Magdiretso sa kaundan

Magdiretso sa listahan sang kaundan

Lugpayi ang mga Nagapangalisod

Lugpayi ang mga Nagapangalisod

 Lugpayi ang mga Nagapangalisod

“Ginhaplas ako ni Jehova . . . sa paglugpay sa tanan nga nagalalaw.”​​—⁠ISAIAS 61:​1, 2.

1, 2. Sin-o ang dapat naton lugpayan, kag ngaa?

SI Jehova, ang Dios sang bug-os nga matuod nga paglugpay, nagatudlo sa aton nga mangin mabinalak-on kon ang iban nagaeksperiensia sing kalamidad. Ginatudluan niya kita nga “maghambal sing malugpayon sa mga kalag nga ginapung-awan” kag lugpayan ang tanan nga nagalalaw. (1 Tesalonica 5:14) Kon ini nga bulig ginakinahanglan, ginahatag naton ini sa mga masigkasumilimba. Ginapakitaan man naton sing gugma ang mga tawo sa guwa sang kongregasyon, bisan ang mga tawo nga mahimo wala magpakita sing bisan ano nga gugma sa aton sang una.​—⁠Mateo 5:43-48; Galacia 6:10.

2 Ginbasa kag gin-aplikar ni Jesucristo ang matagnaon nga sugo: “Ang espiritu sang Soberanong Ginuong Jehova yari sa akon, bangod nga ginhaplas ako ni Jehova sa pagwali sing maayong balita sa mga mahagop. Ginpadala niya ako sa pagbugkos sa mga buong sing tagipusuon, . . . sa paglugpay sa tanan nga nagalalaw.” (Isaias 61:​1, 2; Lucas 4:16-19) Madugay na nahangpan sang modernong-adlaw nga hinaplas nga mga Cristiano nga ini nga sugo naaplikar man sa ila, kag ang “iban nga mga karnero” malipayon nga nagabuylog sa ila sa sini nga hilikuton.​—⁠Juan 10:16.

3. Kon mamangkot ang mga tawo, “Ngaa ginatugutan sang Dios ang mga kalamidad?,” paano naton sila buligan?

3 Kon matabo ang mga kalamidad kag ang mga  tawo madaug sang daku nga kasubo, masami sila nagapamangkot, “Ngaa ginatugutan sang Dios ang mga kalamidad?” Maathag nga ginasabat sang Biblia ini nga pamangkot. Apang, ang isa nga wala nagatuon sing Biblia mahimo nagakinahanglan sing tion agod mahangpan sing bug-os ang sabat. Ang bulig sarang makita sa mga publikasyon sang mga Saksi ni Jehova.⁠ * Apang, bilang panugod, isa gid ka lugpay para sa iban nga mga tawo nga makita man lang sa Biblia ang isa ka teksto subong sang mabasa sa Isaias 61:​1, 2, kay ginapakita sini nga luyag gid sang Dios nga makabaton sing lugpay ang mga tawo.

4. Paano nabuligan sang isa ka Saksi sa Poland ang isa ka nasit-an nga dalagita, kag paano ini nga eksperiensia makabulig sa imo nga buligan ang iban?

4 Ang mga pamatan-on, subong man ang mga tigulang, nagakinahanglan sing lugpay. Isa ka napung-awan nga dalagita sa Poland ang nangayo sing laygay sa iya amiga. Paagi sa mahinuklugon nga pagpangusisa, nahibaluan sang iya amiga, nga isa sang mga Saksi ni Jehova, nga ang dalagita may madamo sing pamangkot kag duhaduha: “Ngaa madamo gid ang kalainan? Ngaa nagaantos ang mga tawo? Ngaa nagaantos ang akon paralisado nga manghod nga babayi? Ngaa may diperensia ang akon tagipusuon? Ang Simbahan nagasiling nga amo ini ang luyag sang Dios. Apang kon matuod ini, indi na ako magtuo sa iya!” Ang Saksi mahipos nga nangamuyo kay Jehova kag nian nagsiling: “Nalipay ako nga ginpamangkot mo ini sa akon. Tinguhaan ko nga buligan ka.” Ginsaysay sang amiga nga Saksi nga sang bata pa sia, may yara man sia mga duhaduha, apang ginbuligan sia sang mga Saksi ni Jehova. Nagpaathag sia: “Natun-an ko nga wala ginapaantos sang Dios ang mga tawo. Palangga niya ang mga tawo, luyag niya ang labing maayo para sa ila, kag himuon niya ang daku nga mga pagbag-o sa duta. Ang balatian, mga problema sang pagtigulang, kag kamatayon madula, kag ang mga matinumanon magakabuhi sing dayon​—⁠diri mismo sa sini nga planeta.” Ginpakita niya sa dalagita ang Bugna 21:​3, 4; Job 33:25; Isaias 35:5-7 kag 65:21-25. Pagkatapos sang malawig nga paghambalanay, ang dalagita nagsiling, nga napaumpawan gid: “Nahibaluan ko na karon ang akon katuyuan sa kabuhi. Mahimo bala ako liwat makakari?” Isa ka pagtuon sa Biblia ang ginhiwat sa iya duha ka beses kada semana.

