Mga Pamatan-on—⁠Indi Pagkalimtan ni Jehova ang Inyo mga Binuhatan!

“Ang Dios indi di-matarong nga malipat sa inyo binuhatan kag sa gugma nga ginpakita ninyo tungod sa iya ngalan, nga nag-alagad kamo sa mga balaan kag padayon nga nagaalagad.”​​—⁠HEBREO 6:⁠10.

1. Paano ginapakita sang mga tulun-an sa Biblia nga Hebreo kag Malaquias nga ginaapresyar ni Jehova ang imo pag-alagad?

NAKAHIMO ka na bala sing isa ka maayo nga buhat para sa isa ka abyan kag wala ka ginpasalamatan? Masaklaw gid ikaw kon ang isa ka maalwan nga buhat ginapasapayanan ukon, malain pa, malipatan sing bug-os. Apang, tuhay gid kon maghatag kita sing bug-os tagipusuon nga pag-alagad kay Jehova! Ang Biblia nagasiling: “Ang Dios indi di-matarong nga malipat sa inyo binuhatan kag sa gugma nga ginpakita ninyo tungod sa iya ngalan, nga nag-alagad kamo sa mga balaan kag padayon nga nagaalagad.” (Hebreo 6:10) Hunahunaa kon ano ang buot silingon sini. Kabigon gid ni Jehova nga isa ka buhat sang pagkadimatarong​​—⁠isa ka sala⁠​—⁠kon malipatan niya ang imo nahimo kag ang imo padayon  nga ginahimo sa pag-alagad sa iya. Daw ano sia ka mainapresyahon nga Dios!​​—⁠Malaquias 3:⁠10.

2. Ngaa pinasahi gid ang pag-alagad kay Jehova?

2 May yara ka isa ka pinasahi nga kahigayunan sa pagsimba kag sa pag-alagad sa sining mainapresyahon nga Dios. Sanglit mga anom ka milyon lamang ang imo mga masigkatumuluo kon ipaanggid sa mga anom ka bilyon ka tawo sa bug-os nga kalibutan, tumalagsahon gid ang imo pribilehiyo. Dugang pa, ang imo pagpamati kag pagbaton sa mensahe sang maayong balita nagapamatuod nga si Jehova nagapakita sing personal nga interes sa imo. Kay man, si Jesus nagsiling: “Wala sing tawo nga makakari sa akon luwas kon buyukon sia sang Amay, nga nagpadala sa akon.” (Juan 6:44) Huo, ginabuligan ni Jehova ang mga tawo sing indibiduwal agod makabenepisyo sa halad ni Cristo.

Pag-apresyar sa Imo Daku nga Pribilehiyo

3. Paano ang mga anak ni Kora nagpabutyag sing apresasyon sa pribilehiyo nga mag-alagad kay Jehova?

3 Subong sang ginpaathag sa nagligad nga artikulo, may yara ikaw isa ka pinasahi nga kahigayunan agod mapahalipay ang tagipusuon ni Jehova. (Hulubaton 27:11) Butang ini nga indi mo gid dapat pasapayanan. Sa isa sang ila inspirado nga mga salmo, ginpabutyag sang mga anak ni Kora ang ila apresasyon sa pribilehiyo nga mag-alagad kay Jehova. Aton mabasa: “Ang isa ka adlaw sa sulod sang imo mga luwang labi pa kaayo sa isa ka libo bisan diin. Ginpili ko nga magtindog sa atangan sang balay sang akon Dios sangsa magdayandayan sa mga layanglayang sang kalautan.”​​—⁠Salmo 84:10.

4. (a) Ngaa mahimo ginatamod sang iban ang pagsimba kay Jehova subong limitasyon sa ila kahilwayan? (b) Sa anong paagi ginapakita ni Jehova nga nalangkag sia nga talupangdon kag padyaan ang iya mga alagad?

