jehova para sa tanan nga mga tawo kag ang espiritu sang Dios nagapahulag sa hunahuna kag tagipusuon sang mga husto nga nahuyog sa kabuhi nga walay katapusan. Isa sini amo si Henry Lepine sa Dawson City, Yukon, nga ginatawag karon nga Dawson. Nagapuyo si Henry sa naligwin nga duog. Sa katunayan, wala sia makagua gikan sa duog sang minahan sang bulawan sing kapin sa 60 ka tuig. Apang, ginpahulag sang espiritu ni Jehova ining 84-anyos nga lalaki nga maglakbay sing kapin sa 1,600 kilometros pakadto sa Anchorage agod magtambong sa isa ka sirkito nga asambleya, bisan wala pa gid sia makatambong sa miting sa kongregasyon. Nakunyag sia sa programa kag nalipay gid sa pagpakig-upod sa mga kauturan. Sang magbalik si Henry sa Dawson City, nagpabilin sia nga matutom tubtob sa iya kamatayon. Madamo sang mga nakakilala kay Henry ang natingala kon ano ang nagpahulag sa sining tigulang na nga lalaki nga maglakbay sing malawig. Bangod sini, ginbaton sang pila pa ka may edad na ang kamatuoran. Gani sa indi direkta nga paagi, nakapanaksi sing maayo si Henry.

Nakabaton sing Di-bagay nga Kaayo ni Jehova

Sang 1955, nalipay ako nga makabaton sing pangagda nga magtambong sa ika-26 nga klase sang Watchtower Bible School of Gilead. Ini nga paghanas nagpalig-on sang akon pagtuo kag nagbulig sa akon nga magsuod pa kay Jehova. Sang naggradwar ako, gin-asayn ako nga magpadayon sa sirkito nga hilikuton sa Canada.

Sa sulod sang mga isa ka tuig, nag-alagad ako sa probinsia sang Ontario. Dayon gin-asayn ako liwat sa matahom nga Aminhan. Ginapanan-aw ko pa gihapon ang matahom nga mga haywey nga nagapangalihid sa matin-aw nga mga linaw kag taklaron nga mga kabukiran nga nakulapan sing niebe ang mga putukputukan. Sa tingadlaw, ang mga nalupyakan kag kapatagan makahalawhaw nga daw alpombra sang maduagon nga ilahas nga kabulakan. Lab-as ang hangin kag matin-aw ang tubig. Ang mga oso, lobo, moose, caribou, kag iban pa nga ilahas nga mga sapat nagalagawlagaw nga wala sing tublag sa ila kinaugali nga puluy-an.

Apang, sa Alaska may mga hangkat​​—⁠indi lamang ang nagabulubag-o nga panahon kundi ang malayo man nga mga distansia. Ang akon sirkito may distansia nga 3,200 kilometros halin sa sidlangan pa katundan. Wala sing aman sadto nga salakyan para sa manugtatap sang sirkito. Nagboluntaryo ang lokal nga mga utod nga lalaki nga idul-ong ako sang ila salakyan halin sa isa ka kongregasyon pakadto sa masunod nga kongregasyon. Apang, kon kaisa, nagasakay lang ako sa mga trak ukon sa salakyan sang mga turista.

Ang isa sini nga hitabo amo ang sa bahin sang Alaska Highway sa ulot sang Tok Junction, Alaska, kag Mile 1202, ukon Scotty Creek nga duog. Ang adwana sa sining duha ka duog mga 160 kilometros ang antad. Nag-agi ako sa adwana sang Estados Unidos sa Tok kag nagsakay sing mga 50 kilometros. Pagkatapos sini wala na sing salakyan nga nag-agi, kag naglakat ako sing mga napulo ka oras sa distansia nga 40 kilometros. Sang ulihi ko na lang nahibaluan nga wala magdugay sang pag-agi ko sa adwana, ginpauntat ang pagbiyahe sang mga salakyan sa sini nga haywey bangod sang pagdalhay sang niebe malapit lang sa adwana. Sang tungang-gab-i nagnubo ang temperatura sa mga minus 23 degrees Celsius, kag mga 80 kilometros pa ang akon antad sa pinakamalapit nga palasilungan. Kinahanglan ko gid ang pasilungan nga mapahuwayan ko.

Samtang nagakiangkiang ako, nakakita ako sing guba na nga salakyan sa kilid sang karsada, nga natabunan sing niebe ang pila ka bahin sini. Naghunahuna ako nga kon makasulod ako kag  makatulog sa almohadon nga pulungkuan, malampuwasan ko ang matugnaw nga kagab-ihon. Ginwahig ko ang niebe agod mabuksan ang puertahan, apang nakita ko nga puro na lang metal ang nabilin sa sulod. Maayo na lang, may nakita ako sa unhan nga payagpayag nga wala sing tawo. Pagkatapos sing mabudlay nga pagsulod sa payagpayag kag pagsindi sing kalayo, nakapahuway gid man ako sing pila ka oras. Pagkaaga, nakasakay ako pakadto sa masunod nga dalayunan, diin nakakuha ako sing bastante nga pagkaon kag nabulong ang pilason ko nga mga tudlo.

