Magdiretso sa kaundan

Magdiretso sa listahan sang kaundan

Pangitaa Kon Ano ang Maayo sa Tagsatagsa

Pangitaa Kon Ano ang Maayo sa Tagsatagsa

 Pangitaa Kon Ano ang Maayo sa Tagsatagsa

“Dumduma ako, O Dios ko, sa kaayuhan.”​​—⁠NEHEMIAS 13:31.

1. Paano si Jehova nagapanghikot nga may pagkaayo sa tanan?

PAGKATAPOS sang madamo nga magal-umon kag maguom nga inadlaw, ang pagsilak sang adlaw nagadala sing makalilipay nga pagbag-o. Nagakalipay ang mga tawo kag naganami ang ila pamatyag. Sing kaanggid, pagkatapos sang malawig nga pagtagiti sang adlaw kag tig-ilinit, ang pagtupa sang ulan​​—⁠bisan sang madamol nga ulan⁠—nagahatag sing kaumpawan. Gindesinyo sang aton mahigugmaon nga Manunuga, nga si Jehova, ang atmospera sang duta agod may subong sini nga makalilipay nga panahon. Ginpatalupangod ni Jesus ang kaalwan sang Dios sang nagtudlo sia: “Padayon nga higugmaa ang inyo mga kaaway kag ipangamuyo ang mga nagahingabot sa inyo; agod mapamatud-an ninyo ang inyo kaugalingon nga mga anak sang inyo Amay nga yara sa mga langit, kay ginapasubang niya ang iya adlaw sa mga tawo nga malauton kag sa mga maayo kag nagapaulan sa mga tawo nga matarong kag sa mga di-matarong.” (Mateo 5:43-45) Huo, si Jehova nagapanghikot nga may pagkaayo sa tanan. Dapat manikasog ang iya mga alagad nga ilugon sia paagi sa pagpangita sang kon ano ang maayo sa iban.

2. (a) Sa anong sadsaran nga nagapanghikot si Jehova nga may pagkaayo? (b) Ano ang ginatalupangod ni Jehova sa aton reaksion sa iya pagkaayo?

2 Sa anong sadsaran nga nagapanghikot si Jehova nga may pagkaayo? Sugod sang nagpakasala si Adan, wala mapaslawi si Jehova sa pagpangita sang kon ano ang maayo sa mga tawo. (Salmo 130:​3, 4) Katuyuan niya nga ipasag-uli ang matinumanon nga katawhan sa kabuhi sa Paraiso. (Efeso 1:​9, 10) Ang iya di-bagay nga kaayo naghatag sa aton sing paglaum nga kahilwayan gikan sa sala kag di-kahimpitan paagi sa ginsaad nga Binhi. (Genesis  3:​15; Roma 5:​12, 15) Ang pagbaton sa kahimusan nga gawad nagbukas sing dalan agod makapanumbalik sa kahimpitan. Nagapanilag karon si Jehova sa tagsatagsa sa aton agod makita, lakip sa iban pa nga mga butang, ang aton reaksion sa iya kaalwan. (1 Juan 3:16) Natalupangdan niya ang bisan ano nga ginahimo naton sa pagpakita sang aton apresasyon sa iya nga pagkaayo. “Ang Dios indi di-matarong nga malipat sa inyo binuhatan kag sa gugma nga ginpakita ninyo tungod sa iya ngalan,” sulat ni apostol Pablo.​​—⁠Hebreo 6:10.

3. Ano nga pamangkot ang dapat naton binagbinagon?

3 Kon amo, paano naton mailog si Jehova sa pagpangita sang kon ano ang maayo sa iban? Binagbinagon naton ang mga sabat sa sining pamangkot sa apat ka bahin sang kabuhi: (1) sa Cristianong ministeryo, (2) sa pamilya, (3) sa kongregasyon, kag (4) sa aton kaangtanan sa iban.