4 Amo bala sini ang ginabatyag mo sa imo pribilehiyo nga mag-alagad sa imo langitnon nga Amay? Matuod nga kon kaisa daw ginalimitehan sang pagsimba kay Jehova ang imo kahilwayan. Matuod nga ang pagsunod sa mga prinsipio sang Biblia nagakinahanglan sing pagsakripisyo sang kaugalingon. Apang, marealisar mo sa ulihi nga ang bisan ano nga ginapangabay ni Jehova sa imo para sa imo kaayuhan. (Salmo 1:​1-3) Dugang pa, makita ni Jehova ang imo mga panikasog kag ginapakita niya ang iya apresasyon sa imo katutom. Sa pagkamatuod, si Pablo nagsulat nga si Jehova “manugpadya sadtong hanuot nga nagapangita sa iya.” (Hebreo 11:⁠6) Nagapangita si Jehova sing mga kahigayunan sa paghimo sini. Ang isa ka matarong nga manalagna sa dumaan nga Israel nagsiling: “Tuhoy kay Jehova, ang iya mga mata nagapanghulonghulong sa bug-os nga duta agod ipakita ang iya kusog para sa ila nga ang tagipusuon himpit sa iya.”​​—⁠2 Cronica 16:9.

5. (a) Ano ang isa sa maayo gid nga mga paagi nga mapakita mo nga ang imo tagipusuon himpit kay Jehova? (b) Ngaa daw mabudlay ang pagpakighambal sa iban tuhoy sa imo pagtuluuhan?

5 Ang isa sa maayong mga paagi nga mapakita mo nga himpit ang imo tagipusuon kay Jehova amo ang pagpakighambal sa iban tuhoy sa iya. Nakahigayon ka na bala nga magpakighambal sa pila sang imo mga kabutho tuhoy sa imo pagtuo? Sa primero, mahimo nga daw makakululba nga himuon ini, kag mahimo nga daw mahadlukan ka sa paghunahuna lang sini. ‘Ano kon kadlawan  nila ako?’ mahimo ipamangkot mo. ‘Ano kon hunahunaon nila nga kalatingalahan ang akon relihion?’ Ginkilala ni Jesus nga indi tanan nga tawo mamati sa mensahe sang Ginharian. (Juan 15:20) Apang, wala ini nagakahulugan nga ikaw pat-od nga yagutaon kag sikwayon. Sa kabaliskaran, madamo nga Saksi nga mga pamatan-on ang nakasapo sing mga pamatan-on nga nagapamati sa ila kag gintahod pa gani sila bangod sang ila pagtindog sa ila ginapatihan.

“Buligan Ka ni Jehova”

6, 7. (a) Paano ang isa ka 17-anyos nga dalagita nakapanaksi sa iya mga kabutho? (b) Ano ang natun-an mo gikan sa eksperiensia ni Jennifer?

6 Apang paano ka makatipon sing kaisog nga maghambal tuhoy sa imo pagtuluuhan? Ngaa indi ka mamat-od nga mangin bunayag kag prangka kon pamangkuton ka sang mga tawo tuhoy sa imo relihion? Binagbinaga ang eksperiensia sang 17-anyos nga si Jennifer. “Nagapanyaga ako sadto sa eskwelahan. Natabuan nga ginahambalan sang mga dalagita sa akon lamesa ang relihion, kag ginpamangkot ako sang isa sa mga dalagita kon ano ang akon relihion,” siling niya. Ginkulbaan bala si Jennifer sa pagsabat? “Huo,” baton niya, “bangod wala ko mapat-od kon ano ang mangin reaksion nila.” Gani ano ang ginhimo ni Jennifer? “Ginsugiran ko ang mga dalagita nga isa ako sa mga Saksi ni Jehova,” padayon niya. “Sang primero daw nakibot sila. Mahimo gid nga nagapati sila nga ang mga Saksi ni Jehova kalatingalahan nga mga tawo. Gani ginpamangkot nila ako, kag natadlong ko ang pila ka sayop nga pagpati nila tuhoy sa mga Saksi. Bisan pagkatapos sadto nga adlaw, ginapalapitan ako kon kaisa sang iban sa ila agod mamangkot.”

7 Naghinulsol bala si Jennifer nga ginhimuslan niya ang kahigayunan nga maghambal tuhoy sa iya ginapatihan? Wala gid! “Maayo gid ang pamatyag ko pagkatapos ko panyaga,” siling niya. “Nahangpan na sadtong mga dalagita kon sin-⁠o gid ang mga Saksi ni Jehova.” Ang laygay karon ni Jennifer simple lamang: “Kon nabudlayan ka nga magpanaksi sa imo mga kabutho ukon mga manunudlo, mangamuyo sing malip-ot nga pangamuyo. Buligan ka ni Jehova. Malipay ka nga ginhimuslan mo ang kahigayunan sa pagpanaksi.”​​—⁠1 Pedro 3:⁠15.