Lugpayi ang Iban Paagi sa Lugpay nga Ginahatag sang Dios

5. Kon nagapabutyag kita sing kahanuklog, ano ang makahatag sing matuod nga lugpay?

5 Kon ginapanikasugan naton nga lugpayan ang iban, ang mahinuklugon nga mga pulong nagakaigo gid. Ginatinguhaan naton nga ipakita sa nagapangalisod nga tawo paagi sa pulong kag sa tono sang tingog nga interesado gid kita sa iya kahimtangan. Indi ini mahimo paagi sa paggamit sing indi sinsero nga mga komento. Ang Biblia nagasiling sa aton nga “paagi sa aton pagbatas kag paagi sa lugpay gikan sa Kasulatan makatigayon kita sing paglaum.” (Roma 15:⁠4) Bangod sini, mapaathag naton sa nagakaigo nga tion kon ano ang Ginharian sang Dios, kag mapakita naton gikan sa Biblia kon paano sini lubaron ang karon nga mga problema. Nian makapangatarungan kita kon ngaa isa ini ka masaligan nga paglaum. Sa sining paagi, makahatag kita sing lugpay.

6. Ano ang dapat naton ipahangop sa mga tawo agod makabenepisyo sila sing bug-os gikan sa lugpay sa Kasulatan?

6 Agod makabenepisyo sing bug-os gikan sa ginahatag nga lugpay, dapat makilala sang isa ka tawo ang matuod nga Dios, kag mahibaluan kon ano nga sahi sia sang Persona, kag kon daw ano ka  masaligan ang iya mga saad. Kon luyag naton buligan ang isa ka tawo nga indi pa sumilimba ni Jehova, maayo nga ipaathag ang masunod nga mga punto. (1) Ang lugpay nga masapwan sa Biblia naghalin kay Jehova, ang matuod nga Dios. (2) Si Jehova amo ang Labing Gamhanan, ang Manunuga sang langit kag duta. Sia isa ka Dios sang gugma kag bugana sa mahigugmaon nga kaayo kag kamatuoran. (3) Mapabakod kita nga batason ang mga kahimtangan kon magpalapit kita sa Dios paagi sa pagkuha sing sibu nga ihibalo gikan sa iya Pulong. (4) Ang Biblia nagaunod sing mga kasulatan nga may yara kaangtanan sa espesipiko nga mga pagtilaw nga ginaatubang sang nagkalainlain nga mga indibiduwal.

7. (a) Ano ang mahimo sang pagpadaku nga ang lugpay nga ginahatag sang Dios ‘magabugana paagi kay Cristo’? (b) Paano mo lugpayan ang isa nga nakarealisar nga nangin malain ang iya paggawi?

7 Ang iban naghatag sing espirituwal nga pagpalig-on sa mga nagapangalisod nga pamilyar na sa Biblia paagi sa pagbasa sang 2 Corinto 1:3-7. Kon nagabasa sini, ginapadaku nila ang ekspresyon nga “ang lugpay nga aton natigayon magabugana man paagi kay Cristo.” Ini nga kasulatan mahimo makabulig sa isa ka tawo nga mahangpan nga ang Biblia isa ka ginhalinan sang lugpay nga dapat niya binagbinagon sing labi pa. Mahimo man ini mangin basihan para sa dugang pa nga pagbinagbinag, ayhan sa iban nga mga tion. Kon ang isa ka tawo nagabatyag nga ang iya mga problema resulta sang malain nga mga butang nga ginhimo niya, nian mahimo naton sia sugiran, nga wala sia ginahukman, nga makalulugpay mahibaluan ang narekord sa 1 Juan 2:​1, 2 kag Salmo 103:11-14. Sa sining paagi malugpayan gid naton ang iban paagi sa lugpay nga ginahatag sang Dios.