Sa Pagbantala kag sa Paghimo sing Disipulo

4. Paano ang pagpakigbahin sa Cristianong ministeryo isa ka pagpakita sing pagpangita sang kon ano ang maayo sa iban?

4 “Ang latagon amo ang kalibutan,” paathag ni Jesus bilang sabat sa mga pamangkot sang iya mga disipulo tuhoy sa kahulugan sang parabola sang mga trigo kag mga gamhon. Subong modernong-adlaw nga mga disipulo ni Cristo, nahibaluan naton ini nga kamatuoran kon nagapakigbahin kita sa aton ministeryo. (Mateo 13:36-​38; 28:​19, 20) Ang aton ministeryo sa latagon nagadalahig sang dayag nga pagpahayag sang aton pagtuo. Ang katunayan nga kilala na karon ang mga Saksi ni Jehova bangod sang ila ministeryo sa pamalaybalay kag sa mga kalye nagapamatuod sang aton kapisan sa pagpangita sa tanan nga takus sa mensahe sang Ginharian. Sa pagkamatuod, si Jesus nagsugo: “Bisan diin nga siudad ukon minuro nga inyo sudlan, pangitaa ninyo kon sin-o didto ang takus.”​​—⁠Mateo 10:11; Binuhatan 17:17; 20:20.

5, 6. Ngaa dapat kita magpadayon sa pagduaw liwat sa mga tawo sa ila puluy-an?

5 Kon ginahimo naton ang wala ginapaabot nga pagduaw sa mga tawo, maobserbahan naton ang ila reaksion sa aton mensahe. Kon kaisa nagapamati sa aton ang isa ka katapo sang panimalay, samtang ang isa naman sa amo gihapon nga puluy-an nagasaligbat, “Indi kami interesado,” kag nagapauntat ini sang pagduaw. Nasubuan kita nga ang pagpamatok ukon pagkawala sing interes sang isa ka tawo nagaapektar sa reaksion sang isa pa! Ano, nian, ang mahimo naton agod makapadayon sa pagpangita sang kon ano ang maayo sa tagsatagsa?

 6 Ang masunod naton nga pagduaw sa puluy-an kon nagabantala kita sa amo nga duog mahimo maghatag sing kahigayunan nga mahambal sing direkta ang tawo nga nagpauntat sang una nga pagduaw. Ang pagdumdom sa natabo sadtong tion makabulig sa aton sa paghanda. Mahimo nga maayo ang mga motibo sang nagpamatok, nagapati nga dapat niya pauntaton ang nagapamati sa mensahe sang Ginharian. Ayhan naimpluwensiahan ang iya mga pagtamod sang butig nga mga impormasyon tuhoy sa aton mga tinutuyo. Apang indi ini dapat magpugong sa aton nga magpadayon sa pagbantala sing maayong balita sang Ginharian sa amo nga puluy-an, mataktikanhon nga ginatinguhaan nga tadlungon ang sayop nga paghangop. Interesado kita nga buligan ang tanan nga makadangat sa sibu nga ihibalo tuhoy sa Dios. Ayhan buyukon ni Jehova ini nga tawo sa iya.​​—⁠Juan 6:​44; 1 Timoteo 2:⁠4.

7. Ano ang makabulig sa aton nga mangin positibo kon nagapalapit kita sa mga tawo?

7 Ang instruksion ni Jesus sa iya mga disipulo naglakip man sing pagpamatok sang pamilya. Indi bala nagsiling sia: “Nagkari ako sa pagtuga sing pagbinahinbahin, sang lalaki batok sa iya amay, kag sang anak nga babayi batok sa iya iloy, kag sang lamharon nga asawa batok sa iya ugangan nga babayi”? Si Jesus nagsiling pa: “Ang mga kaaway sang tawo amo ang mga tawo sang iya mismo panimalay.” (Mateo 10:​35, 36) Apang, nagabag-o ang mga kahimtangan kag mga panimuot. Ang hinali nga pagbalatian, pagkapatay sang isa ka paryente, mga kalamidad, emosyonal nga mga problema, kag madamo pa nga mga kabangdanan nagaimpluwensia sa reaksion sang mga tawo sa aton pagbantala. Kon negatibo ang aton pagtamod​​—⁠nga ang mga tawo nga aton ginabantalaan magapabilin nga indi mamati⁠​—⁠ginapangita gid bala naton kon ano ang maayo sa ila? Ngaa indi mo pagduawon sing malipayon ang ila puluy-an sa iban nga higayon? Mahimo nga tuhay na ang ila reaksion. Kon kaisa indi lamang kon ano ang aton ginahambal kundi ang paagi sang aton paghambal ang nagapabag-o sang reaksion. Ang hanuot nga pagpangamuyo kay Jehova antes kita magsugod sa pagbantala makabulig gid sa aton nga mangin positibo kag mapresentar ang mensahe sang Ginharian sa tanan sa makagalanyat nga paagi.​​—⁠Colosas 4:⁠6; 1 Tesalonica 5:⁠17.