8. (a) Paano ang pangamuyo nakabulig kay Nehemias sang mag-utwas ang wala ginapaabot nga kahimtangan? (b) Ano ang pila ka kahimtangan sa eskwelahan nga mahimo kinahanglan ka mangamuyo kay Jehova sing malip-ot kag mahipos nga pangamuyo?

8 Talupangda nga ginarekomendar ni Jennifer ang ‘pagpangamuyo sing malip-ot nga pangamuyo’ kay Jehova kon mag-utwas ang kahigayunan nga makapanaksi ka tuhoy sa imo pagtuluuhan. Amo gid sini ang ginhimo ni Nehemias, ang manugtagay sang Persianhon nga si Hari Artajerjes, sang mag-utwas ang wala ginapaabot nga kahimtangan. Bal-anon gid nga masinulub-on si Nehemias bangod ginpahibalo sia tuhoy sa kahimtangan sang mga Judiyo kag nabatian niya nga guba ang mga pader kag mga gawang sang Jerusalem. Natalupangdan sang hari nga daw indi mahim-os si Nehemias, gani ginpamangkot niya si Nehemias kon ano ang iya problema. Antes magsabat, nangamuyo anay si Nehemias agod mangayo sing panuytoy. Nian maisugon nga nangayo sia sing pahanugot nga pabalikon sia sa Jerusalem agod magbulig sa pagpatindog liwat sa napukan nga siudad. Gintugutan ni Artajerjes ang pangabay ni Nehemias. (Nehemias 2:​1-8) Ang leksion? Kon ginanerbios ka kon mag-utwas ang kahigayunan nga makapanaksi ka tuhoy sa imo pagtuluuhan, indi pagpatumbayai ang imo kahigayunan nga makapangamuyo sing hipos. ‘Itugyan ninyo kay Jehova ang tanan ninyo nga kabalaka,’ sulat ni Pedro, “kay sia nagaulikid sa inyo.”​​—⁠1 Pedro 5:⁠7; Salmo 55:22.

‘Handa sa Pagpangapin’

9. Paano ang 13-anyos nga si Leah nakapahamtang sing 23 ka kopya sang Young People Ask nga libro?

9 Binagbinaga ang isa pa ka eksperiensia. Si Leah, 13 anyos, nagabasa sang libro nga Questions Young People Ask​​—⁠Answers That Work⁠ * sa tion sang tigpalanyaga sa eskwelahan. “Ginatan-aw ako sang iban,” siling niya, “kag wala magdugay nagkaladto sa likod ko ang isa ka kadam-an. Namangkot sila kon ano nga libro ang ginabasa ko.” Sa paghingapos sang adlaw, apat ka dalagita ang nangayo kay Leah sing Young People Ask nga libro. Ginpakita sining mga dalagita ang libro sa iban, kag luyag man nila makatigayon sing isa ka kopya. Sa sulod sang madason pa nga mga semana,  nakapahamtang si Leah sing 23 ka kopya sang Young People Ask nga libro sa iya mga kabutho kag ila mga abyan. Nangin mahapos bala kay Leah ang paghambal sang primero nga mamangkot ang iban tuhoy sa libro nga ginabasa niya sadto? Indi gid! “Sang primero, ginkulbaan ako,” baton niya. “Apang, nangamuyo ako, kag nahibaluan ko nga upod ko si Jehova.”

10, 11. Paano nabuligan sang isa ka dalagita ang isa ka Sirianhon nga pangulo sang hangaway nga makilala si Jehova, kag ano nga mga pagbag-o ang ginhimo niya pagkatapos sini?

10 Mahimo nga ang eksperiensia ni Leah magapahanumdom sa imo sang kaanggid nga kahimtangan sang isa ka dalagita nga Israelinhon nga gindala nga bihag sa Siria. Si Naaman, nga isa ka Sirianhon nga pangulo sang hangaway, may aro. Mahimo nga ang iya asawa amo ang nag-umpisa sang pagsugilanunay amo nga naghambal ining dalagita tuhoy sa iya pagtuo. “Kon ang agalon ko lamang yara sa atubangan sang manalagna sa Samaria!” siling niya. “Nian ayuhon niya ang iya aro.”​​—⁠2 Hari 5:​1-3.