Lugpayi ang mga Tawo nga ang Ila Kabuhi Naapektuhan Gid Sang Kasingki Ukon Kapurauton

8, 9. Paano mahatag ang nagakaigo nga lugpay sa mga tawo nga nagaantos sing kasingki?

8 Ang kabuhi sang di-maisip nga mga tawo naapektuhan gid sang kasingki​—⁠sang masingki nga mga krimen sa isa ka komunidad ukon sang masingki nga inaway. Paano naton sila lugpayan?

9 Ang matuod nga mga Cristiano nagahalong, sa pulong man ukon sa buhat, nga indi sila magdampig sa isa ukon sa pihak nga bahin sa mga inaway sang kalibutan. (Juan 17:16) Apang ginagamit nila sing nagakaigo ang Biblia agod ipakita nga ang mapintas nga mga kahimtangan karon indi magapadayon tubtob san-o. Mahimo nila basahon ang Salmo 11:⁠5 agod ipakita kon ano ang ginabatyag ni Jehova sa mga nagahigugma sa kasingki ukon ang Salmo 37:1-4 agod ipatalupangod ang pagpalig-on sang Dios nga indi magtimalos kundi magsalig sa Dios. Ginapakita sang Salmo 72:12-14 kon ano ang ginabatyag sang Daku Pa nga Solomon, si Jesucristo, nga karon isa na ka langitnon nga Hari, sa inosente nga mga tawo nga nagaantos sing kasingki.

10. Kon naagihan mo ang mga tinuig nga may inaway, paano ka malugpayan sang ginsambit nga mga kasulatan?

10 Ang iban nga mga tawo nagbatas sing madamo nga inaway samtang ang magkontrahanay nga mga bahin nagaagaway sa paggahom. Ginabaton na nila nga ang inaway kag ang resulta sini bahin sang kabuhi. Ang lamang nga ginalauman nila amo nga magaayo ang ila kahimtangan kon makapalagyo sila pakadto sa iban nga pungsod. Apang ang kalabanan sa ila wala gid makapalagyo, kag ang pila sa ila nga nagtilaw nga makapalagyo napatay. Nasapwan sa masami sang iban nga nakasaylo sa iban nga pungsod nga lain naman ang ila mga problema. Ang Salmo 146:3-6 mahimo gamiton agod buligan sila nga ipahamtang nila ang ila paglaum sa isa ka butang nga mas masaligan sangsa magsaylo sa iban nga pungsod. Ang tagna sa Mateo 24:​3, 7, 14 ukon 2 Timoteo 3:1-5 makabulig sa ila nga makita ang kabilugan nga kahimtangan kag ang kahulugan sang mga kahimtangan nga ginabatas nila, nga amo, nga nagakabuhi kita sa katapusan sang daan nga sistema sang mga butang. Ang mga teksto subong sang Salmo 46:1-3, 8, 9 kag Isaias 2:2-4 makabulig sa ila agod mahangpan nga malauman gid ang isa ka mahidaiton nga palaabuton.

11. Anong mga teksto ang naglugpay sa isa ka babayi sa Katundan nga Aprika, kag ngaa?

11 Sa inaway sa Katundan nga Aprika, isa ka babayi ang nagpalagyo gikan sa iya balay samtang nagaulan ang bala. Nangibabaw sa iya kabuhi ang kahadlok, kasubo, kag masakit nga mga kapaslawan. Sang ulihi, samtang ang pamilya  nagapuyo sa iban nga pungsod, ginsunog sang iya bana ang ila sertipiko sa kasal, ginpalayas ang iya sadto nagabusong nga asawa kag ang ila dies-anyos nga anak nga lalaki, kag nagpari. Sang ang Filipos 4:​6, 7 kag Salmo 55:​22, upod ang Makasulatanhon nga mga artikulo gikan sa Ang Lalantawan kag Magmata! ginbasa sa asawa, nakakita sia sang ulihi sing lugpay kag katuyuan sa kabuhi.

