“Magpalapit Kamo sa Dios”

“Magpalapit kamo sa Dios, kag magapalapit sia sa inyo.”​​—⁠​SANTIAGO 4:8.

1, 2. (a) Ano ang masami nga ginasiling sang mga tawo? (b) Ano ang ginpanugyan ni Santiago, kag ngaa kinahanglanon ini sadto?

“GOD with us.” Makita ini nga mga pulong sa pungsudnon nga mga emblema kag bisan gani sa mga uniporme sang mga soldado. Ang “In God we trust” gin-ukit sa madamo nga mga sensilyo kag papelon nga mga kuwarta sa karon. Ang mga tawo masami nga nagasiling nga suod ang ila kaangtanan sa Dios. Apang, magaugyon ka bala nga indi sa hambal lamang ukon sa pagpakita sing mga eslogan matigayon ining suod nga kaangtanan?

2 Ginapakita sang Biblia nga posible nga matigayon ang kaangtanan sa Dios. Apang kinahanglan ang panikasog. Bisan gani ang pila ka hinaplas nga mga Cristiano sang una nga siglo nagtinguha gid nga palig-unon ang ila kaangtanan kay Jehova nga Dios. Kinahanglan nga paandaman sang Cristianong manugtatap nga si Santiago ang pila sadto tuhoy sa ila undanon nga mga huyog kag kakulang sing espirituwal nga katinlo. Sa sini nga laygay, ginhatag niya ining mabaskog nga panugyan: “Magpalapit kamo sa Dios, kag magapalapit sia sa inyo.” (Santiago 4:​1-​12) Ano ang buot silingon ni Santiago sa ekspresyon nga “magpalapit”?

3, 4. (a) Ano ang mahimo ginpahanumdom sa pila sang mga bumalasa ni Santiago sang una nga siglo sang ekspresyon nga “magpalapit kamo sa Dios”? (b) Ngaa makasalig kita nga posible ang pagpalapit sa Dios?

3 Gingamit ni Santiago ang ekspresyon nga nahangpan sadto sang iya madamo nga mga bumalasa. Ang Mosaikong Kasuguan naghatag sa mga saserdote sing espesipiko nga mga instruksion kon paano ‘magpalapit’ kay Jehova para sa iya katawhan. (Exodo 19:22) Busa mahimo nga ginpahanumdom ang mga bumalasa ni Santiago nga indi dapat pasapayanan ang pagpalapit kay Jehova. Si Jehova amo ang labing dungganon sa uniberso.

4 Sa pihak nga bahin, suno sa isa ka iskolar sa Biblia, “ini nga laygay [sa Santiago 4:8] nagapakita sing daku nga pagkamalaumon.” Nahibaluan ni Santiago nga madugay na ginaagda ni Jehova sing mahigugmaon ang di-himpit nga mga tawo nga magpalapit sa Iya. (2 Cronica 15:2) Ginbuksan sang halad ni Jesus ang dalan sa pagpalapit kay Jehova sa daku pa nga kahulugan. (Efeso 3:​11, 12) Sa karon, ang dalan sa pagpalapit sa Dios ginbuksan sa minilyon! Apang, paano naton mahimuslan ining dalayawon nga kahigayunan? Binagbinagon naton sa malip-ot ang tatlo ka paagi nga makapalapit kita kay Jehova nga Dios.

Padayon nga ‘Magkuha sing Ihibalo’ Tuhoy sa Dios

5, 6. Paano ang halimbawa sang pamatan-on nga si Samuel nagailustrar kon ano ang nadalahig sa ‘pagkuha sing ihibalo’ tuhoy sa Dios?

5 Suno sa Juan 17:​3, si Jesus nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” Madamo nga badbad sini nga bersikulo ang tuhay diutay sa New World Translation. Sa baylo nga magsiling ‘magkuha sing ihibalo’ tuhoy sa Dios, ginbadbad lamang nila ang berbo nga ‘makilala ang Dios ukon ‘pagkilala’ sa Dios. Apang, nagsiling ang pila ka iskolar nga ang kahulugan sang tinaga nga gingamit sa orihinal nga Griego nagadalahig sing kapin pa​​—⁠isa ka dalayon nga proseso, nga mahimo pa gani magdul-ong sa suod nga pagkakilala sa isa.

