Si Jehova—Isa ka Dios nga Takus Makilala

MAY nawasi ka ayhan nga importante nga butang sa kabuhi? Kon diutay lang ang imo nahibaluan tuhoy sa Dios, pat-od gid nga may nawasi ka. Ngaa? Bangod, subong sang natukiban sang minilyon ka tawo, ang pagkilala sa Dios sang Biblia nagahatag sing daku nga mga benepisyo sa kabuhi. Maagom gilayon ini nga mga benepisyo kag magapadayon pa tubtob sa palaabuton.

Luyag ni Jehova nga Dios, ang Awtor sang Biblia, nga makilala naton sia. Ang salmista nagsulat: “Agod makilala sang katawhan nga ikaw, nga ang ngalan amo si Jehova, ikaw lamang ang Labing Mataas sa bug-os nga duta.” Nahibaluan niya nga para sa aton kaayuhan kon makilala naton sia. “Ako, si Jehova, amo ang imo Dios, ang Isa nga nagatudlo sa imo agod makabenepisyo ka.” Paano kita makabenepisyo kon makilala naton si Jehova nga Dios, ang Labing Mataas?​​—⁠Salmo 83:18; Isaias 48:17.

Ang isa ka matuod nga benepisyo amo nga makatigayon kita sing panuytoy sa pag-atubang sa mga problema sa adlaw-adlaw, isa ka malig-on nga paglaum para sa palaabuton, kag malinong nga panghunahuna. Dugang pa, kon kilala naton sing maayo si Jehova, mapalambo naton ang tuhay nga pagtamod sa importante nga mga pamangkot nga ginaatubang sang mga tawo sa bug-os nga kalibutan karon. Ano ini nga mga pamangkot?

May Katuyuan Bala ang Imo Kabuhi?

Walay sapayan sang makatilingala nga pag-uswag sang tawo sa teknolohiya, ang mga pamangkot sang mga indibiduwal karon amo gihapon: ‘Ngaa yari ako diri? Sa diin ako nagapadulong? Ano ang katuyuan sang kabuhi?’ Kon indi masapwan sang isa ka tawo ang makaalayaw nga mga sabat, kulang sing tunay nga kahulugan ang iya kabuhi. Madamo bala sing mga tawo ang nakabatyag sini nga kakulangan? Ang isa ka panalawsaw nga ginhiwat sa Alemanya sang hingapusan sang dekada 90 nagpakita nga katunga sang mga ginpamangkot ang nagbatyag nga sa masami ukon kon kaisa, daw wala sing katuyuan ang kabuhi. Ayhan amo man sini ang kahimtangan sa duog nga imo ginapuy-an.

Kon wala sing katuyuan sa kabuhi, kulang sing sadsaran ang isa ka indibiduwal agod tukuran sang iya personal nga mga tulumuron. Madamo ang nagatinguha nga takpan ini nga kakulangan paagi sa pag-angkon sing isa ka madinalag-on nga karera ukon paagi sa pagtipon sing manggad. Sa gihapon, makatulublag ang pagbatyag sing walay-kapuslanan. Ang pagkawalay katuyuan sa kabuhi nagatublag gani sa iban tubtob sa punto nga indi na nila luyag nga mabuhi pa. Amo ini ang ginbatyag sang isa ka matahom nga dalaga nga, suno sa International Herald Tribune, nagdaku sa “tunga sang makahalawhaw nga manggad kag walay latid nga mga pribilehiyo.” Bisan pa maluho ang iya pagkabuhi, masubo sia kag nagbatyag nga wala sing padulungan ang iya kabuhi. Nag-inom sia sing mga bulong nga pangpatulog kag nasapwan na lang nga patay. Ayhan may nahibaluan ka nga iban pa nga mga tawo nga bangod man sang kasubo makaluluoy nga napatay.