12. (a) Ano nga kaumpawan ang ginahatag sang Kasulatan sa mga nagapamigado? (b) Paano nabuligan sang isa ka Saksi sa Asia ang isa ka kustomer?

12 Ang kabuhi sang madamong minilyon ka tawo naguba bangod sang pagkalusod sang ekonomiya. Kon kaisa resulta man ini sang inaway. Kon kaisa naman, ang kuwarta sang mga tawo naubos kag napilitan sila nga ipaembargo ang ila mga pagkabutang bangod sang di-maalamon nga mga palakat sang gobierno kag sang kakagod kag pagkadibunayag sang mga yara sa poder. Ang iban nadingutan gid sang madamo nga pagkabutang sang kalibutan. Tanan sila mahimo malugpayan sa paghibalo nga ang Dios nagapasalig sing kaumpawan para sa mga nagasalig sa iya kag nagagarantiya sing matarong nga kalibutan diin ang mga tawo magakalipay sa binuhatan sang ila mga kamot. (Salmo 146:​6, 7; Isaias 65:​17, 21-23; 2 Pedro 3:13) Sang mabatian sang isa ka Saksi sa isa ka pungsod sa Asia ang isa ka kustomer nga nagpabutyag sing kabalaka sa kahimtangan sang pangabuhi didto, ginpaathag niya nga amo sini ang nagakatabo sa bug-os nga kalibutan. Ang pagbinagbinag sa Mateo 24:3-14 kag Salmo 37:9-11 nagdul-ong sa isa ka regular nga pagtuon sa Biblia.

13. (a) Kon ang mga tawo nabang-awan bangod sang butig nga mga saad, paano naton gamiton ang Biblia agod buligan sila? (b) Kon ang mga tawo nagabatyag nga ang malain nga mga kahimtangan pamatuod nga wala sing Dios, paano ka manikasog nga mangatarungan sa ila?

13 Kon ang mga tawo nagaantos sa sulod sang madamo nga tinuig ukon nabang-awan sa madamong butig nga mga saad, mahimo nga kaangay sila sang mga Israelinhon sa Egipto nga wala magpamati “bangod sang pagluya sing buot.” (Exodo 6:⁠9) Sa sini nga mga kahimtangan, mahimo mapuslanon nga ipadaku ang mga paagi nga mabuligan sila sang Biblia sa pag-atubang sing madinalag-on sa karon nga mga problema kag malikawan ang mga siod nga nagguba sa kabuhi sang madamo nga tawo. (1 Timoteo 4:8b) Mahimo tamdon sang iban ang ila malain nga mga kahimtangan subong pamatuod nga wala sing Dios ukon nga wala sia nagaulikid sa ila. Mahimo ka mangatarungan sa nagakaigo nga mga kasulatan agod buligan sila nga mahangpan nga ang Dios naghatag sing bulig apang wala ini ginbaton sang madamo.​—⁠Isaias 48:​17, 18.

Lugpayi ang mga Nabagyuhan kag mga Nalinugan

14, 15. Sang madamo ang nakibang bangod sang isa ka kalamidad, paano nagpakita sing kabalaka ang mga Saksi ni Jehova?

14 Ang mga kalamidad mahimo matabo subong resulta sang bagyo, linog, sunog, ukon paglupok. Ang kalisod mahimo lapnag. Ano ang himuon agod lugpayan ang mga nakalampuwas?

15 Dapat mahibaluan sang mga tawo nga may nagaulikid sa ila. Sa tapos sang pag-atake sang mga terorista sa isa ka pungsod, madamo ang nakibang. Madamo sa ila ang namatyan sing mga katapo sang pamilya, sing mga nagabuhi sa pamilya, kag sing mga abyan. Ang iban nadulaan sing palamugnan, kag madamo ang nadulaan sing kalig-unan nga pagdumdom nila ginaagom nila. Ginbuligan sang mga Saksi ni Jehova ang mga tawo sa ila komunidad, nga nagapabutyag sing simpatiya sa natabo sa ila kag nagahatag sing lugpay gikan sa Biblia. Ginpasalamatan sang madamo ang kabalaka nga aton ginapakita.

16. Sang natabo ang kalamidad sa isa ka rehiyon sa El Salvador, ngaa ang pag-alagad sa latagon sang mga Saksi sa sini nga lugar epektibo gid?

