Magsalig kay Jehova sa Bug-os Mo nga Tagipusuon

“Ang mga nakakilala sang imo ngalan magasalig sa imo.”​—⁠SALMO 9:10.

1, 2. Ano ang pila ka butang nga ginasaligan sing walay pulos sang mga tawo para sa kalig-unan?

SA KARON nga madamo nga butang ang nagapahamtang sa katalagman sang aton kaayuhan, natural lamang nga mangita kita sing isa ka persona ukon isa ka butang nga makahatag sa aton sing kalig-unan. Ang pila nagahunahuna nga may kalig-unan ang ila palaabuton kon mas madamo ang ila kuwarta, apang ang matuod, ang kuwarta indi gid masaligan nga dalangpan. Ang Biblia nagasiling: “Ang nagasalig sa iya manggad​—⁠sia mapukan.” (Hulubaton 11:28) Ang iban naman nagasalig sa tawhanon nga mga gumalahom, apang bisan ang labing maayo sa ila nagahimo sing mga kasaypanan. Kag sa ulihi, tanan sila mapatay. Sing maalamon, ang Biblia nagasiling: “Dili kamo magsalig sa mga dungganon, ukon sa anak sang dutan-on nga tawo, nga sa iya wala sing kaluwasan.” (Salmo 146:⁠3) Ining inspirado nga mga pinamulong nagapaandam man sa aton nga indi magsalig sa aton kaugalingon nga mga panikasog. Kita man ‘mga anak sang dutan-on nga tawo.’

2 Ginmulay ni manalagna Isaias ang mga lider sang pungsod sang Israel sang panahon niya bangod nagsalig sila sa “butig nga dalangpan.” (Isaias 28:15-​17) Sa pagpangita nila sing dalangpan, nakig-alyansa sila sa politika sa kaingod nga mga pungsod. Ini nga mga pagpakig-alyansa indi  masaligan​—⁠isa ka kabutigan. Sing kaanggid, madamo nga mga lider sang relihion sa karon ang nagapakig-abyan sa politikal nga mga lider. Ini nga mga pagpakig-alyansa mangin “kabutigan” man. (Bugna 17:​16, 17) Indi ini magahatag sing dayon nga kalig-unan.

Ang Maayong mga Halimbawa Nanday Josue kag Caleb

3, 4. Paano nangin tuhay ang report nanday Josue kag Caleb sa napulo ka lampitaw nga kaupod nila?

3 Busa, diin kita makasapo sing kalig-unan? Sa ginsaligan man nanday Josue kag Caleb sang panahon ni Moises. Wala madugay pagkatapos mahilway ang Israel gikan sa Egipto, handa na ang pungsod sa pagsulod sa Canaan, ang Ginsaad nga Duta. Napulog-duha ka lalaki ang ginpadala agod maglampitaw sa duta, kag pagkatapos sang 40 ka adlaw, nagpauli sila agod magreport. Duha lamang ka espiya, sanday Josue kag Caleb, ang naghambal nga magamadinalag-on ang Israel sa Canaan. Ang iban nagbaton nga ang duta matahom apang nagsiling: “Ang matuod amo nga ang mga tawo nga nagapuyo sa duta gamhanan, kag tuman ka daku ang napamakuran nga mga siudad . . . Indi kita makataklad batok sa mga tawo, bangod mas gamhanan sila sangsa aton.”​​—⁠Numeros 13:​27, 28, 31.

4 Nagpati ang mga Israelinhon sa napulo ka lampitaw kag hinadlukan sila, tubtob sa punto nga nagkumod sila batok kay Moises. Sang ulihi, sanday Josue kag Caleb nagsiling sing hanuot: “Ang duta nga amon ginlatas sa paglampitaw sa sini tama gid kaayo nga duta. Kon si Jehova nahamuot sa aton, nian pat-od gid nga pasudlon niya kita sa sining duta kag ihatag ini sa aton, ang duta nga ginailigan sing gatas kag dugos. Lamang nga indi kita magrebelde batok kay Jehova; kag kamo, indi ninyo pagkahadluki ang mga tawo sang duta.” (Numeros 14:​6-9) Apang, wala namati ang mga Israelinhon, kag subong resulta, wala sila gintugutan nga makasulod sa Ginsaad nga Duta sadto nga tion.

