Mga Pamangkot Gikan sa mga Bumalasa

Isa bala ka porma sang interfaith (salakot nga pagtuluuhan) ang pagbakal sing isa ka bilding gikan sa iban nga relihion kag himuon ini nga Kingdom Hall?

Kinaandan na nga ginalikawan sang mga Saksi ni Jehova ang subong sini nga transaksion sa iban nga mga relihion. Apang, ini nga transaksion mahimo nga indi isa ka porma sang interfaith. Mahimo ini tamdon subong isa ka bes lang nga transaksion sa negosyo. Ang lokal nga kongregasyon sang mga Saksi ni Jehova wala nagapangabudlay upod sa iban nga mga relihion sa pagtukod sing duog sang pagsimba nga lunsay nila gamiton.

Ano ang nalakip sa interfaith nga buhat sa mga mata ni Jehova? Binagbinaga ang sugo ni apostol Pablo: “Dili kamo magpagota sing sampihakan upod sa mga di-tumuluo. Kay ano bala ang pag-updanay sang pagkamatarong kag pagkamalinapason? Ukon ano bala ang paghiambit sang kapawa sa kadudulman? Dugang pa, ano bala ang paghisantuanay sa ulot ni Cristo kag ni Belial? Ukon ano bala ang bahin sang isa ka matutom nga tawo sa isa nga di-tumuluo? Kag ano bala ang pagsinanto sang templo sang Dios sa mga idolo? . . . ‘Busa guwa kamo gikan sa tunga nila, kag magpain kamo gikan sa ila,’ siling ni Jehova, ‘kag mag-untat kamo sa pagtandog sing di-matinlo nga butang’; ‘kag batunon ko kamo.’ ” (2 Corinto 6:14-17) Ano ang buot silingon ni Pablo sa mga tinaga nga “pag-updanay” kag “paghiambit”?

Ang pag-updanay nga ginsambit ni Pablo maathag nga nagadalahig sang pagsimba kag espirituwal nga pagpakig-angot sa mga idolatroso kag mga di-tumuluo. Ginpaandaman niya ang mga taga-Corinto batok sa ‘pag-ambit . . . sa latok sang mga demonyo.’ (1 Corinto 10:​20, 21) Sa amo, ang interfaith nga buhat amo ang paghiambit sa pagsimba ukon pagpakig-upod sa espirituwal sa iban nga relihioso nga mga organisasyon. (Exodo 20:⁠5; 23:13; 34:12) Kon ginbakal ang isa ka bilding nga gingamit anay sang isa ka relihioso nga organisasyon, ginhimo ini agod lamang makatigayon sang bilding nga kinahanglanon para sa isa ka Kingdom Hall. Antes gamiton subong Kingdom Hall, ginpanguha ang bisan anong mga butang nga may kaangtanan sa butig nga pagsimba. Bangod natinluan na, ginadedikar ini kay Jehova para lamang sa katuyuan nga simbahon sia. Wala sing paghiambitay ukon pag-updanay sa ulot sang matuod kag butig nga pagsimba.

Samtang ginahambalan ang mga detalye tuhoy sa pagbakal, ang pagpakig-angot sa nagabaligya dapat nga limitado lamang sa transaksion sang pagbaklanay. Dapat dumdumon sang mga katapo sang kongregasyon ang paandam ni Pablo nga indi “magpagota sing sampihakan upod sa mga di-tumuluo.” Bisan pa wala kita nagabatyag nga superyor sa mga tawo sang iban nga relihion, nagalikaw kita nga makig-upod sa ila ukon mabuyok sa pagbuylog sa ila pagsimba.⁠ *

Ano ang pagtamod sang Kasulatan tuhoy sa kongregasyon nga nagaarkila sing bilding nga ginapanag-iyahan sang isa ka relihioso nga organisasyon? Ang pag-arkila masami nga nagakinahanglan sing regular nga pagpakig-angot sa mga katapo sinang relihioso nga organisasyon, nga dapat likawan. Bisan ang pag-arkila sini nga bilding para sa isa ka okasyon lamang, dapat binagbinagon sang mga gulang ang masunod: May yara bala mga idolo kag relihioso nga mga imahen sa sulod ukon sa guwa sang bilding? Paano tamdon sang mga tawo sa komunidad ang paggamit naton sa pasilidad? May masandad bala sa kongregasyon bangod sang paggamit naton sini nga bilding? (Mateo 18:⁠6; 1 Corinto 8:​7-​13) Dapat binagbinagon sang mga gulang ini nga mga butang kag magdesisyon sing nahisuno. Dapat man nila dumdumon ang ila konsiensia kag ang iya sang kongregasyon sa kabilugan sa pagpamat-od kon bala baklon kag himuon nga Kingdom Hall ang isa ka bilding.

[Nota]

^ par. 6 Tan-awa Ang Lalantawan, Abril 15, 1999, pahina 28 kag 29, para sa impormasyon tuhoy sa nagakaigo nga pagpakigtransaksion sa negosyo sa mga organisasyon nga wala ginakahamut-an ni Jehova.

[Retrato sa pahina 27]

Ini nga bilding, nga isa ka sinagoga anay, ginbakal kag ginkay-o agod mangin isa ka Kingdom Hall