Magdiretso sa kaundan

Magdiretso sa listahan sang kaundan

Isa ka Tion sang Pagkasadya sa Balkans

Isa ka Tion sang Pagkasadya sa Balkans

 Isa ka Tion sang Pagkasadya sa Balkans

Tuig 1922 sadto. Isa ka miting sang mga Earnest Bible Students, nga amo ang tawag sadto sa mga Saksi ni Jehova, ang ginhiwat sa Innsbruck, Austria. Nagtambong si Franz Brand, isa ka pamatan-on nga lalaki gikan sa Apatin sa Vojvodina, Serbia. Sang ginsambit sang humalambal nga ang ngalan sang Dios amo si Jehova, ang kadam-an nagsiniyagit, amo nga imposible na para sa iya nga magpadayon pa sa paghambal, kag ang miting natapos. Apang, may daku gid nga epekto kay Franz ang iya nabatian, kag ginbantala niya ang maayong balita sang Ginharian. Amo ini ang kubos nga ginsuguran sang makalilipay nga espirituwal nga pagtubo sa isa sang mga pungsod sa Balkans.

PARA sa kalabanan nga mga tawo sa karon, ang ngalan nga Yugoslavia nagapaalinton sing laragway sang inaway kag pagpamatay. Nagapahanumdom ini sang masubo nga mga larawan sang makasiligni nga pagmasaker, nasit-an nga mga nagdalangop, naguba nga mga balay, kag nalisang nga mga ilo. Indi malaragway sang mga tinaga ang kasakit kag pag-antos bangod sang inaway nga natabo sa Balkan Peninsula kutob sang 1991 tubtob 1995, nga nagdula sang tanan nga paglaum para sa isa ka mahamungayaon kag malipayon nga palaabuton paagi sa mga panikasog sang tawo. Subong resulta sang inaway, ang mga tawo sa anay Yugoslavia nagaantos sing puraot nga pangabuhi kag sobra nga kaimulon.⁠ *

Bangod sini nga pag-antos, haluson makakita sing malipayon nga tawo sa sini nga bahin sang kalibutan. Apang, bisan pa daw makatilingala, may yara malipayon nga mga tawo diri. Ang matuod, nakaeksperiensia sila sing isa ka adlaw sang pinasahi nga kasadya sang talipuspusan nga bahin sang ika-20 nga siglo. Paano nadalahig si Franz Brand, ang pamatan-on nga ginsambit sa umpisa, sa sini nga kasadya?

Espirituwal nga Pagtubo sa Balkans

Nalipay gid si Franz Brand sa bag-ong mga kamatuoran nga nabatian niya kag namat-od sia nga dapat niya ipalapnag ang maayong balita. Nagtrabaho sia subong barbero sa Maribor, isa ka siudad sa Slovenia malapit sa dulunan sang Austria, kag nagbantala sia sa iya mga kustomer, nga masunson nga nagalingkod kag nagapamati sing mahipos samtang ginabarbasan. Bangod sang iya mga panikasog, isa ka diutay nga grupo sang mga manugbantala sang Ginharian ang naorganisar sa  Maribor sang talipuspusan nga bahin sang katuigan 1920. Ang mga pamulongpulong sa Biblia ginahatag sa isa ka restawran, nga sang ulihi nagakaigo nga ginhingalanan nga Novi svet (New World) Seafood Restaurant.

Pagligad sang pila ka tion, ang maayong balita naglapnag sa bug-os nga pungsod. Ang paggamit sing “Photo-Drama of Creation” (walo-ka-oras nga presentasyon nga nagalakip sang mga pelikula, mga slide, kag mga plaka) nakabulig sa sining pagpalapnag. Nian sang katuigan 1930 sang ang mga Saksi ni Jehova ginhingabot sing mapintas sa Alemanya, napabakod sang Aleman nga mga payunir nga nalagyo gikan sa ila pungsod ang mga Saksi ni Jehova sa Kingdom of Yugoslavia. Walay sapayan nga ginsakripisyo nila ang ila personal nga kasulhayan, nanikasog sila nga mabantalaan ang pinakabaw-ing nga mga bahin sining mabukid nga pungsod. Sang primero, daw diutay lamang ang namati sa ila mensahe. Sang maaga nga bahin sang katuigan 1940, 150 ka manugbantala lamang ang nagreport sing pag-alagad sa latagon.