Ginpatubo Ini ni Jehova sa Aminhan

Ang una ko nga pagduaw sa Fairbanks makapalig-on gid. Nagmadinalag-on kami sa ministeryo, kag mga 50 ang nagtambong sa pamulongpulong publiko sang Domingo. Nagtipon kami sa magamay nga puluy-an sang mga misyonero diin nagapuyo sanday Vernor kag Lorraine Davis. Ang mga tawo nagtamwa halin sa kusina, hulot tulugan, kag sa alagyan sa sulod sang puluy-an agod mamati sa pamulongpulong. Bangod madamo ang nagpamati sa pamulongpulong, nahibaluan namon nga mangin tayuyon pa ang pagbantala nga hilikuton sa Fairbanks kon may yara Kingdom Hall. Gani paagi sa bulig ni Jehova, nakabakal kami sing daku nga tinukod, nga isa anay ka baylehan, kag ginsaylo ini sa nagakaigo nga duta. Nagkutkot sing bubon, naghimo sing mga banyo kag gintakod ang heating unit. Sa sulod sang isa ka tuig, may gingamit na nga Kingdom Hall sa Fairbanks. Sang gindugang tukod ang kusina, gingamit ini sa distrito nga kombension sang 1958, kag 330 ang nagtambong.

Sang tingadlaw sang 1960, nagbiyahe ako sing malawig sakay sa awto pakadto sa ulong talatapan sang mga Saksi ni Jehova sa New York agod mag-eskwela sa refresher course para sa nagalakbay nga mga manugtatap sa Estados Unidos kag Canada. Sang didto ako, nakighambal sa akon si Utod Nathan Knorr kag ang iban pa nga responsable nga mga utod tuhoy sa posibilidad nga magbukas sing isa ka sanga talatapan sa Alaska. Pagligad sang pila ka bulan, nalipay kami sa paghibalo nga sugod sa Septiembre 1, 1961, ang Alaska may yara na sanga talatapan. Si Utod Andrew K. Wagner ang gin-asayn nga magtatap sa mga hilikuton sa sanga. Nag-alagad sila sang iya asawa nga si Vera sa Brooklyn sa sulod sang 20 ka tuig kag may eksperiensia man sa nagalakbay nga hilikuton. Gin-apresyar gid ang pagtukod sing sanga talatapan sa Alaska, bangod ginbuhinan sini ang kalawigon sang pagbiyahe sang manugtatap sang sirkito kag nagbulig sa iya nga masentro ang igtalupangod sa espesipiko nga mga kinahanglanon sang mga kongregasyon kag sang naligwin nga mga teritoryo.

Ang tingadlaw sang 1962 malipayon gid nga tion sa Aminhan. Gindedikar ang sanga sa Alaska, kag ginhiwat ang distrito nga kombension sa Juneau, Alaska. Ginpatindog ang bag-o nga mga Kingdom Hall sa Juneau kag Whitehorse, Yukon, kag naporma man ang pila ka naligwin nga mga grupo.

Balik sa Canada

Sa sulod sang pila ka tuig, nagasulat ako kay Margareta Petras sa Canada. Si Reta, nga amo ang pirme nga tawag sa iya, nagsugod sa pagpayunir sang 1947, naggradwar sa Gilead sang 1955, kag nagpayunir sa nasidlangan nga Canada. Ginhingyo ko sia nga magpakasal kag nagpasugot sia. Ginkasal kami sa Whitehorse sang Pebrero 1963. Sang tigragas sadto nga tuig, gin-asayn ako sa sirkito nga hilikuton sa nakatundan nga Canada, kag nalipay kami sa pag-alagad didto sa sulod sang 25 ka tuig.

Bangod sang nagpigaw nga panglawason, gin-asayn kami sang 1988 subong mga espesyal payunir sa Winnipeg, Manitoba. Naglakip ini sang pag-atipan sa Assembly Hall sa sulod sang mga lima ka tuig. Tubtob posible, nagapakigbahin gihapon kami sa makalilipay nga hilikuton nga paghimo sing mga disipulo. Sa sirkito nga hilikuton, nagsugod kami sing madamo nga mga pagtuon sa Biblia kag ginpadumalahan sa iban. Sa karon, paagi sa di-bagay nga kaayo ni Jehova, ginasugdan namon ini kag may dugang nga kalipay nga makita ang mga estudyante nga nagauswag tubtob magdedikar kag magpabawtismo.

Kumbinsido ako nga ang pag-alagad kay Jehova amo ang labing maayo nga dalanon sang pagkabuhi. Makahulugan ini kag makalilipay, kag nagapatudok ini sang amon gugma kay Jehova kada adlaw. Amo ini ang nagahatag sing matuod nga kalipay. Bisan ano man ang amon teokratiko nga asaynment, ukon bisan diin man kami nga duog, nagaugyon kami sa salmista nga nagsiling: “Malipayon ang katawhan nga ang ila Dios amo si Jehova!”​​—⁠Salmo 144:15.

[Retrato sa pahina 24, 25]

Sa sirkito nga hilikuton

[Retrato sa pahina 25]

Nagduaw kay Henry Lepine sa Dawson City. Yara ako sa wala

[Retrato sa pahina 26]

Ang una nga Kingdom Hall sa Anchorage

[Retrato sa pahina 26]

Si Reta kag ako, 1998