5. Ngaa naghatag sing maayo nga report sanday Josue kag Caleb?

5 Ngaa naghatag sing maayo nga report sanday Josue kag Caleb, samtang malain naman nga report ang ginhatag sang napulo ka lampitaw? Nakita sang 12 ang mabakod nga mga siudad kag malig-on nga mga pungsod. Kag husto ang ginsiling sang napulo nga indi madaug sang Israel ang duta. Nahibaluan man ini nanday Josue kag Caleb. Apang, ang napulo nagtan-aw sa mga butang pasad sa tawhanon nga pagtamod. Sa pihak nga bahin, sanday Josue kag Caleb nagsalig kay Jehova. Nakita nila ang iya gamhanan nga mga buhat sa Egipto, sa Mapula nga Dagat, kag sa tiilan sang Bukid Sinai. Ti, mga dekada sang ulihi bisan ang report lamang tuhoy sadtong mga buhat nagpahulag na kay Rahab sang Jerico nga itaya ang iya kabuhi para sa katawhan ni Jehova! (Josue 2:​1-​24; 6:​22-​25) Sanday Josue kag Caleb, nga nakasaksi sang mga binuhatan ni Jehova, nagsalig sing bug-os nga makig-away gihapon ang Dios para sa iya katawhan. Kap-atan ka tuig sang ulihi, nabindikar ang ila pagsalig sang ang isa ka bag-o nga kaliwatan sang mga Israelinhon, sa idalom sang pagpangulo ni Josue, nagmartsa pasulod sa Canaan kag ginsakop ang duta.

Kon Ngaa Dapat Kita Magsalig sing Bug-os kay Jehova

6. Ngaa nagaatubang karon sing mga pagtilaw ang mga Cristiano, kag diin sila dapat magsalig?

6 Sa sining “makahalanguyos nga mga tion nga mabudlay pakigbagayan,” kaangay sang mga Israelinhon, nagaatubang kita sing mga kaaway nga mas makusog pa sangsa aton. (2 Timoteo 3:⁠1) Nagaatubang kita sing moral, espirituwal, kag pisikal nga mga pagtilaw pa gani. Kon sa aton lamang kaugalingon, indi naton masarangan ini nga mga pagtilaw, bangod naghalin ini kay Satanas nga Yawa, nga mas labaw sa tawo. (Efeso 6:​12; 1 Juan 5:19) Busa, diin kita makatigayon sing bulig? Sa pangamuyo kay Jehova, ang isa ka matutom nga tawo sang dumaan nga tion nagsiling: “Ang mga nakakilala sang imo ngalan magasalig sa imo.” (Salmo 9:10) Kon kilala gid naton si Jehova kag nahangpan ang kahulugan sang iya ngalan, magasalig gid kita sa iya subong sang pagsalig nanday Josue kag Caleb.​​—⁠Juan 17:3.

7, 8. (a) Paano ang pagpanuga naghatag sa aton sing rason agod magsalig kay Jehova? (b) Ano nga mga rason ang ginahatag sang Biblia agod magsalig kay Jehova?

7 Ngaa dapat kita magsalig kay Jehova? Sing bahin, sanday Josue kag Caleb nagsalig kay Jehova bangod nakita nila ang mga pamatuod sang iya gahom. Nakita man naton ini nga mga pamatuod. Binagbinaga, subong halimbawa, ang mga buhat sang pagpanuga ni Jehova, lakip ang uniberso,  nga may binilyon ka galaksiya. Ang tuman kadaku nga pisikal nga mga puwersa nga kontrolado ni Jehova nagapamatuod nga sia, sa pagkamatuod, amo ang Labing Gamhanan. Samtang ginabinagbinag naton ang mga katingalahan sang pagpanuga, magaugyon gid kita kay Job, nga nagsiling tuhoy kay Jehova: “Sin-o ang makapugong sa iya? Sin-o ang magasiling sa iya, ‘Ano ang imo ginahimo?’” (Job 9:12) Ang matuod, kon si Jehova dampig sa aton, wala kita sing dapat kahadlukan sa bug-os nga uniberso.​​—⁠Roma 8:⁠31.