Sa pihak nga bahin, nakabati ka na bala sang mga tawo nga nagasiling nga ang siensia makapaathag sa aton sang tanan nga butang nahanungod sa kabuhi? Ang Aleman nga semanal nga pamantalaan nga Die Woche nagapatalupangod: “Bisan pa mahimo nga matuod ang siensia, mahuyang  ini sa espirituwal. Daw tuman ka simple ang teoriya sang ebolusyon, kag bisan gani ang teoriya sang quantum physics upod ang paggamit sini sing masibod nga matematika agod ipaathag ang nagakatuhay nga mga kinaugali sang diutay nga mga partikulo, wala nagatanyag sing lugpay kag kasiguruhan.” Madamo ang napaathag sang mga natukiban sang siensia tuhoy sa nanuhaytuhay nga porma sang kabuhi kag kinaandan nga mga siklo kag mga proseso nga nagasakdag sang kabuhi. Apang, indi kita masugiran sang siensia kon ngaa yari kita diri kag kon diin kita nagapadulong. Kon sa siensia lang kita nagasandig, indi masabat ang aton mga pamangkot tuhoy sa katuyuan sang kabuhi. Ang resulta, subong sang ginreport sang pamantalaan nga Süddeutsche Zeitung, amo “ang lapnag nga pagkinahanglan sing pagtuytoy.”

Sin-o gid bala ang makahatag sini nga panuytoy kundi ang Manunuga lamang? Bangod kay sa pamuno sia ang nagbutang sang mga tawo sa duta, nakahibalo sia kon ngaa yari sila diri. Ang Biblia nagapaathag nga gintuga ni Jehova ang mga tawo agod puy-an ang duta kag tatapon ini, subong mga manug-atipan sini. Dapat ipabanaag sang mga tawo ang Iya mga kinaiya, kaangay sang hustisya, kaalam, kag gugma, sa tanan nila nga mga hilikuton. Sa tion nga mahangpan naton ang rason kon ngaa gintuga kita ni Jehova, mahibaluan naton kon ngaa yari kita diri.​​—⁠Genesis 1:​26-​28.

Ano ang Imo Mahimo?

Paano naman kon sang nagligad wala ka makasapo sing makaalayaw nga mga sabat sa mga pamangkot nga: ‘Ngaa yari ako diri? Sa diin ako nagapadulong? Ano ang katuyuan sang kabuhi?’ Ginarekomendar sang Biblia nga dapat mo makilala sing suod si Jehova. Sa pagkamatuod, si Jesus nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” Ginapalig-on ka man nga magpalambo sing diosnon nga mga kinaiya, ilabi na ang gugma, kag himuon mo nga personal nga tulumuron ang pagpuyo sa idalom sang nagapakari nga Mesianikong Ginharian sang Dios. Nian, makatigayon ka sing katuyuan sa imo kabuhi kag sing makalilipay kag sigurado nga paglaum sa palaabuton. Pat-od nga masabat ang importante nga mga pamangkot nga ginapaligban mo tubtob subong.​​—⁠Juan 17:⁠3; Manugwali 12:13.

Ano nga kinatuhayan ang mahimo sini? Nahibaluan gid ni Hans kon ano.⁠ * Sang nagligad nga mga tuig indi tanto kaathag ang iya pagpati sa Dios, apang wala sing impluwensia ang pagtuo ni Hans sa iya kabuhi. Nagpangalipay si Hans sa droga, imoral nga mga babayi, ginagmay nga krimen, kag mga motorsiklo. “Apang walay pulos ang kabuhi, indi gid makaalayaw,” paathag niya. Sang sia nagapangidaron sing mga 25 anyos, namat-od si Hans nga makilala sing personal ang Dios paagi sa mahalungon nga pagbasa sa Biblia. Sang makilala niya sing maayo si Jehova kag nahangpan kon ano gid ang katuyuan sang kabuhi, ginbag-⁠o ni Hans ang estilo sang iya pagkabuhi kag nagpabawtismo subong isa sa mga Saksi ni Jehova. Nagapangalagad sia sing bug-os tion sa sulod na sang nagligad nga napulo ka tuig. Tampad sia nga nagsiling: “Ang pag-alagad kay Jehova amo ang pinakamaayo nga paagi sang pagkabuhi. Wala na sing makalabaw pa sa sini. Ang pagkilala sing maayo kay Jehova naghatag sing katuyuan sa akon kabuhi.”

Sa pagkamatuod, ang katuyuan sang kabuhi indi amo lamang ang pamangkot nga ginakabalak-an sang madamo. Samtang nagalain ang kahimtangan sa kalibutan, madamo nga mga tawo ang ginatublag sing isa pa gid ka importante nga pamangkot.

Ngaa Natabo Ini?