8. Ano ang mahimo nga resulta kon ginapangita sang mga Cristiano kon ano ang maayo sa ila di-tumuluo nga mga paryente?

8 Sa pila ka kongregasyon madamo nga mga katapo sang isa ka pamilya ang nagaalagad kay Jehova. Ang masami nga nagakuha sang pagdayaw kag pagtahod sang mga kabataan amo ang pagkatayuyon sang isa ka may edad na nga paryente nga ang maayo nga kaangtanan sa pamilya kag sa pag-asawahay nagbukas sing dalan agod magbag-o ang tagipusuon sang mga bata. Ang pagsunod sa laygay ni apostol Pedro nagbulig sa madamo nga Cristianong asawa nga madaug ang ila bana sing “walay pulong.”​​—⁠1 Pedro 3:​1, 2.

Sa Pamilya

9, 10. Paano ginpangita ni Jacob kag ni Jose kon ano ang maayo sa ila pamilya?

9 Ang suod nga kaangtanan nga nagaangot sing tingob sa mga katapo sang pamilya amo ang isa pa ka bahin nga mapangita naton kon ano ang maayo sa iban. Binagbinaga ang isa ka leksion gikan sa pagpakig-angot ni Jacob sa iya mga anak nga lalaki. Ginapakita sang Biblia sa Genesis kapitulo 37, bersikulo 3 kag 4, nga mas palangga ni Jacob si Jose. Nahisa ang mga utod ni Jose, tubtob sa punto nga naghimbon sila agod patyon ang ila utod. Apang, talupangda ang panimuot ni Jacob kag ni Jose sang ulihi. Ginpangita nila kon ano ang maayo sa ila pamilya.

10 Sang nag-alagad si Jose subong puno nga manugdumala sa kalan-on sa Egipto sa tion sang  tiggulutom, gin-abiabi niya ang iya mga utod. Bisan pa wala sia magpakilala gilayon, ginmaniobra niya ang mga hitabo agod pat-uron nga ginaatipan sila kag may kalan-on nga dala pabalik sa ila tigulang na nga amay. Huo, walay sapayan nga nangin biktima sia sang ila dumot, nanghikot si Jose para sa ila kaayuhan. (Genesis 41:53⁠–​42:​8; 45:23) Sing kaanggid, sang madali na lang mapatay si Jacob, nagpahayag sia sing matagnaon nga mga pagpakamaayo sa tanan niya nga anak nga lalaki. Bisan pa ang ila sayop nga mga buhat nagresulta sa indi nila pagtigayon sing pila ka pribilehiyo, tanan sila nakabaton sing palanublion sa duta. (Genesis 49:​3-​28) Daw ano ka dalayawon nga pagpakita ni Jacob sang mapinadayunon nga gugma!

11, 12. (a) Anong matagnaon nga halimbawa ang nagapadaku sa importansia sang pagpangita sang kon ano ang maayo sa sulod sang pamilya? (b) Anong leksion ang matun-an naton gikan sa halimbawa sang amay sa ilustrasyon ni Jesus tuhoy sa buhaha nga anak?