8 Binagbinaga man ang Pulong ni Jehova, ang Biblia. Ining indi mahubsan nga tuburan sang ihibalo sang Dios may gahom sa pagbulig sa aton nga malandas ang sayop nga mga buhat kag mapahisuno ang aton kabuhi sa kabubut-on ni Jehova. (Hebreo 4:12) Paagi sa Biblia nga nahibaluan naton ang ngalan ni Jehova kag nahangpan ang kahulugan sang iya ngalan. (Exodo 3:14) Nahibaluan naton nga sarang mahimo ni Jehova kon ano ang iya luyag​—⁠mangin isa ka mahigugmaon nga Amay, isa ka matarong nga Hukom, isa ka madinalag-on nga Hangaway⁠​—⁠agod matuman ang iya mga katuyuan. Kag makita naton kon paano pirme natuman ang iya mga pulong. Samtang ginatun-an naton ang Pulong sang Dios, makasiling kita, subong sang ginsiling sang salmista: “Nagsalig ako sa imo pulong.”​​—⁠Salmo 119:42; Isaias 40:⁠8.

9. Paano ang gawad kag ang pagkabanhaw ni Jesus nagapabakod sang aton pagsalig kay Jehova?

9 Ang gawad isa pa ka rason nga magsalig kay Jehova. (Mateo 20:28) Daw ano ka makalilipay nga ginpadala sang Dios ang iya Anak agod mapatay subong gawad para sa aton! Kag epektibo gid ang gawad. Nagatabon ini sang mga sala sang tanan nga katawhan nga may bunayag sing tagipusuon nga naghinulsol kag nagliso kay Jehova. (Juan 3:​16; Hebreo 6:​10; 1 Juan 4:​16, 19) Ang isa ka bahin sang proseso sa pagbayad sang gawad amo ang pagkabanhaw ni Jesus. Ini nga milagro, nga nasaksihan sang ginatos ka tawo, isa pa ka rason nga magsalig kay Jehova. Garantiya ini nga ang aton paglaum indi gid mapaslawan.​​—⁠Binuhatan 17:31; Roma 5:⁠5; 1 Corinto 15:​3-8.

10. Ano ang aton personal nga mga rason para magsalig kay Jehova?

10 Pila lang ini sa mga rason kon ngaa makasalig kag dapat kita magsalig sing bug-os kay Jehova. May madamo pa nga rason, ang pila sini personal. Halimbawa, sa pulupanag-on, nagaatubang kita sang mabudlay nga mga kahimtangan sa aton kabuhi. Samtang nagapangayo kita sang panuytoy ni Jehova sa pag-atubang sini, makita naton kon daw ano ka praktikal ini nga panuytoy. (Santiago 1:​5-8) Samtang labi pa gid ang pagsalig naton kay Jehova sa aton matag-adlaw nga pagkabuhi kag makita ang maayo nga mga resulta sini, labi pa gid nga nagabakod ang aton pagsalig sa iya.

Si David Nagsalig kay Jehova

11. Walay sapayan sang anong mga kahimtangan nga nagsalig si David kay Jehova?

11 Si David sang dumaan nga Israel isa sang nagsalig kay Jehova. Gin-atubang ni David ang mga pamahog ni Hari Saul, nga luyag magpatay sa iya, kag ang gamhanan nga mga hangaway nga Filistinhon, nga nagtinguha nga sakupon ang Israel. Apang, nalampuwasan niya ini kag nagmadinalag-on pa gani. Ngaa? Si David mismo nagpaathag:  “Si Jehova ang akon kapawa kag akon kaluwasan. Kay sin-o ako mahadlok? Si Jehova ang pamakod sang akon kabuhi. Kay sin-o ako makugmat?” (Salmo 27:⁠1) Magamadinalag-on man kita kon magsalig kita kay Jehova.

12, 13. Paano ginpakita ni David nga dapat kita magsalig kay Jehova bisan gamiton sang mga manugpamatok ang ila mga dila subong mga hinganiban batok sa aton?

