Ang Gugma Kinahanglanon Gid

BISAN ano man ang edad, kultura, lenguahe, ukon rasa, kinahanglan gid sang tanan nga tawo ang gugma. Kon indi mapaayawan ini nga pagkinahanglan, indi sila malipayon. Ang isa ka manalawsaw sa medisina nagsulat: “Ang gugma kag ang pagkasuod amo ang importante nga mga butang nga nagapat-od kon ngaa nagabalatian kag nagaayo kita, kon ngaa nagakasubo kag nagakalipay kita, kon ngaa nagaantos kag nagakaumpawan kita. Kon ang isa ka bag-o nga bulong may epekto nga kaangay sini, halos tanan nga mga doktor sa pungsod magarekomendar sini sa ila mga pasyente. Isa ka pagpatumbaya ang indi pagreseta sini.”

Walay sapayan sini, ang moderno nga sosiedad, ilabi na ang media kag ang bantog nga mga modelo sini, masami nga mas nagapadaku sa manggad, gahom, kabantugan, kag sekso sangsa mga kinahanglanon gid sang tawo nga mainit kag mahigugmaon nga mga kaangtanan. Madamo nga mga edukador ang nagapadaku sang sekular nga mga tulumuron kag mga karera, kag nagatakus sang kadalag-an pasad sa sini. Matuod, importante ang edukasyon kag ang pagpauswag sang mga talento sang isa, apang dapat bala ini himud-usan gid amo nga ang isa wala na sing tion para sa iya pamilya kag mga abyan? Ang isa ka edukado nga manunulat sadto anay nga mapanilagon gid sa kinaugali sang tawo nagpaanggid sang isa ka indibiduwal nga may abilidad apang wala sing gugma sa “nagatunog nga saway ukon nagasantikanay nga apiping.” (1 Corinto 13:⁠1) Mahimo nga magmanggaranon ining mga tawo, mangin bantog pa gani, apang indi gid sila malipayon.

Si Jesucristo, nga nakahangop gid kag may pinasahi nga kahamuot sa mga tawo, naghatag sing daku nga importansia sa gugma sa Dios kag sa isigkatawo sa iya panudlo. Sia nagsiling: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna. . . . Higugmaa ang imo isigkatawo subong sang imo kaugalingon.” (Mateo 22:37-39) Ang mga nagasunod lamang sa sini nga mga pulong ang mangin matuod nga mga sumulunod ni Jesus. Busa, sia nagsiling: “Sa sini ang tanan makahibalo nga kamo mga disipulo ko, kon maghigugmaanay kamo.”​​—⁠Juan 13:35.

Apang, paano mapalambo sang isa ang gugma sa kalibutan karon? Kag paano matudluan sang mga ginikanan ang ila kabataan tuhoy sa gugma? Sabton sang masunod nga artikulo ining mga pamangkot.

[Mga retrato sa pahina 3]

Isa ka hangkat ang pagpalambo sing gugma sa isa ka kalibutan nga ginagamhan sang kakagod