11 Ang pagkamainantuson ni Jehova sa pagpakig-angot sa di-matutom nga pungsod sang Israel nagapahangop sing dugang kon paano niya ginapangita kon ano ang maayo sa iya katawhan. Naggamit sang mga kahimtangan sang pamilya ni manalagna Oseas, gin-ilustrar ni Jehova ang iya mapinadayunon nga gugma. Si Gomer, nga asawa ni Oseas, sulitsulit nga nagpakighilahi. Walay sapayan sini, ginsugo ni Jehova si Oseas: “Lakat ka liwat, higugmaa ang isa ka babayi nga ginhigugma sang isa ka kaupod kag nagapakighilahi, subong sang gugma ni Jehova sa mga anak sang Israel bisan nagaliso sila sa iban nga mga dios kag nagahigugma sa mga tinapay nga pasas.” (Oseas 3:⁠1) Ngaa ginsugo sia sing subong sini? Nahibaluan ni Jehova nga gikan sa pungsod nga naglisa sa iya dalanon, may mga indibiduwal nga magaapresyar sang iya pagpailob. Si Oseas nagsiling: “Pagkatapos sini ang mga anak sang Israel magabalik kag pat-od nga magapangita kay Jehova nga ila Dios, kag kay David nga ila hari; kag pat-od nga magakari sila nga may pagkurog kay Jehova kag sa iya pagkaayo sa ulihi nga bahin sang mga adlaw.” (Oseas 3:⁠5) Maayo gid ini nga halimbawa nga pamalandungan kon nagaatubang sang mga kabudlayan sa pamilya. Ang padayon mo nga pagpangita sang kon ano ang maayo sa iban nga mga katapo sang pamilya magapakita sa di-magkubos sing maayo nga halimbawa sa pagpailob.

12 Ang parabola ni Jesus tuhoy sa buhaha nga anak nagahatag sing dugang nga paghantop kon paano naton mapangita kon ano ang maayo sa aton pamilya. Ang manghod nga anak nga lalaki nagpauli sa tapos niya untatan ang pagpatuyang sa kabuhi. Naluoy ang iya amay sa iya. Ano ang reaksion sang amay sa reklamo sang magulang nga  anak nga wala magbiya sa iya pamilya? Ang amay nagsiling sa kamagulangan nga anak: “Anak, kaupod ko ikaw pirme, kag ang tanan nga butang nga akon imo.” Indi ini isa ka pag-akig kundi pagkompirmar lamang sang gugma sang amay. “Dapat kita magkasadya kag magkalipay,” padayon niya, “kay ining utod mo napatay kag nabuhi, kag nadula sia kag nakita.” (Lucas 15:11-32) Mapangita man naton sing padayon kon ano ang maayo sa iban.​​—⁠Lucas 15:​11-​32.

Sa Cristianong Kongregasyon

13, 14. Ano ang isa ka paagi nga masunod naton ang harianon nga kasuguan sa gugma sa sulod sang Cristianong kongregasyon?

13 Subong mga Cristiano, tulumuron naton nga sundon ang harianon nga kasuguan tuhoy sa gugma. (Santiago 2:​1-9) Matuod, mahimo nga batunon naton ang mga katapo sa aton kongregasyon nga ang kahimtangan sa materyal tuhay sangsa aton. Apang may ‘ginapasulabi’ bala kita pasad sa ginhalinan nga rasa, kultura, ukon relihion pa gani? Kon amo, paano naton matuman ang laygay ni Santiago?

14 Ang pag-abiabi sa tanan nga nagatambong sa Cristianong mga miting nagapamatuod sang aton pagkamaabiabihon. Kon magmatumato kita sa pagpakighambal sa mga bag-uhan nga nagatambong sa Kingdom Hall, mahimo nga madula ang ila kakulba kag pagkadimapahamtang. Sa pagkamatuod, ang pila nga nagatambong sa Cristianong miting sa nahauna nga tion nagasiling: “Mainabyanon gid ang tanan. Subong bala nga daw kilala na ako sang tanan. Napahamtang gid ang akon buot.”