Kon may malain nga matabo, masami nga isa lang ka pamangkot ang yara sa hunahuna sang biktima: Ngaa natabo ini? Ang emosyonal nga ikasarang sa paglandas sa malain nga natabo nasandig sing daku sa pagtigayon sing nagakaigo nga sabat sa sini nga pamangkot. Kon wala sing makaalayaw nga sabat nga makuha, padayon ang pag-antos sang biktima kag mahimo sia maghinakit. Binagbinagon naton subong halimbawa ang eksperiensia ni Bruni.

 “Napatay ang akon bata nga babayi pila ka tuig na ang nagligad,” paathag ni Bruni, nga isa ka iloy nga nagapangidaron na karon sing kapin sa 40 anyos. “Nagatuo ako sa Dios, gani nangayo ako sing lugpay sa lokal nga pari. Ginsugiran niya ako nga ginkuha sang Dios si Susanne kag gindala sa langit, diin isa na sia karon ka anghel. Wala lamang maguba ang akon kabuhi bangod napatay sia kundi ginkaugtan ko man ang Dios bangod sang pagkuha sa iya.” Ang kalisod kag pag-antos ni Bruni naglawig sing mga pila ka tuig. “Nian ginpakita sa akon sang isa sa mga Saksi ni Jehova gikan sa Biblia nga wala ako sing rason nga kaugtan ang Dios. Wala gindala ni Jehova si Susanne sa langit, kag indi sia isa ka anghel. Ang iya pagmasakit resulta sang pagkadihimpit sang tawo. Si Susanne nagakatulog sa kamatayon, nga nagahulat nga banhawon ni Jehova. Natun-an ko man nga gintuga niya ang mga tawo agod magpuyo sing walay katubtuban sa paraiso sa duta, kag malapit na ini matuman. Sang mahangpan ko na kon ano gid nga sahi sang Dios si Jehova, nangin suod ako sa iya kag amat-amat nga nadula ang akon kalisod.”​​—⁠Salmo 37:29; Binuhatan 24:15; Roma 5:⁠12.

Minilyon ka tawo ang naapektuhan sang sari-sari nga mga kabudlayan: personal nga trahedya, inaway, gutom, ukon kalamidad. Nahaw-asan si Bruni sang mahangpan niya sa Biblia nga indi si Jehova ang balasulon sa mga kabudlayan, nga wala gid niya gintuyo nga mag-antos ang katawhan, kag sa indi madugay dulaon na niya ang kalautan. Ang pagdugang mismo sang kalautan tanda nga nagakabuhi na kita subong sa “katapusan nga mga adlaw” sini nga sistema sang mga butang. Malapit na mag-abot ang aton tanan ginapaabot nga daku nga pagbag-o padulong sa mas maayo nga kahimtangan.​​—⁠2 Timoteo 3:​1-5; Mateo 24:​7, 8.

Pagkilala sing Maayo sa Dios

Si Hans kag si Bruni may yara anay indi maathag nga ideya tuhoy sa Dios. Nagatuo sila sa iya bisan diutay lang ang nahibaluan nila tuhoy sa iya. Sang maghinguyang sila sing tion nga makilala sing sibu si Jehova, ginpadyaan ang ila pagpaninguha. Nakatigayon sila sing nagakaigo nga sabat sa importante nga mga pamangkot naton karon. Naghatag ini sa ila sing malinong nga panghunahuna kag isa ka malig-on nga paglaum sa palaabuton. Amo man sini ang naeksperiensiahan sang minilyon nga mga sumilimba ni Jehova.

Ang pagkilala sing maayo kay Jehova nagaumpisa sa mahalungon nga pag-usisa sa Biblia, nga nagasugid sa aton tuhoy sa iya kag tuhoy sa kon ano ang iya ginapatuman sa aton. Amo sini ang ginhimo sang iban sang nahauna nga siglo. Ang istoryador kag doktor nga si Lucas nagsugid nga ang mga miembro sang Judiyo nga kongregasyon sa Berea, Gresya, ‘nagbaton sang pulong [halin kay Pablo kag kay Silas] nga may daku gid nga kalangkag sing hunahuna, nga ginausisa sing maayo ang Kasulatan adlaw-adlaw kon bala matuod gid ini nga mga butang.”​​—⁠Binuhatan 17:​10, 11.