12 Sang isa ka higayon si David nangamuyo: “Pamati, O Dios, sa akon kabalaka. Gikan sa kahadlok sa kaaway kabay nga amligan mo ang akon kabuhi. Kabay nga taguon mo ako gikan sa paghimbon sang mga malauton, gikan sa kagubot sang mga manugbuhat sang kasamaran, nga nagpatalom sang ila dila kaangay sang espada, nga nagtaya sang ila baslay, mapait nga pulong, sa pagpana gikan sa tago nga mga duog sa isa nga wala sing sala.” (Salmo 64:​1-4) Indi kita sigurado kon ano ang nagpahulag kay David nga isulat ining mga pulong. Apang nahibaluan naton nga sa karon, ang mga manugpamatok ‘nagapatalom man sang ila dila,’ ginagamit ang mga pulong subong hinganiban sa inaway. ‘Ginapana’ nila ang wala sing sala nga mga Cristiano, nagagamit sing ginapamulong ukon nasulat nga mga tinaga subong mga “baslay” sang kabutigan. Kon magsalig gid kita kay Jehova, ano ang mangin resulta?

13 Si David padayon nga nagsiling: “Pan-on dayon sila sang Dios. Nasamaran sila, kag ginpasandad nila ang isa. Apang ang ila dila batok sa ila kaugalingon. . . . Magakalipay ang mga matarong kay Jehova kag magadangop gid sa iya.” (Salmo 64:7-10) Huo, bisan pa ginapatalom sang mga kaaway ang ila dila batok sa aton, sa ulihi ang ‘ila dila mangin batok sa ila kaugalingon.’ Himuon sa ulihi ni Jehova nga mangin maayo ang resulta, agod yadtong nagasalig sa iya magakalipay sa iya.

Nabindikar ang Pagsalig ni Ezequias

14. (a) Walay sapayan sang anong makatalagam nga kahimtangan nga nagsalig si Ezequias kay Jehova? (b) Paano ginpakita ni Ezequias nga wala sia magpati sa mga kabutigan sang Asiria?

14 Si Hari Ezequias isa pa sadtong nabindikar ang pagsalig kay Jehova. Sa tion sang paghari ni Ezequias, ang gamhanan nga hangaway sang Asiria nagplano nga salakayon ang Jerusalem. Ini nga hangaway naglutos sang madamo nga iban nga mga pungsod. Nasakop gani sini ang mga siudad sang Juda tubtob nga Jerusalem na lang ang wala masakop, kag nagpahambog si Senaquerib nga sakupon man niya ini nga siudad. Paagi kay Rabsaces, nagsiling sia​—⁠sing husto⁠​—⁠nga ang pagsalig sa Egipto para sa bulig wala sing pulos. Apang, sia man nagsiling: “Indi magpalimbong sa imo Dios nga ginasaligan mo, nga nagasiling: ‘Ang Jerusalem indi pag-ihatag sa kamot sang hari sang Asiria.’” (Isaias 37:10) Apang, nahibaluan ni Ezequias nga si Jehova indi malimbungon. Gani nangamuyo sia, nga nagasiling: “O Jehova nga amon Dios, luwasa kami gikan sa iya [sang Asirianhon] kamot, agod nga ang tanan nga ginharian sang duta makahibalo nga ikaw, O Jehova, ang lamang nga Dios.” (Isaias 37:20) Namati si Jehova sa pangamuyo ni Ezequias. Sa isa ka gab-⁠i, ginpatay sang isa ka anghel ang 185,000 ka soldado sang Asiria. Naluwas ang Jerusalem, kag nagbiya si Senaquerib sa duta sang Juda. Ang tanan nga nakabati sini nga hitabo nakahibalo sang pagkagamhanan ni Jehova.

15. Ano lamang ang makabulig agod makahanda kita sa bisan anong mabudlay nga kahimtangan nga mahimo matabo sa aton sa sining indi malig-on nga kalibutan?