Sang 1941, natabo ang mapintas nga paghingabot, nga naglawig tubtob sang 1952. Daw ano gid nga kalipay sang ang mga Saksi ni Jehova legal nga narehistro sang Septiembre 9, 1953, sa idalom sang Komunista nga rehimen ni Heneral Tito! Sadto nga tuig, may yara 914 ka manugbantala sing maayong balita, kag ang kadamuon nag-uswag sing dalayon. Sang 1991, ang kadamuon sang mga manugbantala nag-uswag sa 7,420, kag 16,072 ang nagtambong sa Memoryal sadto nga tuig.

Sugod sang Agosto 16 tubtob 18, 1991, ang nahauna nga internasyonal nga kombension sang mga Saksi ni Jehova sa sining pungsod ginhiwat sa Zagreb, Croatia. Ang nagtambong halin sa sulod kag sa guwa sang pungsod 14,684. Ining di-malipatan nga kombension naghanda sa katawhan ni Jehova para sa mga pagtilaw nga magaabot. Lakip sa katapusan nga mga salakyan nga naglabay sa checkpoint sa ulot sang Croatia kag Serbia amo ang mga bus nga ginsakyan pauli sang taga-Serbia nga mga delegado. Sang makalabay ang katapusan nga bus, ang dulunan ginsirhan kag nagsugod ang inaway.

Ang Katawhan ni Jehova May mga Rason sa Pagkasadya

Ang mga tinuig sang inaway nangin tion sang daku nga pagtilaw para sa mga Saksi ni Jehova sa Balkans. Walay sapayan sini, may rason sila sa pagkasadya bangod ginpakamaayo ni Jehova ang iya katawhan didto paagi sa maayo gid nga pag-uswag. Sugod sang 1991, ang kadamuon sang mga manugbantala sang Ginharian sa anay Yugoslavia nag-uswag sing kapin sa 80 porsiento. May yara kataason nga 13,472 sang 2001 nga tuig sang pag-alagad.

Ang mga opisina sa Zagreb kag Belgrade (Serbia) amo anay ang nagaatipan sang hilikuton sang mga Saksi ni Jehova sa kabug-usan nga anay Yugoslavia. Bangod sang pag-uswag kag sang mga pagbalhin sa politika, kinahanglan nga magtukod sing bag-ong mga opisina sa Ljubljana (Slovenia), kag Skopje (Macedonia), wala labot sang pagtigayon sing bag-ong mga opisina sa Belgrade kag Zagreb. Halos 140 ka katapo ang nagaalagad sa sining mga opisina. Ang kalabanan sa ila mga pamatan-on kag puno sing kakugi kag gugma kay Jehova. Madamo sa ila ang nagabadbad sang mga bulig sa pagtuon sa Biblia sa Croasiano, Macedoniano, Serbiano, kag Sloveniano. Makalilipay gid nga ang kalabanan nga magasin kag literatura sang mga Saksi ni Jehova sa sining mga lenguahe ginabalhag sing dungan sa orihinal nga Ingles nga edisyon! Ining mga publikasyon nagabulig sa madamo nga tawo nga makakita sing kaumpawan kag paglaum.

 Ang isa pa ka rason sa pagkasadya amo ang di-mahamkunon nga suporta sang madamo nga bug-os tion nga mga alagad gikan sa iban nga mga pungsod. Madamong matahom nga mga Kingdom Hall ang ginpatindog sang ulihi nga mga tuig, nga nagdugang sa kalipay sang mga kongregasyon. Walay sapayan sini, may daku pa nga kalipay nga nagahulat. Ano ini?

