Mga Pamangkot Gikan sa mga Bumalasa

Ano ang buot silingon ni Pablo sang sia nagsiling: “Subong kasunson nga nagakaon kamo sining tinapay kag nagainom sa sining kopa”?

Nagapatuhoy sa paghiwat sa Memoryal sang kamatayon ni Jesus, si Pablo nagsulat: “Subong kasunson nga nagakaon kamo sining tinapay kag nagainom sa sining kopa, padayon nga ginabantala ninyo ang kamatayon sang Ginuo, tubtob nga magkari sia.” (1 Corinto 11:​25, 26) Ginahangop sang iban nga ang tinaga diri nga “kasunson” nagapakita nga dapat masami nga saulugon ang kamatayon ni Cristo, sa kahulugan nga madamong beses. Gani, ginasaulog nila ini sing madamong beses sa sulod sang isa ka tuig. Amo bala ini ang buot silingon ni Pablo?

Halos 2,000 ka tuig na ang nagligad sang gin-umpisahan ni Jesus nga hiwaton ang Memoryal sang iya kamatayon. Gani, ang pagsaulog sa Memoryal bisan makaisa lang sa kada tuig nagakahulugan nga ginhiwat na ini sing madamong beses sugod sang 33 C.⁠E. Apang, sa konteksto sang 1 Corinto 11:​25, 26, si Pablo wala nagabinagbinag sa kon daw ano kasunson, kundi kon paano hiwaton ang Memoryal. Sa orihinal nga Griego, wala sia naggamit sang tinaga nga pol·laʹkis, nga nagakahulugan “masunson” ukon “masami.” Sa baylo, gingamit niya ang tinaga nga ho·saʹkis, nga nagakahulugan “subong kasunson,” isa ka malaragwayon nga tinaga nga nagakahulugan “sa bisan ano nga tion,” “sa tagsa ka tion nga.” Buot silingon ni Pablo nga: ‘Sa tagsa ka tion nga ginahimo ninyo ini, ginabantala ninyo ang kamatayon sang Ginuo.’

Daw ano kasunson, nian, dapat saulugon ang Memoryal sang kamatayon ni Jesus? Nagakaigo nga saulugon ini sing makaisa lang kada tuig. Isa gid ini ka memoryal, kag ang mga memoryal masami nga ginahiwat makaisa kada tuig. Dugang pa, napatay si Jesus sa adlaw sang Judiyong Paskwa nga ginahiwat sing makaisa kada ka tuig. Sing nagakaigo, ginpatuhuyan ni Pablo si Jesus subong “Cristo nga aton paskwa,” bangod ginbuksan sang mahalaron nga kamatayon ni Jesus ang dalan padulong sa kabuhi para sa espirituwal nga Israel, subong nga ang una nga halad sang Paskwa nagluwas sa kabuhi sang mga panganay sang kinaugali nga mga Israelinhon sa Egipto kag nagbukas sang dalan agod mahilway ang pungsod sa pagkaulipon. (1 Corinto 5:⁠7; Galacia 6:16) Ini nga kaangtanan sa tuigan nga Judiyong Paskwa dugang pa nga pamatuod nga ang Memoryal sang kamatayon ni Jesus dapat hiwaton sing makaisa lang kada tuig.

Dugang pa, gin-angot ni Pablo ang kamatayon ni Jesus sa isa pa ka tuigan nga kapiestahan sang mga Judiyo, ang Adlaw sang Katumbasan. Sa Hebreo 9:​25, 26, mabasa naton: “Indi agod nga ihalad [ni Jesus] ang iya kaugalingon sing masunson, subong nga ang mataas nga saserdote nagasulod tuigtuig [sa Adlaw sang Katumbasan] sa balaan nga duog dala ang dugo nga indi iya. . . . Apang karon, ginpahayag niya ang iya kaugalingon sing makaisa gid lang sa katapusan sang mga sistema sang mga butang agod dulaon ang sala paagi sa paghalad sang iya kaugalingon.” Bangod gintal-usan sang halad ni Jesus ang halad sang tuigan nga Adlaw sang Katumbasan, nagakaigo nga hiwaton sing isa lang ka bes kada tuig ang Memoryal sang iya kamatayon. Wala sing Makasulatanhon nga rason agod hiwaton sing mas masunson pa sa sina ang Memoryal.

Nahisuno sa sini, ginasaysay sang istoryador nga si John Laurence von Mosheim nga kinaandan nga ginasaulog sang mga Cristiano sang ikaduhang siglo sa Asia Minor ang Memoryal sang kamatayon ni Jesus “sa kada ikanapulog-apat nga adlaw sang unang bulan sang mga Judiyo [Nisan].” Sang ulihi na lang nga mga tinuig nga nangin kinabatasan sa Cristiandad ang madamong beses nga paghiwat sini sa sulod sang isa ka tuig.