15 Sa karon, kaangay ni Ezequias, nagapakig-away man kita. Sa aton bahin, espirituwal ang aton pagpakig-away. Walay sapayan sini, subong espirituwal nga mga hangaway, kinahanglan palambuon naton ang kinahanglanon nga mga ikasarang agod makapabilin nga buhi sa espirituwal. Kinahanglan naton handaan ang mga pagsalakay agod madaug naton ini. (Efeso 6:​11, 12, 17) Sa sining indi malig-on nga kalibutan, madasig nga nagabag-o ang mga kahimtangan. Ang gamo mahimo matabo nga wala damha. Ang mga pungsod nga nakilal-an anay nga matinuguton sa mga tawo nga may tuhay nga relihion mahimo mangin di-matinuguton. Mangin handa kita sa bisan ano nga mahimo matabo kon, kaangay ni Ezequias, ginahanda naton ang aton kaugalingon paagi sa pagpalambo sing bug-os nga pagsalig kay Jehova.

Ano ang Buot Silingon sang Magsalig kay Jehova?

16, 17. Paano naton mapakita nga nagasalig kita kay Jehova?

16 Ang pagsalig kay Jehova indi sa hambal lamang. Nagadalahig ini sang aton tagipusuon kag ginapakita naton ini sa aton mga buhat. Kon nagasalig kita kay Jehova, magasalig kita sing bug-os sa iya Pulong, ang Biblia. Basahon naton ini adlaw-adlaw, pamalandungan ini, kag tugutan ini nga magtuytoy sang aton kabuhi. (Salmo 119:105) Ang pagsalig kay Jehova nagadalahig man sang pagsalig sa gahom sang balaan nga espiritu. Sa bulig sang balaan nga espiritu, mapalambo naton ang mga bunga nga kalahamut-an kay Jehova kag madula ang daw indi na gid mabag-o nga malain nga mga batasan. (1 Corinto 6:​11; Galacia 5:​22-​24) Sa amo, sa bulig sang balaan nga espiritu, nauntat sang madamo ang pagpanigarilyo ukon pagdroga. Nasikway sang iban ang imoral nga pagkabuhi. Huo, kon nagasalig kita kay Jehova, nagapanghikot kita sa iya kusog, indi sa aton kaugalingon nga kusog.​​—⁠Efeso 3:​14-​18.

17 Dugang pa, nagasalig kita kay Jehova kon nagasalig kita sa mga ginasaligan niya. Halimbawa, ginpaatipan ni Jehova sa “matutom kag mainandamon nga ulipon” ang dutan-on nga mga intereses sang Ginharian. (Mateo 24:45-​47) Wala kita nagatinguha nga magpanghikot sing independiente, kag ginakilala naton ini nga pagtangdo, kay nagasalig kita sa kahimusan ni Jehova. Dugang pa, ang mga gulang nagaalagad sa lokal nga Cristianong kongregasyon kag, suno kay apostol Pablo, gintangdo sila sang balaan nga espiritu. (Binuhatan 20:28) Paagi sa pagkooperar sa mga kahimusan sang mga gulang sa kongregasyon, ginapakita man naton nga nagasalig kita kay Jehova.​—⁠Hebreo 13:17.

Sunda ang Halimbawa ni Pablo

18. Paano ginasunod sang mga Cristiano karon ang halimbawa ni Pablo, apang sa ano sila wala nagasalig?

18 Madamo sing naatubang nga mga pag-ipit si apostol Pablo sa iya ministeryo, kasubong man naton. Sa iya adlaw ang Cristianismo ginpakalain sa mga awtoridad, kag kon kaisa gintinguhaan niya nga tadlungon yadtong sayop nga mga impresyon ukon ginpalig-on sing legal ang pagbantala nga hilikuton. (Binuhatan 28:19-​22; Filipos 1:⁠7) Sa karon, ginasunod sang mga Cristiano ang iya halimbawa. Kon posible, ginabuligan naton ang iban nga mahangpan ang aton hilikuton, nagagamit sing bisan ano nga paagi nga posible. Kag nagapanghikot kita agod pangapinan kag legal nga palig-unon ang maayong balita. Apang, wala kita nagasalig sing bug-os sa sining mga panikasog, bangod wala naton ginatamod ang aton kadalag-an ukon kapaslawan nga nagadepende sa pagdaug naton sa mga kaso sa korte ukon sa pagtigayon sing paborable nga publisidad. Sa baylo, nagasalig kita kay Jehova. Nadumduman naton ang iya pagpalig-on sa dumaan nga Israel: “Ang inyo kusog yara sa pagpabilin lamang nga malinong kag may pagsalig.”​—⁠Isaias 30:15.