6 Ang suod nga pagkakilala sa Dios indi isa ka bag-o nga ideya sang adlaw ni Jesus. Sa Hebreong Kasulatan, halimbawa, mabasa naton nga sang bata pa si Samuel, “wala pa niya makilala si Jehova.” (1 Samuel 3:⁠7) Nagkahulugan bala ini nga diutay lamang ang nahibaluan ni Samuel tuhoy sa iya Dios? Wala. Pat-od nga madamo gid ang gintudlo sa iya sang iya mga ginikanan kag sang mga saserdote. Apang, suno sa isa ka iskolar, ang Hebreong tinaga nga gingamit sa sadto nga bersikulo mahimo “magamit para sa suod gid nga kakilala.” Wala pa sadto makilala sing suod ni Samuel si Jehova, kay nakilala lamang niya sing suod si Jehova sang ulihi sang nag-alagad sia subong Iya humalambal.  Samtang nagadaku si Samuel, nakilala gid niya si Jehova, sa amo nangin suod ang iya kaangtanan sa iya.​​—⁠1 Samuel 3:​19, 20.

7, 8. (a) Ngaa indi kita dapat mangalag-ag nga tun-an ang madalom nga mga panudlo sang Biblia? (b) Ano ang pila sang mas madalom nga mga kamatuoran sang Pulong sang Dios nga dapat naton tun-an?

7 Nagakuha ka bala sing ihibalo tuhoy kay Jehova agod makilala mo sia sing suod? Agod mahimo mo ini, dapat ka magpakita sing “kahidlaw” sa espirituwal nga pagkaon nga ginaaman sang Dios. (1 Pedro 2:2) Indi mangin kontento sa sadsaran lamang nga mga panudlo sang Biblia. Tinguhai nga matun-an ang pila sang mas madalom nga mga panudlo sang Biblia. (Hebreo 5:​12-​14) Nagapangalag-ag ka bala nga tun-an ini nga mga panudlo, kay basi mabudlayan ka? Kon amo, dumduma nga si Jehova amo ang “Dakung Instruktor.” (Isaias 30:20) Nakahibalo sia kon paano ipaalinton ang madalom nga mga kamatuoran sa di-himpit nga mga hunahuna sang tawo. Kag pakamaayuhon niya ang imo sinsero nga mga panikasog nga mahangpan ang iya ginatudlo sa imo.​​—⁠Salmo 25:4.

8 Ngaa indi tilawan nga usisaon ang pila sang “madalom nga mga butang sang Dios”? (1 Corinto 2:10) Indi ini makatalaka nga mga topiko subong sang mahimo ginabaisan sang mga teologo kag mga klerigo. Mapuslanon ini nga mga doktrina nga makabulig sa imo agod matun-an ang makawiwili nga mga butang tuhoy sa hunahuna kag tagipusuon sang aton mahigugmaon nga Amay. Halimbawa, ang gawad, ang “sagrado nga likom,” kag ang nanuhaytuhay nga mga katipan nga gingamit ni Jehova sa pagpakamaayo sa iya katawhan kag sa pagtuman sang iya mga katuyuan​​—⁠ini nga mga tema kag ang madamo pa kaangay sini makalilipay kag mapuslanon nga usisaon kag tun-an sing personal.​​—⁠1 Corinto 2:7.

9, 10. (a) Ngaa makatalagam ang bugal, kag ano ang magabulig sa aton agod malikawan ini? (b) Kon tuhoy sa ihibalo ni Jehova, ngaa dapat kita magtinguha nga mangin mapainubuson?

