‘Dios Ko, Ngaa Gintugutan Mo Ini?’

MADUMDUMAN pa ni Ricardo nga nagapungko sila sang iya asawa, nga si Maria, sa hulot nga hululatan sang doktor.⁠ * Wala sila sing kaisog nga basahon ang mga resulta sang pinakaulihi nga medikal nga pag-eksamin kay Maria. Sang ulihi, ginbuksan ni Ricardo ang sobre, kag dalidali nila nga ginpasiplatan ang medikal nga termino sa report. Nakita nila ang tinaga nga “kanser,” kag naghibi sila sang mahangpan nila sing bug-os yadto nga tinaga.

“Mabuot gid ang doktor,” hinumdom ni Ricardo, “apang nahangpan niya nga serioso gid ang kahimtangan bangod pirme niya kami ginsingganan nga dapat kami magsalig sa Dios.”

Antes sugdan ang radiation therapy, natalupangdan sang doktor nga indi na makontrol ni Maria ang mga hulag sang iya tuo nga tiil. Ginpakita sang dugang pa nga mga pag-eksamin nga ang kanser naglab-ot na sa iya utok. Sa sulod lamang sang isa ka semana nga pagpabulong, ang radiation therapy gin-untat. Si Maria na-comatose kag napatay pagligad sang duha ka bulan. “Nalipay ako nga natapos na ang iya pag-antos,” siling ni Ricardo, “apang nahidlaw gid ako sa iya amo nga ginhandum ko nga kuntani mapatay man ako. Masami ako nagatu-aw sa Dios: ‘Ngaa gintugutan mo ini nga matabo?’”

Kon May Trahedya, May Madamo nga mga Pamangkot

Kaangay ni Ricardo, madamo nga tawo sa bug-os nga kalibutan ang napilitan nga atubangon ang kamatuoran tuhoy sa pag-antos. Ang mga inosente amo sa masami ang nagaantos. Handurawa lamang ang makapasakit-sa-dughan nga kasubo nga tuga sang wala untat nga armado nga mga inaway nga nagapapiot sa katawhan. Ukon binagbinaga ang kasakit nga ginabatyag sang di-maisip nga mga biktima sang panglugos, pag-abuso sa bata, kasingki sa pamilya, kag iban pa nga mga kalautan sang tawo. Sa bug-os nga maragtas daw wala sing katapusan ang inhustisya kag kasakit nga ginahimo sang mga lalaki kag mga babayi sa isa kag isa. (Manugwali 4:1-3) Yara man ang kalisang sang mga biktima sang kinaugali nga mga kalamidad ukon sang mga balatian sa emosyon, hunahuna, kag lawas. Indi katingalahan nga madamo ang nagapamangkot, “Ngaa ginatugutan sang Dios ini nga pag-antos?”

Bisan ang mga tawo nga may relihion nabudlayan nga atubangon ang pag-antos. Mahimo ginapalibugan mo man kon ngaa ginatugutan sang mahigugmaon kag labing gamhanan nga Dios nga mag-antos ang tawo. Ang makaalayaw kag matuod nga sabat sa sining makalilibog nga pamangkot importante para sa aton kalinungan kag sa aton kaangtanan sa Dios. Ginasabat ini sang Biblia. Palihug binagbinaga kon ano ang ginasiling sini subong ginapresentar sa masunod nga artikulo.

[Nota]

^ par. 2 Ang mga ngalan gin-islan.

[Mga retrato sa pahina 3]

Pirme kami ginsingganan sang doktor nga dapat kami magsalig sa Dios