Nagtipon man sa mga kongregasyon ang unang-siglo nga mga Cristiano. (Binuhatan 2:​41, 42, 46; 1 Corinto 1:​1, 2; Galacia 1:​1, 2; 2 Tesalonica 1:1) Amo man sa karon. Ang mga kongregasyon sang mga Saksi ni Jehova nagatipon sa mga miting nga gindesinyo agod buligan ang mga indibiduwal nga mangin suod pa kay Jehova kag magkalipay sa pag-alagad sa iya. May dugang pa nga benepisyo ang pagpakig-upod sa lokal nga mga Saksi. Bangod ang mga tawo amat-amat nga nagaanggid sa Dios nga ila ginasimba, ang mga Saksi ni Jehova nagapakita sing mga kinaiya​​—⁠bisan pa sa limitado nga paagi⁠​—⁠nga ginapakita mismo ni Jehova. Gani ang pagpakig-upod sa mga Saksi makabulig sa aton nga makilala sing labi pa si Jehova.​​—⁠Hebreo 10:​24, 25.

Daw nagapakita bala ini sing tuman nga pagpaninguha agod lang makilala sing maayo ang isa ka Persona? Kinahanglan gid ang pagpaninguha. Apang indi bala matuod man ini sa madamo nga mga butang sa kabuhi nga luyag mo maangkon? Hunahunaa ang panikasog nga ginahinguyang sang isa ka bantog nga atleta sa pag-ensayo. Halimbawa, si Jean-Claude Killy, isa ka atleta sang Pransia nga nakadaug sing bulawan nga mga medalya sa hampang nga skiing sa Olympics, naghambal tuhoy sa kon ano ang kinahanglan agod mangin madinalag-on sa internasyonal nga paindis-indis sa hampang: “Kinahanglan umpisahan mo ang pag-ensayo 10 ka tuig antes mag-entra sa Olympics kag planuhon ini sing mga tinuig kag panumdumon ini kada adlaw . . . Isa ini ka 365-dias-kada-tuig nga pagpangabudlay, sa mental kag sa pisikal.” Amo sini tanan nga tion kag kusog ang kinahanglan  para lang magpaindis-indis sa isa ka hampang nga mahimo maglawig sing napulo ka minuto! Mas daku pa​​—⁠kag mas nagadugay⁠​—⁠ang benepisyo nga makuha sa pagkilala sing maayo kay Jehova.

Isa ka Kaangtanan nga Padayon nga Nagasuod

Sin-o ang may gusto nga mawasi niya ang isa ka importante nga butang sa iya kabuhi? Wala gid. Gani, kon mabatyagan mo nga kulang sing tunay nga kahulugan ang imo kabuhi ukon luyag mo mahangpan kon ngaa nagaabot ang mga kalisdanan, nian mamat-od sing malig-on nga makilala sing maayo si Jehova, ang Dios sang Biblia. Ang pagtuon tuhoy sa iya makapauswag sang imo kabuhi sing padayon.

May katapusan bala ang aton pagtuon tuhoy kay Jehova? Yadtong mga nagaalagad sa iya sa sulod na sang mga dekada nagadayaw gihapon sa natun-an nila tuhoy sa iya kag sa bag-o nga mga butang nga padayon pa nila nga ginatun-an tuhoy sa iya. Ang pagtuon sini nga mga butang nagapahalipay sa aton kag nagapasuod sa aton sa iya. Kabay nga ang aton panghunahuna kaangay man kay apostol Pablo, nga nagsulat: “O pagkadalom sang kamanggaran kag kaalam kag ihibalo sang Dios! Pagkadimatungkad sang iya mga paghukom kag pagkadimausoy sang iya mga dalanon! Kay ‘sin-⁠o bala ang nakahibalo sang hunahuna ni Jehova, ukon sin-⁠o bala ang nangin manuglaygay niya?’”​​—⁠Roma 11:​33, 34.

[Nota]

^ par. 12 Gin-islan ang mga ngalan.

[Blurb sa pahina 5]

Ang mga indibiduwal nagapamangkot sing amo man gihapon nga mga pamangkot: ‘Ngaa yari ako diri? Sa diin ako nagapadulong? Ano ang katuyuan sang kabuhi?’

[Blurb sa pahina 6]

“Sang mahangpan ko na kon ano gid nga sahi sang Dios si Jehova, nangin suod ako sa iya”

[Blurb sa pahina 7]

“Ang pag-alagad kay Jehova amo ang pinakamaayo nga paagi sang pagkabuhi. Wala na sing makalabaw pa sa sini. Ang pagkilala sing maayo kay Jehova naghatag sing katuyuan sa akon kabuhi”