11 Bangod sang kaisog sining dalagita, nahibaluan na ni Naaman nga “wala sing Dios bisan diin sa duta kundi sa Israel.” Nagpamat-od pa gani sia nga “indi na maghalad sing halad nga sinunog sa iban nga mga dios kundi kay Jehova.” (2 Hari 5:​15, 17) Ginpakamaayo gid ni Jehova ang kaisog sadtong dalagita. Sarang ini mahimo sang Dios kag himuon man niya ini sa mga pamatan-on karon. Napamatud-an ini ni Leah. Sang ulihi, pila ka kabutho  niya ang nagpalapit sa iya kag ginsugiran sia nga nakabulig ang Young People Ask nga libro sa ila pamatasan. “Nalipay ako,” siling ni Leah, “bangod nahibaluan ko nga ginabuligan ko ang iban nga makatuon sing dugang pa tuhoy kay Jehova kag ginabuligan sila nga bag-uhon ang ila kabuhi.”

12. Paano ikaw mapalig-on nga pangapinan ang imo pagtuluuhan?

12 Maeksperiensiahan mo man ang mga naeksperiensiahan nanday Jennifer kag Leah. Sunda ang laygay ni Pedro, nga nagsulat nga subong isa ka Cristiano dapat ka ‘handa pirme sa pagpangapin sa tagsa nga nagapangayo sa imo sing pangatarungan tuhoy sa paglaum nga yara sa imo, apang ginahimo ini nga may malulo nga buot kag daku nga pagtahod.” (1 Pedro 3:15) Paano mo mahimo ini? Iluga ang ginhimo sang unang-siglo nga mga Cristiano nga nangamuyo kay Jehova nga buligan sila sa pagbantala nga may “bug-os nga kasidla.” (Binuhatan 4:29) Nian, maisugon nga isugid sa iban ang imo pagtuluuhan. Mahimo nga makibot ka sa mangin mga resulta. Dugang pa, pahalipayon mo ang tagipusuon ni Jehova.

Mga Video kag Pinasahi nga mga Proyekto

13. Ano nga mga kahigayunan ang ginhimuslan sang pila ka pamatan-on agod makapanaksi? (Tan-awa ang mga kahon sa pahina 20 kag 21.)

13 Madamo nga mga pamatan-on ang nagpaathag sang ila pagtuo sa mga kabutho ukon sa mga manunudlo paagi sa paggamit sa mga video. Kon kaisa, ang mga proyekto sa eskwelahan nagbukas man sing kahigayunan nga maghatag sing kadayawan kay Jehova. Halimbawa, duha ka 15-anyos nga mga solterito, lunsay mga Saksi ni Jehova, ang nakabaton sing asaynment subong bahin sang ila klase sa world history nga magsulat sing report tuhoy sa mga relihion sa kalibutan. Nagbuligay ining duha ka solterito sa pagsulat sang ila report tuhoy sa mga Saksi ni Jehova, nga ginagamit ang libro nga Jehovah’s Witnesses​​—⁠Proclaimers of God’s Kingdom subong kuluhaan sang ila impormasyon.⁠ * Nagpresentar man sila sing lima ka minutos nga oral nga report. Pagkatapos sang ila report, madamo sing ginpamangkot ang manunudlo kag ang mga estudyante amo kon ngaa nagdugay ang duha ka solterito sa  atubangan sang klase sing 20 minutos pa. Mga pila ka semana pagkatapos sini, padayon gihapon nga nagpamangkot ang ila mga klasmeyt tuhoy sa mga Saksi ni Jehova!

14, 15. (a) Ngaa ang kahadlok sa tawo isa ka siod? (b) Ngaa dapat may kompiansa ka sa pagpaambit sang imo mga pagtuluuhan sa iban?