9 Samtang nagadalom ang imo ihibalo sa espirituwal nga mga kamatuoran, mag-andam sa katalagman nga mahimo mag-utwas​​—⁠ang bugal. (1 Corinto 8:⁠1) Makatalagam ang bugal, bangod ginapapalayo sini ang mga tawo sa Dios. (Hulubaton 16:⁠5; Santiago 4:⁠6) Dumduma, wala sing rason ang tawo nga magpahambog sa iya nahibaluan. Sa pag-ilustrar, binagbinaga ining mga pulong sa introduksion sang isa ka libro nga nag-usisa  sang mga pag-uswag sang tawo sa siensia sining karon lang: “Samtang nagadugang ang aton nahibaluan, labi pa nga narealisar naton kon daw ano ka diutay ang aton nahibaluan. . . . Ang tanan nga natun-an naton daw sa wala lang kon ipaanggid sa dapat pa naton tun-an.” Matahom pamatian ini nga pagkamapainubuson. Karon, kon tuhoy sa pinakamadamo nga ihibalo​​—⁠ang ihibalo ni Jehova nga Dios⁠—labi pa nga may rason kita nga mangin mapainubuson pirme. Ngaa?

10 Talupangda ang ginasiling sang Biblia tuhoy kay Jehova. “Kadalom gid sang imo mga panghunahuna.” (Salmo 92:⁠5) ‘Ang paghangop ni Jehova indi masaysay.’ (Salmo 147:⁠5) ‘Indi matungkad ang paghangop ni Jehova.’ (Isaias 40:28) “O pagkadalom sang kamanggaran kag kaalam kag ihibalo sang Dios!” (Roma 11:33) Maathag nga indi gid naton mahibaluan ang tanan nga dapat mahibaluan tuhoy kay Jehova. (Manugwali 3:11) Madamo na nga makadalayaw nga mga butang ang natudlo niya sa aton, apang indi gid naton maubos ang tanan nga dapat tun-an. Indi bala ini dapat magpakunyag kag magpaubos sa aton? Gani, samtang padayon kita nga nagatuon, dapat naton gamiton pirme ang aton nahibaluan subong sadsaran sa pagpalapit kay Jehova kag sa pagbulig sa iban nga himuon man ini​​—⁠indi gid agod pakataason ang aton kaugalingon sa iban.​​—⁠Mateo 23:12; Lucas 9:⁠48.

Ipabutyag ang Imo Gugma kay Jehova

11, 12. (a) Ano dapat ang epekto sa aton sang ihibalo nga ginakuha naton tuhoy kay Jehova? (b) Paano mahibaluan kon ang gugma sang isa ka tawo sa Dios matuod?

11 Nagakaigo nga gin-angot ni apostol Pablo ang ihibalo kag ang gugma. Nagsulat sia: “Amo ini ang padayon ko nga ginapangamuyo, nga kabay nga ang inyo gugma magbugana sing labi kag labi pa gid nga may sibu nga ihibalo kag bug-os nga paghantop.” (Filipos 1:⁠9) Sa baylo nga magpahambog kita, ang tagsa ka hamili nga kamatuoran nga matun-an naton tuhoy kay Jehova kag sa iya mga katuyuan dapat magpadaku pa sang aton gugma sa aton langitnon nga Amay.

12 Sa pagkamatuod, madamo sang nagasiling nga ginahigugma nila ang Dios ang wala gid nagahigugma sa iya. Mahimo nga sinsero sila sa ila ginabatyag. Maayo ini, kag dalayawon pa gani, kon nagahisanto ini sa sibu nga ihibalo. Apang indi ini ang matuod nga gugma sa Dios. Ngaa indi? Talupangda kon paano ginalaragway sang Pulong sang Dios ini nga gugma: “Amo ini ang kahulugan sang gugma sa Dios, nga sundon naton ang iya mga sugo.” (1 Juan 5:⁠3) Kon amo, ang gugma kay Jehova matuod lamang kon ginapabutyag ini paagi sa matinumanon nga mga buhat.

13. Paano ang diosnon nga kahadlok magabulig sa aton sa pagpakita sang aton gugma kay Jehova?

13 Ang diosnon nga kahadlok magabulig sa aton sa pagtuman kay Jehova. Ining daku nga pagkapunaw kag tudok nga pagtahod kay Jehova resulta sang aton pagkuha sing ihibalo tuhoy sa iya, amo nga natun-an naton ang iya walay latid nga pagkabalaan, himaya, gahom, katarungan, kaalam, kag gugma. Ini nga kahadlok kinahanglanon gid sa aton pagpalapit sa iya. Sa katunayan, talupangda ang ginasiling sang Salmo 25:14: “Ang pagpakigsuod kay Jehova ila sang mga nahadlok sa iya.” Gani kon nahadlok kita nga maakig ang aton hinigugma nga langitnon nga Amay, mahimo kita mangin suod sa iya. Ang diosnon nga kahadlok magabulig sa aton nga pamatian ang maalamon nga laygay sa Hulubaton 3:⁠6: “Sa tanan mo nga dalanon talupangda sia, kag tadlungon niya ang imo mga banas.” Ano ang buot silingon sini?

