Paghatag Bisan Wala sing Ikasarang

“YARA sa inyo kon tawgon ninyo ako nga isa ka manugpakilimos; indi ako masaklaw. Nagapakilimos ako para kay Jesus.” Ginapakita sini nga pagtu-ad sang isa ka Protestante nga ministro ang kontrobersiya bahin sa pinansial nga pagsuportar sa mga relihion. Ang establisado nga relihion daw makatindog lamang kon nagabaton ini sing daku nga pinansial nga suportar. May mga suweldo nga dapat bayaran, mga templo nga dapat tukuron kag mentinahon, mga kampanya sa pag-ebanghelyo nga dapat suportahan. Diin kuhaon ang kinahanglanon nga kuwarta?

Ang sabat sang madamo nga simbahan amo ang pagbayad sang ikapulo.⁠ * “Ang pagbayad sang ikapulo amo ang paagi sang Dios sa pagsuportar sa Iya ginharian sa duta,” siling sang ebanghelisador nga si Norman Robertson. “Amo ini ang Iya sistema sang ekonomiya agod mabantala ang Ebanghelyo.” Prangka nga ginpahanumdom niya ang iya mga sumulunod sang ila salabton sa paghatag: ‘Wala kamo nagahatag sang ikapulo bangod masarangan ninyo ini. Isa ini ka buhat sang pagkamatinumanon. Ang indi paghatag sang ikapulo isa ka maathag nga paglapas sa mga sugo sang Dios. Daw subong bala nga ginakuha ninyo ang kuwarta nga indi inyo.’​​—⁠Tithing​​—⁠God’s Financial Plan.

Mahimo gid nga nagaugyon ka nga ang paghatag dapat mangin bahin sang Cristianong pagsimba. Apang, natak-an ka na bala ukon ayhan naugot pa gani sa walay untat nga pagpangayo sing kuwarta? Ang taga-Brazil nga teologo nga si Inácio Strieder nagasumbong sa mga simbahan nga ginagamit nila ang ikapulo agod “lubaron ang mga problema sang ila institusyon” kag ginatawag niya ini nga mga buhat nga “ilegal, maabusuhon, kag indi nagakaigo sa relihion.” Ang resulta, siling niya, amo nga ang “walay obra nga mga tawo, balo nga mga babayi, mga iskwater, kag ang mga kabos sing paghangop nagahinakop nga ginbayaan sila sang Dios kag obligado sila sa paghatag sing daku nga kantidad sa ‘manugsermon’ amo nga wala sing bastante nga makaon ang ila pamilya.”

Mahimo magpalibog ka: ‘Husto bala nga ginaaplikar sang mga simbahan nga nagapatuman sang ikapulo ang Kasulatan? Ukon ginagamit lamang bala sang pila ka relihion ang kahadlok sa Dios agod kuwartahan ang ila mga sakop? Nagapaabot gid bala ang Dios nga maghatag kita bisan wala kita sing ikasarang?’

[Nota]

^ par. 3 Ang ikapulo amo ang 10 porsiento sang kabilugan nga kinitaan sang isa ka tawo.