Isa ka Pinasahi nga Proyekto

Ang madamo nga manugbantala masunson nga nagapamangkot, ‘San-o kami makatigayon sing New World Translation sa amon lenguahe?’ Kada tuig, nagalaum gid sila nga makabati sing pahibalo tuhoy sini sa distrito nga kombension. Apang, paano himuon ining daku gid nga proyekto kon ang grupo sang mga manugbadbad para sa sining mga lenguahe naorganisar lamang sang nagligad nga pila ka tuig kag diutay lamang sila?

Sa tapos ini matun-an, gin-aprobahan sang Nagadumala nga Hubon ang isa ka proyekto diin ang grupo sang mga manugbadbad sa Croasiano, Macedoniano, kag Serbiano magabuligay kag sa amo magabenepisyo gikan sa ginahimo kag nahimo sang isa kag isa. Ang Croasiano nga grupo amo ang manguna.

Isa ka Adlaw sang Pagkasadya

Indi gid malipatan sang mga Saksi ni Jehova sa Balkans ang Hulyo 23, 1999. Ang mga serye sang “Matagnaon nga Pulong Sang Dios” nga Distrito nga mga Kombension ginhiwat sing dungan sa Belgrade, Sarajevo (Bosnia-Herzegovina), Skopje, kag Zagreb. Indi mapat-od sadto kon bala madayon ang kombension sa Belgrade bangod sang panahon nga nagpamomba ang NATO, wala sing publiko nga pagtinipon ang gintugot. Nalipay gid ang mga kauturan sa higayon nga makapakig-upod sila sa isa kag isa pagkatapos sang mga binulan nga walay kapat-uran! Apang, labaw gid sa ginapaabot nila ang natabo.

Sang Biernes sang hapon, ginhatag ang isa ka pinasahi nga pahibalo sa apat ka siudad nga ginhiwatan sing kombension. Ang 13,497 ka delegado mahipos nga nagaangan-angan kon ano ang matabo. Sang ginpaguwa sang ulihi sang humalambal ang New World Translation of the Christian Greek Scriptures sa Croasiano kag Serbiano kag ginsugiran ang tumalambong nga ginabadbad pa ang Macedoniano nga badbad, ang mga delegado indi na makapugong sang ila balatyagon. Wala matapos sang humalambal ang iya pahibalo bangod sang mabaskog nga palakpak. Sa kombension sa Sarajevo, ang tumalambong hinali nga naglinong bangod sang daku gid nga kakibot. Ginsundan ini sang malawig nga palakpak. Ang mga luha sang kalipay nagaagay sa madamo nga pisngi sa Belgrade, kag bangod sang sulitsulit nga palakpak, ang humalambal madamong beses nga nagdulog antes niya matapos ang iya pahibalo. Malipayon gid ang tanan!

Ini nga dulot labi pa nga ginpakabahandi bangod nakuha sang mga Saksi ni Jehova ang kinamatarong sa pag-imprinta sang Croasiano kag sang Serbiano man nga badbad sang Biblia. Gani, ang New World Translation of the Christian Greek Scriptures sa sining duha ka lenguahe gintingob nga mangin isa ka tomo upod sang Hebreong Kasulatan nga badbad sa sini man nga lenguahe. Dugang pa, ang Serbiano nga Biblia gin-imprinta sa letra nga Roman kag Cyrillic.

Sa pagpasalamat sa tanan nga pagpakamaayo kag pagtuytoy nga nabaton, ang katawhan ni Jehova sa Balkans nagaugyon gid sa pinamulong ni David: “Bisan pa nagalakat ako sa nalupyakan sang daku nga kadulom, wala ako sing kahadlukan nga malain, kay ikaw [Jehova] kaupod nakon.” Walay sapayan sang tanan nga kabudlayan nga ginaatubang gihapon nila, determinado sila nga himuon ‘ang kalipay ni Jehova nga ila kuta.’​​—⁠Salmo 23:⁠4; Nehemias 8:10.

[Nota]

^ par. 3 Ang anay Yugoslavia ginatapuan sang anom ka republika​​—⁠Bosnia-Herzegovina, Croatia, Macedonia, Montenegro, Serbia, kag Slovenia.

[Retrato sa pahina 20]

Ang una nga grupo sang mga manugbantala sa Maribor, Slovenia, nga nagabantala sa malayo nga teritoryo