14, 15. (a) Ano ang pila ka desisyon nga ginahimo naton sa adlaw-adlaw? (b) Paano kita makadesisyon sa isa ka paagi nga nagapakita sang aton diosnon nga kahadlok?

14 Dapat ka maghimo sing desisyon sa adlaw-adlaw, daku man ukon diutay. Halimbawa, ano ang ipakighambal mo sa imo mga kaupod sa trabaho, mga kaeskwela, mga kaingod? (Lucas 6:45) Ukuran mo bala ang imo ulubrahon, ukon magpabuyanbuyan ka lang? (Colosas 3:23) Makigsuod ka bala sa mga tawo nga wala nagahigugma kay Jehova, ukon tinguhaan mo bala nga pabakuron ang imo kaangtanan sa espirituwal nga mga tawo? (Hulubaton 13:20) Ano ang himuon mo, bisan sa diutay nga mga paagi, agod mapauswag ang mga intereses sang Ginharian sang Dios? (Mateo 6:33) Kon ang Makasulatanhon nga mga prinsipio subong sang nasambit na nagatuytoy sa imo adlaw-adlaw nga mga desisyon, ginatalupangod mo gid matuod si Jehova sa “tanan mo nga dalanon.”

15 Sa tagsa ka desisyon nga ginahimo naton, dapat kita tuytuyan sini nga panghunahuna: ‘Ano ang luyag ni Jehova nga himuon ko? Ano nga dalanon ang magapahamuot sa iya?’ (Hulubaton  27:11) Ang pagpakita sing diosnon nga kahadlok sa sining paagi isa ka maayo gid nga paagi sa pagpabutyag sing gugma kay Jehova. Ang diosnon nga kahadlok magapahulag man sa aton sa pagpabilin nga matinlo​​—⁠sa espirituwal, sa moral, kag sa pisikal. Dumduma, sa amo man nga bersikulo diin ginapalig-on ni Santiago ang mga Cristiano nga ‘magpalapit sa Dios,’ naglaygay man sia: “Tinlui ang inyo mga kamot, kamo nga mga makasasala, kag putlia ang inyo tagipusuon, kamo nga mga indi makapamat-od.”​​—⁠Santiago 4:8.

16. Paagi sa paghatag kay Jehova, ano ang indi gid naton mahimo, apang ano ang pirme naton mahimo?

16 Sa pagkamatuod, agod mapabutyag naton ang aton gugma kay Jehova, indi lamang kita maglikaw sa paghimo sing malain. Ginapahulag man kita sang gugma nga himuon ang maayo. Halimbawa, paano naton mabalusan ang daku gid nga kaalwan ni Jehova? Nagsulat si Santiago: “Ang tagsa ka maayong dulot kag tagsa ka himpit nga regalo nagagikan sa hitaas, kay nagapanaug ini gikan sa Amay sang langitnon nga mga kapawa.” (Santiago 1:17) Ang matuod, wala naton ginapamanggad si Jehova kon nagahatag kita sa iya sang aton mga pagkabutang. Iya ang tanan nga mga butang kag mga kamanggaran. (Salmo 50:12) Kag kon nagahatag kita kay Jehova sang aton tion kag kusog, wala naton ginahimo ang isa ka butang nga indi niya mahimo. Bisan pa kon mangindi kita nga ibantala ang maayong balita sang Ginharian sang Dios, sarang niya mapasinggit ang mga bato! Ngaa, nian, dapat naton ihatag kay Jehova ang aton materyal nga manggad, tion, kag kusog? Una sa tanan, bangod paagi sa paghimo sini ginapabutyag naton ang aton gugma sa iya upod sa aton bug-os nga tagipusuon, kalag, hunahuna, kag kusog.​​—⁠Marcos 12:​29, 30.