15. Paano mabuligan ang mga kabataan sa kongregasyon nga magpakita sing interes sa mga may edad na?

15 Sa pila ka kongregasyon, mahimo nga magtipontipon ang pila ka pamatan-on sa sulod ukon sa gua sang Kingdom Hall pagkatapos sang miting, kag wala nagapakig-upod sa mga may edad na. Anong positibo nga butang ang dapat himuon agod malikawan ini nga huyog? Ang una, siempre, amo ang paghanas sang mga ginikanan sa ila kabataan sa puluy-an, ginahanda sila para sa mga miting. (Hulubaton 22:⁠6) Mahimo nga ipahanda sa ila ang nanuhaytuhay nga publikasyon agod madala sang tanan ang mga kinahanglanon sa mga miting. Dapat man palig-unon sang mga ginikanan ang ila kabataan nga makigsugilanon sa mga tigulang kag may kasablagan sa lawas sa Kingdom Hall. Ang paghambal sing pila ka mapuslanon nga butang sa ila makahatag sing kaayawan sa mga kabataan.

16, 17. Paano mapangita sang mga may edad na kon ano ang maayo sa mga kabataan sa kongregasyon?

16 Ang may edad na nga mga kauturan dapat magpakita sing interes sa mga kabataan sa kongregasyon. (Filipos 2:⁠4) Mahimo sila magmatumato sa pagpakighambal sing makapalig-on sa mga kabataan. Masami nga ginapasangkad ang pila ka talalupangdon nga punto sa tion sang miting. Mahimo pamangkuton ang mga kabataan kon bala nalipay sila sa miting kag kon bala may pila ka punto nga naluyagan gid nila kag mahimo nila iaplikar. Subong daku nga bahin sang kongregasyon, dapat apresyahon ang mga pamatan-on bangod sang ila pagkaatentibo kag hatagan sing komendasyon sa mga komento nila sa tion sang miting ukon sa bisan ano nga bahin nila sa programa. Ang paagi sang pagpakig-angot sang mga pamatan-on sa mga may edad na sa kongregasyon kag ang paagi sang paghimo nila sa simple nga mga hilikuton sa puluy-an magapakita nga mahimo nila ang daku pa nga mga responsabilidad sa ulihi.​​—⁠Lucas 16:10.

17 Paagi sa pagbaton sing mga responsabilidad,  ang pila ka pamatan-on nagauswag tubtob sa punto nga bangod sang ila espirituwal nga mga kinaiya, makabaton sila sing mas mabug-at nga mga asaynment. Bangod may ginahimo, nagabulig ini nga malikawan ang binuang nga paggawi. (2 Timoteo 2:22) Ini nga mga asaynment mahimo nga ‘pagtilaw sa pagkanagakaigo’ sa mga kauturan nga lalaki nga nagatinguha nga mangin ministeryal nga mga alagad. (1 Timoteo 3:10) Ang ila kahanda sa pagpakigbahin sa mga miting kag ang ila kakugi sa ministeryo, kag ang ila mainulikdon nga panimuot sa tanan sa kongregasyon, nagabulig sa mga gulang nga makita ang ila potensial kon nagabinagbinag sa ila para sa dugang nga mga asaynment.

Pagpangita sang Kon Ano ang Maayo sa Tanan

18. Ano nga tugalbong may kaangtanan sa paghukom ang dapat likawan, kag ngaa?

18 “Ang pagpakita sang pagpasulabi sa paghukom indi maayo,” siling sang Hulubaton 24:23. Ginapatuman sang langitnon nga kaalam nga likawan sang mga gulang ang pagpasulabi kon nagahukom sing mga butang sa kongregasyon. Si Santiago nagsiling: “Ang kaalam nga gikan sa hitaas una sa tanan putli, nian mahidaiton, makatarunganon, handa sa pagtuman, puno sing kaluoy kag maayong mga bunga, wala sing ginadampigan, indi salimpapaw.” (Santiago 3:17) Maathag nga bisan pa ginapangita ang kaayuhan sang iban, dapat pat-uron sang mga gulang nga ang ila paghukom wala ginasablagan sang personal nga mga kaangtanan ukon emosyon. “Ang Dios nagapahamtang sang iya kaugalingon sa katilingban sang Dios,” sulat ni salmista Asaf. “Sa tunga sang mga dios [ukon “mga tulad-dios,” nga nagapatuhoy sa tawhanon nga mga hukom] nagahukom sia: ‘Tubtob san-o kamo magahukom sa inhustisya kag magapasulabi sa mga malauton?’” (Salmo 82:​1, 2) Sing nahisuno, ginalikawan sang Cristianong mga gulang ang paboritismo kon nagadalahig ini sa isa ka abyan ukon paryente. Sa sining paagi natipigan nila ang paghiusa sa kongregasyon kag ginatugutan nga manghikot sing hilway ang espiritu ni Jehova.​​—⁠1 Tesalonica 5:⁠23.