16 Sa El Salvador ang mabaskog nga linog sang 2001 ginsundan sang daku nga mud slide nga nagkutol sa madamo nga kabuhi. Ang 25-anyos nga anak nga lalaki sang isa ka Saksi kag ang duha ka manghod nga babayi sang nobya sang iya anak napatay. Ang iloy sang pamatan-on upod ang iya nobya gilayon nga masako nga nag-alagad sa latagon. Madamo ang nagsiling sa ila nga ginkuha sang Dios ang mga napatay ukon kabubut-on sang Dios nga mapatay sila. Ginbalikwat sang mga Saksi ang Hulubaton 10:22 agod ipakita nga indi luyag sang Dios nga magkasubo kita. Ginbasa nila ang Roma 5:12 agod ipakita nga ang kamatayon resulta sang pagpakasala sang tawo, indi bangod kabubut-on ini sang Dios. Ginpakita man nila ang makalulugpay nga mensahe nga makit-an sa Salmo 34:18, Salmo 37:29, Isaias 25:⁠8, kag  Bugna 21:​3, 4. Ang mga tawo nagpamati gilayon, ilabi na bangod ang duha ka babayi mismo namatyan sa kalamidad, kag madamo nga pagtuon sa Biblia ang nasugdan.

17. Sa panahon sang kalamidad, ano nga mga sahi sang bulig ang mahimo naton ihatag?

17 Kon matabo ang kalamidad, mahimo masugilanon mo ang isa nga nagakinahanglan gilayon sing pisikal nga bulig. Mahimo nagalakip ini sang pagtawag sing doktor, pagbulig sa isa ka tawo nga madala sa klinika, ukon paghimo sing bisan ano nga posible agod makahatag sing pagkaon kag pasilungan. Sang 1998 sa isa ka kalamidad nga natabo sa Italya, isa ka dyurnalista ang nagkomento nga ang mga Saksi ni Jehova “nagapanghikot sa praktikal nga paagi, nagabulig sa mga nagaantos, nga wala ginasapak kon ano ang ila relihion.” Sa iban nga mga lugar, ang mga hitabo nga gintagna sa katapusan nga mga adlaw nagtuga sing daku nga pag-antos. Sa sining mga lugar, ginapakita sang mga Saksi ni Jehova ang mga tagna sang Biblia, kag ginalugpayan nila ang mga tawo paagi sa pasalig sang Biblia nga ang Ginharian sang Dios magahatag sing matuod nga kalig-unan sa katawhan.​—⁠Hulubaton 1:33; Miqueas 4:4.

Lugpayi ang Namatyan nga Pamilya

18-20. Kon may napatay sa isa ka pamilya, ano ang imo isiling ukon himuon agod makahatag sing lugpay?

18 Kada adlaw minilyon ka tawo ang nagapangalisod bangod sa pagkapatay sang isa ka hinigugma. Mahimo masugilanon mo ang mga nagalalaw kon nagapakigbahin ka sa Cristianong ministeryo ukon kon nagaatipan sang mga hilikuton sa adlaw-adlaw nga pagkabuhi. Ano ang imo isiling ukon himuon nga makahatag sing lugpay?

19 Nagapangalisod gid bala ang isa ka tawo? Puno bala sang nagapangalisod nga mga himata ang balay? Madamo ka sing mahimo ihambal, apang kinahanglan ang pagkamahinantupon. (Manugwali 3:​1, 7) Ayhan ang nagakaigo nga himuon amo ang pagpabutyag sing simpatiya, pagbilin sing isa ka nagakaigo nga publikasyon sa Biblia (brosyur, magasin, ukon tract), kag dayon magduaw pagligad sang pila ka adlaw agod tan-awon kon may mahatag nga dugang pa nga bulig.  Sa nagakaigo nga tion, magpaambit sing pila ka makapalig-on nga panghunahuna gikan sa Biblia. Mahimo ini makahatag sing nagapakalma kag nagapaayo nga epekto. (Hulubaton 16:24; 25:11) Indi mo mabanhaw ang patay, subong sang ginhimo ni Jesus. Apang mapaambit mo ang ginasiling sang Biblia tuhoy sa kahimtangan sang mga patay, bisan pa indi ini ang tion agod tinguhaan nga tadlungon ang sayop nga mga pagtamod. (Salmo 146:⁠4; Manugwali 9:​5, 10; Ezequiel 18:⁠4) Mahimo ninyo basahon ang mga saad sang Biblia tuhoy sa pagkabanhaw. (Juan 5:​28, 29; Binuhatan 24:15) Mahimo ninyo mahambalan kon ano ang buot silingon sini, ayhan ginagamit ang report sa Biblia tuhoy sa pagkabanhaw. (Lucas 8:49-56; Juan 11:39-44) Ipatalupangod man ang mga kinaiya sang mahigugmaon nga Dios nga nagahatag sa aton sini nga paglaum. (Job 14:​14, 15; Juan 3:16) Ipaathag kon paano ka nabuligan sining mga panudlo kag kon ngaa nagasalig ka sa sini.