17. Ano ang makapahulag sa aton sa paghatag sing malipayon kay Jehova?

17 Kon nagahatag kita kay Jehova, dapat naton himuon ini sing malipayon, “kay ang Dios nagahigugma sa malipayon nga nagahatag.” (2 Corinto 9:⁠7) Ang prinsipio sang Deuteronomio 16:17 makabulig sa aton sa paghatag sing malipayon: “Ang dulot sa kamot sang tagsatagsa dapat katumbas sang pagpakamaayo nga ginhatag sa imo ni Jehova nga imo Dios.” Kon hunahunaon naton ang kaalwan ni Jehova sa aton, handumon gid naton nga maghatag sa iya sing maalwan. Ini nga paghatag nagapahalipay sa iya tagipusuon, subong nga ang diutay lamang nga regalo sang isa ka palangga nga bata nagapahalipay sa iya ginikanan. Ang pagpabutyag sang aton gugma sa sining paagi magabulig sa aton nga mangin suod kay Jehova.

Palambua ang Pagkasuod Paagi sa Pangamuyo

18. Ngaa mapuslanon gid nga binagbinagon kon paano naton mapauswag ang kalidad sang aton mga pangamuyo?

18 Ang aton personal nga pagpangamuyo nagahatag sa aton sing hamili gid nga kahigayunan​​—⁠mga tion para sa suod kag kompidensial nga pagpakighambal sa aton langitnon nga Amay. (Filipos 4:⁠6) Sanglit ang pangamuyo isa ka importante nga paagi sa pagpalapit sa Dios, mapuslanon gid nga magdulog kita kag binagbinagon ang kalidad sang aton mga pangamuyo. Indi buot silingon nga dapat mangin matahom gid kag nabalay sing maayo ang mga tinaga sang aton pangamuyo, kundi dapat ini mangin sinsero kag tinagipusuon. Paano naton mapauswag ang kalidad sang aton mga pangamuyo?

19, 20. Ngaa dapat kita magpamalandong anay antes mangamuyo, kag ano ang pila ka nagakaigo nga mga tema nga mapamalandungan?

19 Mahimo tilawan naton nga magpamalandong anay antes mangamuyo. Kon himuon naton ini, mangin espesipiko kag mapuslanon ang aton mga pangamuyo, sa amo malikawan naton ang batasan nga sulitsuliton ang naandan na kag madali madumduman nga mga tinaga. (Hulubaton 15:​28, 29) Mahimo makabulig kon hunahunaon naton ang pila sang mga tema nga ginsambit ni Jesus sa iya modelo nga pangamuyo kag binagbinagon kon paano ini naangot sa aton mga kahimtangan. (Mateo 6:⁠9-​13) Halimbawa, mahimo pamangkuton naton ang aton kaugalingon kon anong diutay nga bahin ang mahimo naton agod matuman ang kabubut-on ni Jehova diri sa duta. Luyag bala naton ipabutyag kay Jehova ang aton handum nga mag-alagad sa iya sa masarangan naton kag pangabayon ang iya bulig sa paghimo sang bisan anong tulumanon nga ginhatag niya sa aton? Problema gid bala naton ang materyal nga mga kinahanglanon? Para sa ano nga mga sala nagakinahanglan kita sing kapatawaran, kag kay sin-o kita dapat mangin kapin ka mapinatawaron? Ano nga mga pagsulay ang nagapabudlay sa aton, kag narealisar bala naton kon daw ano ka  hilingagawon nga kinahanglan naton ang pag-amlig ni Jehova sa sini?

20 Dugang pa, mahimo naton hunahunaon ang aton mga kilala nga nagakinahanglan gid sang bulig ni Jehova. (2 Corinto 1:11) Apang, indi gid naton dapat kalipatan ang pagpasalamat. Kon hunahunaon naton sing maayo, pat-od nga makadumdom kita sing mga rason nga pasalamatan si Jehova kag dayawon sia sa adlaw-adlaw bangod sang iya bugana nga kaayo. (Deuteronomio 8:​10; Lucas 10:21) May dugang pa nga benepisyo ang paghimo sini​​—⁠makabulig ini sa aton sa pagtigayon sing kapin ka positibo kag mainapresyahon nga pagtamod sa kabuhi.