14 Subong ginapakita sang nagligad nga mga eksperiensia, daku nga mga pagpakamaayo ang maeksperiensiahan mo kon isugid mo sa iban ang tuhoy sa imo mga pagtuluuhan kag mga pagpati subong isa sang mga Saksi ni Jehova. Indi pagtuguti ang kahadlok sa tawo nga idingot sa imo ang pribilehiyo kag kalipay nga mabuligan ang iban nga makilala si Jehova. Ang Biblia nagasiling: “Ang pagkurog sa mga tawo nagadala sing siod, apang sia nga nagasalig kay Jehova pagaamligan.”​​—⁠Hulubaton 29:25.

15 Dumduma nga subong isa ka Cristianong pamatan-on, may yara ikaw sing butang nga ginakinahanglan gid sang imo mga katubotubo​​—⁠ang labing maayo nga pagkabuhi karon kag ang saad nga kabuhi nga walay katapusan sa palaabuton. (1 Timoteo 4:⁠8) Sing makawiwili, sa Estados Unidos​​—⁠diin mahimo hunahunaon mo nga ang mga tawo sa kabilugan indi masinapakon ukon indi relihioso⁠​—⁠ginpakita sang isa ka surbe didto nga mga katunga sang mga pamatan-on ang serioso gid sa relihion, kag ikatlo nga bahin ang nagsiling nga ang relihioso nga pagtuo amo “ang labing importante nga impluwensia” sa ila kabuhi. Mahimo nga amo man sini ang kahimtangan sa madamo pa nga mga bahin sang kalibutan. Gani, mahimo gid nga ang imo mga katubotubo sa eskwelahan malipay sa pagpamati sa imo isugid sa ila tuhoy sa Biblia.

Subong Isa ka Pamatan-on, Mangin Suod kay Jehova

16. Paano mo mapahamut-an si Jehova luwas sa pagpakighambal sa iban tuhoy sa iya?

16 Sa pagkamatuod, agod mapahalipay mo ang tagipusuon ni Jehova indi ka lamang makighambal sa iban tuhoy kay Jehova. Dapat mo man sundon ang iya mga talaksan. Si apostol Juan nagsulat: “Amo ini ang kahulugan sang gugma sa Dios, nga sundon naton ang iya mga sugo; apang ang iya mga sugo indi mabug-at.” (1 Juan 5:⁠3) Mapamatud-an mo ini kon mangin suod ka kay Jehova. Paano mo mahimo ini?

17. Paano ikaw mangin suod kay Jehova?

17 Basaha ang Biblia kag ang napasad sa Biblia nga mga publikasyon. Sa dugang nga pagtuon mo tuhoy kay Jehova, mangin mas mahapos ang pagtuman sa iya kag ang pagpakighambal sa iban tuhoy sa iya. “Ang maayo nga tawo nagapaguwa sing maayo gikan sa maayo nga bahandi sang iya tagipusuon,” siling ni Jesus, “kay gikan sa kabuganaan sang tagipusuon nagapamulong ang iya baba.” (Lucas 6:45) Gani pun-a ang imo tagipusuon sing maayong mga butang. Ngaa indi magpahamtang sing mga tulumuron para sa sini? Ayhan mapauswag mo ang imo paghanda para sa mga miting sang kongregasyon sa dason nga semana. Ang imo masunod nga tulumuron mahimo amo ang pagpakigbahin paagi sa paghatag sing malip-ot apang tinagipusuon nga komento. Sa pagkamatuod, importante man nga iaplikar mo ang mga butang nga ginatun-an mo.​​—⁠Filipos 4:9.

18. Bisan pa kon pamatukan ka, sa ano ka makasalig?

18 Ang mga pagpakamaayo sang pag-alagad kay Jehova nagadugay​​—⁠sa pagkamatuod, walay katapusan. Matuod, mahimo nga kon kaisa ginapamatukan ka ukon ginayaguta bangod isa ikaw sa mga Saksi ni Jehova. Apang dumduma si Moises. Ang Biblia nagasiling nga “gintulok niya sing maayo ang balos nga padya.” (Hebreo 11:24-​26) Makasalig ka man nga padyaan ka ni Jehova bangod sang imo pagpanikasog nga makatuon tuhoy sa iya kag makighambal tuhoy sa iya. Sa pagkamatuod, indi gid sia ‘malipat sa imo binuhatan kag sa gugma nga ginpakita mo tungod sa iya ngalan.’​​—⁠Hebreo 6:⁠10.

[Mga nota]

^ par. 9 Ginbalhag sang mga Saksi ni Jehova.