20 Ang pag-agda sa Kingdom Hall mahimo makabulig sa isa nga nagapangalisod nga makilala ang mga tawo nga tunay nga nagahigugma sa ila mga isigkatawo kag nakahibalo kon paano palig-unon ang isa kag isa. Nasapwan sang isa ka babayi sa Sweden nga amo ini ang madugay na niya nga ginapangita sa bug-os niya nga kabuhi.​—⁠Juan 13:35; 1 Tesalonica 5:11.

21, 22. (a) Ano ang ginakinahanglan sa aton agod makahatag kita sing lugpay? (b) Paano mo malugpayan ang isa nga nakahibalo na sang Kasulatan?

21 Kon nahibaluan mo nga ang isa sa sulod ukon sa guwa sang Cristianong kongregasyon nagapangalisod, indi ka bala sigurado kon kaisa kon ano ang imo isiling ukon himuon? Ang Griegong tinaga nga masunson ginabadbad nga “lugpay” sa Biblia literal nga nagakahulugan sing “pagtawag pakadto sa imo tupad.” Ang matuod nga manuglugpay nagakahulugan nga madali ka palapitan sang mga nagapangalisod.​—⁠Hulubaton 17:17.

22 Kamusta naman kon ang tawo nga luyag mo lugpayan nakahibalo na sang ginasiling sang Biblia tuhoy sa kamatayon, gawad, kag pagkabanhaw? Ang presensia mismo sang isa ka abyan nga may pareho sa imo sing mga pagtuluuhan makalulugpay. Kon luyag niya maghambal, pamatii sia. Indi pagbatyaga nga kinahanglan ka maghambal. Kon ginabasa ang mga kasulatan, tamda ini subong mga ekspresyon sang Dios nga nagapabakod sang tagipusuon ninyo nga duha. Ipabutyag ang inyo mabakod nga pagsalig sa kapat-uran sang ginasaad sini. Paagi sa pagpakita sing diosnon nga kaawa kag pagpaambit sing hamili nga mga kamatuoran sang Pulong sang Dios, mabuligan mo ang mga nagapangalisod nga makatigayon sing kalugpayan kag kusog gikan sa “Dios sang tanan nga lugpay,” si Jehova.​—⁠2 Corinto 1:3.

[Nota]

^ par. 3 Tan-awa ang mga libro nga Ang Ihibalo nga Nagadul-ong sa Kabuhi nga Walay Katapusan, kapitulo 8; Reasoning From the Scriptures, pahina 393-400, 427-31; Is There a Creator Who Cares About You?, kapitulo 10; kag ang brosyur nga Nagaulikid Gid Bala ang Dios sa Aton?

Ano ang Komento Mo?

• Sin-o ang ginabasol sang madamo nga tawo sa mga kalamidad, kag paano naton sila mabuligan?

• Ano ang mahimo naton agod buligan ang iban nga makabenepisyo sing bug-os gikan sa lugpay nga ginahatag sang Biblia?

• Ano nga mga kahimtangan ang nagahatag sing kalisod sa madamo sa inyo lugar, kag paano mo sila malugpayan?

[Mga Pamangkot sa Pagtinuon]

[Mga retrato sa pahina 23]

Pagpaambit sing mensahe nga makahatag sing matuod nga lugpay sa tion sang kalisdanan

[Credit Line]

Refugee camp: UN PHOTO 186811/J. Isaac

[Retrato sa pahina 24]

Ang presensia mismo sang isa ka abyan makalugpay