21. Ang pagtuon sa anong Makasulatanhon nga mga halimbawa ang mahimo makabulig sa aton kon magpalapit kita kay Jehova sa pangamuyo?

21 Mapauswag man sang pagtuon ang aton mga pangamuyo. Narekord sa Pulong sang Dios ang talalupangdon nga mga pangamuyo sang matutom nga mga lalaki kag mga babayi. Halimbawa, kon ang isa ka mabudlay gid nga problema nagatublag sa aton kag nagapahadlok pa gani sa aton bangod sang aton pag-ulikid sa kaayuhan naton ukon sang aton mga hinigugma, mahimo naton basahon ang pangamuyo ni Jacob tuhoy sa iya ginapaabot sadto nga pagpakigkita sa iya matimaluson nga utod nga si Esau. (Genesis 32:​9-​12) Ukon mahimo naton tun-an ang pangamuyo ni Hari Asa sang yara sa peligro ang katawhan sang Dios bangod sang mga isa ka milyon nga mga Etiopianhon. (2 Cronica 14:​11, 12) Kon ginatublag kita sang isa ka problema nga mahimo magdala sing kahuy-anan sa maayo nga ngalan ni Jehova, nian takus binagbinagon ang pangamuyo ni Elias sa atubangan sang mga sumilimba ni Baal sa Bukid Carmel, subong man ang pangamuyo ni Nehemias tuhoy sa makaluluoy nga kahimtangan sang Jerusalem. (1 Hari 18:​36, 37; Nehemias 1:​4-​11) Mapalig-on ang aton pagtuo kag mahatagan kita sing mga ideya kon ano ang maayo gid nga paagi sa pagpalapit kay Jehova tuhoy sa mga problema nga nagapabug-at sa aton kon basahon naton kag pamalandungan ini nga mga pangamuyo.

22. Ano ang tuigan nga teksto para sa 2003, kag ano ang mahimo ipamangkot naton sa aton kaugalingon sa tion kag tion sa bug-os nga tuig?

22 Maathag nga wala sing mas daku nga kadungganan, wala sing mas mataas nga tulumuron sangsa sundon ang laygay ni Santiago nga ‘magpalapit kita sa Dios.’ (Santiago 4:⁠8) Kabay nga himuon naton ini paagi sa pagpauswag sang  aton ihibalo tuhoy sa Dios, paagi sa pagtinguha nga ipabutyag ang aton gugma sa iya sing kapin kag kapin pa, kag paagi sa pagpalambo sang aton pagkasuod sa iya sa aton mga pangamuyo. Sa bug-os nga tuig 2003, samtang ginadumdom naton ang Santiago 4:⁠8 subong ang aton tuigan nga teksto, padayon nga usisaon naton ang aton kaugalingon kon bala nagatinguha gid kita nga mangin malapit kay Jehova. Apang, ano naman ang masiling sa naulihi nga bahin sang Santiago 4:8? Sa anong kahulugan si Jehova ‘magapalapit sa inyo,’ nga nagaresulta sa anong mga pagpakamaayo? Binagbinagon sang masunod nga artikulo ini nga tema.

Madumduman Mo Bala?

• Ngaa ang pagtinguha nga mangin suod kay Jehova isa ka butang nga dapat himuon sing serioso?

• Ano ang pila ka tulumuron nga mahimo naton lab-uton kon tuhoy sa pagkuha sing ihibalo tuhoy kay Jehova?

• Paano naton mapakita nga may matuod kita nga gugma kay Jehova?

• Sa anong mga paagi mahimo mapalambo pa naton ang aton pagkasuod kay Jehova sa pangamuyo?

[Mga Pamangkot sa Pagtinuon]

[Blurb sa pahina 12]

Ang tuigan nga teksto para sa 2003 amo ang: “Magpalapit kamo sa Dios, kag magapalapit sia sa inyo.”—⁠Santiago 4:8.

[Retrato sa pahina 8, 9]

Samtang nagadaku sia, nakilala ni Samuel sing suod si Jehova

[Retrato sa pahina 12]

Ang pangamuyo ni Elias sa Bukid Carmel isa ka maayong halimbawa para sa aton