^ par. 13 Ginbalhag sang mga Saksi ni Jehova.

Madumduman Mo Bala?

• Ngaa mapat-od mo nga ginapabaloran ni Jehova ang imo pag-alagad?

• Ano nga mga metodo sang pagpanaksi sa eskwelahan ang nasapwan sang iban nga madinalag-on?

• Paano ikaw mapalig-on nga magpanaksi sa imo mga klasmeyt?

• Paano ikaw mangin suod kay Jehova?

[Mga Pamangkot sa Pagtinuon]

[Kahon/Mga retrato sa pahina 20]

Bisan ang mga Bata Pa Nagadayaw kay Jehova!

Bisan ang mga bata pa nakapanaksi sa eskwelahan. Binagbinaga ining mga eksperiensia.

Ang klase sang ikalima nga grado sang dies-anyos nga si Amber nagabasa sang libro tuhoy sa pagsalakay sang mga Nazi sa mga Judiyo sa tion sang Bug-os Kalibutan nga Inaway II. Namat-od si Amber nga dalhon sa iya manunudlo ang video nga Purple Triangles. Nakibot ang manunudlo sa paghibalo nga ginhingabot man gali ang mga Saksi ni Jehova sang panahon sang mga Nazi. Ginpatan-aw sang manunudlo ang video sa bug-os nga klase.

Ang otso-anyos nga si Alexa nagsulat sa iya klase nga nagapaathag kon ngaa indi sia makapakigbahin sa ila pagsaulog sing Krismas. Nagdayaw gid ang manunudlo amo kon ngaa ginpabasa niya kay Alexa ang iya sulat sa klase kag sa duha pa ka klase! “Gintudluan ako nga tahuron ang iban nga tuhay sing pagtuluuhan sa akon,” siling niya sa konklusion sang iya sulat, “kag nagapasalamat ako sa inyo bangod ginatahod ninyo ang akon desisyon nga indi magsaulog sing Krismas.”

Wala pa lang madugay nga nakasulod si Eric sa una nga grado, gindala niya sa eskwelahan Ang Akon Libro sang mga Sugilanon sa Biblia kag naglisensia sia nga ipakita ini sa iya mga klasmeyt. “May mas maayo nga ideya ako,” siling sang iya manunudlo. “Ngaa indi ka magbasa sing isa ka sugilanon sa klase?” Ginhimo ini ni Eric. Pagkatapos, ginpangabay niya ang tanan nga luyag makatigayon sing isa ka kopya sang libro nga ibayaw ang ila kamot. Napulog-walo ka tawo​—⁠lakip ang manunudlo⁠​—⁠ang nagbayaw sang ila kamot! Ginabatyag karon ni Eric nga may yara sia pinasahi nga teritoryo nga mapanaksihan.

Ang nuebe-anyos nga si Whitney nagpasalamat bangod sa brosyur nga Jehovah’s Witnesses and Education.⁠ * “Masami nga ginahatagan ni Nanay sini nga brosyur ang akon mga manunudlo kada tuig,” siling niya, “apang sini nga tuig ako mismo ang naghimo sini. Bangod sa brosyur, ginrekomendar ako sang akon manunudlo nga mangin ‘estudyante sang semana.’”

[Nota]

^ par. 56 Ang tanan nga publikasyon nga ginsambit ginabalhag sang mga Saksi ni Jehova.

[Kahon/Mga retrato sa pahina 21]

Mga Kahimtangan nga Gingamit sang Iban sa Paghambal Tuhoy sa Ila Pagtuo

Sang ginpahatag sing report ukon proyekto sa eskwelahan, ginpili sang iban ang isa ka tema nga makapanaksi sila

Ginhatagan sang iban nga mga pamatan-on ang ila manunudlo sing video ukon publikasyon nga may kaangtanan sa isa ka tema nga ginahambalan sa klase

Sang nagabasa ang iban nga mga pamatan-on sang Biblia ukon isa ka napasad sa Biblia nga publikasyon sa tion sang recess, ginpalapitan sila sang iban nga mga pamatan-on kag namangkot

[Retrato sa pahina 18]

Mahimo makabulig ang mga eksperiensiado nga hanason ang mga pamatan-on sa pag-alagad kay Jehova