19. Sang ginhingabot, paano nabindikar ang pagsalig sang aton mga kauturan kay Jehova?

19 Sa pila ka tion sa aton moderno nga maragtas, ang aton hilikuton gindumilian sa Nasidlangan kag Nakatundan nga Europa, sa mga bahin sang Asia kag Aprika, kag sa mga pungsod sa Bagatnan kag Aminhan nga Amerika. Nagakahulugan bala ini nga nangin wala sing pulos ang aton pagsalig kay Jehova? Indi. Samtang ginapahanugutan niya kon kaisa ang masingki nga paghingabot para sa iya maayo nga katuyuan, mahigugmaon nga ginpabakod ni Jehova ang mga nag-antos sini nga mga paghingabot. Sang ginhingabot, madamo nga mga Cristiano ang nakahimo sing maayo nga rekord sang pagtuo kag pagsalig sa Dios.

20. Bisan pa nga makabenepisyo kita gikan sa legal nga mga kahilwayan, sa anong mga bahin indi gid dapat kita magkompromiso?

20 Sa pihak nga bahin, legal kita nga ginakilala sa kalabanan nga kadutaan, kag kon kaisa nakabaton kita sing paborable nga publisidad sa media. Nagapasalamat kita sa sini kag nahibaluan naton nga ini man nagabulig agod matuman ang katuyuan ni Jehova. Upod sa iya pagpakamaayo, ginagamit naton ang daku pa nga kahilwayan, indi agod pauswagon ang aton personal nga estilo sang pagkabuhi, kundi agod dayag kag bug-os nga maalagad si Jehova. Apang, wala gid naton ginakompromiso ang aton neutralidad, ginabuhinan ang aton pagbantala, ukon sa bisan ano nga paagi ginapahuyang ang aton pag-alagad kay Jehova agod lamang matigayon ang pagtahod sang mga awtoridad. Mga sakop kita sang Mesianikong Ginharian kag bug-os nga nagadampig sa pagkasoberano ni Jehova. Wala kita nagalaum sa sining sistema sang mga butang kundi sa bag-ong kalibutan, diin ang langitnon nga Mesianikong Ginharian amo lamang ang panguluhan nga magagahom sa duta. Indi matay-ug sang mga bomba, mga missile, ukon nuklear nga mga pagsalakay ini nga panguluhan ukon mapukan ini gikan sa langit. Indi ini sarang malutos kag himuon sini ang mga katuyuan ni Jehova.​​—⁠Daniel 2:​44; Hebreo 12:28; Bugna 6:2.

21. Determinado kita nga sundon ang ano nga dalanon?

21 Si Pablo nagsiling: “Indi kita ang sahi nga nagaisol padulong sa kalaglagan, kundi ang sahi nga may pagtuo padulong sa pagtipig nga buhi sa kalag.” (Hebreo 10:39) Busa, kabay nga tanan kita matutom nga mag-alagad kay Jehova tubtob sa katapusan. May rason gid kita agod magsalig sing bug-os kay Jehova sa karon kag sa walay katubtuban.​​—⁠Salmo 37:⁠3; 125:⁠1.

Ano ang Imo Natun-an?

• Ngaa nagdala sing maayo nga report sanday Josue kag Caleb?

• Ano ang pila ka rason kon ngaa dapat kita magsalig sing bug-os kay Jehova?

• Ano ang buot silingon sang pagsalig kay Jehova?

• Sa pagsalig kay Jehova, determinado kita nga manindugan sing ano?

[Mga Pamangkot sa Pagtinuon]

[Retrato sa pahina 15]

Ngaa naghatag sing maayo nga report sanday Josue kag Caleb?

[Mga retrato sa pahina 16]

Ang pagpanuga nagahatag sa aton sing mabakod nga rason agod magsalig kay Jehova

[Credit Line]

All three images: Courtesy of Anglo-Australian Observatory, photograph by David Malin

 [Retrato sa pahina 18]

Nagasalig kita kay Jehova kon nagasalig kita sa mga ginasaligan niya