19. Sa anong mga paagi nga mapangita naton kon ano ang maayo sa iban?

19 Sa pagpangita sang kon ano ang maayo sa aton mga kauturan, ginapabanaag naton ang panimuot ni Pablo sang naghambal sia sa kongregasyon sa Tesalonica. Sia nagsiling: “Dugang pa, may pagsalig kami sa Ginuo nahanungod sa inyo, nga kamo nagahimo kag padayon nga magahimo sing mga butang nga amon ginasugo.” (2 Tesalonica 3:⁠4) Mahuyog kita nga takpan ang mga kasaypanan sang iban kon ginapangita naton kon ano ang maayo sa ila. Mangita kita sing mga bahin nga mahatagan naton sing komendasyon ang aton mga kauturan, kag ginalikawan gid ang mamulayon nga panimuot. “Ang ginapangita sa mga tulugyanan,” sulat ni Pablo, “amo nga ang isa ka tawo masapwan nga matutom.” (1 Corinto 4:⁠2) Ang katutom indi lamang sang mga tulugyanan sa kongregasyon kundi sang tanan naton nga Cristianong mga kauturan nagaresulta sa paghigugma naton sa ila. Sa amo, nagasuod kita sa ila, kag nagabakod ang higot sang Cristianong pag-abyanay. Ang aton pagtamod mangin kaangay sa pagtamod ni Pablo sa mga kauturan sang panahon niya. Sila “mga masigkamanugpangabudlay para sa ginharian sang Dios” kag “nagapabakod nga bulig” sa aton. (Colosas 4:11) Sa amo, ginapadayag naton ang panimuot ni Jehova.

20. Ano nga mga pagpakamaayo ang magaabot sa mga nagapangita sang kon ano ang maayo sa tagsatagsa?

20 Pat-od nga ginapalanog naton ang pangamuyo ni Nehemias: “Dumduma ako, O Dios ko, sa kaayuhan.” (Nehemias 13:31) Malipayon gid kita nga ginapangita ni Jehova kon ano ang maayo sa mga tawo! (1 Hari 14:13) Kabay nga amo man sini ang aton himuon sa aton pagpakig-angot sa iban. Ang paghimo sini nagahatag sa aton sing paglaum nga matubos kag mabuhi sing dayon sa bag-o nga kalibutan nga malapit na.​​—⁠Salmo 130:⁠3-8.

Paano Mo Sabton?

Sa anong sadsaran nga nagapanghikot si Jehova nga may pagkaayo sa tanan?

Paano naton mapangita kon ano ang maayo sa iban

sa aton ministeryo?

sa aton pamilya?

sa aton kongregasyon?

sa aton kaangtanan sa tanan?

[Mga Pamangkot sa Pagtinuon]

[Retrato sa pahina 18]

Walay sapayan sang dumot anay sang iya mga utod sa iya, ginpangita ni Jose ang ila kaayuhan

[Retrato sa pahina 19]

Ang pagpamatok wala nagaupang sa aton sa pagtinguha nga buligan ang tanan

[Retrato sa pahina 20]

Walay sapayan sang ila nagligad, tanan nga anak ni Jacob nakabaton sang iya pagpakamaayo

[Retrato sa pahina 21]

Abiabiha ang tanan sa Cristianong mga miting